TJONÏK 21
¿Achkë rubʼanik najin ntzjöx ri utziläj taq rutzjol ri ye kʼo chpan le Biblia?
Xa jbʼaʼ chik apü, Jehová xtksaj ri Ruqʼatbʼäl Tzij rchë xtchüp kiwäch jontir ri kʼayewal najin nqaqʼaxaj. Rma röj qataman ri utziläj rutzjol riʼ, nqajoʼ chqä nqatzjoj chkë ri winäq. Jesús xuʼij chkë rutzeqelbʼëy chë tkitzjoj ri utziläj rutzjol riʼ chkë jontir winäq (Mateo 28:19, 20). ¿Achkë najin nkiʼän ri testigos de Jehová rchë nkinmaj rutzij Jesús?
1. ¿Achkë rubʼanik najin nbʼanatäj ri nuʼij Mateo 24:14?
Jesús xuʼij: «Ri utziläj taq rutzjol chrij ri Ruqʼatbʼäl Tzij Dios xttzjöx chwäch jontir Ruwachʼulew» (Mateo 24:14). Ri testigos de Jehová kan nqä chqawäch nqaʼän re samaj reʼ ri kan kowan ruqʼij. Röj nqatzjoj ri utziläj taq rutzjol chwäch jontir le Ruwachʼulew pa más 1,000 chʼaʼäl. Riʼ kan kʼïy samaj rukʼwan, ye kʼa rkʼë rutoʼik Jehová najin nbʼan ri samaj riʼ.
2. ¿Achkë najin nqaʼän rchë nqatzjoj le Biblia chkë ri winäq?
Röj nqatzjoj le Biblia xa bʼa akuchï ye kʼo wä winäq. Chqä nqbʼä «chiʼ taq jay» kan achiʼel xkiʼän ri cristianos pa naʼäy siglo (Hechos 5:42). Ya riʼ jun rubʼanik nqatzjoj le Biblia chkë pa millón winäq ronojel junaʼ. Chqä, nqatzjoj le Biblia akuchï yeqʼax ye kʼïy winäq, rma kʼo mul ma yeqïl ta chkachoch. Röj ronojel mul nqakanuj rubʼanik rchë nqatzjoj chkë ri nkʼaj chik chrij Jehová chqä chrij ri ruchʼobʼon pa qawiʼ.
3. ¿Achoq pa kiqʼaʼ yaʼon wä qa ri samaj chrij rutzjoxik ri utziläj taq rutzjol?
Jontir ri kantzij taq cristianos kʼo chë nkitzjoj ri utziläj taq rutzjol. Re samaj reʼ kan kowan ruqʼij chqawäch röj. Rma riʼ xa bʼa jaruʼ nqkowin nqaʼän, röj nqatzjoj le Biblia chkë ri winäq, rma qataman chë ya riʼ xtbʼanö chë xtkïl kikʼaslemal (taskʼij ruwäch 1 Timoteo 4:16). Röj majun ta ntoj chqë rchë nqaʼän re samaj reʼ, rma le Biblia nuʼij: «Rïx majun ta xkʼutüx chiwä rma ri xikʼül, kan ke riʼ chqä tibʼanaʼ rïx» (Mateo 10:7, 8). Y, tapeʼ ma jontir ta winäq yojkikʼoxaj, röj ma nqayaʼ ta qa rutzjoxik le Biblia, rma ya riʼ jun rubʼanik rchë nqayaʼ ruqʼij Jehová chqä rchë kiʼ rukʼuʼx nuʼän.
TQATAMAJ MÁS CHRIJ RE NAʼOJ REʼ
Tqatzʼetaʼ achkë najin nkiʼän ri testigos de Jehová rchë nkitzjoj le Biblia chwäch jontir le Ruwachʼulew chqä achkë rubʼanik najin nqrtoʼ pä Jehová.
Nqatzjoj le Biblia chwäch jontir le Ruwachʼulew: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Nqatäj qaqʼij rchë nqatzjoj le Biblia chkë jontir winäq
Ri testigos de Jehová kan nqatäj qaqʼij rchë nqatzjoj le Biblia chkë ri winäq xa bʼa akuchï ye kʼo wä. Titzʼetaʼ ri VIDEO y kixtzjon chrij reʼ:
-
¿Achkë más xqä chawäch rït chrij ri nqaʼän röj ri testigos de Jehová rchë nqatzjoj le Biblia?
Tiskʼij ruwäch Mateo 22:39 chqä Romanos 10:13-15, y kixtzjon chrij reʼ:
-
¿Achkë rma nqaʼij chë taq nqatzjoj le Biblia nqakʼüt chë yeqajoʼ ri winäq?
-
¿Achkë nunaʼ Jehová chkij ri nkitzjoj ri utziläj taq rutzjol ri ye kʼo chpan le Biblia? (Titzʼetaʼ ri versículo 15).
5. Nqtoʼon rkʼë Dios
Kʼo kʼïy bʼanatajnäq ri nkikʼüt chqawäch chë Jehová nukʼwaj bʼey chqawäch taq nqatzjoj le Biblia. Tqatzʼetaʼ ri xbʼanatäj Nueva Zelanda. Kʼo jun tqaqʼij, jun Testigo ri rubʼiniʼan Paul xrïl jun ixöq taq najin wä nutzjoj le Biblia chiʼ taq jay. Ri qʼij riʼ —nmaqʼaʼ— ri ixöq xchʼö rkʼë Dios, xksaj rubʼiʼ y xuʼij che rä chë ttoʼ rchë nutamaj ruwäch. Paul nuʼij: «Oxiʼ horas chrij riʼ rïn yïn kʼo wä chik chuchiʼ rachoch».
Tiskʼij ruwäch 1 Corintios 3:9 y kixtzjon chrij reʼ:
-
¿Achkë rma ri xbʼanatäj Nueva Zelanda nukʼüt chqawäch chë Jehová ukʼwayon bʼey chqawäch chutzjoxik le Biblia?
Tiskʼij ruwäch Hechos 1:8 y kixtzjon chrij reʼ:
-
¿Achkë rma nkʼatzin rutoʼik Jehová chqë rchë nqatzjoj le Biblia?
¿Ataman rït reʼ?
Chpan ri qamoloj ri nbʼan chkojöl qʼij nkʼut chqawäch achkë rubʼanik nqatzjoj le Biblia. We rït yït bʼenäq chik chpan jun chkë ri moloj riʼ, ¿achkë naʼij rït chrij ri rubʼanik nqtjöx chriʼ?
6. Taq nqatzjoj le Biblia nqakʼüt chë najin nqanmaj rutzij Dios
Pa naʼäy siglo xejeʼ jojun winäq ri xkajoʼ xkiqʼät kisamaj rutzeqelbʼëy Jesús. Ri cristianos riʼ xebʼä chkiwäch ri qʼatbʼäl taq tzij rchë ma xetzʼil-öx ta taq xkitzjoj le Biblia (Filipenses 1:7). Komä chqä, ri testigos de Jehová kan ke riʼ najin nqaʼän. a
Tiskʼij ruwäch Hechos 5:27-42 y kixtzjon chrij reʼ:
-
¿Achkë rma ma xtqayaʼ ta qa rutzjoxik le Biblia? (Titzʼetaʼ ri versículos 29, 38 chqä 39).
JOJUN WINÄQ RKʼË JBʼAʼ XTKIKʼUTUJ REʼ CHAWÄ: «¿Achkë rma ri testigos de Jehová yeʼel chiʼ taq jay?».
-
¿Achkë xtaʼij rït chkë?
RI XQATAMAJ QA
Jesús xuʼij chkë rutzeqelbʼëy chë tkitzjoj ri utziläj taq rutzjol chwäch jontir le Ruwachʼulew. Jehová najin nutoʼ rutinamit rchë nuʼän re jun samaj reʼ.
Tqakamluj ri xqatzʼët qa
-
¿Achkë najin nbʼan rchë ntzjöx le Biblia chwäch jontir le Ruwachʼulew?
-
¿Achkë rma nqaʼij chë taq nqatzjoj le Biblia nqakʼüt chë yeqajoʼ ri winäq?
-
¿Naʼij rït chë rutzjoxik le Biblia ya riʼ jun samaj ri nuʼän chë kiʼ qakʼuʼx nqaʼän? ¿Achkë rma?
RCHË NATAMAJ MÁS
Tatzʼetaʼ achkë rubʼanik nkitzjoj le Biblia ri testigos de Jehová chkipan nmaʼq taq tinamït.
¿Achkë kibʼanon ri testigos de Jehová rchë nkitzjoj le Biblia chkë ri winäq ri kixqanen kiʼ chpan jun tinamït?
Nqakʼuqbʼaʼ kikʼuʼx ri kixqanen kiʼ chpan jun tinamït (5:59)
Takʼoxaj achkë rubʼanik rukʼaslemal jun qachʼalal ixöq ri ruksan rukʼaslemal rchë nuyaʼ ruqʼij Jehová.
Ri testigos de Jehová ye bʼenäq chkiwäch ri qʼatbʼäl taq tzij y kan kʼïy mul ye chʼakonäq. Tatzʼetaʼ jojun tzʼetbʼäl chrij riʼ.
a Yë Dios nbʼin chqë chë kʼo chë nqatzjoj le Biblia. Rma riʼ ri testigos de Jehová ma nqayoʼej ta na chë ri qʼatbʼäl taq tzij nkiyaʼ qʼij chqë rchë nqaʼän ri samaj riʼ.
Rkʼë jbʼaʼ nawajoʼ natzʼët chqä reʼ
RI KʼUTUNÏK RI NBʼAN CHKIJ RI TESTIGOS DE JEHOVÁ
¿Achkë rubʼanik yekitjoj ri winäq chrij le Biblia ri testigos de Jehová?
Rkʼë ri tjonïk nkiyaʼ ri testigos de Jehová, rït ütz naksaj xa bʼa achkë Biblia nawajoʼ. Chqä ütz naʼän invitar jontir a-familia o xa bʼa achkë awachiʼil.
