“Lökten yin aṅhati, tön öt akahalōn yin tö sakāmö, ötrēhěn tö ṙētak.”—MËTIV 25:13.

“Hīnöre yin, aṅhati, vë-ekūötēv inrē tön öt akahalōn yin tö hē öp ṙētak.”—MĀKÖS 13:33.

Öthěng tak tö akahakūö töp ṙētak öp manāngen min nö yih, tö ṙô ngam Töhet Līpöre. Höng ngam Tēv tö akahakūö tö e. Anga-aṅ ṙamātö öp ‘sakāmö hēk ṙētak’ re min nö kētö manāngen ngih panam. (Mëtiv 24:36) Tö ngö manah hòng pökeh ngaich angū-ö, tö hī ötkô akahakūö töp ṙētak e min? Hö-ö nö ngatī. Ik sā Yēsū misī nö ing panam, ōt nuk vahënyö ò nö in yik haköptö ò, nup tö meukö min urēhěkūö öp manāngen nö yih.

Ngöṙô ang Yēsū, “Pò vē tarik min nö lā-al höö, pūlngö inrē nö la-al höö. Yöng inyāichö öp min, kumyeūnö inrē, nö ṙōlkang chūök.” (Mëtiv 24:3, 7) Ōt inrē min nup “invah tölëlngökūö” tö ṙô ò. (Lūkös 21:11) Hö-ö öi töngamuh meuk minë vahënyö Yēsū?

Pōyen yip tarik mameuk kanihngen tökūö tī kinyūngö, inyāichö, kumyeūnö hēk invah inrē, pōyen inrē yik tökapah tökūö tī u. Sā ök Sunāmī ik samyeūheu 2004 el ngam Indian Ocean 2,25,000 ṙôken yik tarik tökapah ik hē e. Ngaich ik i-a samyeūheu ngam COVID-19 invah nö keuheūtngöre chūök, 26,00,000 ṙôkhang vah yik tarik tökapah tö kūö e. Yēḵ hī nyin meuk në töngatī tö ṙô Yēsū ngaich inmeuktö ngam manāngen anū-ö nö röhta.

“Manā-aṅ sakāmö” ngöṙô ngam Töhet Līpöre tö ngam ṙētak urēhěkūö ngam manāngen min. (2 Pītör 3:3, 4) Vë-eny nang hī ngam Innëtö Timôtī 3:1-5 tö inlahen yip tarik min ip manā-aṅ sakāmö nöng töhāngenlōn töre, yamikngö chehen holre, tö-angëṅ, öt töhāngenlōn inrē tö holre. (Ngëichkö ngam box “ Urēhĕkūö Ngam Manāngen Nö Yih.”) Hö-ö öi meuk yip tarik töngamuh töngatī tinrīken? Anū-ö nun në inrē inmeuktö ranöhta ngam manāngen ngih panam.

Irô-òten min ngam manā-aṅ sakāmö? Höng “rahëchtaṙen” tö ṙô ngam Paipöl. Ngaich unôichrit e min ngam Tēv nö ha-etngö yip mahachōichngen ngih panam.—Inmeukhömat 11:15-18; 12:12.

Ngaich ngam Tēv nö lēnngö tī tö öp ṙētak re min nö piyāingö në ötlanöökö ikūö ngih panam. (Mëtiv 24:36) Öt lōnu pöri anga-aṅ tö töhěng tak tarik nö kapah yěn yih öp manāngen. (2 Pītör 3:9) Pön lōnu tö hī ṙôkhöre öi aṅ. Lökten ò nö kētö ṙētak hī öi mikahtökūöre tö ò hěnghöre hateung minë kuilōn ò inrē.

Halēnlö ngam inköptö tarik anga-aṅ nö keuheūtngöre chūök hòṅ cha nö mikahtökūöre tö minë la-en re yěn hòṅ iyöng kūö öp tufömngöre panam min. Vë-eny ang Yēsū tö ngam tölöök inhangkö ngam Pūlngö min nö ahangka nö “inë taṙòkhöre panam.” (Mëtiv 24:14) Ik samyeūheu tö 2019 më Vamënyen Yāvē nö 200 crore kanta kahëti tö ṙētak re nö ahānga. Teungtökūö ngam ṙô Yēsū, in e mikahkūö ayī-ö tö ngam manāngen nö röhta.

Röhta ön ngaich ngam ṙētak ngam Tēv nö piyāingö në ötlanöökö ikūö ngih panam. Ngaich vīten ngih panam nö Peretāis, ngam chūök meh min kuchīken. Sitih inlahen pöri ayī-ö yěi hòṅ iyöng kūö e, vë-eny nang hī ngam yamih ātiköl.