Ri wuj The Watch Tower (La Torre del Vigía) rchë 1 de junio, 1912, xuʼij reʼ: «Rkʼë jbʼaʼ, kʼïy chkë ri yeskʼin ruwäch re wuj reʼ kitaman kiwäch winäq ye moyiʼ. Ryeʼ chqä ütz nkiskʼij ruwäch publicaciones ri ma ye tojon ta. Re publicaciones reʼ yebʼan kikʼë puntitos ri yeʼel pä chwäch wuj rchë ryeʼ yekowin nkiskʼij ruwäch. Ye kʼïy moyiʼ janina yetyoxin rma nkitamaj chë jun qʼij Dios kʼïy utzil xtyaʼ pä pa ruwiʼ le Ruwachʼulew».

 Taq ri wuj The Watch Tower xuʼij reʼ, röj, ri testigos de Jehová, ya najin wä chik yeqesaj publicaciones ri ütz nskʼïx kiwäch kimä ri moyiʼ tapeʼ kʼo wä jalajöj rubʼanik ntzʼibʼäx braille pa inglés. Komä, pa más 50 chʼaʼäl najin yeʼelesäx wä re publicaciones reʼ. ¿Achkë rubʼanik yebʼan pä re wuj reʼ?

 Naʼäy, nkʼatzin yeqʼaxäx ri letras chkipan letras ri yeʼuksäx chpan braille. Michael Millen, ri nsamäj pa Servicios de Procesamiento de Texto chlaʼ Patterson (Nueva York), nuʼij: «Rubʼanon qa, yeqalöqʼ wä programas rchë computadora rchë yeqatzʼibʼaj letras pa braille, ye kʼa xa xuʼ wä jojun chʼaʼäl nqkowin nqaʼän riʼ kikʼë. Komä, nqaksaj ri programa ri rubʼiniʼan Watchtower Translation System, ri kan jontir bʼaʼ chʼaʼäl nuyaʼ qʼij chqë rchë nqaqʼaxaj pa braille. Rïn nbʼij chë majun ta chik jun programa ri junan rkʼë reʼ».

 Chkipan ri publicaciones pa braille yaʼon pä chqä kiqʼalajsaxik ri achbʼäl. Jun tzʼetbʼäl. Ri achbʼäl ri kʼo pä chwäch ri wuj Nawajoʼ rït yakʼaseʼ ke reʼ rubʼanik nqʼalajsäx pa braille: «Jun achï najin nbʼiyïn äl chpan jun bʼey ri nqʼax äl chkojöl kotzʼiʼj chqä juyuʼ». Jamshed, jun moy ri toʼonel pa congregación chqä precursor, nuʼij: «Ri kiqʼalajsaxik ri achbʼäl kan kowan kiqʼij chi nwäch rïn».

 Taq xqʼaxäx yän ru-letra jun publicación chkipan letras pa braille, ri publicación riʼ ntaq äl chkipan ri sucursales rchë nkiyaʼ pä chwäch wuj. Ri wuj yeʼuksäx kan kuw rchë ma yeretzetäj ta taq yeyaʼöx ri puntitos chkiwäch chqä rchë ma yechaʼ ta chiʼ tapeʼ kowan xkeʼuksäx. Chrij riʼ, yetun ri wuj chqä nyaʼöx kij. Taq xkʼis kibʼanik, yetaq äl kikʼë ri nkʼaj chik publicaciones chkipan ri congregaciones, o kan chkë ri moyiʼ yetaq wä äl we chpan kitinamit ma nkʼatzin ta ntoj rchë ntaq äl chkë. Ye kʼa, we ri qachʼalal moyiʼ o ri ma kan ta yetzuʼun chik kan nkʼatzin yän ri publicaciones chkë, achiʼel ri yeqaksaj pa qamoloj, ri sucursales nkikanuj rubʼanik rchë nkitäq yän äl chkë.

 Jontir reʼ kan rukʼwan kʼïy tiempo chqä päq. Tqatzʼetaʼ achkë rma nqaʼij riʼ. Chlaʼ Wallkill (Nueva York), xa junan tiempo nukʼwaj nbʼan kaʼiʼ Biblias pa braille kikʼë 50,000 Biblias ri ma ye kʼo tä pa braille. Chqä tqaquʼ rij reʼ: xa xuʼ jun Biblia pa braille pa chʼaʼäl inglés, kʼo 25 tanaj wuj chpan. Y jontir ri nkʼatzin rchë nbʼan jun Biblia achiʼel riʼ, jotäl más 123 mul rajäl chwäch jun Biblia ri ma kʼo tä pa braille. Xa xuʼ kij ri 25 tanaj wuj ri ye kʼo chpan le Biblia reʼ, jun 150 dólares kajäl.

 ¿Achkë nkinaʼ ri yetoʼon rkʼë kilesaxik re publicaciones reʼ? Ya Nadia, ri kʼo pa sucursal rchë Sudáfrica, nuʼij: «Ri qachʼalal moyiʼ o ri ma kan ta más chik yetzuʼun kʼo kʼïy kan kʼayewal nuʼän chkiwäch. Rma riʼ, rïn kan jaʼäl nnaʼ yentoʼ re qachʼalal reʼ y ntaman chë Jehová kan kowan chqä yerajoʼ».

 We jun moy ma nkowin ta nuskʼij ruwäch braille, ¿achkë ütz nuʼän? Ojer qa jbʼaʼ, xesäx jun folleto ri rubʼiniʼan Aprenda a leer braille. Re wuj reʼ kʼo pä letras ri nqkowin nqaskʼij röj chqä braille chpan. Y bʼanon pä rchë chë jun winäq ri ma nkowin ta ntzuʼun chqä jun ri nkowin ntzuʼun yekowin junan nkiksaj. Rkʼë re folleto reʼ petenäq kaʼiʼ samajbʼäl ri ütz nuksaj jun moy rchë ntzʼibʼan pa braille. Ri winäq ri najin nutamaj braille ütz yeruksaj re samajbʼäl reʼ rchë yerutzʼibʼaj ri tzij. Reʼ xttoʼ rchë xkekanaj pa rujolon ri letras pa braille chqä rchë xtkowin xtskʼij kiwäch rkʼë ruwiʼ ruqʼaʼ.

 Ri moyiʼ chqä ri ma kan ta yetzuʼun chik kan kʼïy yerutoʼon wä ri publicaciones pa braille. Tqatzʼetaʼ achkë xbʼanatäj rkʼë Ernst, ri kʼo Haití. Rubʼanon qa, taq majun ta wä ruwuj pa braille, kʼo wä chë nuyaʼ pa rujolon jontir ri nrajoʼ nuʼij taq nuqʼaxaj jun ru-asignación pa congregación o taq nuyaʼ jun ru-comentario. Ryä nuʼij: «Komä ma ke riʼ ta chik, chqä yikowin nyaʼ jun n-comentario xa bʼa ajän nwajoʼ rïn. Komä nnaʼ chë kan kʼo nqʼij pa congregación. Jontir junan qatoʼik najin nqïl rchë más junan nuʼän qawäch rkʼë Jehová».

 Jun ukʼwäy bʼey ri kʼo Austria ri rubʼiniʼan Jan kʼayewal chik nuʼän chwäch ntzuʼun. Tapeʼ ke riʼ, ryä nqʼaxan ri tjonïk chrij ri wuj Ri Chajinel chqä ri Tjonïk chrij le Biblia pa congregación. Ryä nuʼij: «Ma wlon ta chik jun publicación ri chaq bʼaʼ naskʼij ruwäch chkiwäch ri qa-publicaciones röj pa braille. Nbʼij riʼ rma chaq bʼaʼ natamaj achkë ruxaq yït kʼo wä, ma kʼayewal ta yeʼawïl ri notas chqä ri kiqʼalajsaxik ri achbʼäl nkiʼän chë chaq bʼaʼ nqʼax ri achbʼäl pan ajolon».

 Chlaʼ Corea del Sur kʼo jun precursora ri rubʼiniʼan Seon-ok. Ryä moy chqä tokän. Rubʼanon qa, nkʼatzin wä chë ri nkʼaj chik nkichäp ruqʼaʼ rchë nkiqʼaxaj ri qamoloj chwäch. Komä, ruyonïl nkowin nuskʼij kiwäch ri publicaciones ri yeʼelesan pä chpan le Biblia ri ye kʼo pa braille. Ryä nuʼij: «Kan kʼayewal nuʼän chi nwäch nskʼij kiwäch nkʼaj chik publicaciones pa braille, rma ma yetzʼaqät ta ri puntos ye kʼo chpan, xa jechʼ yebʼä ri líneas o kowan xax ri wuj nkiksaj. Ye kʼa ri ki-publicaciones ri testigos de Jehová ma nbʼanatäj ta riʼ kikʼë, rma más ütz ri wuj nkiksaj chqä ri puntos más yeʼel pä chwäch ri wuj. Rubʼanon qa, xa xuʼ wä yikowin nskʼij kiwäch wuj ri yeʼelesan pä chpan le Biblia rkʼë rutoʼik jun chik, ye kʼa komä nyonïl yikowin nbʼän riʼ. Kan nqä chi nwäch ntjoj wiʼ chkij ri qamoloj, yenqʼaxaj asignaciones chqä yenyaʼ comentarios. Rïn nskʼij kiwäch jontir ri qa-publicaciones ye kʼo pa braille. ¡Kan ma yikowin ta nyaʼ qa kiskʼixik!».

 Ri publicaciones pa braille, achiʼel ri nkʼaj chik publicaciones, nuʼij pä reʼ chkipan: «Ri rujachik re wuj reʼ rukʼwan riʼ rkʼë rutzjoxik le Biblia ri najin nbʼan chwäch ronojel Ruwachʼulew. Reʼ nbʼan pä rkʼë kikchaj ri winäq chqä ma rchë ta nkʼayïx». Rma ri ikchaj ri niʼän pä chkipan jalajöj rubʼanik ri kʼo chpan donate.pr418.com, jontir winäq ütz nkiskʼij ruwäch publicaciones ri yeʼelesan pä chpan le Biblia, yajün ri moyiʼ chqä ri ma kan ta yetzuʼun chik. ¡Matyox chiwä rma kowan yixspan!