Qachʼalal:

Rma kowan nqajoʼ Dios chqä rma yeqajoʼ ri winäq, röj nqajoʼ nqaʼän ri xuʼij qa Jesús: «Jäx kʼa chwäch ronojel le Ruwachʼlew y keʼitjoj ri winäq rchë yeʼok ntzeqelbʼëy. Keʼiqasaj pa yaʼ» (Mat. 28:19, 20; Mar. 12:28-31). Taq kantzij nqjowan, röj nqkowin yeqatoʼ ri winäq ri «nkajoʼ nkïl ri kʼaslemal ri majun bʼëy xtkʼis ta» (Hech. 13:48).

Ojer qa, kan nqatäj wä qaqʼij rchë yejeʼ qa pa qajolon ri jalajöj rubʼanik nqachäp tzij kikʼë ri winäq chqä rchë nqayaʼ qa qawuj chkë. Ye kʼa komä nkʼatzin nqakanuj nkʼaj chik rubʼanik rchë nqtzjon kikʼë. Rma ri winäq ma junan ta kinaʼoj, nkʼatzin nqatzʼët achkë nqä chkiwäch chqä achkë nbʼanö chkë chë nchʼpü kikʼuʼx. Rma riʼ, xtqakʼüt chë nqjowan taq xtqtzjon kikʼë chrij ri nkajoʼ nkitzjoj ryeʼ. ¡Re wuj reʼ bʼanon pä rchë nqkowin nqaʼän ya riʼ!

Re folleto reʼ nunukʼuj kij 12 naʼoj ri yekʼatzin chqë rchë nqakʼüt chë nqjowan chqä rchë yeqatoʼ ri winäq chrij le Biblia. Ri naʼoj yeʼelesan pä chpan jojun peraj rchë le Biblia ri akuchï Jesús o jun chik cristiano pa naʼäy siglo xsmajij jun naʼoj taq xtzjoj Ruchʼaʼäl Dios. Röj ma nqajoʼ ta chik xa xuʼ nqakamluj tzij chkë ri winäq, xa kan nqajoʼ nqakanuj rubʼanik rchë nqakʼüt chkiwäch chë yeqajoʼ. Tapeʼ jontir ri naʼoj ri yetzʼet chpan re folleto reʼ yekʼatzin taq nqatzjoj le Biblia, jojun chkë riʼ más xkekʼatzin taq xtqachäp tzij kikʼë ri winäq, taq xtqakamluj kichʼbʼexik chqä taq xkeqatjoj chrij le Biblia.

Taq xtanukʼuj rij jun naʼoj, taquʼ rij achkë rubʼanik nasmajij ri naʼoj riʼ taq xtatzjoj le Biblia chkë ri winäq chpan atinamit. Ri nqanaʼ chrij Jehová chqä chkij ri winäq más ruqʼij chwäch xa bʼa achkë rubʼanik nachäp tzij o yeʼatjoj ri winäq. Rma riʼ, tatjaʼ aqʼij rchë más nawajoʼ Jehová chqä rchë más yeʼawajoʼ ri winäq. Ya riʼ xkaturtoʼ rchë xkakowin xkeʼatoʼ ri winäq rchë yeʼok rutzeqelbʼëy Cristo.

Chqawäch röj kan jun mamaʼ utzil ri junan nqsamäj iwkʼë rïx chubʼanik rusamaj Jehová (Sof. 3:9). ¡Yë ta kʼa Qatataʼ xtyaʼö kʼïy utzil pan iwiʼ rma kan yeʼiwajoʼ ri winäq chqä ma yixtaneʼ ta chkitoʼik rchë yeʼok rutzeqelbʼëy Cristo!