TJONÏK 22
¿Achkë ütz naʼän rchë natzjoj le Biblia chkë ri winäq?
Taq natamaj achkë nukʼüt le Biblia rkʼë jbʼaʼ rït naʼij: «¡Ri winäq chqä nkʼatzin nkitamaj ya reʼ!». Y kantzij wä, jontir winäq nkʼatzin nkitamaj riʼ. Ye kʼa rkʼë jbʼaʼ naxiʼij jbʼaʼ awiʼ natzjoj chkë nkʼaj chik ri najin natamaj. Rma riʼ tqatzʼetaʼ achkë ütz naʼän rchë ma xtaxiʼij ta awiʼ xtatzjoj le Biblia chkë ri winäq.
1. ¿Achkë ütz naʼän rchë natzjoj chkë awachʼalal chqä awachiʼil ri najin natamaj?
Ri rutzeqelbʼëy Jesús xkiʼij: «Ma nqkowin ta nqayaʼ qa rutzjoxik ronojel ri qatzʼeton pä chqä ri qakʼoxan pä» (Hechos 4:20). Ryeʼ kan kowan xkiloqʼoqʼej ri naʼoj ye kʼo chpan le Biblia, rma riʼ xkajoʼ xkitzjoj chkë jontir winäq. ¿Ke riʼ chqä nanaʼ rït? We ke riʼ, tatjaʼ aqʼij rchë kan pa rubʼeyal natzjoj chkë awachʼalal chqä awachiʼil ri najin natamaj (taskʼij ruwäch Colosenses 4:6).
Ütz naʼän reʼ
-
Taq xkatzjon rkʼë jun awachʼalal, taʼij apü reʼ rchë natzjoj le Biblia che rä: «Re semana reʼ kʼo jun xintamaj ri kowan xqä chi nwäch».
-
Taq xtatzʼët chë jun awachiʼil yawaʼ o najin nbʼison, taskʼij jun texto chwäch rchë nakʼuqbʼaʼ rukʼuʼx.
-
Taq ri awachiʼil pan asamaj xtkikʼutuj chawä achkë xaʼän ri sábado o domingo, tatzjoj jun naʼoj chkë ri xatamaj chpan atjonik chrij le Biblia o chpan ri qamoloj.
-
Takʼutuʼ chkiwäch awachiʼil ri qa-sitio pa Internet jw.org.
-
Taʼij chkë nkʼaj chik chë kejeʼ awkʼë taq nyaʼöx atjonik chrij le Biblia o takʼutuʼ chkiwäch achkë rubʼanik nkikʼutuj jun kitjonik chrij le Biblia pa jw.org.
2. ¿Achkë rma ütz nayaʼ chawäch natzjoj le Biblia rkʼë ri congregación?
Ri rutzeqelbʼëy Jesús ma xa xuʼ ta chkë ri winäq ri kitaman kiwäch xkitzjoj ruchʼaʼäl Dios. Jesús «ye kakaʼ xuʼän äl chkë rchë xerutäq äl chkipan jontir ri tinamït» rchë xkibʼetzjoj ruchʼaʼäl Dios (Lucas 10:1). Ya riʼ xbʼanö chë más winäq xkikʼoxaj chkij ri utziläj taq rutzjol. Chqä, ri rutzeqelbʼëy Jesús kan kiʼ kikʼuʼx xkiʼän rma kan xyaʼöx kichiʼil rchë xkiʼän ri samaj riʼ (Lucas 10:17). ¿Nawajoʼ rït chqä natzjoj le Biblia rkʼë ri congregación?
TQATAMAJ MÁS CHRIJ RE NAʼOJ REʼ
Tqatzʼetaʼ achkë ütz naʼän rchë ma xtaxiʼij ta awiʼ xtatzjoj le Biblia chqä rchë kiʼ akʼuʼx xtanaʼ taq xtaʼän riʼ.
3. Jehová kan xkaturtoʼ pä
Ye kʼo jojun nkixiʼij jbʼaʼ kiʼ nkitzjoj le Biblia rma ma kitaman ta achkë xtkiʼij pä ri winäq chkë o achkë nkiquʼ chkij ryeʼ.
-
Y rït, ¿naxiʼij jbʼaʼ awiʼ natzjoj chkë nkʼaj chik ri najin natamaj, o manä? ¿Achkë rma?
Titzʼetaʼ ri VIDEO y kixtzjon chrij reʼ:
-
Rchë ma xkixiʼij ta kiʼ xkitzjoj le Biblia, ¿achkë xkiʼän ri qʼopojiʼ kʼojolaʼ ri xeʼel pa video?
Tiskʼij ruwäch Isaías 41:10 y kixtzjon chrij reʼ:
-
¿Achkë rma ütz nakʼutuj atoʼik che rä Jehová we naxiʼij awiʼ natzjoj le Biblia?
¿Ataman rït reʼ?
Kʼïy chkë ri ye testigos de Jehová chik komä, xkinaʼ chë majun bʼëy xkekowin ta xkeʼel chutzjoxik le Biblia. Jun tzʼetbʼäl, jun achï ri rubʼiniʼan Sergey xnaʼ chë kan majun ruqʼij ta chqä kan nuxiʼij wä riʼ ntzjon kikʼë nkʼaj chik winäq. Ye kʼa, kʼo jun qʼij xchäp rutjonik chrij le Biblia. Ryä nuʼij: «Tapeʼ kan kʼayewal wä nuʼän chi nwäch yitzjon kikʼë ri winäq, kʼo jun qʼij xinyaʼ chi nwäch ntzjoj chkë nkʼaj chik ri najin wä ntamaj. Taq xinbʼän riʼ xinnaʼ chë kan kʼo nqʼij chqä kan xapon más pa wan ri naʼoj ye kʼo chpan le Biblia».
4. Ma taqasaj ta kiqʼij ri winäq
Taq ya natzjoj le Biblia che rä jun winäq, ma xa xuʼ ta taquʼ achkë xtaʼij che rä, xa kan tachʼobʼoʼ chqä achkë rubʼanik xtaʼij riʼ che rä. Tiskʼij ruwäch 2 Timoteo 2:24 chqä 1 Pedro 3:15, y kixtzjon chrij reʼ:
-
¿Achkë rubʼanik xtasmajij re textos reʼ taq xtatzjoj le Biblia chkë nkʼaj chik winäq?
-
Rkʼë jbʼaʼ jojun awachʼalal o awachiʼil ma junan ta nkiquʼ awkʼë rït. ¿Achkë ütz naʼän? ¿Y achkë kʼo chë ma naʼän ta?
-
Pa rukʼexel naʼij chkë achkë kʼo chë nkinmaj, ¿achkë rma más ütz chë kan pa rubʼeyal yatzjon kikʼë?
5. Kan kiʼ qakʼuʼx nqanaʼ taq nqatzjoj ri utziläj taq rutzjol
Jehová xuʼij che rä Jesús chë ttzjoj ri utziläj taq rutzjol. ¿Achkë rubʼanik xtzʼët Jesús ri samaj riʼ? Tiskʼij ruwäch Juan 4:34 y kixtzjon chrij reʼ:
-
Ri rukïl taq wäy yojkitoʼ rchë ma nqkäm ta chqä rchë kiʼ qakʼuʼx nqaʼän. ¿Achkë rma xuʼij Jesús chë taq nqaʼän ruraybʼal Dios —ri ntok chqä rutzjoxik ri utziläj taq rutzjol chpan— kan achiʼel ta najin nqatäj jun rukïl wäy?
-
¿Achkë naʼij rït? ¿Achkë utzil xtawïl we xtatzjoj ri utziläj taq rutzjol chkë ri winäq?
Ri ütz naʼän
-
Chpan ri moloj ri nbʼan chkojöl qʼij, tatzʼetaʼ achkë naʼoj xkatkitoʼ rchë xtachäp atzij kikʼë ri winäq.
-
Takʼutuj che rä ri najin nyaʼö atjonik achkë ütz naʼän rchë yayaʼöx chpan ri programa rchë ri moloj ri nbʼan chkojöl qʼij. Ri asamaj xtyaʼöx xkaturtoʼ rchë más ütz rubʼanik xtatzjoj chkë nkʼaj chik ri najin natamaj.
-
Taksaj ri peraj «Jojun winäq nkiʼij reʼ» y «Jojun winäq rkʼë jbʼaʼ xtkikʼutuj reʼ chawä» ri kʼo chpan re libro reʼ rchë natamaj achkë rubʼanik xtaqʼalajsaj kikʼutunik ri winäq chqä achkë ütz naʼij taq ma nkajoʼ ta yatkikʼoxaj.
JOJUN WINÄQ RKʼË JBʼAʼ XTKIKʼUTUJ REʼ CHAWÄ: «¿Ütz awäch? ¿Achkë najin naʼän komä?»
-
¿Achkë ütz naʼän rchë natzjoj che rä ri winäq riʼ ri najin natamaj chpan le Biblia?
RI XQATAMAJ QA
Kan kiʼ qakʼuʼx nqanaʼ taq nqatzjoj ri utziläj taq rutzjol, y rkʼë jbʼaʼ ma kan ta kʼayewal nachäp rutzjoxik.
Tqakamluj ri xqatzʼët qa
-
¿Achkë xtbʼanö chawä rchë xtatzjoj ri utziläj taq rutzjol?
-
¿Achkë ütz naʼän rchë ma xtaqasaj ta kiqʼij ri winäq taq xtaʼän riʼ?
-
¿Achkë ütz naʼän rchë ma xtaxiʼij ta awiʼ xtatzjoj le Biblia?
RCHË NATAMAJ MÁS
Tatzʼetaʼ achkë kajiʼ rubʼanik ütz natzjoj le Biblia rkʼë ri tarjeta ri nqrtäq pa jw.org.
Naʼoj ri yojkitoʼ rchë nqatzüj ri tarjeta ri nqrtäq pa jw.org (1:43)
Tatamaj achkë kajiʼ naʼoj xkatkitoʼ rchë xtatzjoj ri utziläj taq rutzjol.
«¿Nawajoʼ rït yeʼatoʼ ri winäq rchë yeʼok rutzeqelbʼëy Cristo?» (Ri Chajinel, septiembre 2020)
Tatzʼetaʼ achkë tzʼetbʼäl ri kʼo chpan le Biblia nqrtoʼ rchë ma nqaxiʼij ta qiʼ nqatzjoj le Biblia tapeʼ kʼa yoj akʼalaʼ na.
Tatzʼetaʼ achkë ütz naʼän rchë natzjoj le Biblia chkë awachʼalal ri ma kitaman ta na ruwäch Jehová.
«¿Achkë rbʼanik yeqatoʼ qafamiliares rchë nkiyaʼ rqʼij Jehová?» (Ri Chajinel, 15 de marzo, 2014)
Rkʼë jbʼaʼ nawajoʼ natzʼët chqä reʼ
RI KʼUTUNÏK RI NBʼAN CHKIJ RI TESTIGOS DE JEHOVÁ
¿Achkë rubʼanik yekitjoj ri winäq chrij le Biblia ri testigos de Jehová?
Rkʼë ri tjonïk nkiyaʼ ri testigos de Jehová, rït ütz naksaj xa bʼa achkë Biblia nawajoʼ. Chqä ütz naʼän invitar jontir a-familia o xa bʼa achkë awachiʼil.
