Röj xa xuʼ yeqajlaj ri winäq ri nkitzjoj ri ütz taq rtzjol chrij Rqʼatbʼäl Tzij Dios ronojel ikʼ (Mateo 24:14). Re winäq reʼ rkʼë jbʼaʼ yeqasan chik pa yaʼ o xa xuʼ nkitzjoj le Biblia qkʼë tapeʼ ma yeqasan ta na pa yaʼ.

 Manä. Ma yë ta ri kchaj ri nuyaʼ jun winäq nbʼanö chë nbʼeʼok testigo de Jehová o nyaʼöx jun rsamaj pa congregación (Hechos 8:18-20). Kʼïy chkë ri kchaj yeyaʼöx ma nqatamaj ta achkë yeyaʼö rchë. Jontir ri Testigos yetoʼon rkʼë ri samaj ri najin nqaʼän chwäch jontir le Rwachʼlew. Ryeʼ nkiyaʼ kitiempo, kichqʼaʼ chqä ri kʼo kikʼë we yekowin chqä we naläx pa kan (2 Corintios 9:7).

 Chkipan jontir ri congregaciones, ri Testigos nkitzʼibʼaj jaruʼ samaj xkiʼän chutzjoxik le Biblia chpan jun ikʼ.

 Chkijujnal ri congregaciones nkijlaj ri samaj xkiʼän y nkitäq äl che rä ri sucursal ri ntzʼetö kichë. Chrij riʼ, ri sucursal nutäq äl pa central mundial jontir ri samaj xbʼan chkipan ri tinamït ri najin yertzʼët.

 Taq nkʼis ri jnaʼ rchë servicio, a ntzʼet jaruʼ Testigos ye kʼo chkipan chkijujnal ri tinamït. Chrij riʼ, yejläx rchë ntzʼet jaruʼ Testigos ye kʼo chwäch jontir le Rwachʼlew. Chpan ri peraj «Chwäch jontir le Rwachʼlew», ri kʼo pa qasitio rchë internet, nqʼalajin ri samaj xkiʼän chkijujnal ri tinamït. Kan jaʼäl nqanaʼ taq nqatzʼët ri samaj nkiʼän qachʼalal. Röj nqanaʼ kan achiʼel xkinaʼ ri naʼäy taq cristianos taq xkikʼoxaj ri najin wä nkiʼän ri kichiʼil (Hechos 2:41; 4:4; 15:3).

 Tapeʼ ma yeqajlaj ta ri winäq riʼ chkikojöl ri jaruʼ Testigos ye kʼo, kiʼ qakʼuʼx rma nkimöl kiʼ qkʼë. Kʼïy chkë ryeʼ yeʼapon taq nqanataj rkamik Jesús chpan jun jnaʼ. We nqajoʼ nqatamaj yë jaruʼ chkë ri winäq riʼ, xa xuʼ nqesaj ri jaruʼ Testigos ye kʼo chkë ri xeʼapon taq xnatäx rkamik Jesús. Chpan ri jnaʼ 2023, ye 20.461.767 winäq xeʼapon taq xqanataj rkamik Jesús.

 Kʼïy winäq ri ma nkimöl ta kiʼ qkʼë, najin yetjöx chrij le Biblia. Re tjonïk reʼ ma tojon ta. Chpan ri jnaʼ 2023, xyaʼöx jun 7.281.212 tjonïk chrij le Biblia ronojel ikʼ. Ye kʼo jojun winäq kan jnan xkikʼül kitjonik.

 Kʼïy mul, taq yebʼan ri censos, nkʼutüx chkë ri winäq achkë religión ye bʼenäq wä. Tqatzjoj rij ri Oficina del Censo de Estados Unidos. Re Oficina reʼ nuʼij chë jun chkë ri nrajoʼ nutamaj ya riʼ «we ri winäq nkinaʼ chë ye kichiʼil jun religión o manä». Chqä nuʼij chë ri censo xa xuʼ nukʼüt ri nkiʼij ri winäq, y ma yë ta ri kan najin nbʼanatäj. Ye kʼa röj ma yeqajlaj ta ri winäq ri nkiʼij chë ye qachiʼil, xa xuʼ yeqajlaj ri nkitzjoj le Biblia chqä nkiʼij jaruʼ samaj xkiʼän chrij riʼ chpan jun ikʼ.