Taq kʼa yïn koʼöl na, kan nqä wä chi nwäch ri kʼechelaj. Chaq taqïl wä nqbʼä rkʼë n-familia pa kʼechelaj chqä chuchiʼ raqän taq yaʼ ri kistin rij ri qatinamit Jyväskylä, ri kʼo wä pa tinamït Finlandia. Chqä kan yeqä wä chi nwäch ri chköp. ¡Taq kʼa yïn koʼöl na, kan nwajoʼ wä ye nqʼetej jontir ri tzʼeʼ chqä ri syan ri yentzʼët! Taq xikʼïy qʼanäj, xintzʼët chë ri winäq ma itzel ta chkiwäch ri yeʼatzʼlaʼ ri chköp. Rma riʼ xinok kikʼë jun molaj winäq ri yetoʼon rchë ma yetzʼil-öx ta ri chköp. Chriʼ xintamaj kiwäch nkʼaj chik winäq ri junan wä nqaquʼ kikʼë.

Yeqaʼän wä campañas rchë yeqatoʼ ri chköp. Nqesaj wä rutzjol y nqchʼojin chkij ri tiendas chqä laboratorios ri nkikʼayij wä kitzʼmal ri chköp. Chrij riʼ xqaʼän jun organización ri yeruchajij ri chköp. Ye kʼa ri rubʼanik xqaʼän che rä xa xkʼäm pä chʼaʼoj chqij kikʼë ri qʼatbʼäl taq tzij. Kan kʼïy mul xichäp äl y xqʼat tzij pa nwiʼ.

Chqä kan nchʼpü wä nkʼuʼx chkij ri kʼayewal yebʼanatäj chkipan ri tinamït. Rma riʼ kan xinjuʼ wiʼ chkipan organizaciones achiʼel Amnistía Internacional chqä Greenpeace, y kan rkʼë ronojel wan xentoʼ. Chqä kan xentoʼ ri majun kirajil chqä ri nkitäj nmïk.

Ye kʼa, xqʼax ri tiempo y xintzʼët chë ma yikowin ta njäl kinaʼoj ri winäq. Tapeʼ kʼo mul kan yeqachʼäk wä koköj taq chʼaʼoj, ye kʼa ri nmaʼq taq chʼaʼoj xa más yenmär. Kan achiʼel ta ye ri itzelal nchʼakon chrij ri ütz, y ya reʼ kan majun ta ruqʼij chkiwäch ri winäq. Xinnaʼ chë achiʼel ta majun ta chik wuchqʼaʼ.

Ri majun ta wuchqʼaʼ nuʼän chë nchʼpü nkʼuʼx, rma riʼ xinchäp ruquʼik rij Dios chqä le Biblia. Tapeʼ bʼanon qa xintjoj pä wiʼ kikʼë ri testigos de Jehová y ntyoxij chkë rma ri kinaʼoj xkiʼän wkʼë, ye kʼa chpan ri qʼij riʼ kan ma nchʼobʼon ta wä njäl nkʼaslemal. Ye kʼa komä kan xjalatäj rubʼanik nkʼaslemal.

Xinkanuj n-Biblia y xinchäp ruskʼixik, riʼ kan kowan xirutoʼ. Kan kʼïy textos xinskʼij kiwäch ri akuchï nuʼij wä achkë rubʼanik kʼo chë yechajïx ri chköp. Jun tzʼetbʼäl chrij riʼ ya riʼ kʼo chpan Proverbios 12:10 ri akuchï nuʼij: «Ri chöj rukʼaslemal kan yeruchajij ruchkop» (La Palabra de Dios para Todos). Chqä xintzʼët chë ma yë ta Dios ajmak chë kʼo kowan kʼayewal chwäch le Ruwachʼlew. Pa rukʼexel riʼ, jontir ri kʼayewal ye kʼo rma kʼïy winäq ma nkismajij ta Rupixaʼ Jehová. Kan xsloj wan taq xintzʼët chë Jehová ma nikʼo ta rukʼuʼx qkʼë chqä kowan nqrajoʼ (Salmo 103:8-14).

Chpan ri tiempo riʼ, xintzʼët jun achbʼäl rchë ri libro ¿Qué enseña realmente la Biblia? y xinkʼutuj äl jun wchë pa-correo. Jbʼaʼ tiempo chrij riʼ, xeʼapon jun kʼlaj Testigos wkʼë y xkitzüj jun tjonïk chrij le Biblia chwä. Kan xinwajoʼ xinkʼül ri tjonïk riʼ. Chqä xibʼä chkipan ri moloj ri yebʼan chpan ri Salón del Reino. Riʼ xuʼän chë ri ruchʼaʼäl Dios eqal xkʼiyär pa wan.

Rkʼë rutoʼik le Biblia kan kʼïy xikowin xinjäl pa nkʼaslemal. Xinyaʼ qa rutjik yaʼ y ma xiskʼan ta chik. Kan xinjäl rubʼanik yitzjon chqä nwäq wiʼ, chqä xinjäl rubʼanik yentzʼët ri qʼatöy taq tzij (Romanos 13:1). Chqä xinjäl ri rubʼanik ntzʼët achkë riʼ ri ütz chqä ri ma ütz, rma rubʼanon qa, kan jontir jbʼaʼ ütz chi nwäch.

Ye kʼa ri más kʼayewal xuʼän chi nwäch ya riʼ xinjäl rubʼanik xentzʼët ri organizaciones de lucha social. Ma kan ta chanin xinjäl nnaʼoj chkij riʼ, pa naʼäy xinnaʼ chë achiʼel ta xa wij najin wä nyaʼ qa chkiwäch, ye kʼa xintzʼët chë xa xuʼ ri Ruqʼatbʼäl Tzij Dios nkowin nsolö jontir ri kʼayewal. Rma riʼ kan rkʼë ronojel wan yitoʼon rkʼë ri Qʼatbʼäl Tzij riʼ chqä ntzjoj chkë ri winäq chrij riʼ (Mateo 6:33).

Taq yïn kʼo wä chkipan ri organizaciones, kan yenjachon wä ri winäq: ri ütz kinaʼoj chqä ri ma ütz ta. Y kan ma nkʼewaj ta nqʼät tzij pa kiwiʼ ri itzel kinaʼoj. Ye kʼa komä, rkʼë rutoʼik le Biblia, kan xinyaʼ qa ri itzel naʼoj riʼ y xinchäp yenwajoʼ jontir winäq (Mateo 5:44). Kan jalajöj wä rubʼanik nkʼüt ri ajowabʼäl riʼ. Jun rubʼanik ya riʼ taq ntzjoj ri Ruqʼatbʼäl Tzij Dios. Kan janina kiʼ nkʼuʼx taq ntzʼët chë re jun samaj reʼ kan nuyaʼ kiʼkʼuxlal chqä uxlanen pa kan ri winäq, y nuʼän chë kʼo achoq chrij nkikʼuqbʼaʼ wä kikʼuʼx.

Ri nyaʼon qa jontir pa ruqʼaʼ Jehová kan ruyaʼon uxlanen pa wan. Rïn kan nkʼuqbʼan nkʼuʼx chë ryä, ri bʼanayon ronojel, ma xtyaʼ ta qʼij chë ri winäq chqä ri chköp xketzʼil-öx. Ryä chqä ma xtyaʼ ta qʼij chë kan jurayil xttzʼil-öx le Ruwachʼlew. Rkʼë Ruqʼatbʼäl Tzij, xa jbʼaʼ chik apü xtchojmij jontir ri kʼayewal chqä ri itzelal kibʼanon ri winäq (Isaías 11:1-9). Kan kiʼ nkʼuʼx rma ma xa xuʼ ta xintamaj re naʼoj reʼ, xa kan rma yikowin ye ntoʼ ri nkʼaj chik rchë nkikʼuqbʼaʼ kikʼuʼx chrij reʼ. Komä nnaʼ chë ma yïn ta chik rïn ri kʼo chë yijalö kinaʼoj ri winäq.