Tapeʼ rït kowan nawajoʼ Jehová chqä natäj aqʼij rchë ma nayaʼ ta bʼis pa ran, kʼo mul kʼo akuchï xkasach wä. Ye kʼa ye kʼo mak más ye nmaʼq chkiwäch ri nkʼaj chik (1 Corintios 6:9, 10). We rït xkaqä chpan jun mamaʼ mak, tnatäj chawä chë Jehová ma rma ta riʼ ma ta xkatrajoʼ chik; ryä kan xtrajoʼ xtküy amak chqä xtyaʼ atoʼik.

1. ¿Achkë kʼo chë nqaʼän rchë Jehová nuküy qamak?

Taq jun winäq ri nrajoʼ Jehová nunaʼ chë xuʼän jun mamaʼ mak, ri winäq riʼ kan janina ntiʼon ran. Ye kʼa Jehová nukʼuqbʼaʼ rukʼuʼx kikʼë re tzij reʼ ri rubʼin che rä rutinamit: «Tapeʼ ri imak rïx achiʼel ta kan qʼäq akëq kibʼanon, kan säq xkekanaj achiʼel ri nieve» (Isaías 1:18). We röj kan rkʼë ronojel qan nqatzolij qiʼ, Jehová kan xtküy qamak. Ye kʼa ¿achkë ntel chë tzij nqatzolij qiʼ? Ntel chë tzij chë kan ntiʼon qan rma ri mak xqaʼän, nqayaʼ qa rubʼanik ri ma ütz ta chqä nqaʼij che rä Jehová chë tkyuʼ qamak. Ya riʼ xtbʼanö chë kan xtqatäj qaqʼij rchë xtqajäl ri rubʼanik nqchʼobʼon, rchë xkeqayaʼ qa ri bʼanobʼäl ri xebʼanö chqë chë xqqä chpan ri mak riʼ chqä rchë xtqakʼwaj jun kʼaslemal ri nqä chwäch Jehová (taskʼij ruwäch Isaías 55:6, 7).

2. We nqqä chpan jun mak, ¿achkë rubʼanik yeruksaj Jehová ri ukʼwäy taq bʼey rchë nqrtoʼ pä?

Jehová nuyaʼ re naʼoj reʼ che rä jun winäq ri nuʼän jun mamaʼ mak: «Ttzjon kikʼë ri ukʼwäy taq bʼey ri ye kʼo pa congregación» (taskʼij ruwäch Santiago 5:14, 15). Re achiʼaʼ reʼ, ri yechaʼon rkʼë ri loqʼoläj ruchqʼaʼ Dios, nkajoʼ Jehová chqä yekajoʼ ri rusamajelaʼ. Ryeʼ yojkitoʼ rchë junan chik jmul nuʼän qawäch rkʼë Dios (Gálatas 6:1).

¿Achkë rubʼanik yojkitoʼ ri ukʼwäy taq bʼey we nqqä chpan jun mamaʼ mak? Kaʼiʼ u oxiʼ chkë ryeʼ xtkiksaj le Biblia rchë xtkikʼüt chqawäch chë ma ütz ta ri xqaʼän. Chqä, xtkikʼuqbʼaʼ qakʼuʼx y xtkiyaʼ qanaʼoj rchë ma xtqqä ta chik chpan ri mak riʼ. Rkʼë jbʼaʼ ri ukʼwäy taq bʼey xtkiʼij chqë achkë samaj ma ütz ta chik xtqaʼän pa congregación kʼa taq junan chik jmul xtuʼän qawäch rkʼë Jehová. We jun winäq nuʼän jun mamaʼ mak y ma nutzolij ta riʼ, ri ukʼwäy taq bʼey xtkesaj qa pa congregación rchë yekichajij jontir ri qachʼalal.

 TQATAMAJ MÁS CHRIJ RE NAʼOJ REʼ

3. Ri nqaʼij qamak nqrtoʼ rchë junan chik jmul nuʼän qawäch rkʼë Jehová

Xa bʼa achkë mak nqaʼän kan nuyaʼ bʼis pa ran Jehová, rma riʼ kʼo chë nqaʼij jontir qamak che rä. Tiskʼij ruwäch Salmo 32:1-5 y kixtzjon chrij reʼ:

• ¿Achkë rma kan kʼo utzil nqïl taq ma nqewaj ta qamak chwäch Jehová?

 4. Kan kʼo utzil nqïl jontir taq jun winäq nesäx qa pa congregación

We jun winäq ri xqä chpan jun mamaʼ mak ma nrajoʼ ta nusmajij rupixaʼ Jehová, nesäx qa pa congregación. Taq nbʼanatäj riʼ, röj ma nqakʼwaj ta chik qiʼ rkʼë nixta nqtzjon chik rkʼë. Tiskʼij ruwäch 1 Corintios 5:6, 11 chqä 2 Juan 9-11, y kixtzjon chrij reʼ:

• Achiʼel ri levadura ri nuʼän chë yespöj ri kaxlanwäy, ¿naʼij rït chë kʼo xtkʼäm pä pa ruwiʼ ri congregación we röj xtqakʼwaj qiʼ rkʼë jun winäq ri ma nrajoʼ ta nutzolij riʼ che rä rumak? ¿Achkë rma?

 RI XQATAMAJ QA

We nqqä chpan jun mamaʼ mak, ye kʼa rkʼë ronojel qan nqatzolij qiʼ chqä nqatäj qaqʼij rchë ma nqqä ta chik chpan, Jehová kan xtküy qamak.

Tqakamluj ri xqatzʼët qa

• ¿Achkë rma kan kʼo utzil nqïl taq ma nqewaj ta qamak chwäch Jehová?

• ¿Achkë kʼo chë nqaʼän rchë Jehová nuküy qamak?

• We nqqä chpan jun mamaʼ mak, ¿achkë rma kʼo chë nqakʼutuj qatoʼik chkë ri ukʼwäy taq bʼey?