1. Asuh ök lanökngöre ellōn ök ṙālö tarik in ök minkahten nö el Könvensön ik 1935?

ṘÒNGMÖ 18 samyeūheu ngam ṙāl tarik hē ò nö vōkö ik 1926. Mahaköp Paipöl invëka nak sin yöng ò, më Vamënyen Yāvē töngamuh tö ṙô hī. Lūöi tak kūön cha-a tö kikōnyö ngaich nët tak minā kikānö, haruklöng cha-a nö asīnken Yēsū Kristū nö löklōn Yāvē. Sā më holre Mahaköp Paipöl ngam ṙālö nö kaheuk samyeūheu nö nyā ngam rôiī òk ngam vāin inrē im Inmūlkūö Ngam Mā. Haṙī-ingre ngam tinrīken ò unôichrit ò nö hang ök minkahten ök tö ngö “Tökiröng Kiteūm.” Kahëtö J. F. Rötörfōt ik Könvensön i Vòshingtön. Asuh öp tö hakööpö ik Könvensön hē e?

2. Asuh ök vahënyö Prötör Rötörfōt nö in ök minkahten?

² Mikahtö elmat hī ang Prötör Rötörfōt nö i kaha ngam minkahten tö yip tö kakka töm Inmeukhömat 7:9 “tökiröng kiteūm” ngölōn sin më mahaköp Paipöl tö ngam tökiröng kiteūm inrē nö innëtö nö chamuh el halīöngö më töt uroh nö tö ngöönö ṙinātö ellōn. Mikahtö elnang hī ang Prötör Rötörfōt nö löknyö mat ngam Töhet līpöre tö yip tökiröng kiteūm * nö öt chuh el halīöngö, pô cha min nö töt kò-òngvah ip “sakamö tanānyö” ngam Tēv ngaich örheūheu nö aṅ nö ikūö ngih panam. (Inm. 7:14) Kilēḵngô re Yēsū:  “Kēḵngö nômöre chin kūö në pököre. Pöököre vö Chin tö tahëng; nup töt aṅ ngih kiteūm. Anū-ö nup inrē hachōkūö chu, ngaich hang ṙô chu min anū-ö; ngaich hĕng kiteūm nö elkatòh ngam töhĕng tak Yōm pököre.” (Yôh 10:16) Tököp yin nö i linöökö lōn Yāvē tö aṅhav in töm mineūka nômö tö-örheūheu-aṅ nö ing panam. (Mët. 25:31-33, 46) Sitih inlahen öng ngih tufömngöre mikah elmat nö hayööken yip hol maneuk hī hēk tö ök 18 samyeūheu ṙēḵti ṙālö tarik.—Sal. 97:11; Inc. 4:18.

3-4. Asuh ök mikah elmat taneūngen yik tököönyu hol maneuk hī ik 1935 könvensön?

³ Ngö ṙô ang Prötör Rötörfōt nö hatön yik yamihtö kūö ik Könvensön im mana-angrit ngam minkahten, “Yip mameūkken re in yīö min nö teūngen töm nômö tö-örheūheu-aṅ nö ing panam, mihôiṅ öi sin söklöre?” Hěng tak ök umuh prötör yamihtökūö vamë-eny yik yamihtökūö nö 20,000 ngaich pōyen tö töròngti yik samöklöre nö in cha nö aṅ ngam tökiröng kiteūm. Ngöṙô ngaich ang prötör Rötörfōt nö ikūö cha, “Yěh meuk! Angū-ö ön ngih tökiröng kiteūm!” höng hangtöre cha-a tö e ngaich keuheūtnyöre tö ṙanamlōnre, akahakūö cha-a inrē ngaich töre nö öt katöllöngö nö chuh el halīöngö öt rēhěn nö tö hachamö elkui töm töhet fanöinylö. Unôichrit ök sakamö ngam Könvensön 840 ṙôken yik kamë ngam vinôkö, pōyen yik in cha hē e aṅ ngam tökiröng kiteūm.

⁴ Akaha elmat ngaich ngam ṙāl tarik tö më tö kööṅnyu inrē tahëng hol ò tö cha nö ötkô nö nyā ngam rôtī òk ngam vāin inrē hē infēkö ngam Töhet Inmūlkūö Ngam Mā. Hěng tak ök prötör in cha tö ngö ṙô: “Ngam Memorīöl 1935 an mana-aṅ inlahen chu öich kēḵ minë minkahngö. Pò chu ngaich mikahtulōn tö ngam töhet kumlēḵ Yāvē tö chu öt katöllöng öich chuh el halīöngö; Kē-ěvkūö pöri chū-ö tö ngam mineūka nômö tö-örheūheu-aṅ öich ikūö ngih panam yēḵ e min hēk nö vī-i nö peretāis.” (Rōm. 8:16, 17; 2 Kòr. 1:21, 22) Lökten ngaich ngam tökiröng kiteūm nö sīöpö ṙôngö ngaich holṙen re nö la-evṙen tö më chööḵṙen tö hachamö elkui. *

5. Sitih mufē ang ngam Tēv Yāvē nö in yik ṙamangenre nö nyā ngam rôtī òk ngam vāin inrē?

⁵ Sā mat hī ngaich meuk, mufē yik hol maneuk re urēhěkūö ngam samyeūheu 1935 tö cha nö chamuh el halīöngö tö lōnre lökten cha-a misī nö nyā ngam rôtī òk ngam vāin inrē yēḵ cha nö afēkö ngam Töhet Inmūlkūö ngam Mā akahalōn pöri ngaich cha-a töre nö kô-en nö töt katöllöngö nö chuh el halīöngö. Lökten cha ngaich nö ṙāngenre nö kē-ě u. Sitih elmat ang Yāvē nö ngëichken vē töngatī inlahen hol maneuk hī? Öthō an lohten nö öt hō-en cha. Yěn ōt töngamuh yip tö ngatī inlahen nö kē minë minkahngö pön tökatöllöng tö lōnren chamuh el halīöngö, ngaich hòṅ sitih inlahen cha-a? (1 Kòr. 11:28) Yēḵ cha min nö hayāichngöre akaha elmat inrē tö re nö vaich, ngaich ṙāngen re nö kēḵ minë minkahngö, ngaich höng iṙūöhen nö löklōn Yāvē, ngaich öthō min Yāvē nö sōḵen cha ngaich kaheuk höt cha nö im tökiröng kiteūm. Pòrô min ngaich cha-a nö ötkēḵ minë minkahngö, sön min  cha-a nöng yihtökūö hē infēkö ngam Memorīöl pô cha nö hangenlōn tö Yāvē hēk Yēsū inrē tö nup tī cha nö in cha.

6. Asuh öp la-en tinöölô yip ma-ahānga tö Yēsū?

⁶ Sā mat hī ngaich meuk ranöhta yanīhi öp tökiröng kanihngen nöng ikūö hī, vai angū-ö yěi holṙô re öi kakkö ngam Inmeukhömat tö 7 mirūlö ngam vamënyö inlahen yip töhachmö elkui Kristīön tö më tökiröng kiteūm inrē. In e ang Yēsū nö töl ṙô yip ma-ahānga nö kiṙapkö minë tö fën la-a tö kalēḵ kuföt hòṅ u nö öt hachök ngih panam. Hanöng sā tī cha nö mikahngö māl yip kūön ngam Tēv tö hachamö elkui Kristīön, Ngam inlahen Yāvē kòl nö hō-o nup la-en cha. (Inm. 7:1-4) Ngaich reushu min cha-a nö hol Yēsū nö hayöng nö el halīöngö tö kūö ngam lanöökö cha. (Inm. 20:6) Ngaich yěn teūngen min yip tö 1,44,000 tö hachamö elkui töm raneushöre , ngaich ṙamlōn min yip ma-ahānga el halīöngö.

7. Sā ṙô ngam Inmeukhömat 7:9, 10, achīö yik tö meūkö tö Yôhan hē ò nö hameukhu mat, ngaich asuh ök la-en cha? (Ngëichköm nyat lama uk.)

⁷ Urěh ang Yôhan nö vënyö Inlahen më tö 1,44,000 rācha tömë kūönṙô inrē, unôichnöre ang Yôhan nö meuk ngam “tökiröng kiteūm” më töt kò-òngvah im kinyūngöm Armakētòn. Öt kanṙeūken cha-a tö kūö ṙôngöre (Vë-evkūö Inmeukhömat 7:9, 10.) Inyūtu min më tökiröng kiteūm tö “tö-isoh inyut” nö inmeuktö cha nö “öt mumu” tö tī ngih panam ngam Sī-ö köp pöri cha-a nö hameuktöre nö hangenlōn tö Yāvē hēk Kristū inrē. (Yāk. 1:27) Pōitô cha-a nö ngöṙô tökôlò An ngam yamih nö i Mine-eny Yāvē töm Kristū ò ngam sīöṅp ngam Tēv ò inrē. Aṅhav eltī cha-a tö rōi kachūr nö sökhaka inmeuktö cha nö ṙamölōn nö Rācha vö tö Yēsū ngam katöllö Yāvē nö Rācha.—Ngëichkö ṙôm Yôhan 12:12, 13.

8. Sitih inlahen vinënyi yip kūön Yāvē aṅ el halīöngö?

⁸ Vë-evkūö Inmeukhömat 7:11, 12. ṙamlōn më aṅ el halīöngö nö meuk ngam tökiröng kiteūm. Meuk inlahen cha ang Yôhan nö ha-öönyö Yāvē kūö ṙanamölōn re tö ngam tökiröng kiteūm. ṙamlōn yin min inrē yěn meuk inlahen ngam tökiröng kiteūm nö öt kò-òngvah yěn yih öp tökiröng kanihngen.

9. Asuh öp la-en yip tökiröng kiteūm tö sā ṙô ngam Inmeukhömat 7:13-15?

⁹ Vë-evkūö Inmeukhömat 7:13-15. Ngö ṙô ang Yôhan nö vë-eny nang hī tö ngam tökiröng kiteūm söich minë tö aṙū-uti inyutre cha-a, nö i mahām ngam pököre nö mī-isohnyö mat u.” Vinënyö cha nö hëtö elkuilōn löök inrē nö sökhak nö ikūö Yāvē. (Isa. 1:18) Kamëtöre yin nö löklōn Yāvē, tövōkö nö Kristīön, nö ṙamatö ellōnre nö im tö kitaknyu mahām, ngön inrē ngam innôlö cha nö in Yāvē. (Yôh. 3:36; 1 Pīt. 3:21) Lökten yin nö mihôiṅ nö hatööm-sakamö nö sök nö ikūö ngam kantēra ngam Tēv nö hang nup töng chööngö ò. Urěhlen ngam inhangköm tölöök inhānga hēk vinīten taṙòkhöre tarik cha-a,nö mahaköp tö nup töng kuilōn cha.—Mët. 6:33; 24:14; 28:19, 20.

10. (a) Asuh öp tökiröng ṙinatö ellōn më ṅ ngam tökiröng? (b) Asuh öp min kinlēḵngô maheuk cha min tö teungtakūö?

¹⁰ Ṙinatulōn ngam tökiröng kiteūm tö ngam Tēv min nö chumkūöṙen tö cha, pò ngam “amūichhak nö el kantēra nö hanyat tökui cha min.” Meuk taneungtö kūö ngih kinlēḵngô min ngam tökiröng kiteūm ngih  maheūkkö cha nö marò-òten: “Ngaich chūtngö mak mat min Anga-aṅ, nö ṙā-ang i mat cha, öt ōtngöre min inrē ngam kinpaha, ötrēhĕn min miṙivlōn nö umuh, öt pineūnyu, öt chanöku nö hēkngöre; ngaich nuk raneh inlahen nö chuhngöre..”—Inm. 21:3, 4.

11-12. (a) Sā ṙô ngam Inmeukhömat 7:16, 17, asuh nup min inkôlò yamih taneūngen ngam tökiröng? (b) Asuh öp min yanöölenmë tökiröng yanöölen ngam tökiröng kiteūm yěn yihtö kūö nö el, ngaich kūö yòh?

¹¹ Vë-evkūö Inmeukhömat 7:16, 17. Pōyen yip tarik ngam Tēv tökihngen tö nya-aṅkūöre tökūö minë kanihngen i panam. Ōt yip tö hachēlhöt vö tö kūö ngam ṙinatö ellōn re. Akahakūö pöri cha-a tö minë kanihngen cha min nö ha-ëtiyö, ngaich möl min cha-a nö teūngen tö nya-akūö re ip yamih ṙētak holre tö minë ṙô ngam Tēv. Yěn ahetngö ngih panam ngam Sī-ö min ang Yāvē, ngaich chumkūöṙen min anga-aṅ tö yip tökiröng kiteūm nö un fukkui töm “tökalēḵ tanānyö” ò. Unôichrit ngam tökiröng kanihngen min, ang Yēsū nö kē-ěkūö cha tö ngam “mak nômö tö-örheūheu-aṅ.” Asehkūöre man tö ngam kumchikṙen cha min yěn teūngen tö ngam nômö tö-örheūheu-aṅ. Ngaich öthō min cha-a nö kapah!—Yôhan 11:26.

¹² Ṙamlōn yip tökiröng kiteūm tö minë inkôlò re kahëtö Yāvē hēk Yēsū! Pōiṙāi cha-a nö imat Yāvē pôrò nö öt katöllöng nö chuh el halīöngö. Holṙô yip töhachamö elkui cha-a nö ha-öönyö Yāvē hēk Yēsū. Angū-ö inrē inlahen cha nö hameuktö minlēḵṙenre tö ngam Töhet Inmūlkūö Ngam Mā.

13-14. Kūö yòh öi hòṅ ṙòkhöre yihtö kūö im infēkö kinpaha Kristū?

¹³ Sā mat hī meuk inuk tö ngaich ngen samyeūheu nöng 1 tak in më tö 1,000 nyama ngam rôtī òk ngam vāin inrē nö in më yamihtökūö. Öt pōyen yip nyama ngam rôtī hēk òk ngam vāin inrē. Tö ngö manah angū-ö tö yip tö-aṅ min nö ing panam nö pōyen . Kūö yòh pöri cha-a nö yihtö kūö nö el Memorīöl? Afītöre man sin tö Inlahen re kūö yòh öm ṙung yihtö kūö el inpīhö öp holre. Kūö meh lohten hòṅ hameuktö hanangenlōn re tö ò. Ngatī yip tökiröng kiteūm inrē nö hameuktö hanangenlōnre  nö yihtö kūö nö im infēkö kinpaha Kristū tö yip töhachamö elkui inrē. Hameuktö ṙanamölōnre më tökiröng kiteūm töm kinpaha Kristū ngam lökten cha min nö teūngen töm nômö tö-örheū-heu-aṅ.

¹⁴ Ngam tahëng hēk lānyngen cha nö yihtö kūö pô cha nö hòṅ hang chööngö kahëtö Yēsū. Pön tölṙô cha ang Yēsū hē ò nö rultenre nö kēken e, ngö ṙô anga-aṅ tö cha: “Ngatī tī pöichö inköpkölōn yīö tö chu.” (1 Kòr. 11:23-26) Hanöng saha yip tö hachamö elkui nö ṙòngmö aṅ nö ing panam ngaich höng iṙūöhen cha-a nö fēkö ngam kinpaha kristū. Lökten yin më tökiröng kiteūm nö havëtö më tahëng inrē nö fēkö ngam kinpaha Kristū.

15. Hòṅ asuh nup la-en hī el ngam Memorīöl yěi höṅ ha-öönyö Yāvē hēk Yēsū inrē?

¹⁵ Ṙētak hī an ngam tinkökṙôre hēk vine-ekūötēv öi ha-öiny ngam Tēv hēk Kristū hē ngam Memorīöl. Ngih ön min kui ngam minkahten el ngih samyeūheu “Hameuktö Minlēḵṙenre Tö Minë Tī Ngam Tēv hēk Kristū Inrē Nö In Meh!” Yěi hang ngih minkahten min ngaich sīöp min ngam minlēḵṙen hī tö Yāvē hēk Kristū inrē. Yěn silôṙö min minë rôtī tö ngam vāin ngaich hòṅ köplōn ayī-ö tö u nö minkahngö ngam—alaha mahām Kristū. Kôtikūö min ayī-ö töm hanangenlōn Yāvē tö hī nö kēngö nômö ngam kūönre tö pôkūö hī. (Mët. 20:28) Ngòh töhangenlōn tö Yāvē hēk töm kūön ò inrē ngaich yihtökūö min anga-aṅ nö im infēkö kinpaha ò.

16. Asuh nup töhěngren nö in më tö hachamö elkui hēk tö më tökiröng?

¹⁶ Pôrò nö harīkngöre minë inkôlò yip tö kiröng kiteūm tö më töhachamö elkui. Sön pöri cha-a nö nët re nö pōiṙāi nö imat ngam Tēv. Nëtre cha-a nö pōiṙāi nö imat ò. Pön höng hěngren ngam ṙāi cha nö havaha tö ngam kūön ò. Lōnu Yāvē hēk Yēsū tö cha nö kööpö hanangenlōn tö cha. (Sal. 31:23) Mihôiṅ ngam Tēv nö hěngren ṙôken tī nö kē-ěkūö hī tö ngam töhet kumlēḵ re.

17. Asuh öp ahökkö yip chööḵṙen töhachamö elkui?

¹⁷ Ötlöktökūö finötnyöre yin më Töhachamö elkui Kristīön nö teūngen töm maheūkköre chinuhu el halīöngö. Pô e nö tö teūchhötvö tö ngam Tēv nö ellōn cha. Afēkö ngam maheūṅkköre cha-a, vë-ekūötēv nö chöö-önyten tö e ngaich meūkkö taneūngenre töm raneushöre nö el halīöngö. Öt rēhěn cha-a nö akahakūö töp alahare min yěn hachohlöngö. (Filip. 3:20, 21; 1 Yôhan 3:2) Sön pöri cha-a nöng hòṅ kapahare nö hòṅ meuk kūö Yāvē, Yēsū yip  ma-ahānga hēk tö yip tahëng tö hachamö elkui. Höktöre cha-a töm ṙētakre nö hol Yēsū nö hayöng nö holtö yip tahëng inrē tö hachāmö elkui.

18. Asuh öp ahökkö yip tökiröng kiteūm?

¹⁸ Meūka yin më tökiröng kiteūm töre min nö teūngen töm nômö tö-örheū-heu aṅ nômö pön ha-ehangen Ngū-ö nö chaphöt vö nö ellōn ngòh töhěngtak tarik. (Mum. 3:11) Meūka cha-a tö ngih panam min nö vī-i nö peretāis. Meūka cha-a inrē tö cha min nö mānlö patī re, vī panò-òṅ re min cha-a hēk öt vahavö min inrē yip kūön cha. (Isa. 65:21-23) Pōyen nup min la-en cha min nö el peretāis pōyen inrē nup haköp cha min in minë vahī Yāvē— minë rôngö, el inchōnngen, tö minë lātaṙeū inrē tö ngam mai. Ngam tö mötlö pöri nö in u nö ṙòkhöre töngam ngam innôlö cha tö e nö ngönlöre min.

19. Asuh nup tövai ṙētak kahëtö ngam Memorīöl nö in, ngaich ihē öp Memorīöl nö kēkaṙen el ngih samyeūheu?

¹⁹ Ngòh kamëtöre nö lök lōn Yāvē kē-ěvkūö anga-aṅ tö ngam tövai mineūka tö ò. (Yar. 29:11) Pōyen tī ang Yāvē hēk Yēsū nö hayööken hī hēk kē-ěkūö hī inrē tö ngam nômö tö-örheūheu-aṅ, hē öp Memorīöl inmin öi teūngen tö ṙētakre öi ha-öönyö cha. Ngam Memorīöl an tökiröng nö ṙētak vē tökô-en Kristīön nö meuk kūöre. Ip Sanichār, Māch 27, 2021 unôichrit sanipti tavūöi min nö kēkaṙen. Pōyen yip min töt kihngen nö yihtö kūö hē e, ōt pöri min yip töhakihtuṙen. Ōt yip më-el chēl nö kēken e. Köplōn pöri më-eṅ, tö Yāvē, Yēsū, yip ma-ahānga, hēk yip töhachamö elkui nö chumkūöṙen tö ngòh töhěng tak tarik tö yip töng kūönen hēk tö nup māṅ, Lōnu in tö yīö öi vāyö inlahen öi kēken e!