¡KIXKʼASEʼ APÜ!
¿Achkë rma ri winäq kowan nkitzelaj kiʼ? | ¿Achkë nuʼij le Biblia chrij riʼ?
Chkipan ri qʼij yoj kʼo komä, kan xa xuʼ chik yeʼatzʼët noticias chrij chʼaʼoj, chkij winäq ri yekiʼij tzij ri nukʼüt chë itzel nkinaʼ chkë ri nkʼaj chik o chkij winäq ri yekitzʼlaʼ ri nkʼaj chik xa rma kijatzul.
«Chkipan ri redes sociales kowan xenmatäj ri winäq ri nkiʼij chë itzel nkinaʼ chkë ri nkʼaj chik rma ri chʼaʼoj najin nbʼanatäj chkiwäch Israel chqä Gaza chqä kimä winäq ri nqä chkiwäch chʼaʼoj» (The New York Times, 15 de noviembre, 2023).
«Kan pa 7 de octubre, chwäch le Ruwachʼlew kowan xenmatäj ri winäq ri itzel nkinaʼ chkë ri nkʼaj chik y ri yekiyöqʼ chqä ri yekitzʼlaʼ ri nkʼaj chik rma itzel nkinaʼ chkë» (Dennis Francis, ri ukʼwayon bʼey chpan ri Asamblea General de las Naciones Unidas, 3 de noviembre, 2023).
Ri winäq ri itzel yekitzʼët ri nkʼaj chik, ri yetzʼil·öx ye kʼïy pa kiqʼaʼ ri nkʼaj chik chqä ri chʼaʼoj, ma kan ta kʼa riʼ najin nbʼanatäj. Le Biblia nutzjoj kij achiʼaʼ ri kan itzel kinaʼoj ri xejeʼ ojer ri nqä wä chkiwäch nkiʼän chʼaʼoj, y kan nujnamaj ri xkiʼij ri winäq riʼ kikʼë flechas (Salmo 64:3; 120:7; 140:1). Ye kʼa le Biblia nuʼij achkë rma komä kan ye kʼïy winäq itzel nkitzʼët kiʼ.
Ri itzel nkitzʼët kiʼ ri winäq: jun retal chë yoj kʼo chik chkipan rukʼisbʼäl taq qʼij
Le Biblia nutzjoj kaʼiʼ achkë rma ri winäq kan kowan itzel nkitzʼët kiʼ.
1. Le Biblia xuʼij chë xtbʼejeʼ na jun tiempo ri akuchï kan «ye kʼïy ma xkejowan ta chik» (Mateo 24:12). Rma riʼ, pa rukʼexel yekajoʼ ri nkʼaj chik, xa xtqʼalajin chë itzel nkinaʼ chkë rma ri yekiʼän chqä ri yekiʼij (2 Timoteo 3:1-5).
2. Le Biblia nuʼij chë «ronojel le Ruwachʼlew pa ruqʼaʼ ri Itzel Winäq kʼo wä», ntel chë tzij, ri Diablo (1 Juan 5:19; Apocalipsis 12:9, 12). Ri winäq kan kowan itzel nkinaʼ kiʼ rma ri Itzel Winäq kan kowan ruksan ruchqʼaʼ chkij.
Ye kʼa le Biblia nuʼij chë xa jbʼaʼ chik apü, Dios xtuʼän chë ri winäq ma xtkitzelaj ta chik kiʼ. Ryä xtuʼän chë ri winäq ri xkitäj poqän xa rma riʼ, xtmestäj chkë ri kʼayewal xkiqʼaxaj. Le Biblia nuʼij:
Dios «xtsuʼ ruyiʼal ri runaqʼ kiwäch, y ma xtjeʼ ta chik kamïk, bʼis, oqʼej nixta tyowen. Jontir riʼ ma xkejeʼ ta chik» (Apocalipsis 21:4).