Jehová kan nqä chwäch nutjoj rutinamit. Rma riʼ rutinamit yerubʼanon kïy tijobʼäl rchë chë ri qachʼalal más yekowin nkiʼän ri samaj yaʼon pa kiqʼaʼ. Jun chkë ri tijobʼäl riʼ ya riʼ ri Tijobʼäl rchë yetjöx ri nkitzjoj ri Ruqʼatbʼäl Tzij Dios. Chkipan ri junaʼ ri ye qʼaxnäq pä, ri rutinamit Jehová ma xa xuʼ ta rutzʼeton achkë rubʼanik más ütz yetjöx ri qachʼalal, xa kan rutzʼeton chqä achkë rubʼanik más ütz nuʼän chkë ri jay ri akuchï yetjöx wä. Ri najowäx ya riʼ chë ri tijonelaʼ ma kʼayewal ta nuʼän chkiwäch yekikʼüt naʼoj y ri tijoxelaʼ ma kʼayewal ta nuʼän chkiwäch nkitjoj kiʼ. ¿Achkë rubʼanik yeksan ri qakchaj rchë nbʼanatäj riʼ?

 Kan kʼïy junaʼ, ri tijobʼäl yebʼanon chkipan ri Salones del Reino o Salones de Asamblea. Ye kʼa chkipan ri junaʼ ri kʼa xeqʼax qa, yeyakon o yechojmin jay ri yeksäx rchë yebʼan ri tijobʼäl riʼ chkipan. ¿Achkë rma? Tqatzʼetaʼ oxiʼ rma.

 Yekʼatzin más qachʼalal. Ri qachʼalal Christopher Mavor, jun ri ntoʼö ri Comité rchë Servicio rchë ri Molaj Ukʼwäy Bʼey, xuʼij: «Ri sucursales kibʼin chë yekʼatzin más qachʼalal rchë yetoʼon rkʼë rutzjoxik le Biblia. Achiʼel chpan ri junaʼ 2019, ri sucursal kʼo Brasil xuʼij chë yekʼatzin jun 7,600 qachʼalal ri ye alenäq pä chpan ri Tijobʼäl rchë yetjöx ri nkitzjoj ri Ruqʼatbʼäl Tzij Dios rchë nkitzʼët ri achkë nkʼatzin chpan ru-territorio ri sucursal riʼ». Ri sucursal kʼo Estados Unidos nuʼij chë yekʼatzin ye kʼïy precursores che rä rchë yekitoʼ ri nkʼaj chik rchë nkitzjoj le Biblia akuchï yeqʼax wä ye kʼïy winäq, akuchï yeʼapon wä ri barcos chqä chkipan ri cárceles. Chqä yekʼatzin qachʼalal rchë yetoʼon rkʼë ri Departamento Local de Diseño y Construcción chqä chkipan ri Comités de Enlace con los Hospitales. Y ri qachʼalal ri ye bʼenäq chpan ri Tijobʼäl rchë yetjöx ri nkitzjoj ri Ruqʼatbʼäl Tzij Dios yekowin nkiʼän ri samaj riʼ.

 Ye kʼïy najin nkitäq ki-solicitud. Chkipan kïy sucursales kan kʼïy solicitudes yeʼapon, rma riʼ majun chik akuchï yejeʼ wä jontir ri nkajoʼ yejeʼ chpan ri tijobʼäl riʼ. Achiʼel chlaʼ Brasil, chpan ri sucursal xeʼapon jun 2,500 solicitudes xa xuʼ chpan jun junaʼ. Ye kʼa rma majun akuchï yeyaʼöx wä jontir, ri sucursal xa xuʼ xerukʼän ye 950 qachʼalal.

 Jay ri más ütz bʼanon chkë. Taq ri tijobʼäl nbʼan chpan jun Salón del Reino o chpan jun Salón de Asambleas, kan ronojel bʼaʼ mul ri tijoxelaʼ yekanaj qa chkachoch qachʼalal. Ya riʼ kan ütz akuchï ma kan ta kïy tijobʼäl yebʼan chpan jun junaʼ. Ye kʼa akuchï kan kʼïy yebʼan, ri qachʼalal ri ye kʼo naqaj rkʼë jbʼaʼ ma ronojel ta mul yekowin yekikʼül apü ri tijoxelaʼ chpan jun junaʼ. Rma riʼ xbʼix chë keksäx jay ri ye kʼo chunaqaj ri akuchï nbʼan wä ri tijobʼäl ri kan bʼanon rchë yejeʼ ri tijoxelaʼ chkipan.

 Ri nyak o nchojmïx jun jay rchë yetjöx qachʼalal chpan chqä rchë njeʼ jalajöj ri achkë nkʼatzin chkë ri tijoxelaʼ chqä ri tijonelaʼ chpan, rkʼë jbʼaʼ kan pa millón päq nukʼwaj. Yë ri akuchï nyak wä ri jay o akuchï kʼo wä chqä nkʼaj chik ri nkʼatzin nbʼan che rä, ya riʼ nbʼanö chë kʼïy o jbʼaʼ päq nuksäx chrij.

 Kan ronojel bʼaʼ mul, ri tijobʼäl yebʼan akuchï ma kan ta kʼo yeqʼajan. Tapeʼ ke riʼ, nkanüx jun ri akuchï yeʼapon wä chʼichʼ. Chqä kan ronojel bʼaʼ mul nkanüx jun akuchï ye kʼo kʼïy publicadores naqaj rchë yetoʼon chkipan ri jay chqä rkʼë kichojmirsaxik.

 Chkipan ri jay kʼo bibliotecas, jay akuchï ütz natjoj wä awiʼ chrij Ruchʼaʼäl Dios, computadoras, impresoras chqä nkʼaj chik. Kan ronojel bʼaʼ mul, chkipan ri jay kʼo jun jay ri akuchï ütz yewaʼ wä ri tijoxelaʼ chqä ri tijonelaʼ. Chqä kʼo akuchï nkiʼän wä ejercicio chqä akuchï ütz yetzʼan wä.

 Ye kʼa ri kʼo más kiqʼij chkipan ri jay riʼ ya riʼ ri akuchï yetjöx wä qachʼalal. Troy, jun qachʼalal ri nsamäj chpan ri Departamento Mundial de Diseño y Construcción chlaʼ Warwick (Nueva York), nuʼij: «Xqaʼij che rä ri Departamento de Escuelas Teocráticas chë kojkitoʼ rchë ri rubʼanik xkeqaʼän chkë ri jay xtuʼän chë ri qachʼalal ma kʼayewal ta xtuʼän chkiwäch xtkitjoj kiʼ. Ri qachʼalal xkiʼij chqë achkë rubʼanik ütz yebʼan chkë ri jay chqä jaruʼ saqïl nkʼatzin njeʼ chpan y achkë samajbʼäl rchë audio y video nkʼatzin njeʼ chpan». Zoltán, jun tijonel chpan ri Tijobʼäl rchë yetjöx ri nkitzjoj ri Ruqʼatbʼäl Tzij Dios chlaʼ Hungría, xuʼij reʼ chkij ri samajbʼäl rchë audio: «Pa naʼäy, rma majun ta wä qa-micrófonos, chaq taqïl wä nkʼatzin nqaʼij chkë ri qachʼalal chë kuw ketzjon. Ye kʼa, rma komä jontir escritorios kʼo chik ki-micrófono, ma nkʼatzin ta chik nqaʼän riʼ».

 ¿Achkë utzil rukʼamon pä pa kiwiʼ ri tijoxelaʼ chqä ri tijonelaʼ jontir ri bʼanon? Ya Angela, ri xbʼä pa Tijobʼäl rchë yetjöx ri nkitzjoj ri Ruqʼatbʼäl Tzij Dios chlaʼ Palm Coast (Florida, Estados Unidos), nuʼij: «Kan jaʼäl nanaʼ yajeʼ chpan ri tijobʼäl. Jontir kan jaʼäl bʼanon che rä, kan ke riʼ bʼanon che rä akuchï nqatjoj wä qiʼ chqä akuchï nquxlan wä. Ya riʼ xqrtoʼ rchë xqayaʼ qan chrij ri qatjonik». Csaba, jun qachʼalal ri tijonel chpan jun tijobʼäl chlaʼ Hungría, nqä chwäch nwaʼ kikʼë ri tijoxelaʼ rma nutoʼ rchë nutamaj más kiwäch. Ryä nuʼij: «Ri tijoxelaʼ nkitzjoj chqë achkë nkinaʼ chqä achkë kiqʼaxan pä chpan kikʼaslemal. Ya riʼ nqrtoʼ rchë nqatamaj más kiwäch, ye kʼa ya riʼ chqä nqrtoʼ rchë nqakʼüt naʼoj chkiwäch ri kan xkerutoʼ».

 Ri tijoxelaʼ chqä ri tijonelaʼ kan qajnäq chkiwäch jontir ri bʼanon kikʼë ri jay. Ryeʼ kan jun mamaʼ spanïk nkitzʼët che rä ri yaʼon pä rma ri Nimaläj Qatijonel, Jehová (Isaías 30:20, 21). Chlaʼ Filipinas, xchojmïx jun jay rchë yebʼan tijobʼäl chpan. Jun qachʼalal ixöq ri xbʼä chpan ri Tijobʼäl rchë yetjöx ri nkitzjoj ri Ruqʼatbʼäl Tzij Dios chpan ri jay riʼ, nuʼij: «Taq xqjeʼ chpan ri tijobʼäl riʼ, röj ma xqanaʼ ta chë xa xuʼ yoj tijoxelaʼ, xa kan xqanaʼ chë yoj ru-invitados Jehová. Ryä nrajoʼ chë kan jaʼäl nqanaʼ nqatjoj qiʼ chrij Ruchʼaʼäl».

 Rma ri kchaj ri niyaʼ pä rïx, ri rutinamit Jehová nkowin yeruyäk chqä yeruchojmij ri jay ri akuchï yebʼan wä ri tijobʼäl. Kïy chkë ri kchaj riʼ yetaq äl chpan donate.pr418.com. ¡Matyox chiwä rma kowan yixspan!