Jun tataʼaj nuʼij reʼ che rä rukʼajol ri siete rujunaʼ: «Ojer qa, Dios xuʼän le Ruwachʼlew chqä jontir ri kʼo chwäch. Ryä chqä xuʼän ri Qʼij, ri Ikʼ chqä ri chʼumilaʼ». Ri akʼal nuquʼ rij riʼ, y chrij riʼ nukʼutuj reʼ che rä: «Pap... ¿y achkë xbʼanö rchë Dios?».

Ri tataʼaj nuʼij: «Majun achkë xbʼanö rchë. Dios ronojel mul kʼo pä». Ri akʼal kan kiʼ rukʼuʼx xuʼän rkʼë ri xuʼij rutataʼ che rä. Ye kʼa, taq nkʼïy qʼanäj, nrajoʼ nutamaj más chrij ya riʼ. Ryä kʼayewal nqʼax pa rujolon chë majun ta jun achkë xbʼanö Dios. Ri kʼajol nuquʼ reʼ: «¿Achkë kʼa rubʼanik riʼ? Si yajün jontir ri kʼo chkaj kʼo jun xbʼanö rchë. ¿Achkë kʼa xbʼanö rchë Dios?».

¿Achkë nuʼij le Biblia chrij riʼ? Kan junan nuʼij achiʼel xuʼij ri tataʼaj che rä rukʼajol. Moisés xuʼij reʼ che rä Jehová: «Taq majanä kejeʼ ri juyuʼ o taq majanä taʼän le Ruwachʼlew chqä ri ilew ri kan nuyaʼ ruwäch, rït yït Dios xtbʼä qʼij xtbʼä säq» (Salmo 90:​1, 2). Ri profeta Isaías kan ke riʼ chqä jbʼaʼ xuʼij: «¿Ma ataman ta rït reʼ? O, ¿ma akʼoxan ta? Jehová, ri xbʼanö ronojel ri kʼa näj kʼo wä che rä le Ruwachʼlew, jun Dios ri majun bʼëy xtkäm ta» (Isaías 40:​28). Y rucarta Judas nuʼij chë Dios kan ronojel mul kʼo pä (Judas 25).

Re versículos reʼ nkikʼüt chë Dios ya riʼ «ri Qʼatöy Tzij ri ronojel mul kʼo pä», kan achiʼel xuʼij ri apóstol Pablo che rä (1 Timoteo 1:17). Achiʼel nqatzʼët, Dios kan ronojel mul kʼo pä, xa bʼa jaruʼ junaʼ qʼaxnäq pä. Y kan ronojel mul xtjeʼ. Ya riʼ nbʼanö chë yë ryä ri Dios ri kʼo ronojel uchqʼaʼ pa ruqʼaʼ (Apocalipsis 1:⁠8).

¿Achkë rma kan kʼayewal nqʼax pa qajolon ya reʼ? Rma xa jbʼaʼ tiempo nqkʼaseʼ. Ya riʼ nuʼän chë ma junan ta nqatzʼët ri tiempo achiʼel nutzʼët Jehová. Tqaquʼ rij reʼ: chwäch ryä, mil junaʼ xa achiʼel jun qʼij, rma kan ronojel mul kʼo pä (2 Pedro 3:⁠8). Tqaquʼ rij re tzʼetbʼäl reʼ. Jun xiʼl nkʼaseʼ 50 qʼij. ¿Xtqʼax komä chwäch ryä ri yakʼaseʼ jun 70 u 80 junaʼ, achiʼel ri junaʼ nkʼaseʼ jun winäq? ¡Rkʼë jbʼaʼ manä! Röj yoj achiʼel ti xiʼl riʼ taq nqajnamaj qiʼ rkʼë Jehová, ri bʼanayon qchë. Ri rubʼanik nqchʼobʼon röj kan ma njunmatäj ta rkʼë ri rubʼanik nchʼobʼon Jehová (Isaías 40:22; 55:⁠8, 9). Rma riʼ, kʼo jojun ri ma nqʼax ta pa qajolon chrij Jehová.

Tapeʼ kʼayewal nqʼax chqawäch chë Dios majun ta jun xbʼanö rchë chqä majun bʼëy nkäm ta, kan kʼo rma nqanmaj riʼ. ¿Achkë rma? Rma xa ta kʼo jun xbʼanö rchë Dios, ya riʼ ta xbʼanö ronojel. Ye kʼa le Biblia nuʼij chë yë Jehová xbʼanö jontir (Apocalipsis 4:11). Chqä qataman chë xjeʼ jun tiempo ri majun ta ri kaj nixta le Ruwachʼlew (Génesis 1:​1, 2). ¿Achkë rubʼanik xbʼejeʼ qʼanäj jontir? Rchë xbʼanatäj riʼ, kʼo ta chë kʼo chik ri xbʼanö ronojel riʼ. Chqä kʼo ta chë kʼo chik taq majanä kʼo ta Jesús nixta ri ángeles (Job 38:​4, 7; Colosenses 1:15). Achiʼel nqatzʼët, pa naʼäy, Dios xa ruyonïl wä kʼo. Ryä majun ta jun achkë xbʼanö rchë, rma majun ta wä kʼo naʼäy chwäch ryä.

Ri qakʼaslemal chqä jontir ri kʼo nkikʼüt chë kʼo jun Dios ri ronojel mul kʼo pä. Xa xuʼ ryä xkowin xuʼän chë kan pa rubʼeyal nsamäj jontir chqä xa xuʼ ryä xkowin xyaʼ kikʼaslemal jontir ri ye kʼäs (Job 33:⁠4).