Adán y Eva xejeʼ kalkʼwal. Rma riʼ, ri winäq xekʼiyär chwäch le Ruwachʼulew. Chkipan qa ri qʼij riʼ, ye kʼo ángeles xkiʼän kan achiʼel xuʼän Satanás. Ryeʼ ma xkinmaj ta chik rutzij Dios.

Ri ángeles riʼ xepë chwäch le Ruwachʼulew chqä xkipoʼ kiʼ chë winäq rchë xekʼleʼ kikʼë ri ixoqiʼ. Ri kalkʼwal xejeʼ kan itzel wä kinaʼoj chqä kʼo wä más kichqʼaʼ chkiwäch ri nkʼaj chik winäq.

Le Ruwachʼulew ruyon itzel taq winäq xejeʼ chwäch. Le Biblia nuʼij chë ri itzelal xkʼiyär chwäch le Ruwachʼulew chqä chë ri winäq xa xuʼ wä itzelal nkajoʼ nkiʼän.

Noé kan ütz wä runaʼoj. Rma riʼ, Jehová xuʼij che rä chë xtkʼäm pä jun nimaläj jöbʼ ri xtnujsaj le Ruwachʼulew chë yaʼ. Ke riʼ xtchüp kiwäch jontir ri itzel taq winäq.

Dios chqä xuʼij che rä Noé chë tbʼanaʼ jun mamaʼ kax ri nleʼeʼ pa ruwiʼ yaʼ. Ri kax riʼ xbʼix arca de Noé che rä. Ryä xbʼix che rä chë keruksaj ru-familia chqä jontir kiwäch chköp chpan ri arca riʼ.

Noé xyaʼ rutzjol chkë ri winäq chë xtpë jun nimaläj jöbʼ, ye kʼa ryeʼ ma xkiyaʼ ta kixkïn che rä. Ye kʼo xa xetzeʼen chrij, y nkʼaj chik xa xmeqʼeʼ kikʼë.

Taq Noé xkʼïs rubʼanik ri arca, xeruksaj ri chköp chpan.