Röhta yanīhi öp inyöngö ngam Tēv nö ing panam nö löktö el halīöngö. Hē e min nö vai ngih panam. Lanāmönyöre min tarik, kö īnu min cha-a tö nup la-en re hēk holtö ṙanamölōnre inrē. Katöllen Yēsū ngam Tēv nö rācha ngam inyööngö. Öt sā yip mahayöng anga-aṅ töngamuh ikūö ngih panam. Pön lōnu anga-aṅ töre nö chumkūöṙen tö më tarik re nö örheūheu. Akah fālen taṙòkhöre pöri min anga-aṅ, lökten ngam inyööngö tö ò nö tölöök.—Isayā 11:4.

Yēḵ ngam Tēv min nö vī ngih panam nö tufömngöre, ngaich ṙòkhöre min ngam hīnëngö nö ihôi tum-mīhëṅṙö tarik. Ṙòkhöre cha-a nö kö hangenlōn tö höö hēk hangenlōn tö ngam Tēv inrē pò ngam hīnëngö nö in cha. (Inmeukhömat 7:9, 10) Holṙen re min cha-a nö la-evṙen nö sā lōn ngam Tēv nö vī ngih panam nö Peretāis nö sā öp tövai panô-òṅ hēk ngëichken e inrē.—Salmai 115:16.

Pōyen nup kanihngen hī töngamuh kūö pinlāngen tī ngam kumnyeūnö tö ngam ṙānööingö. Öt ngatī inlahen pöri min yěn hayöng ngih panam ang Yēsū. (Salmai 24:1, 2) Ik sā Yēsū nö ing panam urēhěkūö tö nët köiny samyeuheū, ngaich hameukhöti anga-aṅ nö löktö i kumlēḵ ngam Tēv nö vëkö ngam tökiröng chanôchö, ngaich ṙātöre ngam chanôchö. (Mākös 4:39, 41) Ip inyööngö min tö ngam Tēv öt kanihnguṙen min tarik tö kūö nup pinlāngen yamih ing panam, het min ngam kuföt tö minë mak ip hē e. Öt ōtre min pinhëv-ekūö nö ihôi më tarik tö minë töṙeūla pön höng lanāmönyöre min.—Hōsī 2:18.

Kôlò el alaha min tarik, öt invahavö, öt kanööinyuvö hēk öt kinpahavö inrē. (Isayā 35:5, 6) Sā inlaha öp panô-òṅ Ēten ön min ngih panam nö het vai inrē. Kôlò kūö min nup taneūch hī pōyen min nup nya-aṅkūö hī. (Ranehlö 2:9) Sā inlahen yik tarik ngam Tēv misī nö öt hanātuṙen tö nya-aṅkūö, ngatī inlahen min ip yamih tufömngöre panam öi öt hanātuṙen.—La-en Lēvī 26:4, 5.

Lanāmönyöre min nö ihôi tarik. Yěn hayöng min ngam Tēv, keuheutngöre chūök min ngam lanāmö ngaich vayö tinrīken min cha-a nö in höö. Öt hěngtak min kamëtö chööngö hēk öt kinyūngu inrē. Kētö nup taṙòkhöre kuilōn hī min ngam Tēv. Kilēḵngôre anga-aṅ: “Kö Uichhakṙen pöri min cha-a nö el katòh vāin re el katòh anychīr re inrē, öt hěng tak min pumnëken cha.”—Maika 4:3, 4.

Ṙòkhöre min öi patī-ivö hēk öt kapahlöng min tö holmaneukre. Teūngen min ayī-ö tö ṙòng nup la-enre. Kilēḵngôre ngam Tēv tö nup la-en yip tarik min nöng ‘öt chanök alaha’ el öp tufömngöre panam.—Isayā 65:21-23.

Tö kirööngen mikah an ngam Tēv Yāvē ngam Vamīlen ngih panam. Pōyen nup min haköplö hī in nup vahī kūö kuntī ò hēk haköp nup inlahen ò min inrē öi el öp tufömngöre panam. Sā kinūichngö e nö imat ngam Töhet Līpöre: “Tööḵlö min ngih panam tö mikah ngam Tēv.” (Isayā 11:9) Öt vī aṅ tī kumyung min cha-a hēk öt hayëngen höö inrē. (Isayā 2:4) Höng lanāmönyöre min cha-a hēk holṙen re inrē nö vī ngih panam nö Peretāis.—Salmai 37:11.

Vī ngih panam ngam Tēv nö chūök tarik nö ṙamölōn. Lōnu anga-aṅ tö tarik nö örheūheu nö aṅ nö ikūö e. (Salmai 37:29; Isayā 45:18) Kilēḵngôre ngam Tēv töre nö ‘kēngö ngam kinpaha.’ (Isayā 25:8) Ip hē e nö ‘öt kinpahavö öt miṙivlōn öt pineunyuvö öt chanöökuvö nö hēkngöre.’ (Inmeukhömat 21:4) Yip tarik töt mūlta nö i nup la-en ngih panam tötlēn, teūngen min cha-a tö ngam tö örheūheu aṅ nômö. Ha-aṅlöng min inrē yip tö kapah ngaich kē-ěvkūö min tö ngam tö örheūheu aṅ nômö.—Yôhan 5:28, 29; Inlahen 24:15.

 Röhta yanihi ngam tufömngöre panam. Lāku ṙòken yip tarik aṅ kūö ngih panam hamökken e angū-ö ṙētak. Ṙònghöichṙen yip töngamuh nö ṙūöhlö mikahkūö re tö ngam Tēv Yāvē tö Yēsū Kristū inrē, haköp nup inlahen re inrē cha-a nö el öp tufömngöre panam.—Yôhan 17:3.

Lōnu hòng më-eṅ töre öt kô-òngvah töp manāngen ngih panam hēk hòṅ aṅ hòng më-eṅ ikūö ngam tufömngöre panam? Yěm hòṅ ṙūöhtö mikahkūöre ngaich mihôiṅ öm ngëichken ngam website JW.ORG më Vamënyen Yāvē. Ṙamlōn yip nö hol meh öm kakken minë tö kūichi ṙô aṅ mat ngam Paipöl.