¿Kʼo komä jun awachʼalal kamnäq chik? Rkʼë jbʼaʼ ri qʼij riʼ kan kowan xabʼison chqä xakʼutuj qa chawäch: «¿Achkë nbʼanatäj qkʼë taq nqkäm? ¿Xkentzʼët na chik jmul ri wachʼalal ri ye kamnäq äl?». Chpan re tjonïk reʼ chqä chpan ri jun chik xtqatzʼët achkë nuʼij le Biblia chrij riʼ ri kan kowan xtkʼuqbʼaʼ qakʼuʼx.

1. ¿Achkë nbʼanatäj qkʼë taq nqkäm?

Jesús xjnamaj ri kamïk rkʼë jun winäq ri qajnäq chë waran. ¿Achkë rma? Rma taq jun winäq qajnäq chë waran, ma nunaʼ ta achkë yebʼanatäj. Ke riʼ chqä nbʼanatäj taq jun winäq nkäm, ryä majun chik nunaʼ ta nixta nutäj poqän. Le Biblia nuʼij chë ri kamnaqiʼ majun chik nkinaʼ ta (taskʼij ruwäch Eclesiastés 9:5).

2. ¿Achkë rubʼanik nqrtoʼ ri nqatamaj ri kantzij chrij ri kamïk?

Ye kʼïy winäq nkixiʼij kiʼ chwäch ri kamïk chqä chkiwäch ri kamnaqiʼ. We rït chqä ke riʼ nbʼanatäj awkʼë, ri nuʼij le Biblia chrij riʼ kan xtkʼuqbʼaʼ akʼuʼx. Jesús xuʼij: «Ri kantzij xkixurköl» (Juan 8:32). Ri religiones nkikʼüt chë taq jun winäq nkäm kʼo jun nkʼaseʼ qa che rä, ye kʼa le Biblia ma ya riʼ ta nukʼüt. Taq jun winäq nkäm ma nutäj ta chik poqän. Rma ri kamnaqiʼ majun chik nkinaʼ ta, ryeʼ ma yekowin ta yojkitzʼlaʼ. Rma riʼ ma nkʼatzin nqchʼö rkʼë Dios pa kiwiʼ nixta nqayaʼ kiqʼij o nqaʼän xa bʼa achkë chik na jun rchë ma yojkitzʼlaʼ ta.

Ye kʼo jojun winäq nkiʼij chë yekowin yetzjon kikʼë ri kamnaqiʼ, ye kʼa riʼ ma kantzij ta. Achiʼel qatzʼeton pä, ri kamnaqiʼ majun chik nkinaʼ ta. Rma riʼ ri winäq ri nkiʼij chë yekowin yetzjon kikʼë ri kamnaqiʼ, rkʼë jbʼaʼ xa najin yetzjon kikʼë demonios ri najin nkesaj kichbʼäl winäq ri ye kamnäq chik. Ye kʼa taq nqatamaj achkë nbʼanatäj qkʼë taq nqkäm, ya riʼ nqrtoʼ rchë nqachajij qiʼ chkiwäch ri demonios. Jehová nuyaʼ rubʼixik chqë chë ma tqakanuj ta rubʼanik rchë nqtzjon kikʼë ri kamnaqiʼ rma retaman chë xa kikʼë ri demonios xtqtzjon wä, y ya riʼ xa xtqrtzʼlaʼ (taskʼij ruwäch Deuteronomio 18:10-12).

3. Ri nbʼanatäj qkʼë taq nqkäm

Chwäch jontir le Ruwachʼulew, ri winäq kan kʼïy nkiʼij chrij ri nbʼanatäj qkʼë taq nqkäm. Ye kʼa kʼïy chkë ri nkiʼij ma kantzij ta.

• ¿Achkë nkinmaj ri winäq pan atinamit rït chkij ri kamnaqiʼ?

 4. Ri nqatamaj ri kantzij chrij ri kamïk kʼo utzil nukʼäm pä pa qawiʼ

Taq nqatamaj ri kantzij chrij ri kamïk ma xtqaxiʼij ta chik qiʼ chkiwäch ri kamnaqiʼ. Tiskʼij ruwäch Eclesiastés 9:10 y kixtzjon chrij reʼ:

• ¿Yekowin komä yojkitzʼlaʼ ri kamnaqiʼ?

Ri kantzij ye kʼo chpan le Biblia nqrtoʼ rchë ma nqanmaj ta chik chë kʼo chë nqayaʼ kiqʼij ri kamnaqiʼ. Tiskʼij ruwäch Isaías 8:19 chqä Apocalipsis 4:11, y kixtzjon chrij reʼ:

• ¿Achkë komä nunaʼ Jehová naʼij rït taq jun winäq nuyaʼ kiqʼij ri kamnaqiʼ o nukʼutuj rutoʼik chkë?

5. Ri nqatamaj ri kantzij chrij ri kamïk nukʼuqbʼaʼ qakʼuʼx

Ye kʼïy winäq kʼutun chkiwäch chë taq xkekäm xtkitäj poqän rma ri ma ütz ta xkiʼän pa kikʼaslemal. Ye kʼa kan jaʼäl nqanaʼ rma qataman chë majun ta jun winäq xttäj poqän taq xtkäm, nixta ri winäq ri kan kʼïy itzelal xkiʼän pa kikʼaslemal. Tiskʼij ruwäch Romanos 6:7 y kixtzjon chrij reʼ:

• Le Biblia nuʼij chë taq jun winäq nkäm nkuy jontir rumak. Rma riʼ, ¿najin komä nkitäj poqän ri kamnaqiʼ rma ri kimak xkiʼän ojer? ¿Achkë naʼij rït?

Taq más nqatamaj ruwäch Jehová, más nqʼax chqawäch chë ryä majun bʼëy xtuʼän ta chë ri kamnaqiʼ xtkitäj poqän. Tiskʼij ruwäch Deuteronomio 32:4 chqä 1 Juan 4:8, y kixtzjon chrij reʼ:

• Rkʼë ri nuʼij re textos reʼ, ¿xtyaʼ komä qʼij jun Dios ri ke riʼ runaʼoj rchë nkitäj poqän ri winäq ri ye kamnäq chik?

• ¿Naʼij rït chë ri nqatamaj ri kantzij chrij ri kamïk nukʼuqbʼaʼ qakʼuʼx? ¿Achkë rma?

 RI XQATAMAJ QA

Taq jun winäq nkäm nkʼis rukʼaslemal. Ri kamnaqiʼ ma nkitäj ta poqän chqä ma yekitzʼlaʼ ta ri winäq.

Tqakamluj ri xqatzʼët qa

• ¿Achkë nbʼanatäj qkʼë taq nqkäm?

• ¿Achkë rubʼanik nqrtoʼ ri nqatamaj ri kantzij chrij ri kamïk?

• ¿Achkë rma kan nukʼuqbʼaʼ qakʼuʼx nqatamaj ri kantzij chrij ri kamïk?