¡KIXKʼASEʼ APÜ!
Ri cristianos chqä ri chʼaʼoj yebʼan | ¿Achkë nuʼij le Biblia chrij riʼ?
Ri chʼaʼoj najin nuʼän Rusia rkʼë Ucrania rukʼutun chë ye kʼïy ukʼwäy taq bʼey chkipan ri religiones ri nkiʼij chë ye cristianas najin yetoʼon chkipan ri chʼaʼoj. Ri ukʼwäy taq bʼey aj Rusia nkitoʼ kitinamit y ke riʼ chqä nkiʼän ri ukʼwäy taq bʼey aj Ucrania. Tatzʼetaʼ achkë nkiʼij jojun chkë ryeʼ:
«Nqajoʼ nqatyoxij chkë jontir ri winäq ri ye bʼenäq pa chʼaʼoj rma najin nkitoʼ Ucrania, ri kitinamit, chkiwäch rukʼulel [...]. Chqä nqajoʼ nqaʼij chkë chë kan kowan kiqʼij chqawäch, chë ronojel mul xkeqatoʼ chqä xtqakʼutuj Dios pa kiwiʼ» (Metropolitano Epifanio I de Kiev, The Jerusalem Post, 16 de marzo, 2022).
«Re domingo reʼ, ri ukʼwäy bʼey chpan ri Iglesia ortodoxa rusa xuʼän jun ki-misa ri soldados aj Rusia ri akuchï xuʼij chkë chë kebʼä pa chʼaʼoj rchë nkitoʼ kitinamit ‹kan achiʼel rukʼulun chkë ri aj Rusia›. Loman najin nbʼanatäj riʼ, Moscú kʼa najin na nuʼän chʼaʼoj rkʼë Ucrania» (Reuters, 3 de abril de 2022).
¿Kʼo ta komä chë yebʼä pa chʼaʼoj ri cristianos? ¿Achkë nuʼij le Biblia chrij riʼ?
Ri nuʼij le Biblia
Le Biblia nuʼij chë ri kantzij rutzeqelbʼëy Cristo ma yebʼä ta pa chʼaʼoj.
«Takʼoloʼ ri awespada, rma jontir ri yeksan espada xkekamsäx rkʼë espada» (Mateo 26:52).
We jun winäq ütz yerutzʼët ri chʼaʼoj o nbʼetoʼon chkipan, ¿najin komä nuʼän ri xuʼij qa Jesús?
«Nyaʼ re jun kʼakʼakʼ pixaʼ reʼ chiwä: tiwajowalaʼ iwiʼ chiwäch; achiʼel wä yixinjowan pä rïn, ke riʼ chqä tibʼanaʼ rïx, tiwajowalaʼ iwiʼ chiwäch. Ke riʼ xtqʼalajin chkiwäch jontir chë rïx yïx nutzeqelbʼëy, we xtiwajowalaʼ iwiʼ chiwäch» (Juan 13:34, 35).
We jun winäq ütz yerutzʼët ri chʼaʼoj, ¿najin komä nukʼüt chë yerajoʼ ri winäq kan achiʼel xuʼij qa Jesús chë xtqʼalajin chkij rutzeqelbʼëy?
We nawajoʼ natamaj más chrij reʼ, tatzʼetaʼ ri tzijonem «El cristianismo y la guerra: ¿son compatibles?».
¿Ütz yebʼä chkipan ri chʼaʼoj ri cristianos pa qaqʼij komä?
¿Ütz nqayoʼej chë ri cristianos pa qaqʼij komä ma yetoʼon ta chkipan ri chʼaʼoj? Jaʼ, ütz. Le Biblia nuʼij chë chkipan ri qʼij yoj kʼo komä, ri nbʼix «rukʼisbʼäl taq qʼij» chkë, xkejeʼ winäq ri jalajöj kitinamit ri ma xtkitamaj ta chik «xtkiʼän chʼaʼoj» kan achiʼel wä xkʼüt qa Jesús (Isaías 2:2, 4, nota).
Rchë natamaj más, taskʼij kiwäch ri tzijonem ri kikʼwan kiʼ ri xepë chpan ri wuj La Atalaya ri rubʼiniʼan «¿Qué piensa Dios de las guerras?».
Xa jbʼaʼ chik apü, Jehová, a «ri Dios ri nyaʼö uxlanen», xtksaj Ruqʼatbʼäl Tzij rchë xkeruköl ri winäq «chwäch ri kʼayewal yaʼon pa kiwiʼ chqä chwäch ri itzelal» (Filipenses 4:9; Salmo 72:14).
Rchë natamaj achkë rubʼanik xtuʼän riʼ, tatzʼetaʼ ri video ¿Achkë riʼ ri Ruqʼatbʼäl Tzij Dios?
a Jehová ya riʼ rubʼiʼ Dios (Salmo 83:18).