Ütz nqaʼij chë Miguel —o «san Miguel», achiʼel nkiʼij jojun religiones— ya riʼ jun bʼiʼaj ri nuyaʼ le Biblia che rä Jesús taq majanä tpë chwäch le Rwachʼlew chqä taq ya xtzolin äl chkaj. a Le Biblia nuʼij chë xjeʼ chʼaʼoj chkiwäch Miguel chqä Satanás taq Moisés xkäm chqä chë Miguel xtoʼ jun ángel rchë nkowin nbʼeruʼij che rä ri profeta Daniel jun ri xuʼij äl Dios che rä (Daniel 10:13, 21; Judas 9). Miguel nutoʼ Rqʼatbʼäl Tzij Jehová y nuʼän chʼaʼoj kikʼë rkʼulel Dios. Rma riʼ kan taqäl chrij nyaʼöx ri bʼiʼaj riʼ che rä, rma ntel chë tzij: «Majun ta jun njunmatäj rkʼë Dios» (Daniel 12:1; Apocalipsis 12:7).

 Tqatzʼetaʼ achkë rma ütz nqaʼij chë Jesús ya riʼ ri arcángel Miguel.

•   Miguel ya riʼ «ri arcángel» (Judas 9). Ri tzij arcángel ntel chë tzij «ri ukʼwayon bʼey chkiwäch ri ángeles» y xa kamul nilitäj chpan le Biblia. Y che kaʼiʼ mul riʼ xa xuʼ chrij jun ntzjon wä, reʼ nukʼüt chë xa xuʼ jun ángel ke riʼ nbʼix che rä. Jun chkë ri versículos riʼ nuʼij reʼ chrij Jesús taq ya xkʼasöx yän äl: «Ri Ajaw xtqä pä chkaj rkʼë kuw rchʼaʼäl, rchʼaʼäl arcángel» (1 Tesalonicenses 4:16). Re versículo reʼ nuʼij chë rchʼaʼäl Jesús kan rchʼaʼäl arcángel. Rma riʼ, ütz nqaʼij chë Jesús ya riʼ Miguel, ri arcángel.

•   Miguel nukʼwaj bʼey chkiwäch kʼïy ángeles. «Miguel chqä ri r·ángeles xkiʼän chʼaʼoj rkʼë ri dragón», ntel chë tzij, ri Diablo (Apocalipsis 12:7). Miguel kan kʼïy uchqʼaʼ yaʼon pa rqʼaʼ chlaʼ chkaj. Le Biblia nuʼij chë ryä ya riʼ «jun chkë ri ukʼwäy bʼey ri kan kʼo rqʼij» chqä «ri nimaläj ukʼwäy bʼey» (Daniel 10:13, 21; 12:1). Re bʼiʼaj reʼ nkikʼüt chë Miguel ya riʼ «ri ukʼwayon bʼey chkiwäch ri ángeles chlaʼ chkaj», ya riʼ nuʼij David Aune, ri kan rtjon riʼ chrij ri Nuevo Testamento, chrij Miguel.

   Le Biblia xa xuʼ chik nutzjoj rij jun ri rkʼwan bʼey chkiwäch ri ángeles. Chriʼ nuʼij chë «ri Qajaw Jesús chqä ri r·ángeles xkepë chlaʼ chkaj chpan qʼaqʼ» (2 Tesalonicenses 1:7, 8; Mateo 16:27). Chqä 1 Pedro 3:21, 22 nuʼij chë «Jesús xbʼä äl chkaj y xyaʼöx ángeles, qʼatbʼäl tzij chqä uchqʼaʼ pa rqʼaʼ». Rkʼë ri xqatzʼët qa, ütz nqaʼij chë Jesús ya riʼ chqä Miguel, rma we ma ke riʼ ta, ntel chë tzij chë Dios xeryaʼ kaʼiʼ ri nkikʼwaj bʼey chkiwäch ri ángeles, y riʼ kan ma pa rbʼeyal ta rma rkʼë jbʼaʼ xa njeʼ chʼaʼoj chkiwäch che kaʼiʼ.

•   Miguel «xtbʼekatäj pä» chpan jun tiempo «ri xtjeʼ jun nimaläj kʼayewal» ri majun bʼëy bʼanatajnäq ta (Daniel 12:1). Chpan ri wuj Daniel, ri tzij «xtbʼekatäj pä» kʼïy mul nksäx chrij jun qʼatöy tzij ri kʼo jun nuʼän ri kan kowan rejqalen (Daniel 11:2-4, 21). Jesucristo, ri nbʼix chqä «Rchʼaʼäl Dios» che rä, xtchüp kiwäch ri rkʼulel Dios chqä xtköl rtinamit, rma yë ryä ri «Qʼatöy tzij pa kiwiʼ qʼatöy taq tzij» (Apocalipsis 19:11-16). Ryä xtuʼän riʼ chpan jun tiempo «ri xtpë jun nüm kʼayewal» ri majun bʼëy bʼanatajnäq ta kʼa komä (Mateo 24:21, 42).