Jesús xuʼij chë jun winäq kʼo chë nqasäx pa yaʼ rchë ntok rutzeqelbʼëy (taskʼij ruwäch Mateo 28:19, 20). Ye kʼa, ¿achkë ntel chë tzij yaqasäx pa yaʼ? ¿Y achkë kʼo chë nuʼän jun winäq rchë nqasäx pa yaʼ?

1. ¿Achkë rubʼanik kʼo chë nqasäx pa yaʼ jun winäq?

Rchë xqasäx pa yaʼ, Jesús xjuʼüx jontir ruchʼakul chpan ri raqän yaʼ ri rubʼiniʼan Jordán rma Juan, y chrij riʼ «xel pä pa yaʼ» (Marcos 1:9, 10). Ke riʼ chqä nbʼan kikʼë ri kantzij taq cristianos taq yeqasäx pa yaʼ. Ryeʼ njuʼüx qa jontir ri kichʼakul pa yaʼ.

2. ¿Achkë nukʼüt jun winäq taq nqasäx pa yaʼ?

Taq jun winäq nqasäx pa yaʼ nukʼüt chë rujachon chik riʼ pa ruqʼaʼ Jehová. ¿Y achkë kʼo chë nuʼän rchë nujäch riʼ pa ruqʼaʼ Jehová? Ri winäq riʼ kʼo chë nchʼö rkʼë Dios rchë nuʼij che rä chë xtyaʼ ruqʼij chpan rukʼaslemal. Ya riʼ kʼo chë nuʼän taq majanä tqasäx pa yaʼ. Ri winäq riʼ nuʼij che rä Jehová chë xa xuʼ ryä xtyaʼ ruqʼij chqä chë ri kʼo más ruqʼij chwäch ya riʼ nuʼän ri nqä chwäch ryä. Chqä, ruyaʼon chik chwäch ran chë xtkʼän runaʼoj chrij Jesús chqä xtsmajij ri xkʼüt qa. Jesús xuʼij: «We kʼo jun chiwä rïx nrajoʼ ntok nutzeqelbʼëy, ma tuʼän ta chik ri nqä chwäch ryä [...] chqä kirutzeqelbʼej ronojel mul» (Mateo 16:24). Taq ri winäq riʼ nujäch riʼ pa ruqʼaʼ Dios chqä nqasäx pa yaʼ, más junan xtuʼän ruwäch rkʼë Jehová chqä kikʼë ri nkiyaʼ ruqʼij.

3. ¿Achkë nkʼatzin nuʼän jun winäq rchë nqasäx pa yaʼ?

We rït nawajoʼ yaqasäx pa yaʼ, naʼäy kʼo chë natamaj ruwäch Jehová chqä nakʼuqbʼaʼ akʼuʼx chrij (taskʼij ruwäch Hebreos 11:6). Taq más xtatamaj ruwäch Jehová chqä xtakʼuqbʼaʼ akʼuʼx chrij, más xtawajoʼ. Ya riʼ xtbʼanö chë xtawajoʼ xtatzjoj le Biblia chqä xtaʼän ri nqä chwäch Jehová chpan akʼaslemal (2 Timoteo 4:2; 1 Juan 5:3). Taq jun winäq najin chik nukʼwaj «jun kʼaslemal ri nqä chwäch Jehová», ya riʼ taq rkʼë jbʼaʼ xtrajoʼ xtjäch rukʼaslemal pa ruqʼaʼ Dios chqä xtqasäx pa yaʼ (Colosenses 1:9, 10). a

 TQATAMAJ MÁS CHRIJ RE NAʼOJ REʼ

4. Ri nqatamaj qa chrij ri rubʼanik xqasäx pa yaʼ Jesús

Rchë natamaj más chrij ri rubʼanik xqasäx pa yaʼ Jesús, tiskʼij ruwäch Mateo 3:13-17. Chrij riʼ kixtzjon chrij reʼ:

• ¿Kʼa neʼy na komä Jesús taq xqasäx pa yaʼ?

• ¿Xa xuʼ jbʼaʼ yaʼ xkiyaʼ pa rujolon? ¿Achkë kʼa rubʼanik xbʼan che rä?

Taq Jesús xqasäx yän pa yaʼ, xchäp rubʼanik ri samaj ri xchlaʼej Dios che rä. Tiskʼij ruwäch Lucas 3:21-23 chqä Juan 6:38, y kixtzjon chrij reʼ:

• Taq Jesús xqasäx yän pa yaʼ, ¿achkë samaj xyaʼ más ruqʼij?

5. Rït chqä yakowin yaqasäx pa yaʼ

Rkʼë jbʼaʼ pa naʼäy naxiʼij jbʼaʼ awiʼ najäch awiʼ pa ruqʼaʼ Dios chqä yaqasäx pa yaʼ. Ye kʼa we rït natäj aqʼij rchë natamaj más ruwäch Jehová, ya riʼ xkaturtoʼ rchë ma kaʼiʼ ta chik akʼuʼx xtaʼän. Rchë nitamaj kiwäch jojun winäq ri xkitäj kiqʼij rchë xeqasäx pa yaʼ, titzʼetaʼ ri VIDEO.

Tiskʼij ruwäch Juan 17:3 chqä Santiago 1:5, y kixtzjon chrij reʼ:

• ¿Achkë ütz nuʼän jun winäq ri nrajoʼ nqasäx pa yaʼ?

1. Röj nqajäch qiʼ pa ruqʼaʼ Jehová taq nqaʼij che rä chë nqajoʼ nqayaʼ ruqʼij chpan qakʼaslemal.

2. Taq nqqasäx pa yaʼ nqakʼüt chkiwäch jontir chë qajachon chik qiʼ pa ruqʼaʼ Dios.

 6. Taq jun winäq nqasäx pa yaʼ ntok chpan ru-familia Jehová

Taq nqqasäx pa yaʼ nq-ok chpan jun familia ri kʼo chwäch jontir le Ruwachʼulew. Tapeʼ xa bʼa achkë na qatinamit o ri qaqʼaxan pä pa qakʼaslemal, jontir xa junan ri nqanmaj chqä qakʼwan jun kʼaslemal ri nqä chwäch Dios. Tiskʼij ruwäch Salmo 25:14 chqä 1 Pedro 2:17, y kixtzjon chrij reʼ:

• Rkʼë ri xqaskʼij qa, ¿achkë utzil nukʼäm pä pa qawiʼ ri nqqasäx pa yaʼ?

 RI XQATAMAJ QA

Jesús xuʼij chë kʼo chë nqqasäx pa yaʼ rchë nq-ok rutzeqelbʼëy. Y rchë nqkowin nqaʼän riʼ, kʼo chë nqakʼuqbʼaʼ qakʼuʼx chrij Jehová, nqasmajij ri naʼoj ye kʼo chpan le Biblia chqä nqajäch qiʼ pa ruqʼaʼ.

Tqakamluj ri xqatzʼët qa

• ¿Achkë rubʼanik kʼo chë nqqasäx pa yaʼ, y achkë rma kan kʼo ruqʼij nqaʼän riʼ?

• ¿Achkë rma nqaʼij chë ri najäch awiʼ pa ruqʼaʼ Dios rukʼwan riʼ rkʼë ri yaqasäx pa yaʼ?

• ¿Achkë kʼo chë nuʼän jun winäq ri nrajoʼ nujäch riʼ pa ruqʼaʼ Dios chqä nqasäx pa yaʼ?