Ri demonios nqä chkiwäch yekamsan
Satanás chqä ri demonios kan ronojel mul qajnäq chkiwäch yekitzʼlaʼ ri nkʼaj chik. Ojer qa, Satanás xerukamsaj ruchkop chqä rusamajelaʼ Job, jun utziläj rusamajel Dios. Chrij riʼ xerukamsaj ri 10 ralkʼwal, rma xuʼän chë jun mamaʼ kaqʼiqʼ xtzäq ri jay ri akuchï ye kʼo wä. Ryä chqä xuʼän chë Job xpë jun itzel yabʼil chrij ruchʼakul (Job 1:7-19; 2:7).
Pa ruqʼij qa Jesús, ri demonios nkiʼän wä chë jojun winäq ma yekowin ta chik yetzjon nixta yetzuʼun (Mateo 9:32, 33; 12:22). Kʼo wä jun achï ri xkiʼän chë kowan xtäj poqän, rma riʼ nuqpij wä ruchʼakul rkʼë abʼäj (Marcos 5:5). Ryeʼ chqä xkiʼän chë jun kʼajol nuräq kowan ruchiʼ, nukʼäq riʼ pan ilew chqä nubʼolqotlaʼ riʼ (Lucas 9:42).
Ojer qa, ri demonios xkiʼän chë jojun winäq xkïl kiyabʼil y chkë jojun chik xkiʼän chë nkibʼolqotlaʼ kiʼ pan ilew
Komä, Satanás chqä rudemonios kʼa nqä na chkiwäch yekitzʼlaʼ ri winäq. Ryeʼ kan más na chik kibʼanon riʼ taq xekʼaq pä chlaʼ chkaj. Chwäch jontir le Ruwachʼlew, ryeʼ kan kʼïy itzelal yekiʼän chkë ri winäq: nkiʼän chë npë kiyabʼil, yekiʼän tzʼil taq bʼanobʼäl kikʼë, yekixiʼij rchë ma ntok ta kiwaran o nkiʼän chë yekiʼän itzel taq achïkʼ; chkë jojun chik, nkiʼän chë nkikamsaj kiʼ, yekikamsaj nkʼaj chik o nkiʼän chë nuʼän itzel kijolon.
Komä, ri demonios nkiʼän chë jojun winäq itzel kinaʼoj nkiʼän y yekitzʼlaʼ nkʼaj chik rma nkiʼän chë yekiʼän itzel taq achïkʼ
Ya Lintina, ri kʼo Surinam, nuʼij chë jun demonio xerukamsaj ye 16 ruchʼalal y xuʼän chë ryä xtäj poqän 18 junaʼ. Rma ri ruqʼaxan pä, ryä nuʼij chë ri demonios «nqä chkiwäch yekitzʼlaʼ ri nkʼaj chik chqä yekikamsaj äl».
Ye kʼa Jehová nkowin yeruköl rusamajelaʼ chwäch Satanás (Proverbios 18:10).
