Röj kʼo jalajöj qatzyaq ri nqä chqawäch yeqaksaj. We nqasmajij ri naʼoj ri yeruyaʼ le Biblia chrij riʼ, kan xtqkowin xtqachaʼ achkë tzyäq xtqaksaj chqä xtqaʼän chë Jehová kiʼ rukʼuʼx xtuʼän qkʼë. Tqatzʼetaʼ jojun chkë ri naʼoj riʼ.

1. ¿Achkë naʼoj xkojkitoʼ rchë xtqatzʼët achkë rubʼanik xtqawäq qiʼ?

Le Biblia nuʼij reʼ chkij ri cristianos: «Majun rma nqʼax ruwiʼ ri rubʼanik nkiwäq kiʼ, xa tkiksaj kinaʼoj rchë pa rubʼeyal tkiweqaʼ kiʼ chqä ütz rubʼanik kitzyaq tkiksaj». Chqä, kʼo chë nqʼalajin chkij chë ye chʼajchʼöj chqä chë «nkiyaʼ ruqʼij Dios» (1 Timoteo 2:9, 10). Tatzʼetaʼ achkë kajiʼ naʼoj nqatamaj qa chpan re texto reʼ. 1) «Majun rma nqʼax ruwiʼ ri rubʼanik nkiwäq kiʼ». Chpan rutinamit Jehová jalajöj rubʼanik nqawäq qiʼ, achiʼel atzʼeton pä chkipan ri qamoloj. Ye kʼa ri qatzyaq chqä ri rubʼanik nqaʼän che rä qawiʼ nukʼüt chë ma nqaqasaj ta ruqʼij ri qa-Dios. 2) «Pa rubʼeyal tkiweqaʼ kiʼ». Nqaʼän riʼ taq ma yeqaksaj ta tzyäq ri xa nkiʼän chë ri nkʼaj chik yepë itzel taq chʼobʼonïk pa kijolon o nkiyaʼ qaqʼij xa rma ri qatzyaq. 3) «Tkiksaj kinaʼoj». Nqaʼän riʼ taq ma nqakʼän ta qanaʼoj chkij ri winäq y yeqaksaj xa bʼa achkë tzyäq ri kʼa riʼ xeʼel pä. 4) Ri rubʼanik nqawäq qiʼ ronojel mul kʼo ta chë nukʼüt chë nqayaʼ «ruqʼij Dios» (1 Corintios 10:31).

2. ¿Achkë rma kʼo chë yeqaquʼ ri qachʼalal taq nqachaʼ achkë tzyäq xtqaksaj?

Kantzij na wä chë röj nqchaʼö achkë tzyäq xtqaksaj, ye kʼa kʼo chë nqatzʼët na we majun ta jun qachʼalal xtqatzäq rkʼë riʼ. Rma riʼ nqatäj qaqʼij rchë majun ta jun chiʼin xtnaʼ rma ri rubʼanik nqawäq qiʼ. Röj nqasmajij re naʼoj reʼ: «Chqajujnal röj tqabʼanaʼ ri nqä chkiwäch ri nkʼaj chik rchë kʼo utzil nkïl chqä rchë nqakʼuqbʼaʼ kikʼuʼx» (taskʼij ruwäch Romanos 15:1, 2).

3. ¿Achkë rma ri rubʼanik nqawäq qiʼ rkʼë jbʼaʼ xkerutoʼ ri nkʼaj chik rchë xtkajoʼ xtkitamaj ruwäch Jehová?

Röj nqatäj qaqʼij rchë ronojel mul kan pa rubʼeyal nqaksaj qatzyaq. Ye kʼa más na chik nqaʼän riʼ taq nqbʼä pa qamoloj chqä taq nqabʼetzjoj le Biblia. Röj ma nqajoʼ ta chë ri rubʼanik nqawäq qiʼ nuqasaj ruqʼij ri nqatzjoj chkë ri winäq. Pa rukʼexel riʼ, nqajoʼ chë ya riʼ yerutoʼ rchë nkajoʼ nkitamaj ruwäch Jehová chqä rchë «kan jaʼäl nqʼalajin ri tjonïk ri nuyaʼ Dios» (Tito 2:10).

 TQATAMAJ MÁS CHRIJ RE NAʼOJ REʼ

4. Taq kan pa rubʼeyal nqawäq qiʼ ma nqaqasaj ta ruqʼij Jehová

¿Achkë riʼ ri kʼo más ruqʼij chqawäch röj rma riʼ kan nqatzʼët na achkë rubʼanik nqawäq qiʼ? Tiskʼij ruwäch Salmo 47:2 y kixtzjon chrij reʼ:

• ¿Achkë rma ri nqatamaj chë qakʼwan rubʼiʼ Jehová nqrtoʼ rchë nqatzʼët achkë tzyäq xtqaksaj?

• ¿Kan nkʼatzin komä nqatzʼët na achkë rubʼanik nqawäq qiʼ taq nqbʼä pa qamoloj chqä taq nqabʼetzjoj le Biblia? ¿Achkë rma naʼij riʼ?

 5. Ri xtqtoʼö rchë kan pa rubʼeyal xtqawäq qiʼ

Titzʼetaʼ ri VIDEO.

Ri kʼo más ruqʼij ma ya riʼ ta ri jaruʼ rajäl qatzyaq, xa kan ya riʼ chë chʼajchʼöj chqä chë ma nuqasaj ta ruqʼij xa bʼa achkë ri najin nqaʼän. Tiskʼij ruwäch 1 Corintios 10:24 chqä 1 Timoteo 2:9, 10. Chrij riʼ kixtzjon chrij ri achkë rma ma xtqaksaj ta tzyäq ri...

• ... kowan xilxïk, tobʼotïk o ma chʼajchʼöj ta.

• ... ye latzʼ, küt kaqän o ri nkiʼän chë ri nkʼaj chik yepë itzel taq chʼobʼonïk pa kijolon.

Tapeʼ ri cristianos ma nqasmajij ta chik ri Pixaʼ ri xyaʼöx che rä Moisés, ri pixaʼ riʼ nukʼüt chqawäch achkë rubʼanik nchʼobʼon Jehová. Tiskʼij ruwäch Deuteronomio 22:5 y kixtzjon chrij reʼ:

• ¿Achkë rma ma ütz ta chë jun ixöq yeruksaj tzyäq ri achiʼel ta achï nqʼalajin chkipan, o jun achï ri achiʼel ta ixöq nqʼalajin?

Tiskʼij ruwäch 1 Corintios 10:32, 33 chqä 1 Juan 2:15, 16, y kixtzjon chrij reʼ:

• We ri winäq pa qatinamit o ri qachʼalal pa congregación ma ütz ta nkitzʼët achkë rubʼanik nqawäq qiʼ, ¿achkë rma kan kʼo chë nqaquʼ rij riʼ?

• ¿Achkë tzyäq o achkë rubʼanik nkiwäq kiʼ ri winäq pan atinamit rït?

• ¿Naʼij rït chë jojun chkë ri tzyäq riʼ ma ütz ta nuksaj jun cristiano? ¿Achkë rma naʼij riʼ?

 RI XQATAMAJ QA

Taq pa rubʼeyal nqawäq qiʼ, röj ma nqaqasaj ta ruqʼij Jehová chqä ma nqaqasaj ta kiqʼij ri nkʼaj chik.

Tqakamluj ri xqatzʼët qa

• ¿Achkë rma kan kʼo ruqʼij chwäch Jehová ri rubʼanik nqawäq qiʼ?

• ¿Achkë jojun naʼoj chpan le Biblia yojkitoʼ rchë nqatzʼët achkë rubʼanik xtqawäq qiʼ?

• Rkʼë ri rubʼanik nqawäq qiʼ, ¿nqkowin komä yeqatoʼ ri nkʼaj chik rchë xtkajoʼ xtkiyaʼ ruqʼij Jehová? ¿Achkë rma?