TJONÏK 19
¿Ye kantzij taq cristianos ri testigos de Jehová?
Ri testigos de Jehová nqanmaj chë röj yoj kantzij taq cristianos. ¿Achkë rma? Tqatzʼetaʼ akuchï qesan wä pä ri nqanmaj chqä ri qabʼiʼ qayaʼon. Y tqatzʼetaʼ chqä achkë rubʼanik qakʼutun chë nqajowalaʼ qiʼ chqawäch.
1. ¿Akuchï kesan wä ri testigos de Jehová ri nkinmaj?
Jesús xuʼij reʼ che rä Dios: «Ri achʼaʼäl rït ya riʼ ri kantzij» (Juan 17:17). Röj, ri testigos de Jehová nqaʼän chqä ri xuʼän Jesús: ronojel mul kan chpan Ruchʼaʼäl Dios nqesaj wä pä ri nqanmaj. Jun tzʼetbʼäl chrij riʼ, ya riʼ ri xbʼanatäj pa taq junaʼ 1870 taq jun molaj winäq ri nkitjoj wä kiʼ chrij le Biblia xkichäp runukʼuxik ruwäch Ruchʼaʼäl Dios. Ryeʼ kan chpan le Biblia xkesaj wä pä ri nkinmaj, yajün taq ma ya riʼ ta wä ri naʼoj nkikʼüt ri Iglesias. Chrij riʼ ryeʼ xkitzjoj chkë ri nkʼaj chik ri najin wä nkitamaj. a
2. ¿Achkë rma nbʼix testigos de Jehová chqë?
Jehová nuʼij chë, ri ru-testigos, ya riʼ ri winäq ri nkiyaʼ ruqʼij chqä nkitzjoj ri kantzij chrij ryä (Hebreos 11:4-12:1). Jun tzʼetbʼäl. Ojer qa, Dios xuʼij che rä rutinamit: «Rïx yïx n-testigos» (taskʼij ruwäch Isaías 43:10). Y che rä Jesús nbʼix «ri Testigo ri kantzij ntzjon» (Apocalipsis 1:5). Rma riʼ chpan ri junaʼ 1931 xqachaʼ ri bʼiʼaj testigos de Jehová. Y röj kan kiʼ qakʼuʼx rma qakʼwan ri bʼiʼaj riʼ.
3. ¿Achkë rubʼanik nkikʼüt ri testigos de Jehová chë yejowan kan achiʼel Jesús?
Jesús kan kowan xerajoʼ rutzeqelbʼëy, rma riʼ kan achiʼel ru-familia xerutzʼët (taskʼij ruwäch Marcos 3:35). Ri testigos de Jehová chqä kan junan rubʼanon qawäch; jontir xa jun familia qabʼanon. Rma riʼ taq nqatzʼët jun chik qachiʼil nqaʼij «qachʼalal» che rä (Filemón 1, 2). Chqä, nqanmaj re tzij reʼ: «Keʼiwajoʼ jontir ri qachʼalal» (1 Pedro 2:17). Ri testigos de Jehová kan kʼïy rubʼanik nqakʼüt chkiwäch qachʼalal chwäch jontir le Ruwachʼulew chë yeqajoʼ. Jun rubʼanik, ya riʼ taq yeqatoʼ taq najin nkiqʼaxaj kʼayewal.
TQATAMAJ MÁS CHRIJ RE NAʼOJ REʼ
Tqatamaj más chrij ri kiqʼaxan pä ri testigos de Jehová. Chqä tqatzʼetaʼ achkë nkʼutü chë röj yoj kantzij taq cristianos.
Ri kantzij taq cristianos kan chpan le Biblia nkesaj wä pä ri nkinmaj chqä nkitzjoj ri naʼoj riʼ chkë ri winäq.
4. Jontir ri nqanmaj kan chpan le Biblia qesan wä pä
Jehová kan ojer chik rubʼin qa chë komä más xtqʼax chqawäch ri naʼoj ye kʼo chpan le Biblia. Tiskʼij ruwäch Daniel 12:4 y kixtzjon chrij reʼ:
-
¿Achkë riʼ ri kan xtkʼiyär kikʼë rusamajelaʼ Dios taq xtkinukʼuj ruwäch le Biblia?
Tatzʼetaʼ achkë rubʼanik xkinukʼuj ruwäch Ruchʼaʼäl Dios jun molaj winäq ri nkitjoj wä kiʼ chrij le Biblia. Kikʼë ryeʼ chqä xjeʼ Charles Russell. Titzʼetaʼ ri VIDEO y kixtzjon chrij reʼ:
-
Achiʼel xqatzʼët qa chpan ri video, ¿achkë rubʼanik xkinukʼuj ruwäch Ruchʼaʼäl Dios Charles Russell chqä ri nkʼaj chik rachiʼil?
¿Ataman rït reʼ?
Kʼo mul, röj qajalon jojun chkë ri nqanmaj. ¿Achkë rma? Rma Dios kan eqal eqal najin nuyaʼ qʼij chqë rchë nqʼax Ruchʼaʼäl chqawäch, kan achiʼel nuʼän ri Qʼij nmaqʼaʼ ri eqal eqal nusaqirsaj pä jontir (tiskʼij ruwäch Proverbios 4:18). Rma riʼ tapeʼ le Biblia ma yejalatäj ta ri naʼoj ye kʼo chpan, röj nqajäl jojun chkë ri nqanmaj taq más nqʼax jun chkë ri naʼoj riʼ chqawäch.
5. Nqatzjoj ri kantzij chrij Jehová
¿Achkë rma testigos de Jehová qabʼiʼ xqayaʼ qa? Titzʼetaʼ ri VIDEO y kixtzjon chrij reʼ:
-
¿Achkë rma kan ütz xqachaʼ ri bʼiʼaj testigos de Jehová?
¿Achkë rma Jehová yeruchaʼon jojun winäq rchë yeʼok ru-testigos? Rma ri winäq riʼ nkitzjoj ri kantzij chrij Jehová, rma kan kʼïy tzʼukün taq tzij bʼin chrij ryä. Tqatzʼetaʼ jojun chkë ri tzʼukün taq tzij riʼ.
Ye kʼo jojun religiones nkikʼüt chë Dios nrajoʼ chë yeqaksaj tyox rchë nqayaʼ ruqʼij. Ye kʼa ¿kantzij komä riʼ? Tiskʼij ruwäch Levítico 26:1 y kixtzjon chrij reʼ:
-
Achiʼel nuʼij re texto reʼ, ¿kantzij komä ri nkiʼij ri religiones? ¿Achkë nunaʼ Dios taq yeksäx tyox rchë nyaʼöx ruqʼij?
Ye kʼo jojun ukʼwäy bʼey pa taq religiones nkikʼüt chë Jesús ya riʼ Dios. Ye kʼa ¿kantzij komä riʼ? Tiskʼij ruwäch Juan 20:17 y kixtzjon chrij reʼ:
-
Achiʼel nuʼij re texto reʼ, ¿kantzij komä ri nkiʼij ri ukʼwäy taq bʼey riʼ? ¿Xa ye junan komä Dios chqä Jesús?
-
¿Achkë nanaʼ rït taq natamaj chë Jehová rubʼin chkë rusamajelaʼ chë tkikʼutuʼ ri kantzij chrij ryä chqä chrij Rukʼajol?
6. Kan nqajowalaʼ qiʼ chqawäch
Le Biblia yerujnamaj ri cristianos kikʼë ri jalajöj peraj rchë ri qachʼakul. Tiskʼij ruwäch 1 Corintios 12:25, 26 y kixtzjon chrij reʼ:
-
¿Achkë najowatäj chë nkiʼän ri kantzij taq cristianos taq ri nkʼaj chik kichiʼil nkitäj poqän?
-
Rkʼë ri atzʼeton rït, ¿achkë rubʼanik nkikʼüt ri testigos de Jehová chë kan nkajoʼ kiʼ?
Taq ri testigos de Jehová ri ye kʼo chpan jun tinamït nkitäj poqän, ri kichiʼil ri ye kʼo pa nkʼaj chik tinamït kan chanin yekitoʼ. Rchë nitzʼët jun tzʼetbʼäl chrij riʼ, titzʼetaʼ ri VIDEO. Chrij riʼ kixtzjon chrij reʼ:
-
Ri testigos de Jehová yekitoʼ kichiʼil taq nkïl jun nüm kʼayewal, ¿naʼij rït chë ya riʼ nkʼutü chë kan nkajoʼ kiʼ? ¿Achkë rma?
Ri kantzij taq cristianos nkikʼüt chë yekajoʼ ri nkʼaj chik taq nkiyaʼ kitoʼik.
JOJUN WINÄQ NKIʼIJ REʼ: «Ri testigos de Jehová jun religión ri majanäj ta xchapatäj pä».
-
¿Ajän riʼ taq Jehová xuʼij «testigos» chkë ri winäq ri nkiyaʼ ruqʼij?
RI XQATAMAJ QA
Ri testigos de Jehová ye kantzij taq cristianos. Röj xa jun familia qabʼanon chwäch jontir le Ruwachʼulew, nqayaʼ ruqʼij Dios, chpan le Biblia qesan wä pä ri nqanmaj y nqakʼüt ri kantzij chrij Jehová.
Tqakamluj ri xqatzʼët qa
-
¿Achkë rma testigos de Jehová qabʼiʼ xqayaʼ qa?
-
¿Achkë rubʼanik nqakʼüt chë kan nqajoʼ qiʼ?
-
¿Naʼij rït chë ri testigos de Jehová ye kantzij taq cristianos?
RCHË NATAMAJ MÁS
Tatamaj más chrij ri qaqʼaxan pä röj ri testigos de Jehová.
Ri testigos de Jehová kiqʼalajsan kʼïy tzʼukün taq naʼoj ri nkikʼüt ri winäq. Tatzʼetaʼ jun tzʼetbʼäl chrij riʼ.
Tatzʼetaʼ kiqʼalajsaxik jojun chkë ri akʼutunik chkij ri testigos de Jehová.
«Ri kʼutunïk ri nbʼan chkij ri testigos de Jehová» (Jun peraj rchë jw.org)
Stephen kan kʼïy itzelal xeruʼän rma kan itzel xnaʼ chkë ri nkʼaj chik. Tatzʼetaʼ achkë xtzʼët ryä chkij ri testigos de Jehová ri xuʼän chë xjäl rukʼaslemal.
«Kan más na chik itzel najin wä nuʼän nkʼaslemal» (Ri Chajinel, 1 de julio, 2015)
a Ri qawuj Ri Chajinel, ri ya riʼ ri wuj ri más nqaksaj, xchap pä rulesaxik chpan ri junaʼ 1879.
Rkʼë jbʼaʼ nawajoʼ natzʼët chqä reʼ
RI KʼUTUNÏK RI NBʼAN CHKIJ RI TESTIGOS DE JEHOVÁ
¿Achkë rubʼanik yekitjoj ri winäq chrij le Biblia ri testigos de Jehová?
Rkʼë ri tjonïk nkiyaʼ ri testigos de Jehová, rït ütz naksaj xa bʼa achkë Biblia nawajoʼ. Chqä ütz naʼän invitar jontir a-familia o xa bʼa achkë awachiʼil.
