Pa 1 de enero rchë ri junaʼ 2021, ri Molaj Ukʼwäy Bʼey xuʼij chë xttel jun kʼakʼakʼ libro rchë nqayaʼ tjonïk ri rubʼiniʼan Nawajoʼ rït yakʼaseʼ. a ¿Achkë xanaʼ rït taq xakʼoxaj re rutzjol reʼ? Matthew, ri kʼo Canadá, nuʼij: «¡Ma nnmaj ta wä! Y, taq xenkʼoxaj ri tzijonem chqä xentzʼët ri videos ri nkikʼüt achkë rma xbʼan re libro reʼ chqä achkë rubʼanik xkiksaj yän jojun qachʼalal, kan más na chik xel nkʼuʼx. ¡Kʼo ta xinwajoʼ chë kʼo ta chik wkʼë rchë nchäp ruksaxik!».

 Rkʼë re libro reʼ jun wä chik rubʼanik yetjöx ri winäq chrij le Biblia, ye kʼa ma xa xuʼ ta ya riʼ nbʼanö chë ma junan ta kikʼë ri nkʼaj chik wuj ri xeqaksaj rchë xeqatjoj ri winäq. We kʼo chik re libro reʼ awkʼë, rkʼë jbʼaʼ xatzʼët yän chë ma junan ta kikʼë ri nkʼaj chik qawuj. ¿Nawajoʼ natamaj achkë rma? Tqatzʼetaʼ achkë rubʼanik nbʼan ri libro Nawajoʼ rït yakʼaseʼ.

 Ri rupnul ri wuj. Rchë xbʼan ri libro Nawajoʼ rït yakʼaseʼ, xkʼatzin jun wuj más pin. ¿Achkë rma? Re libro reʼ kʼo más 600 achbʼäl chpan, jun 10 mul más chwäch ri libro Nos enseña. Chqä, ye kʼo jojun peraj che rä ri ruxaq ri majun ta más letras chqä achbʼäl chwäch. Ya reʼ kʼo jun kʼayewal nukʼäm pä. Taq más xax ri wuj, ri achbʼäl ri ye kʼo chpan ri jun chik ruxaq, kan yeqʼalajin chpan ri jun chik tapeʼ xa jbʼaʼ ok. Rchë ma xbʼanatäj ta riʼ, ri qachʼalal ri ye kʼo chpan ri Departamento Internacional de Impresión chlaʼ Wallkill (Nueva York) xkiksaj kajiʼ jalajöj wuj, ri ye qaksan wä chik chkipan ri qa-imprentas rchë xkitzʼët achkë ri más ütz. Ri Comité rchë Redacción rchë ri Molaj Ukʼwäy Bʼey xtzʼët ri kajiʼ wuj riʼ y xchaʼ ri wuj más pin. Kantzij na wä chë re wuj reʼ jun 16% más rajäl chwäch ri wuj ri qaksan kikʼë ri nkʼaj chik qa-publicaciones. Tapeʼ ke riʼ, ri winäq ri xketjöx chrij le Biblia rkʼë ri libro Nawajoʼ rït yakʼaseʼ ma xtsüqʼ ta chkiwäch ri achbʼäl ri yeqʼalajin chpan ri jun chik ruxaq.

 Rij ri libro. Ri libro Nawajoʼ rït yakʼaseʼ ma junan ta rij kikʼë ri nkʼaj chik qa-libros, rma ya reʼ jun wä chik protector ri xyaʼöx chrij. Ri nkʼaj chik qa-libros kan ntzʼitzʼan kij, ye kʼa ya reʼ, rma ri protector ri xyaʼöx chrij, ma kan ta ke riʼ; rchë ke riʼ más nqʼalajin ri achbʼäl ri kʼo chwäch. Chqä, ntoʼon rchë ma chanin ta nchaʼ chiʼ ri libro. Ye kʼa, ri protectores achiʼel reʼ, jotäl jun 5 mul más kajäl chkiwäch ri kan yetzʼitzʼan. Rma riʼ ye kʼïy sucursales xkitolaʼ kiʼ rchë xkikanuj jun protector ri ma kan ta ntzʼitzʼan chqä ma kan ta más nüm rajäl.

 ¿Achkë rma xeksäx re samajbʼäl reʼ si kan kowan nüm kajäl? Jun qachʼalal ri kʼo chpan ri Departamento Internacional de Impresión nuʼij reʼ: «Rma re libro reʼ kan kowan xtksäx, ri nqajoʼ ya riʼ chë ma chanin ta nchaʼ chiʼ». Eduardo, ri nsamäj chpan ri Oficina rchë ri Imprenta ri kʼo pa sucursal rchë Brasil, nuʼij: «Kan kiʼ qakʼuʼx rma rutinamit Jehová najin yeruksaj utziläj taq samajbʼäl rchë nuʼän re jun jaʼäl libro reʼ ri ma chanin ta nchaʼ chiʼ chqä kan jaʼäl nanaʼ naksaj. Chqä, rma kan pa rubʼeyal najin nuksaj ri qakchaj».

 Xqachäp xqaʼän imprimir ri libro Nawajoʼ rït yakʼaseʼ pa marzo rchë ri junaʼ 2021, taq najin chik ri COVID-19. Rma riʼ kʼo kʼayewal xuʼän chqawäch. Pa Betel majun ta chik jun qachʼaʼäl ütz ta xtok, rma riʼ ma xeʼok ta chik ri qachʼalal ri najin wä yetoʼon chkipan ri imprentas chqä ma ütz ta wä yebʼan invitar jojun qachʼalal rchë yeʼok betelitas. Chkipan jojun imprentas ma ye kʼïy ta wä qachʼalal ye kʼo, y nkʼaj chik kʼo chë xetzʼapeʼ jun tiempo rma ri pixaʼ xyaʼ ri qʼatbʼäl tzij chpan ri tinamït riʼ.

 ¿Achkë rubʼanik xqqʼax chkiwäch ri kʼayewal riʼ? Kan xa xuʼ xqkowin xqachäp chik jmul ri impresión, xbʼix chkë jojun betelitas ri ye kʼo chkipan nkʼaj chik departamentos chë ketoʼon jun tiempo chkipan ri imprentas. Joel, ri kʼo chpan ri Departamento Internacional de Impresión, nuʼij: «Rma kinaʼoj xkikʼüt ri qachʼalal riʼ chqä rma ma xkikʼewaj ta xkitamaj jun chik samaj, ya riʼ xtoʼon rchë xqkowin xqaʼän jontir ri samaj ri kʼo wä chqawäch».

 Tapeʼ xqïl jontir ri kʼayewal riʼ, komä, kan pa millón chkë ri libros Nawajoʼ rït yakʼaseʼ qabʼanon chik imprimir. Rchë riʼ qaksan kʼïy samajbʼäl, achiʼel ri planchas de impresión, wuj, tinta, pegamento y nkʼaj chik samajbʼäl. Chkipan ri naʼäy woʼoʼ ikʼ taq xqachäp pä rulesaxik re libro reʼ, xqasäch más kaʼiʼ millones de dolares rkʼë nkʼaj xa xuʼ chkiwäch ri samajbʼäl ri xqatzjoj qa chqä chkiwäch nkʼaj chik samajbʼäl achiʼel riʼ. Rchë ma nqasäch ta más päq, xa xuʼ najin nqaʼän imprimir ri libros ri nkikʼutuj pä ri congregaciones.

 ¿Achkë nkinaʼ ri qachʼalal chqä ri winäq ri najin yekitjoj taq nkiksaj re kʼakʼakʼ libro reʼ? Jun qachʼalal aj Australia ri rubʼiniʼan Paul, nuʼij: «Kan nqä chi nwäch nksaj re libro reʼ rchë yentjoj ri winäq chrij le Biblia. Ma xa xuʼ ta rït yatzjon y ri winäq kan jaʼäl nkitzʼët che rä. Chqä, jontir ri naʼoj ri ye kʼo chpan kan kikʼwan kiʼ, achiʼel ri kʼutunïk, ri videos, ri achbʼäl, ri recuadros chqä ri peraj ri akuchï nuʼij achkë ütz nuyaʼ chwäch nuʼän ri winäq ri najin natjoj. Kan jaʼäl re libro reʼ; nwajoʼ nksaj rchë yinok jun utziläj tijonel».

 Jun winäq aj Estados Unidos ri najin nutjoj riʼ chrij le Biblia, nuʼij: «Kan nqä chi nwäch re libro reʼ. Ri achbʼäl yinkitoʼ rchë nqʼax chi nwäch ri naʼoj ri kʼo más kejqalen. Ri videos kan yeʼapon pa wan chqä yinkitoʼ rchë nsmajij ri najin ntamaj». Re winäq reʼ bʼenäq chkipan jontir qamoloj chqä kaʼiʼ mul pa jun semana najin nukʼül rutjonik.

 Kʼa nkʼatzin na yeqaʼän imprimir más libros chkipan kʼïy chʼaʼäl. Rma riʼ, ri Molaj Ukʼwäy Bʼey rubʼin chik chë re libro reʼ xttel chkipan 710 chʼaʼäl, 340 chʼaʼäl más chwäch ri libro Nos enseña.

 ¿Akuchï nkʼan wä pä jontir ri päq ri nksäx rchë nbʼan re samaj reʼ? Re samaj reʼ najin nbʼan rkʼë ri kikchaj ri winäq ri ye kʼo chwäch jontir le Ruwachʼulew. Kʼïy chkë ri kchaj riʼ yeyaʼöx äl pa Internet chpan donate.pr418.com. Röj kan janina nqatyoxij jontir ri kchaj riʼ. Rma rkʼë ya riʼ nqkowin nqesaj más wuj rchë yeqatjoj ri winäq ri nkajoʼ nkitamaj ruwäch Jehová chqä nkïl ri kʼaslemal ri majun bʼëy xtkʼis ta (Salmo 22:26).