¿Ya ütz chik komä nbʼän nbautismo?
CAPÍTULO 37
¿Ya ütz chik komä nbʼän nbautismo?
Tajchʼuʼ qa achkë tzij y achkë manä:
Jontir ri cristianos nkʼatzin nkiʼän kibautismo.
□ Kantzij
□ Ma tzij ta
Kan nkʼatzin naʼän abautismo rchë ma yaqä ta chik chkipan mak.
□ Kantzij
□ Ma tzij ta
Taq naʼän abautismo chriʼ nchapatäj ri bʼey rchë yakolotäj.
□ Kantzij
□ Ma tzij ta
We majanä nbʼän nbautismo, Dios ma xtkʼutuj ta cuentas chwä.
□ Kantzij
□ Ma tzij ta
Ri wamigos najin chik nkiʼän kibautismo, rïn chqä nkʼatzin nbʼan nbautismo.
□ Kantzij
□ Ma tzij ta
¿NAJIN chik yeʼasmajij ri naʼoj ye kʼo chpan le Biblia? ¿Najin natäj aqʼij rchë más jnan nuʼän awäch rkʼë Dios? ¿Najin chik natzjoj ri ataman pä chrij le Biblia? We xaʼij jaʼ chkë ri oxiʼ kʼutunïk reʼ, y majanä naʼän abautismo, ütz chik naquʼ rij riʼ. Ye kʼa naʼäy, kachʼobʼon na chrij reʼ. ¿Nanaʼ rït chë kan ütz chik naʼän abautismo? Ri xkatoʼö rchë natamaj reʼ ya riʼ natzʼët achkë xajuchʼ qa pa naʼäy.
● Jontir ri cristianos nkʼatzin nkiʼän kibautismo.
Kantzij. Ya reʼ xuʼij qa Jesús chë nkiʼän jontir rtzeqelbʼëy (Mateo 28:19, 20). Jesús chqä xuʼän rbautismo. Rma riʼ, rchë yatok rtzeqelbʼëy Cristo, rït chqä kʼo chë naʼän abautismo we kantzij ya riʼ nawajoʼ naʼän y nanaʼ chë kʼuqül chik akʼuʼx chpan rtinamit Jehová.
● Kan nkʼatzin naʼän abautismo rchë ma yaqä ta chik chkipan mak.
Ma tzij ta. Ri naʼän abautismo xa xuʼ jun retal chkiwäch ri winäq chë rït ya xajäch yän akʼaslemal pa rqʼaʼ Jehová. Ri naʼän riʼ rma nawajoʼ nanmaj rtzij Jehová, y ma rma ta yaturqʼät rchë ma yamakun ta chik.
● Taq naʼän abautismo chriʼ nchapatäj ri bʼey rchë yakolotäj
Kantzij. Le Biblia nuʼij chë, kan nkʼatzin naʼän abautismo rchë yakolotäj (1 Pedro 3:21). Tapeʼ ke riʼ, ma xa xuʼ ta rma nqajoʼ nqkolotäj nqaʼän qabautismo. Kan nqaʼän reʼ rma kantzij nqajoʼ Jehová y nqayaʼ rqʼij jontir qakʼaslemal (Marcos 12:29, 30).
● We majanä nbʼän nbautismo, Dios ma xtkʼutuj ta cuentas chwä.
Ma tzij ta. Santiago 4:17 nuʼij chë «we jun winäq rtaman achkë riʼ ri ütz, ye kʼa, ma nuʼän ta, xa najin nmakun», tapeʼ xuʼän yän rbautismo o majanä. Rma riʼ, taquʼ rij reʼ: ¿Qʼaxnäq pan ajolon achkë nrajoʼ Dios chë kʼo chë naʼän? ¿Ataman chik achkë qäs nawajoʼ naʼän chpan akʼaslemal? We ke riʼ, katzjon rkʼë ateʼ atataʼ o kʼo jun qachʼalal ri kan kʼuqül rkʼuʼx chpan rtinamit Jehová. Ryeʼ xketoʼö awchë rchë xkakowin xtajäch akʼaslemal pa rqʼaʼ Jehová.
● Ri wamigos najin chik nkiʼän kibautismo, rïn chqä nkʼatzin nbʼan nbautismo.
Ma tzij ta. Ri nawajoʼ naʼän abautismo nkʼatzin chë pa awan ntel pä (Salmo 110:3). Chqä ataman chik achkë samaj rkʼwan yatok jun testigo de Jehová y ma kaʼiʼ ta abʼanon akʼuʼx (Eclesiastés 5:4, 5).
Jun chʼobʼoj ri nujäl akʼaslemal
Ri naʼän abautismo jurayil nujäl akʼaslemal rma kan kʼïy utzil nakʼül. Ye kʼa ütz chqä ma namestaj ta chë kʼïy samaj npë chawij. ¿Achkë che samaj? Ri naʼän jontir ri xatzüj che Jehová taq xayaʼ akʼaslemal che rä.
¿Xa jbʼaʼ chik nrajoʼ rchë naʼän abautismo? We ke riʼ, kiʼ akʼuʼx tabʼanaʼ. ¡Majun ta chik jun ri más nüm rejqalen chwäch nayaʼ rqʼij Jehová rkʼë ronojel awan chpan jontir akʼaslemal! (Mateo 22:36, 37).
RI KʼO CHPAN RI JUN CHIK CAPÍTULO
Tatzʼetaʼ achkë rbʼanik kan pa rbʼeyal naksaj akʼaslemal.
TATZʼETAʼ RE TEXTO REʼ
«Titzjuʼ apü ichʼakul chwäch ryä kan achiʼel ta jun sacrificio ri kʼo rkʼaslemal, ri loqʼoläj chqä ri kan ütz nutzʼët Dios; ke riʼ xtikʼüt chë kan xiquʼ rij ri samaj xtiʼän rma Dios» (Romanos 12:1).
ÜTZ NAʼÄN REʼ
Takʼutuj chkë ateʼ atataʼ achkë qachʼalal ri kʼo pan acongregación ri ütz yaturtoʼ rchë nkʼuqeʼ akʼuʼx chpan rtinamit Jehová (Hechos 16:1-3).
¿ATAMAN RÏT REʼ?
Ri naʼän abautismo ya riʼ jun chkë ri najowatäj naʼän rchë yakolotäj (Ezequiel 9:4-6).
¡XTINBʼÄN REʼ!
Ya reʼ naʼoj ri kʼo chpan le Biblia ri nkʼatzin nqʼax chi nwäch rchë nbʼän nbautismo: ․․․․․
¿Achkë ütz nkʼutuj chkë nteʼ ntataʼ chrij re naʼoj reʼ? ․․․․․
¿ACHKË NAʼIJ RÏT?
● ¿Achkë rma ri naʼän abautismo majun atzʼanen ta?
● ¿Achkë rma ye kʼo qʼopojiʼ kʼojolaʼ kan chanin nkajoʼ nkiʼän kibautismo?
● ¿Achkë rma kʼo jojun qʼopojiʼ kʼojolaʼ ma nkajoʼ ta na nkiʼän kibautismo?
[Comentario]
«Ri ma nmestaj ta chwä chë xinbʼän yän nbautismo yirtoʼ rchë nchaʼ nbʼän ri ütz y ma ntïtzʼ ta wiʼ chkipan ri kʼayewal» (Noemí).
[Comentario]
kʼutunïk ri taqïl yebʼan chrij ri naʼän abautismo
¿Achkë ntel chë tzij ri naʼän abautismo? Taq yajuʼüx qa pa yaʼ achiʼel ta yakäm, chriʼ nayaʼ qa kibʼanik jontir ri narayij rït. Y taq yatel pä pa yaʼ, achiʼel ta yakʼastäj pä chik jmul, ye kʼa komä ma yë ta chik ri narayij rït naʼän komä xtaʼän achkë nrajoʼ Jehová.
¿Achkë ntel chë tzij ri najäch akʼaslemal pa rqʼaʼ Jehová? Ntel chë tzij chë ma naʼän ta chik ri narayij rït, xa xtaʼän ri nrajoʼ Jehová (Mateo 16:24). Rma riʼ, taq xtawajoʼ xtaʼän abuatismo, naʼäy kachʼö rkʼë Jehová y taʼij che rä chë ronojel mul xtaʼän ri nqä chwäch ryä.
¿Achkë nkʼatzin nbʼän we nwajoʼ nbʼän nbautismo? Kʼo chë nasmajij ri nuʼij le Biblia chqä natzjoj chkë ri winäq ri ataman pä chpan. Chqä kʼo chë natjoj awiʼ chrij le Biblia y yachʼö rkʼë Dios rchë jnan nuʼän iwäch rkʼë. Y kan nkʼatzin chë pan awan ntel wä pä nayaʼ rqʼij Jehová y ma rma ta chë xa nkʼaj chik yebʼin chawä.
¿Jaruʼ komä njnaʼ ütz chik nbʼän nbautismo? Ma yë ta ri jaruʼ ajnaʼ kʼo ya riʼ kʼo más rqʼij. Ri más rqʼij ya riʼ we nqʼax chawäch achkë samaj rkʼwan ri najäch awiʼ pa rqʼaʼ Jehová.
¿We rïn nwajoʼ nbʼän nbautismo achkë xtinbʼän we nteʼ ntataʼ nkiʼij chwä chë tinyo’ej na jbʼaʼ? We ryeʼ nkitzʼët chë kʼa kʼo na jbʼaʼ nawajoʼ rchë nasmajij jojun naʼoj ye kʼo chpan le Biblia, tanmaj kitzij y tabʼanaʼ ri achkë nkʼatzin rchë más jnan nuʼän awäch rkʼë Jehová (1 Samuel 2:26).
[Recuadro]
Tab‘ana‘ re
¿abʼanon chik jontir ri najowatäj rchë naʼän abautismo?
Rchë natamaj riʼ ri kʼutunïk ri kʼo kʼa chuxeʼ xkatkitoʼ. Ye kʼa, rchë yeʼaqʼalajsaj ri kʼutunïk ¡naʼäy keʼaskʼij ri textos!
¿Kan akʼuqbʼan akʼuʼx chrij Jehová? ¿Achkë rbʼanik najin nakʼüt chë ke riʼ?(Salmo 71:5). ․․․․․
¿Yakowin chik natzʼët achkë ütz naʼän y achkë manä? ¿Kʼo chë akʼutun chë yë ri ütz ya riʼ abʼanon?(Hebreos 5:14). ․․․․․
¿Jaruʼ mul yachʼö rkʼë Dios jun qʼij?. ․․․․․
achkë yeʼaʼij nqʼalajin chrij riʼ chë kantzij nawajoʼ Jehová?(Salmo 17:6). ․․․․․
¿Achkë jojun nawajoʼ najäl taq yachʼö rkʼë Dios rchë más ütz naʼän che rä? ․․․․․
¿Ronojel qʼij tajin naskʼij rwäch a Biblia?(Josué 1:8). ․․․․․
¿Achkë nanukʼuj rij rït taq natjoj awiʼ chrij le Biblia pan ayonïl? ․․․․․
¿Achkë nawajoʼ nayaʼ chawäch naʼän rït taq natjoj awiʼ chrij le Biblia pan ayonïl? ․․․․․
¿Naquʼ rït chë kan ütz tajin naʼän che rä taq natzjoj le Biblia? (Rchë natzʼët we ke riʼ taquʼ rij reʼ: ¿Yakowin nakʼüt chkiwäch nkʼaj chik ri naʼoj ma kʼayewal ta yeqʼax? ¿Najin natäj aqʼij nawïl jun winäq rchë natjoj chrij le Biblia?)
□ Jaʼ □ Manä
¿Yatel rtzjoxik le Biblia tapeʼ ateʼ atataʼ ma yeʼel ta? (Hechos 5:42).
□ Jaʼ □ Manä
¿Achkë nawajoʼ nayaʼ chawäch naʼän taq yatel rtzjoxik le Biblia? (2 Timoteo 2:15).
¿Ronojel mul yabʼä pa moloj ri yebʼan pa congregación o kʼa chqä jantäq na yabʼä? (Hebreos 10:25). ․․․․․
¿Achkë rbʼanik yatoʼon rït chkipan ri moloj? ․․․․․
We ateʼ atataʼ kiyaʼon qʼij chawä chë yabʼä pa moloj, ¿yabʼä rït taq ryeʼ ma ütz ta nuʼän chkiwäch yebʼä?
□ Jaʼ □ Manä
¿Kan jaʼäl nanaʼ rït naʼän ri nqä chwäch Dios? (Salmo 40:8).
□ Jaʼ □ Manä
¿Kʼo jmul xkitäj kiqʼij awachiʼil chawij chë tabʼanaʼ jun ri ma ütz ta, ye kʼa ma xaqä ta pa kiqʼaʼ? (Romanos 12:2). ․․․․․
¿Achkë achʼobʼon naʼän rchë ronojel mul nawajoʼ Jehová? (Judas 20, 21). ․․․․․
¿Xtayaʼ na rqʼij Jehová rït we ateʼ atataʼ chqä awachiʼil nkiyaʼ qa Jehová? (Mateo 10:36, 37).
□ Jaʼ □ Manä
[Achbʼäl]
Ri nachʼöbʼ naʼän abautismo jnan rkʼë ri yakʼleʼ: majun atzʼanen ta