CHWÄCH RE REVISTA REʼ
¿Achkë rma ye kʼïy kʼayewal nuʼän chkiwäch nkajoʼ Dios?
«‹Tawajoʼ Jehová ri aDios rkʼë ronojel awan, rkʼë ronojel akʼaslemal chqä rkʼë ronojel achʼobʼonik›. Ya riʼ ri naʼäy pixaʼ chqä ri más ruqʼij» (Jesucristo, junaʼ 33). a
Ye kʼo winäq kʼayewal nuʼän chkiwäch nkajoʼ Dios, rma nkinaʼ chë Dios ma nchʼpü ta chqij o kan itzel runaʼoj. Tatzʼetaʼ na peʼ ri kibʼin jojun winäq:
«Tapeʼ nkʼutuj wä ntoʼik che rä Dios, nnaʼ wä chë ma yirukʼoxaj ta. Nquʼ wä rïn chë ryä ma nunaʼ ta ri nqanaʼ röj» (Marco, Italia).
«Rïn nwajoʼ wä nyaʼ ruqʼij Dios, ye kʼa nnaʼ rïn chë kʼa näj kʼo wä. Chi nwäch rïn, Dios kan itzel runaʼoj y xa xuʼ kʼayewal nuyaʼ pa qawiʼ. Ma nnmaj ta wä chë ryä kan nqrajoʼ» (Rosa, Guatemala).
«Taq kʼa yïn akʼal na, nquʼ wä chë Dios xa xuʼ qamak nutzʼët rchë nuyaʼ kʼayewal pa qawiʼ. Taq xqʼax ri tiempo, xinnaʼ chë ryä ma nqrajoʼ ta, achiʼel jun qʼatöy tzij ri nuqʼät tzij pa kiwiʼ ri winäq ye kʼa ma yerajoʼ ta (Raimunda, Canadá).
¿Y rït achkë naquʼ? ¿Nkowin komä jun winäq nrajoʼ Dios? Kan kʼïy junaʼ ri cristianos kiquʼun pä rij reʼ. Pa taq junaʼ 500 kʼa pa 1,500, kan jontir jbʼaʼ winäq ma yechʼö ta wä qʼanäj rkʼë Dios. ¿Achkë rma? Rma xa nkixiʼij wä kiʼ chwäch. Ri historiador Will Durant xuʼij reʼ: «Jun winäq ri xa ajmak xa nuxiʼij wä riʼ nchʼö qʼanäj rkʼë jun Dios ri kan itzel runaʼoj».
¿Achkë rma ri winäq ke riʼ nkiquʼ? ¿Achkë qäs nukʼüt le Biblia? We nqatamaj ri kantzij chrij Dios, ¿xtqrtoʼ komä riʼ rchë nqajoʼ?