Ri testigos de Jehová nkiksaj jun samajbʼäl rchë nkikʼüt chkiwäch ri winäq ri naʼoj ri ye kʼo chpan le Biblia. Ya reʼ jojun rubʼanik xkaturtoʼ ri tjonïk nqayaʼ:

•   Kiʼ akʼuʼx xtaʼän.

•   Xkatok rachiʼil Dios.

•   Xtatamaj achkë nutzüj le Biblia chqë chqawäch apü.

Chpan re peraj reʼ xtqaqʼalajsaj re kʼutunïk reʼ:

•  ¿Achkë rubʼanik yeqatjoj ri winäq chrij le Biblia?

•  ¿Kʼo chë ntöj ri tjonïk?

•  ¿Jaruʼ tiempo nyalöj ri tjonïk?

•  ¿Akuchï nchäp wä?

•  ¿Ütz ntjoj wiʼ jun kayoxiʼ mul paqeʼ?

•  We xtinkʼän ri tjonïk, ¿kʼo chë yinok testigo de Jehová?

•  ¿Ütz nksaj n-Biblia rïn?

•  ¿Ütz yejeʼ nkʼaj chik winäq wkʼë?

•  We rïn xintjoj yän wiʼ kikʼë ri testigos de Jehová ojer, ¿ütz ntjoj chik jmul wiʼ?

•  ¿Kʼo jun rubʼanik ntjoj wiʼ chrij le Biblia pa nyonïl y ma nkʼatzin ta na chë kʼo jun nyaʼö ntjonik?

 Jun testigo de Jehová xkaturtoʼ rchë xtatamaj chrij le Biblia. Naʼäy xkixtzjon chrij jun naʼoj y chrij riʼ chrij jun chik. Rkʼë rutoʼik ri libro Nawajoʼ rït yakʼaseʼ, eqal eqal xtatamaj achkë nukʼüt le Biblia y achkë rubʼanik yaturtoʼ pan akʼaslemal. We nawajoʼ natamaj más, tatzʼetaʼ re video reʼ.

 Manä, ma natöj ta. Ri testigos de Jehová nqanmaj ri xuʼij qa Jesús chkë rutzeqelbʼëy taq xuʼij: «Rïx majun ta xkʼutüx chiwä rma ri xikʼül, kan ke riʼ chqä tibʼanaʼ rïx» (Mateo 10:8). Chqä ma natöj ta ri samajbʼäl yeksäx chpan ri tjonïk, achiʼel ri Biblia o ri libro Nawajoʼ rït yakʼaseʼ.

 Ri libro rukʼamon pä 60 tjonïk. Rït yachaʼö jaruʼ mul nawajoʼ natjoj awiʼ. Ye kʼïy winäq nkajoʼ nkikʼïs jun tjonïk jmul pa jun semana, ye kʼa nkʼaj chik nkajoʼ nkikʼïs más tjonïk.

1.  1. Tanujsaj ri formulario ri kʼo chpan qa-sitio. Ri a-datos ri xtatzʼibʼaj chpan, xa xuʼ xtqaksaj rchë jun testigo de Jehová xttzjon awkʼë.

2.  2. Ri winäq ri xtyaʼö atjonik xttzjon awkʼë. Ryä xttzjoj chawä achkë xtatzʼët chpan atjonik chqä xtqʼalajsaj xa bʼa achkë akʼutunik kʼo.

3.  3. Rït chqä ri winäq riʼ xtiʼij qa achkë rubʼanik xtitjoj iwiʼ. Rït ütz nakʼül atjonik chawachoch, pa teléfono, pa videollamada, chpan carta o pa correo electrónico. Jbʼaʼ ma jun hora nyalöj ri tjonïk, ye kʼa kʼo mul nyalöj más o ma kan ta nyalöj; rït yatzʼetö achkë rubʼanon a-tiempo.

 Jaʼ, ütz. Rchë riʼ, tanujsaj ri formulario ri kʼo pa qa-sitio. Taq xkaskʼïx rchë xtyaʼöx atjonik, taʼij che rä ri winäq ri xtchʼö pä awkʼë chë xtatjoj awiʼ jun kayoxiʼ mul paqeʼ rchë xtatzʼët we xtqä chawäch o manä. Rïx xtiksaj ri folleto Nawajoʼ rït yakʼaseʼ, ri xa xuʼ rukʼamon pä ri naʼäy oxiʼ tjonïk ri ye kʼo chpan ri libro.

 Manä. Ri testigos de Jehová kan nqä chkiwäch nkitjoj kiʼ chrij le Biblia kikʼë ri winäq, ye kʼa majun bʼëy nkiʼij ta chkë chë kan kʼo chë yeʼok chpan ki-religión. Ryeʼ nkikʼüt ri naʼoj ri ye kʼo chpan le Biblia, y kitaman chë chkijujnal ri winäq yechaʼö achkë nkajoʼ nkinmaj (1 Pedro 3:15).

 Jaʼ. Ütz naksaj xa bʼa achkë Biblia ri nawajoʼ rït. Tapeʼ röj, ri testigos de Jehová nqaksaj ri Traducción del Nuevo Mundo, ri ma kʼayewal ta nqʼax chqä ma ye jalatajnäq ta ri naʼoj ye kʼo chpan, qataman chë ye kʼïy winäq nkiksaj ri Biblia ri rukʼulun chkë nkiksaj.

 Jaʼ. Ütz naʼän invitar jontir a-familia o xa bʼa achkë awachiʼil.

 Jaʼ, ütz natjoj chik jmul awiʼ. Y rkʼë jbʼaʼ kan más xtqä chawäch komä. Ri tjonïk nqayaʼ komä, xjal rchë yekʼut naʼoj ri nkʼatzin chkë ri winäq pa qaqʼij komä. Chqä, ri rubʼanik bʼanon pä che rä ri samajbʼäl nqaksaj nqrtoʼ rchë nqtzjon más chqawäch chqä kʼo kʼïy achbʼäl y videos rukʼamon pä, más chwäch rubʼanon qa.

 Jaʼ, kʼo. Tapeʼ ye kʼïy winäq más ütz nkinaʼ chë kʼo jun ntoʼö kichë rchë nkinukʼuj ruwäch le Biblia, ye kʼo nkʼaj chik ri más ütz nkinaʼ chë naʼäy nkitjoj kiʼ pa kiyonïl. Chpan ri peraj «Toʼïk rchë natjoj awiʼ chrij le Biblia» ye kʼo jojun samajbʼäl ri kowan xkatkitoʼ. Ya reʼ jojun chkë riʼ:

•   Videos rchë natjoj awiʼ chrij le Biblia. Chpan re peraj reʼ xtawïl koköj taq videos ri nkikʼüt ri naʼoj ri nkʼatzin natamaj chpan le Biblia.

•   Kʼutunïk ri yebʼan chrij le Biblia. Aweʼ xtawïl jojun peraj ri nkiqʼalajsaj kʼïy kʼutunïk ri yebʼan chrij le Biblia.

•   Kikʼojlibʼäl wuj pa Internet. Chpan re samajbʼäl reʼ xtawïl kʼïy publicaciones ri kesan ri testigos de Jehová.