Rïn xinaläx Paddington, jun peraj che rä ri tinamït Londres (Inglaterra) ri akuchï kan kʼïy winäq ye kʼo. Rïn yïn kʼo wä rkʼë nteʼ chqä kikʼë oxiʼ nnmal. Rma ntataʼ kowan ntjö yaʼ, kʼo mul napon chojay y kʼo mul ma napon ta.

Taq kʼa yïn akʼal na, ri nteʼ ronojel aqʼaʼ nchʼö wä rkʼë Dios. Rïn kʼo wä jun ti koʼöl nBiblia ri xa xuʼ wä ri Salmos kʼo chpan. Rma riʼ, yentzʼük wä ri música chqä yenbʼixaj ri Salmos riʼ. Kʼo jmul, rïn xinskʼij chpan jun libro re tzij reʼ ri kan ma yikowin ta nwesaj pa njolon: «Tqajoʼ chë manä, jontir xa nqkäm». Re tzij reʼ kan xkesaj nwaran. Xinquʼ rij ri achkë xtbʼanatäj wkʼë. Rïn nbʼij wä qa chi nwäch: «¿Achkë rma xa jbʼaʼ ok junaʼ nqkʼaseʼ? ¿Achkë rma yïn kʼäs?». ¡Rïn ma nwajoʼ ta wä yikäm!

Rïn xinwajoʼ xintamaj chrij ri itzinïk. Rma riʼ xinkanuj rubʼanik rchë yitzjon kikʼë ri kamnaqiʼ chqä xibʼä kikʼë wachiʼil akuchï yemuq wä ri winäq. Rïn chqä yijeʼ wä kikʼë rchë nqatzʼët películas ri akuchï ruyon itzinïk nqʼalajin. Tapeʼ jontir riʼ kan kowan yojkixiʼij, kan jaʼäl chqä nqanaʼ yeqaʼän.

Tapeʼ kʼa riʼ wä 10 njunaʼ, ya xinchäp wä rubʼanik ri ma ütz ta. Rma xintäj sikʼ, kan xkʼluj chwä xinbʼän riʼ. Chrij riʼ xinskʼaj marihuana. Taq 11wä njunaʼ, xinchäp rutjik yaʼ. Tapeʼ ma nqä ta wä chi nwäch achkë ntej, kan nqä wä chi nwäch achkë nanaʼ taq yït qʼabʼarnäq. Kowan wä nqä chi nwäch ri música chqä yixajö. Rma riʼ, taq ütz wä nuʼän chi nwäch, yibʼä wä chkipan nmaqʼij chqä discotecas. Eqal wä yinel äl chwachoch chaqʼaʼ y yitzolin pä taq kʼa najin wä nsaqirsan qʼanäj. Kan ronojel bʼaʼ mul, kan kowan wä yïn kosnäq chkaʼn qʼij. Rma riʼ, ma yibʼä ta pa tijobʼäl, y taq yibʼä, ntäj wä yaʼ pan ewäl.

Taq yïn kʼo wä rukʼisbʼäl junaʼ pa tijobʼäl, kan ma ütz ta ncalificaciones xinwesaj. Rma riʼ, nteʼ xnaʼej chë kan majun ta ütz najin nbʼän. Rma kowan xpë ruyowal chwä, xqaʼän chʼaʼoj rkʼë chqä xinel äl chwachoch. Jun tiempo xibʼä rkʼë Tony, ri nnovio. Ryä nqä wä chwäch nleqʼan, nukʼayij wä drogas chqä kan tamatäl ruwäch rma kowan nchʼeyon. Jbʼaʼ chrij riʼ xikanaj pa yabʼil y xjeʼ naʼäy wal taq 16 wä njunaʼ.

Xintamaj kiwäch ri testigos de Jehová taq yïn kʼo wä chpan jun jay ri akuchï yekʼul wä ixoqiʼ ri kʼo kal ri majun ta kichjil. Ri qʼatbʼäl tzij xkiyaʼ jun wachoch chriʼ. Ye kaʼiʼ ixoqiʼ ri ye testigos de Jehová, yeʼapon wä chriʼ rchë yekibʼechʼaʼej nkʼaj chik qʼopojiʼ ri kʼo kal. Kʼo jun qʼij xijeʼ kikʼë xa xuʼ rchë nkʼüt chë ri Testigos xa ye sachnäq. Ye kʼa ryeʼ eqal xkiqʼalajsaj nkʼutunik rkʼë le Biblia chqä ma kan ta kʼayewal rubʼanik xkiʼän che rä. Kowan xqä chi nwäch chë kan jaʼäl kinaʼoj xkiʼän wkʼë. Rma riʼ, xinwajoʼ xintjoj wiʼ chrij le Biblia kikʼë.

Jbʼaʼ chrij riʼ kʼo jun xintamaj chpan le Biblia ri xjäl nkʼaslemal. Kan kʼa yïn akʼal na kowan wä nxiʼij wiʼ yikäm, ye kʼa xintamaj chë Jesús xuʼij chë kʼo jun qʼij ri kamnaqiʼ xkekatäj na pä (Juan 5:28, 29). Chqä xintamaj chë Dios kan kowan yirajoʼ (1 Pedro 5:7). Ri nuʼij chpan Jeremías 29:11 kan xapon pa wan. Chriʼ nuʼij: «Jehová chqä nuʼij: ‹Rïn kan ntaman achkë nwajoʼ pan iwiʼ rïx; nwajoʼ chë ma tpë ta chʼaʼoj pan iwiʼ nixta kʼayewal. Chqä nwajoʼ nyaʼ jun utziläj ikʼaslemal chqä chë kʼo ütz niyoʼej apü›». Xqʼax chi nwäch chë yikowin yikʼaseʼ chwäch jun kotzʼijaläj ilew chqä majun bʼëy yikäm ta (Salmo 37:29).

Ri testigos de Jehová kan jaʼäl kinaʼoj xkiʼän wkʼë. Ri naʼäy mul ri xinmöl wiʼ kikʼë kan jaʼäl xinnaʼ xijeʼ kikʼë rma xintzʼët chë kan jontir nkajoʼ kiʼ (Juan 13:34, 35). ¡Kan ma junan ta wä kinaʼoj kikʼë ri winäq ri xenwïl pan iglesia! Ri Testigos ma itzel ta xinkitzʼët rma ri rubʼanik nkʼaslemal nkʼwan. Ryeʼ kan xkijäm kiwäch rchë xejeʼ wkʼë, xkikʼüt chi nwäch chë yinkajoʼ chqä jalajöj rubʼanik xinkitoʼ. Rïn xinnaʼ chë kan yïn kʼo wä chpan jun jaʼäl familia.

Taq xintjoj wiʼ chrij le Biblia, xqʼax chi nwäch chë nkʼatzin wä njäl rubʼanik nkʼaslemal rchë yikowin yinok rachiʼil Dios. Rïn kan kʼayewal xuʼän chi nwäch xinyaʼ qa rutjik sikʼ. Chqä xintzʼët chë kʼo wä jojun bʼix ri xa nkiʼän wä chwä chë nrayij nskʼaj marihuana. Rma riʼ xinjäl ri bʼix ri yenkʼoxaj. Ma xibʼä ta chik chkipan ri nmaqʼij nixta chkipan ri discotecas, rma ntaman wä chë we xa xkibʼä chriʼ, xa xtinrayij wä xtintäj yaʼ. Chqä xenkanuj nkʼaj chik wachiʼil ri xkinkitoʼ rchë nkʼwaj jun kʼaslemal ri nqä chwäch Jehová (Proverbios 13:20).

Chpan ri tiempo riʼ, Tony chqä xtjoj riʼ chrij le Biblia kikʼë ri testigos de Jehová. Rma xkiqʼalajsaj rukʼutunik rkʼë le Biblia, ryä xtzʼët chë kantzij taq naʼoj najin nutamaj. Rma riʼ xjäl rubʼanik rukʼaslemal, xeruyaʼ qa ri itzel taq rachiʼil, xyaʼ qa rubʼanik eläqʼ chqä ma xskʼaj ta chik marihuana. Ye kʼa xqatzʼët chë we nqajoʼ nqayaʼ ruqʼij Jehová achiʼel wä nrajoʼ ryä, kʼo wä chë nqkʼleʼ chqä chöj kaʼiʼ nkʼatzin wä nqatoʼ qalkʼwal rchë ütz nkʼïy qʼanäj. Rma riʼ, pa junaʼ 1982 xqkʼleʼ.

Nnatäj chwä chë rïn nkanuj wä chkipan ri revistas La Atalaya chqä ¡Despertad! a chkij winäq ri xekowin xkiyaʼ qa jun kʼaslemal achiʼel wä nkʼaslemal rïn. Ri xkiqʼaxaj ri winäq riʼ kan kowan xinkitoʼ rchë xikowin xinkʼwaj jun kʼaslemal ri achiʼel nqä chwäch Jehová. Kan ronojel wä mul nbʼij che rä Jehová chë ma tikʼo ta rukʼuʼx wkʼë. Tony chqä rïn xq·ok testigos de Jehová pa julio rchë ri junaʼ 1982.

Ri xinok rachiʼil Jehová yirutoʼon rchë kʼa yïn kʼäs na komä. Tony chqä rïn qatzʼeton achkë rubʼanik Jehová yojurtoʼon taq qaqʼaxan nmaʼq taq kʼayewal. Röj kan qakʼuqbʼan qakʼuʼx chrij Jehová taq kʼo kʼayewal qaqʼaxan y ronojel mul qatzʼeton chë ryä kan yojurchajin pä (Salmo 55:22).

Kan jaʼäl qanaʼon rma yeqatoʼon qalkʼwal rchë yeʼok rachiʼil Jehová. Komä kan jaʼäl chqä nunaʼ wan taq ntzʼët chë ri nmam najin chqä nkitamaj ruwäch.

Ma ntel ta chik nwaran chaqʼaʼ xa rma nquʼ rij ri kamïk o ri achkë xtbʼanatäj wkʼë. Ronojel semanas, Tony chqä rïn nqbʼä chkipan jalajöj congregaciones kichë ri testigos de Jehová rchë nqabʼekʼuqbʼaʼ kikʼuʼx ri qachʼalal. Y nqbʼä kikʼë rchë nqabʼeʼij chkë ri winäq chë we nkikʼuqbʼaʼ kikʼuʼx chrij Jesús, ryeʼ chqä xkekowin majun bʼëy xkekäm ta.