¡KIXKʼASEʼ APÜ!
Ri junan nuʼän qawäch jontir: ¿xa xuʼ komä jun achïkʼ? | ¿Achkë nuʼij le Biblia chrij riʼ?
Chkiwäch ye kʼïy, ri junan nuʼän kiwäch ri winäq xa xuʼ jun achïkʼ.
«Chkipan jalajöj tinamït kan nqʼalajin chë ri winäq itzel yekitzʼët ri ma ye kijatzul ta. Ya riʼ jun chkë ri nbʼanö chë ri winäq ma junan ta nuʼän kiwäch» (António Guterres, secretario general de las Naciones Unidas).
¿Napon na komä jun qʼij junan nuʼän kiwäch jontir ri winäq? ¿Achkë nuʼij le Biblia chrij riʼ?
Dios junan yerutzʼët ri winäq tapeʼ jalajöj kijatzul
Le Biblia nuʼij achkë rubʼanik yerutzʼët Dios ri winäq ri jojun wä kijatzul.
«[Dios] xuʼän chë xa rkʼë jun achï xeʼel wä pä jontir winäq rchë nkinujsaj ruwäch le Ruwachʼlew» (Hechos 17:26).
«Dios ma yeruchaʼ ta ri winäq, y xa bʼa achkë na kʼa kitinamit, kan yerajoʼ ri nkiʼän ri ütz chqä ma nkiqasaj ta ruqʼij» (Hechos 10:34, 35).
Le Biblia nuʼij chë jontir ri winäq xa yoj jun familia chqä chë Dios nqrajoʼ jontir tapeʼ jalajöj qajatzul.
¿Achkë rubʼanik junan xtuʼän kiwäch jontir ri winäq?
Ri Ruqʼatbʼäl Tzij Dios, ri kʼo chlaʼ chkaj, xtuʼän chë ri winäq junan xtuʼän kiwäch. Ri qʼatbʼäl tzij riʼ xtkʼüt chkiwäch ri winäq rchë ütz kinaʼoj nkiʼän kikʼë ri nkʼaj chik tapeʼ jalajöj kijatzul. Ri winäq xtkitamaj xtkesaj ri itzel pa kan chkij ri ma junan ta kijatzul kikʼë.
Chwäch le Ruwachʼlew, ri winäq «nkitamaj achkë rubʼanik kan pa rubʼeyal nkiʼän che rä jontir» (Isaías 26:9).
«Y rma xtqakʼwaj jun jïk kʼaslemal xtqanaʼ uxlanen pa qan, y kan ma xtkʼis ta ri uxlanen xtqanaʼ chqä majun bʼëy xtqaxiʼij ta qiʼ» (Isaías 32:17).
Pa qaqʼij komä, kan pa millón winäq najin nkitamaj chpan le Biblia achkë kinaʼoj nkiʼän kikʼë ri winäq rchë ma nkiqasaj ta kiqʼij.
We rït nawajoʼ natamaj más chrij reʼ taskʼij ri revista ¡Despertad! ri rubʼiniʼan «¿Tiene cura el prejuicio?».
Rchë natamaj achkë rubʼanik ri teʼej tataʼaj nkitzjoj re naʼoj reʼ chkë kalkʼwal, taskʼij ri tzijonem «¿Cómo hablar con sus hijos sobre el racismo?».