¡KIXKʼASEʼ APÜ!
Jontir xjoteʼ rajäl chwäch ronojel Ruwachʼlew | ¿Achkë nuʼij le Biblia chrij riʼ?
Chpan jun informe rchë junio, 2022 ri ukʼwayon bʼey chwäch ri Grupo Banco Mundial, xuʼij: «Jmul chik najin nqä rajäl ri päq chwäch jontir le Ruwachʼlew».
Ri Fondo Monetario Internacional xuʼij chë ri gas, ri gasolina chqä ri rukïl wäy, «chanin najin njoteʼ kajäl. Ya riʼ yerutzʼil-on ri winäq ri ye kʼo chkipan tinamït ri ma kan ta kʼo más kirajil».
Le Biblia nqrtoʼ rchë nqʼax chqawäch achkë rma najin yebʼanatäj re kʼayewal reʼ, achkë rubʼanik nqqʼax chkiwäch y achkë rma ütz nqanmaj chë kʼo jun qʼij xkeslotäj jontir.
Jontir najin njoteʼ rajäl chkipan ri «rukʼisbʼäl taq qʼij»
Le Biblia nuʼij chë röj yoj kʼo chkipan ri «rukʼisbʼäl taq qʼij» (2 Timoteo 3:1).
Jesús xuʼij chë chpan re tiempo reʼ xkebʼanatäj nmaʼq taq kʼayewal ri xtkiʼän chë ri winäq xtkixiʼij kiʼ (Lucas 21:11). Taq jontir njoteʼ rajäl, ri winäq nkixiʼij kiʼ rma ma kitaman ta achkë xtbʼanatäj chqawäch apü chqä we xkekowin xtkitzüq ki-familia.
Ri wuj Apocalipsis nuʼij chë chpan re tiempo reʼ xtjoteʼ rajäl rukïl qaway. «Xinkʼoxaj jun chʼaʼäl ri nuʼij: ‹Ri nuchʼäk jun winäq chpan jun qʼij, xa xuʼ xtbʼeqʼiʼ rchë xtloqʼ jun kilo trigo u oxiʼ kilos cebada›» (Apocalipsis 6:6, Traducción en lenguaje actual).
Rchë natamaj más chrij ri «rukʼisbʼäl taq qʼij» y chrij ri profecía ri kʼo chpan ri wuj Apocalipsis, tatzʼetaʼ ri video Pa 1914 xjalatäj jontir chwäch le Ruwachʼlew chqä taskʼij ri peraj «¿Achkë nkikʼambʼej tzij ri kajiʼ kej ri nutzjoj Apocalipsis?».
Ri rubʼanik xkeslotäj ri kʼayewal ye kʼo rma ri päq
«Ryeʼ xkekiyäk jay chqä xkejeʼ chpan; xkekitïk uva y xtkitäj ruwäch. Ma xkekiyäk ta jay rchë chë nkʼaj chik yejeʼ chkipan; ma xketkonäj ta rchë chë nkʼaj chik yetjö ruwäch» (Isaías 65:21, 22).
«Kan pa rukʼiyal kiwäch ri tkoʼn xkewachin chwäch le Ruwachʼulew, kan xtqʼax ruwiʼ ri xkewachin pa kiwiʼ ri juyuʼ» (Salmo 72:16).
«Ya reʼ nuʼij Jehová: ‹Rïn xkentoʼ ri winäq ri najin nkitäj poqän rma yaʼon kʼayewal pa kiwiʼ chqä ri najin yebʼison rma ma kan ta achkë kʼo kikʼë›» (Salmo 12:5). a
Xa jbʼaʼ chik apü, Dios xtsöl jontir ri kʼayewal ye kʼo rma ri päq, y ma xa xuʼ chpan jun tinamït, xa kan chwäch ronojel Ruwachʼlew. Rchë natamaj achkë rubʼanik xtuʼän riʼ, taskʼij ri peraj «¿Ütz komä nqanmaj chë kʼo jun qʼij ri winäq ma xtkitäj ta chik poqän rma ri päq?».
Loman Dios xtchüp kiwäch ri kʼayewal, le Biblia nkowin yaturtoʼ komä. ¿Achkë rubʼanik? Ye kʼo utziläj taq naʼoj chpan ri xkatkitoʼ rchë kan ütz xtaksaj arajil (Proverbios 23:4, 5; Eclesiastés 7:12). Rchë natamaj más chrij riʼ, taskʼij ri peraj «Kan pa rubʼeyal taksaj arajil» chqä «¿Achkë ütz naʼän taq ma kan ta achkë kʼo awkʼë?».
a Jehová ya riʼ rubʼiʼ Dios (Salmo 83:18).