Jehová xtchojmij jontir ri itzelal rubʼanon Satanás. Rma riʼ, xuʼän chë Jesús ntok Qʼatöy Tzij pa ruwiʼ le Ruwachʼlew. Chuxeʼ Ruqʼatbʼäl Tzij Dios, le Ruwachʼlew kan kotzʼijaläj xtuʼän ruwäch (Daniel 7:13, 14; Lucas 23:43).

Tatzʼetaʼ achkë rutzjun Jehová chqë:

• KAN PA RUKʼIYAL QAWAY XTJEʼ: «Le ilew kan xtyaʼ ruwäch; Dios, ri qaDios, xtyaʼ utzil pa qawiʼ». «Chwäch le Ruwachʼlew kan pa rukʼiyal ruwäch tkoʼn xtjeʼ, y kan xtqʼax ruwiʼ ri ruwäch tkoʼn xtjeʼ pa kiwiʼ ri juyuʼ» (Salmo 67:6; 72:16).

• MA XTJEʼ TA CHIK CHʼAʼOJ: «Kixampä y titzʼetaʼ achkë najin yeruʼän Jehová, ri rubʼanon jojun chwäch le Ruwachʼlew ri kan ntel akʼuʼx chkë. Ryä nuʼän chë nkʼis chʼaʼoj chwäch le Ruwachʼlew» (Salmo 46:8, 9).

• MA XKEJEʼ TA CHIK ITZEL TAQ WINÄQ: «Rma ri itzel taq winäq xtchup kiwäch [...]. Xa jbʼaʼ chik apü, ri itzel taq winäq ma xkejeʼ ta chik; xkeʼakanuj akuchï xejeʼ wä, ye kʼa ma xkeʼawïl ta chik chriʼ» (Salmo 37:9, 10).

•  MA XTJEʼ TA CHIK YABʼIL NIXTA KAMÏK: «Chpan ri qʼij riʼ, ri runaqʼ kiwäch ri moyiʼ xkejaqatäj, y ri kixkïn ri ye tokän xkejaqatäj. Chpan ri qʼij riʼ, ri nkoj·ïn xttzopïn kan achiʼel jun mazat, y ri mem kan xträq ruchiʼ rma kiʼ rukʼuʼx» (Isaías 35:5, 6).

  «Y Dios kan xtjeʼ kikʼë. Y ryä xtsuʼ ruyiʼal ri runaqʼ kiwäch, y ma xtjeʼ ta chik kamïk, bʼis, oqʼej nixta tyowen. Jontir riʼ ma xkejeʼ ta chik» (Apocalipsis 21:3, 4).

Jehová kan ma junan ta runaʼoj rkʼë Satanás chqä ri demonios; ryä majun bʼëy nutzʼük ta tzij, kan nuʼän jontir ri nutzüj (Lucas 1:36, 37). Jehová kowan yatrajoʼ rït y nrajoʼ chë yajeʼ chwäch ri Kotzʼijaläj Ilew ri xtuʼän ryä. Rma riʼ, keʼakanuj ri testigos de Jehová rchë natamaj más chkij ri utziläj taq naʼoj ri ye kʼo chpan Ruchʼaʼäl Dios. We rït yeʼasmajij ri naʼoj riʼ chpan akʼaslemal, xkakowin xtaköl awiʼ chkiwäch ri tzʼukün taq naʼoj yekiʼij ri winäq. Chqawäch apü, kan xkakol chqä chwäch ri mak chqä ri kamïk. Xtbʼanatäj reʼ awkʼë kan achiʼel xuʼij Jesús: «Xtitamaj ri kantzij, y ri kantzij xkixurköl» (Juan 8:32).