LE BIBLIA XJÄL KIKʼASLEMAL
Ronojel mul nkʼwan wä n·arma wkʼë
XALÄX PA JUNAʼ: 1958
RUTINAMIT: ITALIA
RUBʼANON QA: RYÄ XOK ALEQʼON
RI NKʼASLEMAL RUBʼANON QA:
Rïn xinaläx chqä xikʼïy pä chpan jun tinamït ri akuchï ri winäq ma kan ta kʼo wä kirajil. Ri tinamït riʼ naqäj nkanaj wä qa che rä Roma. Rïn kan kʼayewal ri xinqʼaxaj chpan nkʼaslemal. Ma xintamaj ta ruwäch nteʼ y majun bʼëy ütz ta xinkʼwaj wiʼ rkʼë ntat. Xintamaj xikʼïy pä chpan jun tinamït ri akuchï ye kʼo alqʼomaʼ.
Rïn xinchäp nbʼän eläqʼ taq kʼo wä 10 njunaʼ, y taq kʼo wä 12 xinanmäj äl chwachoch. Ri ntat kan kʼïy mul xirubʼekʼamaʼ pä pa policía. Ronojel wä mul nbʼän chʼaʼoj kikʼë ri winäq chqä kowan wä qʼaqʼ njolon. Taq xuʼän 14 njunaʼ xinanmäj äl chwachoch y ma xitzolin ta chik. Majun ta wä wachoch; pa taq bʼey yikanaj wä qa chqä ntäj wä drogas. Taq ntok qa aqʼaʼ, rïn njäq wä jun chʼichʼ y chriʼ yiwär wä qa. Chkaʼn qʼij nkanuj wä akuchï kʼo yaʼ rchë nchʼajchʼobʼej jbʼaʼ wiʼ.
Rïn kan xintamaj xinbʼän eläqʼ. Nleqʼaj wä kibolsos ri winäq pa taq bʼey chqä yileqʼan wä chkipan jay chaqʼaʼ. Rma kan xtamatäj nwäch, kʼo jun molaj winäq xkiʼij chwä chë kinok kichiʼil rchë yeleqʼan. Ya riʼ xitoʼö rchë «xikowin» xileqʼan más, rma xinchäp xinbʼän eläqʼ pa taq bancos. Rma kan nqä wä chi nwäch nbʼän chʼaʼoj, ri wachiʼil kan xjeʼ nqʼij chkiwäch. Ronojel mul nkʼwan wä n·arma wkʼë, y kan nyaʼ wä qa chuxeʼ nchʼikwiʼt taq yiwär qa. Nqä wä chi nwäch nbʼän chʼaʼoj, yileqʼan, nbʼän tzʼil taq bʼanobʼäl chqä yenbʼij itzel taq tzij. Ri policías nkajoʼ wä yinkikʼwaj pa cárcel, y kan kʼïy mul xinkichäp äl. Kan kʼïy junaʼ xinbʼän eläqʼ chqä xijeʼ pa cárcel.
¿ACHKË RUBʼANIK LE BIBLIA XJÄL NKʼASLEMAL?
Jun chkë ri kʼïy taq mul ri xinel pä pa cárcel, xibʼä rkʼë jun nchʼutiteʼ. Rïn ma ntaman ta wä chë ryä chqä kaʼiʼ ral xeʼok testigos de Jehová. Ryeʼ xkiʼij chwä chë kibʼä kikʼë pa Salón, y rïn xibʼä rma xinwajoʼ xintamaj achkë nbʼan chriʼ. Taq xqapon pa Salón del Reino, xinbʼij chkë chë xkitzʼyeʼ qa kʼa chrij rchë ntzʼët achkë winäq yeʼok y achkë yeʼel, y kan nkʼwan wä n·arma wkʼë.
Rïn xinnaʼ chë ri xinqʼaxaj ri qʼij riʼ xjäl nkʼaslemal. Nnatäj na chwä chë xinquʼ: «¡Xa najin yinachkʼan!». Ri winäq kan kiʼ wä kikʼuʼx chqä kan ütz kinaʼoj nkiʼän kikʼë ri nkʼaj chik; ma nmestan ta ya riʼ. ¡Rïn xinnaʼ chë achiʼel ta jukʼan chik yïn kʼo wä!
Xinchäp ntjonik chrij le Biblia kikʼë ri Testigos. Taq najin wä ntjoj wiʼ xqʼalajin chi nwäch chë nkʼatzin njäl rubʼanik nkʼaslemal. Jun chkë ri xinbʼän ya riʼ xinsmajij ri nuʼij chpan Proverbios 13:20, ri nuʼij: «Ri yerachbʼilaj ajnaʼoj taq winäq xttok jun ajnaʼoj winäq, ye kʼa ri yerachbʼilaj winäq ri majun ta kinaʼoj majun ütz ta xtrïl pa rukʼaslemal». Xqʼax chi nwäch chë nkʼatzin wä yenyaʼ qa ri wachiʼil ye kʼo. Ma chaq bʼaʼ ta xuʼän chi nwäch, ye kʼa rkʼë rutoʼik Jehová xikowin xinbʼän riʼ.
Ya riʼ ri naʼäy mul xinnaʼ chë yikowin nqʼät wiʼ rkʼë ri yenbʼän
Chqä xinyaʼ qa rutjik sikʼ chqä drogas. Xinqpij nwiʼ, xinwesaj äl ruwiʼ nxkïn chqä ma xinbʼij ta chik itzel taq tzij. Ya riʼ ri naʼäy mul xinnaʼ chë yikowin nqʼät wiʼ rkʼë ri yenbʼän.
Ma nqä ta wä chi nwäch nskʼij ruwäch wuj, rma riʼ kan kʼayewal xuʼän chi nwäch xintjoj wiʼ chrij le Biblia. Ye kʼa eqal eqal xinwajoʼ Jehová. Taq ya riʼ xbʼanatäj, rïn xtiʼon nuconciencia. Chaq taqïl itzel wä nnaʼ qa chqä nquʼ wä chë Jehová majun bʼëy xkiruküy ta rma jontir ri xinbʼän rubʼanon qa. Taq nnaʼ wä ya riʼ, rïn nskʼij wä chpan le Biblia achkë rubʼanik Jehová xküy David tapeʼ xeruʼän nmaʼq taq mak, y ya riʼ nukʼuqbʼaʼ wä nkʼuʼx (2 Samuel 11:1–12:13).
Jun chik ri kan kʼayewal xuʼän chi nwäch ya riʼ xintzjoj le Biblia chiʼ taq jay (Mateo 28:19, 20). ¡Nxiʼij wä wiʼ nwïl jun winäq ri xinbʼän jun itzelal che rä rubʼanon qa! Tapeʼ ke riʼ, taq xqʼax ri tiempo ma xinxiʼij ta chik wiʼ chqä xqä chi nwäch xintzjoj chkë ri winäq chrij ri nimaläj Qatat kʼo chkaj, ri ma nukʼewaj ta nuküy qamak.
¿ACHKË UTZIL WLON?
Kʼo kʼïy utzil wlon rma xintamaj ruwäch Jehová. Kʼïy chkë wachiʼil ri ye kʼo wä rubʼanon qa ye kamnäq chik o ye kʼo pa cárcel. Ye kʼa rïn kan kiʼ nkʼuʼx chqä nyoʼen nwïl jun ütz kʼaslemal chqawäch apü. Xintamaj ma nnaʼ ta wiʼ, yinman tzij chqä nqʼät nyowal; ya riʼ bʼanayon chë kan ütz nkʼwaj wiʼ kikʼë ri nkʼaj chik. Kan kiʼ nkʼuʼx yïn kʼlan rkʼë ya Carmen, jun jaʼäl ixöq. Chöj kaʼiʼ yeqatoʼ ri qavecinos rchë nkitamaj más chrij le Biblia.
¡Ah!, xinmestaj, komä ma yileqʼan ta chik. Jantäq yisamäj na pa taq bancos, ye kʼa ma rchë ta yileqʼan, xa rchë yenjosqʼij.