Röj, ri testigos de Jehová, nqatäj qaqʼij chë junan nuʼän qawäch kikʼë ri qa-familias, y kan ke riʼ chqä nqajoʼ chkë ri qa-vecinos. Röj kan nqaloqʼoqʼej le familias rma chë kan yë Dios xtkirsan pä rchë (Génesis 2:​21-​24; Efesios 3:​14, 15). Chpan le Biblia Dios kan ruyaʼon pa naʼoj chkë jontir winäq chwäch ronojel Ruwachʼulew. Ruyaʼon ri naʼoj riʼ rma nrajoʼ rchë ri kʼlan taq winäq kiʼ kikʼuʼx yejeʼ chqä ütz nkikʼwaj kiʼ pa kikʼlajil.

 Röj, ri testigos de Jehová, nqatäj qaqʼij rchë nqasmajij ri naʼoj ri ye kʼo chpan le Biblia, ya riʼ nqtoʼö rchë kan ütz nqakʼwaj qiʼ pa qakʼlajil chqä nq-ok utziläj teʼej tataʼaj (Proverbios 31:10-​31; Efesios 5:⁠22–​6:4; 1 Timoteo 5:8). Tapeʼ jun familia ma junan ta nkinmaj chrij Dios, ye kʼa le Biblia nkowin nuʼän chë junan nuʼän kiwäch (1 Pedro 3:​1, 2). Tqatzʼetaʼ achkë nkiʼij jojun winäq taq xeʼok testigos de Jehová kikʼlaj:

•   Clauir, aj Brasil nuʼij reʼ: «Ri naʼäy 6 junaʼ yïn kʼlan rkʼë ya Ivete, kan xa xuʼ wä chʼaʼoj nqaʼän y ma kiʼ ta wä chik qakʼuʼx. Ye kʼa taq ya Ivete xok testigo de Jehová xjal runaʼoj. Komä nukʼüt más ajowabʼäl chi nwäch chqä xqä ruqʼaqʼal rujolon, y ya riʼ xqtoʼö rchë ma xqajäch ta qiʼ».

•   Agness, aj Zambia nuʼij reʼ: «Rïn ma nwajoʼ ta wä chë Chansa, ri wachjil, nutjoj riʼ chrij le Biblia, rma nquʼ wä chë ri testigo de Jehová xa yekijäch le familias. Rma komä ya xqʼax yän ri tiempo, xqʼalajin chi nwäch chë le Biblia kantzij na wä chë nqrtoʼ y komä más junan rubʼanon qawäch rkʼë wachjil».

 Y taq nqatzjoj ri ruchʼaʼäl Dios chkë ri qa-vecinos, nqakʼüt chkiwäch achkë rubʼanik nkiksaj ri naʼoj ye kʼo chpan le Biblia. Ke riʼ, ryeʼ más junan nuʼän kiwäch kikʼë ri ki-familia. Tqatzʼetaʼ jojun chkë riʼ:

•   ¿Achkë rubʼanik nawïl jun utziläj winäq rchë ntok akʼlaj?

•   Chpan ri naʼäy junaʼ yïx kʼlan, ¿achkë ütz niʼän rchë nisöl ri kʼayewal chpan ikʼlajil?

•   ¿Achkë rubʼanik ütz nakʼwaj awiʼ kikʼë ruteʼ rutataʼ akʼlaj?

•   ¿Achkë rubʼanik ütz niʼän che rä ruksaxik irajil?

•   ¿Achkë ütz niʼän rchë ma niʼän ta chik chʼaʼoj pan ikʼlajil?

•   ¿Achkë ütz niʼän rchë nikuyulaʼ iwiʼ?

•   ¿Achkë ütz naʼän rchë pa rubʼeyal naqʼïl awalkʼwal?

 Kʼo mul kan nuyaʼ wä chʼaʼoj. Pa junaʼ 1998, jun empresa ri rubʼiniʼan Sofres, xtzjoj chpan jun ru-publicación chë 1 chkë ri 20 kʼlaj taq winäq xkiyaʼ kʼayewal chrij kikʼlaj ri xok testigos de Jehová.

 Jesús xuʼij qa chë ri rutzeqelbʼëy xtyaʼöx wä kʼayewal chkij. Chqä xuʼij qa chë jojun kʼayewal riʼ kan pa kachoch xtkïl wä (Mateo 10:32-​36). Jun historiador ri rubʼiniʼan Will Durant, xuʼij chë pa ki-tiempo ri romanos taq yeqʼatö wä tzij nkiqʼabʼaj wä chrij «ri cristianismo chë yerujäch ri familias». a Y komä, kʼo jojun mul, ya riʼ chqä nqʼabʼäx chkij ri testigos de Jehová. Ye kʼa, ¿kantzij komä chë yë ri testigos de Jehová yeyaʼö chʼaʼoj pa jun familia?

 Taq nbʼix chkij ri testigos de Jehová chë yekijäch ri familias, ri Tribunal Europeo rchë Derechos Humanos xuʼij chë ri familiares ri ma ye testigos ta, ya riʼ yetkirsan chʼaʼoj. Nkiʼän riʼ rma ma nkajoʼ ta chë jun kichʼalal nusmajij ri nunmaj chqä chë ntok Testigo. Ri qʼatöy tzij chqä xuʼij: «Reʼ kan nbʼanatäj kikʼë jontir familias ri ma junan ta nkinmaj chrij Dios, y kan ke riʼ chqä nbʼanatäj kikʼë ri testigos de Jehová». b Tapeʼ yeyaʼöx kʼayewal chqij, röj ri testigos de Jehová, nqatäj qaqʼij rchë nqasmajij ri naʼoj ri nqïl chpan le Biblia: «Ma titzolij ta rukʼexel taq nbʼan jun itzelal chiwä. [...] Tibʼanaʼ jontir ri kʼo pan iqʼaʼ rchë ma njeʼ ta chʼaʼoj chiwäch kikʼë ri winäq» (Romanos 12:17, 18).

 Röj, ri testigos de Jehová, nqanmaj ri rubʼin qa Dios chpan le Biblia chë xa xuʼ ütz yakʼleʼ rkʼë jun winäq «ri runiman chik ri Ajaw», ntel chë tzij, junan ninmaj rkʼë (1 Corintios 7:​39 El Nuevo Testamento en Cakchiquel Occidental Primera Edición). Re pixaʼ reʼ, ri ruyaʼon qa Dios, kantzij na wä chë nkʼatzin chqë. Jun tzʼetbʼäl, chpan jun revista ri xel pa 2010 ri rubʼiniʼan Journal of Marriage and Family, nuʼij: «Ri kʼlan taq winäq ri junan nkinmaj chrij Dios chqä junan nkismajij ri nkinmaj, kʼïy mul kan más jaʼäl nkikʼwaj kiʼ». c

 Röj, ri testigos de Jehová, ma nqaʼij ta chkë ri kʼlan taq winäq chë tkiyaʼ qa kikʼlaj xa rma ma yë Testigos ta. Le Biblia ke reʼ nuʼij: «We ri rixjayil jun qachʼalal ma rutzeqelbʼëy ta Cristo, ye kʼa ri rixjayil ütz nutzʼët chë ryä kʼo rkʼë, ma tyaʼ ta qa. Y we ri rachjil jun ixöq ma rutzeqelbʼëy ta Cristo, ye kʼa ri rachjil ütz nutzʼët chë ryä kʼo rkʼë, ma tyaʼ ta qa rachjil» (1 Corintios 7:​12, 13). Y röj kan nqanmaj tzij chwäch re naʼoj reʼ.