Taq Dios majanä wä tuʼän Adán, ryä xuʼän jun ángel ri janina ruchqʼaʼ. Rchë Jehová kiʼ rukʼuʼx nuʼän qkʼë, röj kʼo chë nqakʼoxaj rutzij ri nimaläj ángel riʼ.

Taq qʼaxnäq chik kʼïy junaʼ bʼanon qa ri ángel riʼ, Dios xuʼän chë xaläx chwäch le Ruwachʼulew. Ryä xaläx pa tinamït Belén rkʼë jun qʼopoj rubʼiniʼan María, chqä rubʼiʼ xyaʼöx ya riʼ Jesús (Juan 6:38).

Taq xjeʼ chwäch le Ruwachʼulew, Jesús xkʼüt chë rukʼwan runaʼoj Jehová, rma kan ütz runaʼoj xuʼän chqä kan xerajoʼ ri winäq. Rma riʼ, ri winäq kan xkajoʼ xejeʼ rkʼë. Ryä chqä ma xxiʼij ta riʼ xkʼüt ri kantzij chrij Dios chkiwäch ri winäq.

Ryä chqä xeruknaj yawaʼiʼ y xerukʼasoj jojun kamnaqiʼ.

Ri ukʼwäy taq bʼey judíos kan itzel xkinaʼ chë rä Jesús. Ryeʼ xkinaʼ riʼ rma Jesús xuʼij chë ryeʼ xa tzʼukün taq tzij nkikʼüt chqä xa itzel taq bʼanobʼäl yekiʼän.

Rma riʼ, ri ukʼwäy taq bʼey judíos xkiʼän chë ri qʼatöy taq tzij aj Roma xkichʼäy chqä xkikamsaj Jesús.