TQANATAJ RKAMIK JESÚS
Jesucristo xtresaj ri chʼaʼoj
Taq Jesús xjeʼ chwäch le Rwachʼlew, ryä xkʼüt chë kowan xerajoʼ ri winäq; rma riʼ kan ma xkʼewaj ta xyaʼ rkʼaslemal pa qawiʼ (Mateo 20:28; Juan 15:13). Ryä kʼa kowan na nqrajoʼ, rma riʼ xa jbʼaʼ chik apü xtresaj ri «chʼaʼoj chwäch le Rwachʼlew». Ryä xtkowin xtuʼän riʼ, rma ya Qʼatöy Tzij chik chpan Rqʼatbʼäl Tzij Dios (Salmo 46:9).
Tatzʼetaʼ achkë nuʼij le Biblia chrij ri xtuʼän Jesús:
«Ryä xtköl ri winäq ri kan rkʼë oqʼej nukʼutuj rtoʼik rma kʼo pa mebʼaʼïl, xtköl ri ma kan ta achkë kʼo rkʼë chqä xa bʼa achkë winäq ri majun ta jun nyaʼö rtoʼik. Ryä xtjyowaj rwäch ri nuqasaj riʼ chqä ri kʼo pa mebʼaʼïl, y xkerköl ri mebʼaʼiʼ. Xkerköl chwäch ri kʼayewal yaʼon pa kiwiʼ chqä chwäch ri itzelal (Salmo 72:12-14).
¿Achkë rbʼanik nqakʼüt chwäch Jesús chë nqatyoxij ri xuʼän chqä ri xtuʼän pa qawiʼ? Chpan Lucas 22:19, ryä xuʼij qa chë nkʼatzin nqanataj rkamik. Rma riʼ ronojel jnaʼ röj, ri testigos de Jehová, nqamöl qiʼ rchë nqaʼän riʼ. Re jnaʼ reʼ yë ri domingo 24 de marzo xtqanataj rkamik Jesús, rma riʼ nqajoʼ chë yatapon qkʼë.