¿Achkë ütz naʼän rchë xtawïl ri utzil ri nukʼäm pä rukamik Jesús?
Jmul pa jun junaʼ, ri testigos de Jehová chwäch jontir le Ruwachʼlew chqä ri pa millón winäq ri yebʼan invitar, nkimöl kiʼ rchë nkinataj rukamik Jesús, kan achiʼel xuʼij qa ryä (Lucas 22:19). Re moloj reʼ nqrtoʼ rchë nqʼax chqawäch achkë rma Jesús xyaʼ rukʼaslemal pa kiwiʼ jontir winäq. Chqä nqrtoʼ rchë nqatzʼët achkë utzil nukʼäm pä riʼ pa qawiʼ komä chqä chqawäch apü (Juan 3:16).
We rït xajeʼ o ma xajeʼ ta chpan ri moloj ri xbʼan re junaʼ reʼ rchë xqanataj rukamik Jesús, ¿achkë ütz naʼän rchë xtawïl ri utzil ri nukʼäm pä rukamik Jesús? Ryä xuʼij qa achkë nkʼatzin nqaʼän.
1. Nqatamaj ruwäch Dios chqä nqatamaj ruwäch Jesús. Kʼo jmul, Jesús xuʼij reʼ che rä Rutataʼ: «Ya reʼ ntel chë tzij ri kʼaslemal ri ma nkʼis ta: chë tkitamaj awäch rït, ri kʼaslïk Dios, chqä tkitamaj nwäch rïn Jesucristo, ri xinatäq pä chwäch le Ruwachʼlew» (Juan 17:3).
2. Nqasmajij ri nqatamaj. Jesús xuʼij chë nkʼatzin nqasmajij pa qakʼaslemal ri xkʼüt qa ryä. Jun tzʼetbʼäl, taq ya nukʼïs ri Sermón del Monte, Jesús xuʼij chkë ri winäq ri nkismajij ri xkʼüt qa ryä chë kan ütz ri najin nkiʼän (Lucas 6:46-48). Jun chik qʼij, ke riʼ chqä jbʼaʼ xuʼij: «We rïx itaman ronojel riʼ, kiʼ ikʼuʼx we xtiʼän» (Juan 13:17).
¿Nawajoʼ rït natamaj más chrij Dios chqä chrij Jesús? ¿Nawajoʼ natamaj achkë rubʼanik nasmajij ri najin natamaj? Re naʼoj reʼ kowan xkatkitoʼ.
Tjonïk chrij le Biblia
Ri toʼïk nqayaʼ röj chkë ri winäq yerutoʼon rchë nkitjoj kiʼ chrij le Biblia chqä rchë nkismajij pa kikʼaslemal ri nkitamaj.
Katok chpan ri peraj «Tatjoj awiʼ chrij le Biblia rkʼë jun testigo de Jehová» rchë natamaj más chrij re tjonïk reʼ.
Tatzʼetaʼ ri video Ütz apetik chpan ri atjonik chrij le Biblia rchë natamaj achkë rubʼanik röj, ri testigos de Jehová, yeqatjoj ri winäq chrij le Biblia.
Ri qamoloj
Röj, ri testigos de Jehová, nqamöl qiʼ kaʼiʼ mul pa jun semana chpan jun jay ri rubʼiniʼan Salón del Reino. Chkipan re moloj reʼ, nqatjoj qiʼ chrij le Biblia chqä nqatamaj achkë rubʼanik nqasmajij pa qakʼaslemal ri naʼoj ye kʼo chpan Ruchʼaʼäl Dios.
Jontir winäq ütz yeʼapon chkipan re moloj reʼ tapeʼ ma ye Testigos ta. Chkipan jojun tinamït, re moloj reʼ yebʼan pa Salones del Reino chqä yeqʼaxäx pa videoconferencia.
Chpan ri video ¿Achkë yebʼan pa qamoloj?, xtatamaj achkë nbʼan chpan jun Salón del Reino.
Katok chpan ri peraj «Ri kimoloj ri testigos de Jehová» rchë natzʼët achkë congregación más naqaj nkanaj wä chawä.
Tzijonem chqä videos pa internet
Kʼo kʼïy peraj chqä videos chpan re sitio reʼ ri xkatkitoʼ rchë natamaj más chrij ri xkʼüt qa Jesús y chrij ri rukʼaslemal xyaʼ ryä pa kamïk.
Jun tzʼetbʼäl, we nawajoʼ natamaj achkë rma kan ye kʼïy winäq nkïl utzil xa rma rukamik jun achï, tatzʼetaʼ ri peraj «¿De qué manera nos salva Jesús?» chqä «¿Por qué sufrió y murió Jesús?» o tatzʼetaʼ ri video ¿Achkë rma xkäm Jesús?