Pa qaqʼaʼ röj kʼo wä we yë Jehová nqayaʼ ruqʼij o yë Satanás chqä rudemonios. Ma nqkowin ta kan che kaʼiʼ nqayaʼ kiqʼij. ¡Ye kʼa kan kʼo qanaʼoj xtqakʼüt we yë Jehová xtqayaʼ ruqʼij!

Achiʼel qatzʼeton pä, ri demonios nqä chkiwäch yekitzʼlaʼ chqä yekiqʼöl ri winäq. Jehová ma ke riʼ ta runaʼoj. Ryä yerajoʼ ri winäq kan achiʼel nuʼän jun tataʼaj kikʼë ralkʼwal. «Jontir ri jaʼäl taq spanïk» rkʼë ryä ye petenäq wä (Santiago 1:17). Ryä ronojel mul yë ri ütz nuyaʼ pä chkë ri winäq. Rma riʼ, kan ma xkʼewaj ta xyaʼ Rukʼajol pa kamïk xa qmä röj (Efesios 2:4-7).

Taquʼ achkë xuʼän Jesús, ri Rukʼajol Dios, taq xjeʼ chwäch le Ruwachʼlew. Ryä xuʼän chë ri ye mem xetzjon chqä chë ri moyiʼ xetzuʼun; xeruknaj ri kʼo lepra chkij chqä ri xa yekoj·ïn; xresaj demonios chkij ri winäq chqä xknaj xa bʼa achkë yabʼil. Y rkʼë rutoʼik Rutataʼ, ryä kan xerukʼasoj pä ri kamnaqiʼ (Mateo 9:32-35; 15:30, 31; Lucas 7:11-15).

Pa rukʼexel nutzʼük tzij rchë nqrqʼöl, Dios ronojel mul kantzij ntzjon. Ryä majun bʼëy xtqʼöl ta jun winäq (Números 23:19).

Kan pa millón winäq ri yekinmaj ri tzʼukün taq naʼoj yebʼix achiʼel ta ye xmïl chkipan ri tzʼukün taq  tzij riʼ. Ryeʼ ye achiʼel jun üs ri nqʼateʼ qa chpan ruken äm. Ya riʼ nuʼän chë nkixiʼij kiʼ chkiwäch ri kamnaqiʼ, chkiwäch ri demonios chqä chkiwäch ri rkʼë jbʼaʼ nkiʼän pä jun itz chkij. Ryeʼ chqä nkikanuj xa bʼa achkë jun ri nkʼutü chkiwäch achkë xtbʼanatäj chpan kikʼaslemal y nkiksaj xa bʼa achkë jun ri nkinaʼ ryeʼ chë xkerutoʼ rchë ütz xkebʼä chpan kikʼaslemal o xkeruchajij chwäch ri itzelal. Ryeʼ nkiyaʼ qʼij chë xa yë ri tzʼukün taq tzij ri nkiʼij Satanás chqä rudemonios nsmajin kikʼaslemal. Ye kʼa ri rusamajelaʼ Dios ma ye xmïl ta chkipan ri tzʼukün taq naʼoj riʼ.

Jehová más ruchqʼaʼ chwäch Satanás. We rït nayaʼ ruqʼij Jehová, ryä xkaturchajij chkiwäch ri demonios (Santiago 4:7). Ri itz xtbʼan pä chawij ma xkatkitzʼlaʼ ta. Ya riʼ xbʼanatäj rkʼë jun testigo de Jehová ri kʼo wä Nigeria. Rma re Testigo reʼ ma xrajoʼ ta xel äl chpan kitinamit, oxiʼ ajqʼijaʼ xkitäq itz chrij rchë nkäm. Taq ri Testigo ma xkäm ta, jun chkë ri ajqʼijaʼ riʼ kan xxiʼij riʼ. Rma riʼ, xbʼä rkʼë ri Testigo chqä xuʼij che rä chë tkyuʼ rumak.

We ri demonios najin yatkinäq, rït ütz nakʼutuj atoʼik che rä Jehová y ryä xkaturchajij pä (Proverbios 18:10). Ye kʼa we nawajoʼ chë Dios yaturchajij pä, rït nkʼatzin nayaʼ qa rubʼanik xa bʼa achkë costumbre ri rukʼwan riʼ rkʼë ri itzinïk o rkʼë ri nyaʼöx kiqʼij ri demonios. Chqä nkʼatzin naporoj o nakʼäq äl xa bʼa achkë ri rukʼwan riʼ rkʼë ya riʼ. Ya riʼ xkiʼän ri xeyaʼö ruqʼij Dios pa tinamït Éfeso. Ryeʼ xkimöl jontir kiwuj ri rukʼwan riʼ rkʼë ri itzinïk y xekiporoj äl (Hechos 19:19, 20). Kan ya riʼ chqä nkʼatzin nkiʼän rusamajelaʼ Dios komä. Rma riʼ tachpuʼ ruwäch xa bʼa achkë jun ri kʼo awkʼë ri rukʼwan riʼ rkʼë ri  itzinïk, achiʼel ri wuj ri kikʼwan kiʼ rkʼë ri magia o xa bʼa achkë jun ri nkiʼij ri winäq chë xkaturchajij chwäch ri itzelal, achiʼel ri këq chij ri nyaʼöx chkiqʼaʼ ri neʼy.

We rït nawajoʼ chë Dios kiʼ rukʼuʼx nuʼän awkʼë, ma xa xuʼ ta nkʼatzin nayaʼ qa kibʼanik costumbres o bʼanobʼäl ri ma yeqä ta chwäch Dios, xa kan nkʼatzin chqä kan pa rubʼeyal nayaʼ ruqʼij. Le Biblia nuʼij chë rït nkʼatzin naʼän ya reʼ:

Satanás chqä ri demonios yekiksan winäq rchë yekiʼän chqä rchë yekikʼüt itzel taq bʼanobʼäl. Ye kʼa Jehová chqä yeruksan winäq ri kikʼwan rubʼiʼ: ya riʼ ri testigos de Jehová (Isaías 43:10). Chwäch le Ruwachʼlew ye kʼo más ocho millones de Testigos. Jontir ryeʼ nkitäj kiqʼij rchë yekiʼän ütz taq bʼanobʼäl chqä rchë yekikʼüt kantzij taq naʼoj. Kan chkipan jbʼaʼ jontir tinamït, rït xkeʼawïl re winäq reʼ chkipan ri Salones del Reino, ri akuchï kan kiʼ kikʼuʼx xkatkikʼül apü.

Ri nkajoʼ ryeʼ ya riʼ yekitoʼ ri nkʼaj chik rchë nkiyaʼ ruqʼij Dios. Ryeʼ xkeʼapon chawachoch rchë xkatkitjoj chrij le Biblia, y xtkikʼüt chawäch achkë rubʼanik kan pa rubʼeyal nayaʼ ruqʼij Jehová. Rït ma xtkʼatzin ta xtatöj chkë. Ri Testigos kan kiʼ kikʼuʼx yekitjoj ri winäq rma kowan yekajoʼ chqä rma kowan nkajoʼ Jehová Dios.