Keʼatoʼ ri yekʼoxan awchë rchë nkiquʼ rij ri yekinmaj chqä ri yekiʼän pa kikʼaslemal. Keʼabʼanaʼ kʼutunïk ri nuʼän chë yechʼobʼon ri yekʼoxan awchë; riʼ xkerutoʼ rchë xtkiquʼ rij ri achkë nkinaʼ.

Keʼatoʼ ri winäq rchë nkitzʼët achkë qäs rma nkiʼän jun utziläj bʼanobʼäl. Keʼatoʼ ri winäq rchë nkiquʼ achkë rma yekiʼän utziläj taq bʼanobʼäl. Chqä keʼatoʼ rchë nqʼax chkiwäch chë kʼo chë yekiʼän riʼ rma kajowabʼäl chrij Jehová, kajowabʼäl chkij ri winäq y rma nkiloqʼoqʼej ri naʼoj ye kʼo chpan le Biblia. Tabʼanaʼ che ri winäq nkiquʼ rij ri najin nakʼüt, y ma xa xuʼ ta taʼij chkë ri kʼo chë nkiʼän. Taq xtakʼïs atzijonem, ri winäq ma kʼo ta chë itzel nkinaʼ rma ri xkikʼoxaj, xa kʼo ta chë nkirayij nkismajij ri naʼoj xakʼüt chkiwäch.

Tabʼanaʼ chë ri winäq nkiyaʼ ruqʼij Jehová rkʼë ri nakʼüt. Takʼutuʼ chkiwäch ri winäq chë ri naʼoj chqä ri pixaʼ ye kʼo chpan le Biblia, nqrtoʼ rchë nqatamaj ruwäch Dios y nkikʼüt chqawäch chë ryä janina nqrajoʼ. Takʼutuʼ chkiwäch ri winäq achkë nunaʼ Jehová taq kʼo jun nkichaʼ nkiʼän pa kikʼaslemal y tabʼanaʼ chë nkʼiyär kiraybʼal rchë nkiʼän ri nqä chwäch Jehová.