Vënyu nang in tö minë lama-urěh ātiköl, tö inlahen ngam Tēv min nö veūten nö ha-etngö yip tötlöökö la-en tarik, tö nup la-en cha inrē tötlöök. Ṙinātu-ellōn ayī-ö tö e nö teung min, pön kilēḵngôre ngam Töhet Līpöre nö ngöṙô:

“Chuhngöre ngih panam.”—1 YÔHAN 2:17.

Mihôiṅ pöri ayī-ö ṙinātu-ellōn tö yip tarik nö öt ṙòkngöre vah min nö kapah pön ngöṙô ngam Töhet Līpöre nö vë-eny nang hī:

“Anga-aṅ pöri ngòh tö la-evṙen tö lōn ngam Tēv köp nöng örheūheu.”

Lökten yēḵ hī öi hòṅ aṅ, ngaich hòṅ la-evṙen ayī-ö tö nup lōn ngam Tēv. Hòṅ urěh pöri ayī-ö mikahtökūöre tö ngam Tēv, yēḵ hī hòṅ akahakūö tö nup kuilōn ò.

Ngöṙô ök misī Yēsū, “Ngih ön nômö tö-örheūheu-aṅ, ngam mikahkūö cha tö Meh, Öm tökô-en Tēv.” (Yôhan 17:3) Lökten yēḵ hī hòṅ örheūheu-aṅ, hēk sōḵ inrē öi kô-òngvah ip manāngen min, ngaich ‘hòṅ mikahtökūöre’ ayī-ö tö ngam Tēv. Rö-ö pöri nöng ngam mikahkūö hī tö ò nö ōt, hēk nup tö rahëichyen mikahkūö hī inrē tö nup tinrīken ò. Tön hòṅ hanôlö ò ayī-ö. Sā hī ṙung kēnyö ṙētak re in yip holre yěi lōnu tö ngam innôlö re nö ngön. Ngatī inlahen ayī-ö yěi hanôl ngam Tēv öi hòṅ kēnyö ṙētak re in ò. Ta-a töi ngëichkö minë ṙô ngam Paipöl nö vë-eny inlaha ngam Tēv.

Ha-aṅkö nômöre in ṙung, lökten öi nyā kaheuk sakamö. Ngöṙô pöri Yēsū: “Rö-ö ön ngòh tarik, nöng lökten ròti nö aṅ, lökten i nup ṙô ngam Tēv pöri nup lamöknyö elvāng ò.”—Mëtiv 4:4.

Mihôiṅ ayī-ö hang minë ṙô ngam Tēv Yāvē öi lökten im Paipöl. Yēḵ hī min haköpmat e, ngaich kôtökūö min ayī-ö tö nuk inlahen ngam Tēv misī, hēk tö nup inlahen ò töngamuh, inlahen ò min inrē inup yamih ṙētak.

Lōnu man lohten töre öm hang chööngö ngam Tēv, sön pöri nö ōt nup la-en kahëken meh nup tö sō-ovö tö ngam Tēv. Yēḵ meh ngatī inlahen, ngaich hēk më-eṅ ṙūöhtö mikahkūöre tö ngam Tēv. Yöölen min më-eṅ yěm ngatī inlahen.

Ngëichkö inlahen ök ihih yöngnyīö aṅ Asia. Öt tölöngö tinrīken anga-aṅ, ik sā ò pöri nö haköpmat ngam Paipöl, kòtökūö anga-aṅ tö ngam chööngö kahëtö ngam Tēv ngam tö ngö, “Ṙūöngöre töm chinô-òṅkānö.” (1 Kòrin 6:18) Vë-ekūötēv anga-aṅ nö havëkö inyööken re nö ṙāngen minë tötlöng la-en re, ngaich kò-en anga-aṅ nö ṙāngen u. Ṙòmöng la-al ò pöri minë ötkumlē-en ò. “Yěn yih minë tötlöng mufē chu,” ngöṙô anga-aṅ, “Ngaich keuheūtnyö ṙô ellōn re chū-ö ikūö Yāvē öich vë-ekūötēv. Akahakūö chū-ö töre ötkô kahngenre la-al u. Sā maharöhtöre chū-ö in Yāvē yēḵ chu vë-ekūötēv.” Pōyen yip töngamuh tarik tö sā inlahen ngòh yöngnyīö nö mikahtökūöre tö ngam Tēv. Ngaich hayööken cha ngam Tēv nö halööktitre hěnghöre kēken nup la-en inrē tö ṙamlōn tī tö ò.—Filipī 4:13.

Yēḵ hī min mikahtökūö re tö ngam Tēv, ngaich akahakūö min ngam Tēv tö hī inrē, holrevölōn min anga-aṅ tö hī. (Kalatī 4:9; Salmai 25:14) Ngaich yěn tumfömlöng min ngih panam, mihôiṅ min më-eṅ öm aṅ ikūö e. Tö sitih inlahen öp min angū-ö panam? Mikahtö elnang hī min ngam yamih ātiköl.