Rkʼë jbʼaʼ, röj nqanaʼ ri xuʼij ri qachʼalal Geoffrey Jackson chpan Ri sexto rutzjol ri nuyaʼ ri Molaj Ukʼwäy Bʼey rchë ri junaʼ 2020. Ryä xuʼij: «Ojer qa jbʼaʼ, rkʼë jbʼaʼ ma ta xqkowin xqakʼül jontir ri nuyaʼ pä rutinamit Jehová chqë pa formato electrónico. Ye kʼa, komä nqakʼutuj qa chqawäch: ‹¿Achkë ta komä xqaʼän [chpan re pandemia reʼ, xa ta] ma ta kʼo qasamajbʼal, achiʼel JW Library?›. Jehová kan ojer riʼ yojurtjon pä rchë nqqʼax chkiwäch kʼayewal achiʼel reʼ».

 ¿Achkë rubʼanik yojurtjon pä Jehová? ¿Achkë xkʼatzin rchë xbʼan ri aplicación JW Library? ¿Y achkë nkʼatzin rchë ronojel mul ütz nsamäj chqä rchë más ütz nbʼan pä che rä?

 Pa mayo rchë ri junaʼ 2013, ri Molaj Ukʼwäy Bʼey xuʼij che rä ri Departamento de Programación de MEPS, ri kʼo pa central mundial, chë tbʼanaʼ jun aplicación ri kʼo ri kʼakʼakʼ Traducción del Nuevo Mundo chpan. Paul Willies, ri nsamäj chpan re departamento reʼ, xuʼij: «Majun bʼëy qabʼanon ta wä jun aplicación rchë nqajtobʼaʼ chkipan ri tiendas de aplicaciones. Rma riʼ kʼo chë xyaʼöx qa kibʼanik nkʼaj chik samaj, kʼo chë xechaʼöx achkë xkebʼanö ri aplicación chqä kʼo chë junan xqsamäj kikʼë nkʼaj chik departamentos pa Betel. Kan xqatäj qaqʼij che rä Jehová chë tqrtoʼ pä, y kan xqatzʼët achkë rubʼanik ryä xuʼän riʼ, rma cinco ikʼ chrij riʼ xkʼut apü ri aplicación chpan ri moloj rchë ri junaʼ riʼ».

 Chrij riʼ kʼo chik jun xkʼatzin xqaʼän, ya riʼ nqaʼän chë JW Library yejeʼ más publicaciones chpan chqä chkipan jalajöj chʼaʼäl. Pan enero rchë ri junaʼ 2015, kan ronojel bʼaʼ chik chkë ri publicaciones pa inglés ye kʼo wä chik chpan ri aplicación. Y jun seis ikʼ chrij riʼ, ya nawïl wä chik publicaciones chpan ri aplicación chkipan kʼïy chʼaʼäl.

 Ri qachʼalal riʼ kibʼanon chë ri aplicación más na chik nkʼatzin chqë. Ryeʼ kiyaʼon videos chpan chqä kiyaʼon jun peraj ri akuchï kʼo jontir ri nkʼatzin chqë rchë nqatjoj äl qiʼ chkij ri qamoloj. Chqä ya ütz chik natzʼët ri referencias ri ye kʼo chpan ri Guía de estudio taq yït kʼo chpan le Biblia.

 Más 15 millones dispositivos nkijäq JW Library ronojel ikʼ. Chkë riʼ, 8 millones nkijäq ronojel qʼij. ¿Achkë nkʼatzin rchë chë ri aplicación kan ütz nsamäj chkipan jalajöj dispositivos? Paul Willies nuʼij reʼ: «Re samaj reʼ majun bʼëy nkʼis ta. Ronojel mul nqakanuj rubʼanik rchë chë ri aplicación más nqrtoʼ chqä rchë más ma kʼayewal ta naksaj. Rma ri dispositivos electrónicos chaq taqïl nkanüx rubʼanik rchë más ütz yesamäj, röj chqä kʼo chë nqakanuj rubʼanik rchë chë ri aplicación ütz nsamäj chkipan ri dispositivos riʼ. Y rma najin njtobʼäx más audios chqä nkʼaj chik publicaciones chpan JW Library, röj kʼo chë chaq taqïl nqatzʼët chë ri aplicación ma nqʼateʼ ta». Pa qaqʼij komä, chpan JW Library kʼo jun 200,000 publicaciones chqä más 600,000 audios chqä videos ri ye kʼo chkipan jalajöj chʼaʼäl.

 Rchë nqkowin nqaʼän chë ri aplicación ütz nsamäj, ma xa xuʼ ta nkʼatzin computadoras chqë, xa kan nkʼatzin chqä jojun programas rchë computadora chqë. Ye kʼa rchë ütz yeqaksaj ri programas riʼ, nkʼatzin yeqatöj. Xa xuʼ jun chkë ri programas riʼ, nkʼatzin nqatöj 1,500 dólares jun junaʼ rchë ütz nqaksaj. Chqä ri Departamento de Programación de MEPS nkisäch jun 10,000 dólares jun junaʼ rchë nkilöqʼ dispositivos ri jalajöj ki-marca. Ryeʼ nkiʼän riʼ rchë nkitzʼët we ri aplicación ütz nsamäj chkipan computadoras, tablets chqä teléfonos ri kʼa xeʼel.

 JW Library rubʼanon chë ma kan ta kʼïy chik päq nqasäch rchë yeqesaj publicaciones chwäch wuj chqä rchë yeqatäq äl chkipan ri congregaciones. Nqʼalajin riʼ rkʼë ri xbʼanatäj rkʼë ri wuj Tqanukʼuj ruwäch ri Ruchʼaʼäl Dios ronojel qʼij. Re wuj reʼ, rchë ri junaʼ 2013, xesäx jun 12 millones, ye kʼa rchë ri junaʼ 2020, xa xuʼ 5 millones xesäx tapeʼ ye kʼo chik jun 700,000 publicadores más chwäch le Ruwachʼulew. ¿Achkë rma? Rma komä, ye kʼïy qachʼalal chpan JW Library nkiskʼij wä ruwäch re wuj reʼ. a

 JW Library kan kʼïy rubʼanik xkaturto’. Ya Geneviève, ri kʼo Canadá, nunaʼ chë re aplicación reʼ xtoʼ rchë nunukʼuj más ruwäch le Biblia. Ryä nuʼij: «Rïn nnaʼ chë xa ta nkʼatzin nwesaj pä kʼïy wuj rchë nnukʼuj ruwäch le Biblia, rkʼë jbʼaʼ ma xtinbʼän ta ronojel nmaqʼaʼ. Ye kʼa rkʼë ri aplicación xa xuʼ nkʼatzin ntzäj n-tablet rchë nwïl jontir ri nkʼatzin chwä. Ri chaq taqïl nnukʼuj ruwäch le Biblia yirutoʼon rchë más kuw rubʼanon nkʼuqbʼäl kʼuʼx chqä rchë más junan rubʼanon nwäch rkʼë Jehová».

 Re aplicación reʼ kan kowan yojurtoʼon, más chpan ri COVID-19. Charlyn, ri aj Estados Unidos, nuʼij: «Rma ri COVID-19 kowan rukran riʼ chwäch le Ruwachʼulew más jun junaʼ ma ntzʼeton ta chwäch wuj ri publicaciones ri ye alenäq. Ye kʼa chpan JW Library kʼo jontir ri nkʼatzin chqë rchë nqakowirsaj ri qakʼuqbʼäl kʼuʼx. ¡Janina yityoxin che rä Jehová rma re utziläj spanïk reʼ!».

 Ye kʼïy junan nkinaʼ rkʼë ri xuʼij ya Faye, ri kʼo Filipinas. Ryä nuʼij: «Re aplicación reʼ kowan nqä chi nwäch, rma kʼo jontir chpan ri nkʼatzin chwä rchë junan nuʼän nwäch rkʼë Jehová. Rïn nksaj rchë nskʼij ruwäch le Biblia o jun qa-publicación ronojel nmaqʼaʼ, rchë nkʼoxaj jun tzijonem ri nkʼuqbʼaʼ nkʼuʼx loman najin nbʼän nsamaj pa wachoch, rchë ntjoj wiʼ chkij ri qamoloj chqä rchë nnukʼuj ruwäch le Biblia. Taq jamäl jbʼaʼ nwäch, yentzʼët videos, y taq kʼo nkʼatzin nyoʼej, nksaj rchë nskʼij ruwäch le Biblia o jun chkë ri qa-publicaciones. ¡Re aplicación reʼ kan kowan ruqʼij!».

 Chqä re aplicación reʼ kan janina nqrtoʼ taq nqatzjoj le Biblia. Tqatzʼetaʼ jun tzʼetbʼäl. Jun qachʼalal ixöq aj Camerún kan xqä chwäch jun texto ri xksaj rachiʼil taq najin nkitzjoj le Biblia. Jun kayoxiʼ semanas chrij riʼ ryä xrajoʼ xksaj ri texto riʼ, ye kʼa ma nnatäj ta che rä akuchï nrïl wä. Ryä nuʼij: «Xa matyox chë ma xmestäj ta jun tzij chwä ri kʼo chpan ri texto riʼ. Xa xuʼ xkʼatzin xinjäq ri aplicación, xinyaʼ akuchï kʼo wä le Biblia y xinkanuj ri tzij riʼ chpan ti koʼöl lupa. Kan chanin xinwïl ri texto ri najin nkanuj. Ri aplicación yirutoʼ rchë yenwïl ri textos ri yemestäj chwä».

 Rma ri ikchaj ri niʼän pä chkipan jalajöj rubʼanik ri kʼo chpan donate.pr418.com, röj nqkowin nqaʼän chë ri aplicación JW Library más ütz nsamäj. Ke riʼ jontir qachʼalal ri ye kʼo chwäch jontir le Ruwachʼulew ütz nkiksaj re aplicación reʼ. Matyox chiwä rma ronojel ri ikchaj ri kan rkʼë ronojel iwan niyaʼ pä.

1. Octubre, 2013: Xesäx ri aplicación ri kʼo pä ri kʼakʼakʼ Traducción del Nuevo Mundo, pa inglés, chpan.

2. Enero, 2015: Xeyaʼöx más publicaciones chpan; naʼäy pa inglés, chrij riʼ, chkipan nkʼaj chik chʼaʼäl.

3. Noviembre, 2015: Xbʼan chë ütz nayaʼ ketal tzij kikʼë jalajöj colores.

4. Mayo, 2016: Xyaʼöx pä ri ícono «Reuniones».

5. Mayo, 2017: Xbʼan chë kʼo ütz natzʼibʼaj chpan ri aplicación.

6. Diciembre, 2017: Xyaʼöx ri Biblia de estudio, pa inglés, chpan.

7. Marzo, 2019: Xbʼan chë ütz naqasaj audios, natzʼët videos tapeʼ ma yeʼaqasan ta chqä yeʼatzʼët ri referencias ri kʼo chpan ri Guía de estudio.

8. Enero, 2021: Xbʼan chë kʼo chik jojun ütz naʼän chpan ri wuj Nawajoʼ rït yakʼaseʼ.