¡KIXKʼASEʼ APÜ!
Le Ruwachʼlew najin nutzʼlaʼ riʼ | ¿Achkë nuʼij le Biblia chrij riʼ?
«Le Ruwachʼlew más kʼatän najin nuʼän ruwäch. Ye kʼïy jay najin yekanaj qa chuxeʼ yaʼ, más kʼatän najin nuʼän, najin yebʼanatäj más qʼeqäl taq jöbʼ chqä najin nkʼis ri yaʼ. Y, kan pa millón chköp chqä cheʼ najin yekʼis. Ma najin ta nyaʼ ruwiʼ ri najin nbʼij. Ri científicos nkiʼij chë ya riʼ najin nbʼanatäj rma ri qʼatbʼäl taq tzij ma pa rubʼeyal ta najin nkiksaj ri energía». (Rutzij António Guterres, ri secretario general rchë ri Naciones Unidas, chrij ri informe rchë 4 de abril, 2022 rchë ri Grupo Intergubernamental de Expertos sobre el Cambio Climático).
«Ri científicos nkiʼij chë chkipan ri junaʼ ri ye petenäq, ri kʼayewal ri xkebʼanatäj rma kan más na chik kʼatän najin nuʼän, xkerutzʼlaʼ jbʼaʼ ma jontir ri parques nacionales ri ye kʼo Estados Unidos, rma kan chaq bʼaʼ yechaʼ chiʼ taq kowan kʼatän nuʼän. Kan nxiʼin rij ri petenäq chkij ri 423 parques ri ye kʼo, rma xkebʼanatäj nmaʼq taq kʼatik, xkeyiʼär ri hielo, xtnmär kipan ri mares chqä más kʼatän xtuʼän». (“Flooding Chaos in Yellowstone, a Sign of Crises to Come” [Ri tinamït Yellowstone nnuj chë yaʼ, jun retal chkij ri kʼayewal xkepë], The New York Times, 15 de Junio, 2022).
¿Kʼo komä jun qʼij ma xkebʼanatäj ta chik ri kʼayewal ri najin nkitzʼlaʼ le Ruwachʼlew? We kʼo jun qʼij ma xkebʼanatäj ta chik, ¿achkë rubʼanik xtbʼanatäj riʼ? Tatzʼetaʼ achkë nuʼij le Biblia chrij riʼ.
Le Biblia nuʼij achkë kʼayewal xkebʼanatäj
Le Biblia nuʼij chë Dios xtchüp kiwäch «ri winäq ri najin nkitzʼlaʼ le Ruwachʼlew» (Apocalipsis 11:18). Chpan re texto reʼ kʼo oxiʼ naʼoj nqatamaj qa:
1. Ri winäq xtkitzʼlaʼ le Ruwachʼlew.
2. Ri kʼayewal ri najin nkitzʼlaʼ le Ruwachʼlew komä, xkekʼis.
3. Yë Dios xtchpü kiwäch re kʼayewal reʼ y ma yë ta ri winäq.
Ri kʼayewal ri najin yebʼanatäj chwäch le Ruwachʼlew xkeslotäj
Le Biblia nuʼij chë «le Ruwachʼlew majun bʼëy xtchup ta ruwäch» (Eclesiastés 1:4). Ronojel mul xkejeʼ winäq chwäch.
«Ri chöj kikʼaslemal xtyaʼöx qa le Ruwachʼlew chkë» (Salmo 37:29).
Le Ruwachʼlew xtbʼan rubʼanik chqä kan jaʼäl xtuʼän.
«Ri tzʼiran ilew chqä ri ilew ri kan chaqiʼj ruwäch xkekotzʼijan, y ri juyuʼ ri majun ta achkë jun kʼo chwäch kan xtkotzʼijan achiʼel ri azafrán» (Isaías 35:1).