TÖHAKÖÖPÖ ĀTIKÖL 33
TINKÖÖKÖ 130 Til Sē Māf Köre
Sitih Mat Ang Yāvē Nö Ngëichkö Më Tarik Tököölö Fālen
‘Yěn hěng tak öp tö köölö fālen nö in hī, ngaich hěng tak ngam kamhòklö kui hī ngam mahayööken hī.’—1 YÔH. 2:1.
ASUH ÖP MIN HAKÖP HĪ?
Ik raneh senchurī misī, hěng tak ök prötör kamëken ök tökiröng fālen nö el ngam māṅ i Kòrin. Sitih inlahen kinṙòkken ngaich ngam fālen misī? Asuh öp min haköplö hī öi in e?
1. Asuh nup lōn Yāvē nö in hī öi ṙòkhöre?
KĒ-ĚKŪÖ HĪ ang Yāvē tö ngam tökiröng inlōnti, ngam inlahen hī mihôiṅ kahngenre öi kē nup fëslare. Kô-en an nö tövai nö inlōntö hī. Lökten öi mihôiṅ öi kē nup tö kun kun hēk tökiröng fësla inrē öi kahngenre. Ngam tökiröng kūö tökiröng pöri fësla tö hòṅ kē-ě tö hī nö ngam inlahen hī öi hòṅ kahngenre öi kētö ngam nômöre öi löklōn Yāvē, ngaich tūmö alaha ngam mikūönö ò inrē. Lōnu ang Yāvē tö hī öi ṙòkhöre öi löklōn ò, ha-öinyö ò inrē. Kūö yòh? Kūö ò nö hangenlōn takô tö hī öi ṙòkhöre, hòṅ hayööken hī anga-aṅ. Lōnu inrē anga-aṅ tö hī öi hol ò, ngaich höng örheūheu öi aṅ.—Chöö. 30:19, 20; Kal. 6:7, 8.
2. Yip tarik tö sōḵ nö haṙivlōn tö nup tökööl re, ngaich asuh öp lōn Yāvē nö in cha?(1 Yôhan 2:1)
2 Hö-ö pöri ang Yāvē nö timlö alaha ngòh tö hěng tak tarik nö kētöre nö löklōn ò. Kētö ṙētak hī pöri anga-aṅ öi ṙòkhöre öi löknyö ellōnre lōn öi löklōn ò. Yē öp prötör sistör pöri öp tö ngaich nö kē ngam vinôkö nö filal minë chööngö Yāvē hēk kēken öp tökiröng tökööl, ngaich hòṅ sitih inlahen anga-aṅ? Yē ò min nö öt hameuktö miṙivlōnre tö nup tökööl re, ngaich ha-uknyuvö min anga-aṅ nö ṙā-ang el ngam māṅ. (1 Kòr. 5:13) Ṙinātu-ellōn pöri ang Yāvē tö ngam tö fāluṙen tarik nö öthō min nö öt havantöre hēk nö in ò. Kô-en nö angū-ö takô tökiröng lāinyngen ò nö kētö ngam ṙāi ṙinānyi nö in hī, hòṅ ngam tö fāluṙen tarik min nö teūngen tö inṙē-ěl nup tökööl re. (Vë-evkūö 1 Yôhan 2:1) Hangenlōn takô ngam Tēv hī tö hī, lökten anga-aṅ nö hōten hī öi haṙivlōn tö nup tökööl re, ngaich havantöre hēk öi in ò.—Sak. 1:3; Rōm. 2:4; Yāk. 4:8.
3. Asuh öp min haköp hī öi in ngih ātiköl?
3 Lōnu Yāvē tö hī öi sā mat ò öi ngëichken ngam tökööl, sā mat ò inrē öi ngëichken ngam tarik tököölö fālen. In ngih ātiköl in min öi mikahtukūö tö inlahen matre öi ngëichken ò. Yěi vë-ekūö ngih ātiköl min, ngaich teūngen min ayī-ö tö sanapṙô në intöönö, (1) Hē ök töhěng tak tarik misī nö kôḵti fālen ök aṅ ngam māṅ i Kòrin ik raneh senchurī, ngaich sitih inlahen kinṙòkken anga-aṅ? (2) Hē ngam tököölö fālen nö haṙivlōn tö ngam tököölre, ngaich asuh nuk inlēnö kahëtö Pôl nö in ngam māṅ? (3) Sitih mat ang Yāvē nö ngëichken ngam tarik kamëken ngam tökiröng fālen, ngaich asuh öp haköp hī öi in e?
SITIH INLAHEN KINṘÒKKEN ÖN MISĪ MINË TÖKIRÖNG FĀLEN IK RANEH SENCHURĪ?
4. Asuh ök ahang hī inlahen ngam māṅ i Kòrin ik raneh senchurī? (1 Kòrin 5:1, 2)
4 Vë-evkūö 1 Kòrin 5:1, 2. Ṙònghöichröön hē e ang Pôl im linūöi vanröön ò nö chöhken ngam māṅ i Kòrin, hē e ngaich anga-aṅ nö hang inlahen ngam māṅ i Kòrin töp lökten ò ngaich nö pōyen miṙivlōn. Töng fömlöre vinīlö hē e ngih māṅ, akahakūö ngaich ang Pôl tö inlahen ök töhěng tak prötör nöng asěhkö ök istep mötör (stepmother) re ngaich kēken ngam tökiröng tökööl. Tökiröng angū-ö takô nö tökööl misī, pön öt rēhěn yik tarik aṅ kūö ngam panam misī nö kēken nup tö ngatī tökiröng fālen. Ngaich pöri më tarik aṅ ngam māṅ nö rö-ö nöng hökngen ngam tökööl, pön sā töṙamlōn inrē cha-a nö meūkö e. Ōt yik in cha tö ngö mufē tö cha nö asīnkö ngam miṙēḵlōn Yāvē tö ngam tarik. Hö-ö pöri takô ang Yāvē nö halöngten nup tö ngatī ṙôkö fālen nöng hökiṙen. Kūö ngòh tarik nö kēken ngam tökiröng tökööl nö hachōichngen ngam tövai minënyö ngam māṅ. Ngaich lohten min yip mahanôlö ò sin nö lökngöre tö minë tötlöng inlahen ò. Lökten nö sitih ṙô ang Pôl nö kētö inlēnö nö in ngam māṅ i Kòrin?
5. Asuh nuk inlēnö kahëtö Pôl nö in ngam māṅ i Kòrin, tö sitih manah ngam ṙô ò? (Ngëichkö ngam nyat.)
5 Vë-evkūö 1 Kòrin 5:13. Löktö in ngam töhet kumlēḵ ngaich ang Pôl nö kūichtö ök töhěng chitri nö in ngam māṅ i Kòrin. Halēnö cha anga-aṅ nö ngö ṙô yē ngam tarik tököölö fālen nö öt haṙivlōn tö ngam tökööl kahëkenre, ngaich hòṅ ha-uknyu anga-aṅ nö ṙā-ang el ngam māṅ. Unôichrit e inrē më Kristīön aṅ Kòrin nö hòṅ sitih inlahen nö in ngam tarik ngam tököölö fālen? Ngöṙô ang Pôl nö in cha ‘ṙāngenre yin uh öi hanôlö ò.’ Tö sitih manah öng angū-ö nö ṙô? Ngö ṙô ang Pôl nö vë-eny nang cha, ‘Uh takô yin öi holkūö öp tö ngatī inlahen tarik öi nyā.’ (1 Kòr. 5:11) Yē hī ṙung öi nyā öi holkūöre, ngaich öthō ayī-ö öi öt vë-ek-ūöre, hiṙeūt-hiṙeūtkö inlahenre inrē öi kē-ěny ṙētakre öi hanôlö höö. Lökten ang Pôl nö ngö ṙô nö in cha tö cha nöng ötkô nö hanôltöre nö in ngam tarik. Yē ngam māṅ min nö ngatī inlahen, ngaich yöölen min më prötör sistör el ngam māṅ. (1 Kòr. 5:5-7) Öt kò-òngvah min inrē cha-a tö minë tötlöng la-en kahëken ngam tarik hōtu cha-a inrē nö ṙūöhöngre takô tö ngam tarik nö un vë-ekūö ò, ngaich lohten min ngam tarik nö akahaiṙen töre nö miṙivngölōn Yāvē, haṙivlōn inrē min anga-aṅ tö minë kahëkenre, ngaich lohten min anga-aṅ nö havantöre nö hēk.
I tinöölô re ang Pôl tö Yāvē nö kētö inlēnö nö imat ök chitri re tö öp tarik yěn öt haṙivlōn tö tökööl re, ngaich hòṅ ha-uknyuvö anga-aṅ tö ngam māṅ (Ngëichköm perekrāf 5)
6. Asuh ök lanökngöre ngam māṅ i Kòrin hēk tö ngam tarik kamëken ngam tökiröng fālen, unôichrit inlahen cha nö vë-ekūö ngam chitri kahūichtö Pôl?
6 Pōyen lohten nuk mufē elkuilōn Pôl unôichrit inlahen ò nö söömtö ök innëtö chitri yik aṅ Kòrin. Pön ngö lōn anga-aṅ, sitih lōn yip vö min tarik yěn vë-ekūö öp chitri, hang nup inlēnö yip vö min, hö-ö ṙöng. Yih ngaich ang Taitus nö meuk kūö Pôl ngaich vë-eny nang ò tö inlahen yik Kristīön aṅ Kòrin, lökten ang Pôl nö ṙamlōn nö hang inlahen cha. Ngö ṙô ang Taitus nö vë-eny nang ò, tö yik Kristīön aṅ Kòrin nö kēḵkö kahan nuk ṙô kahūichtö ò nö imat ök chitri, hang nuk inlēnö inrē cha-a. (2 Kòr. 7:6, 7) Rö-ö nöng anū-ö, pön hameuktö miṙivlōnre inrē ök tarik ök kamëken ngam tökiröng fālen. Lohten nöng haroh tumhang chumngëṅtö ang Pôl nö kūichtö ngih chitri nö in cha, ngaich pöri ngam tarik nö havailö minë mufēre, halööktö minë tinrīkenre inrē ngaich tūön kui minë tölöök tinrīken rahātö Yāvē inrē ngaich anga-aṅ. (2 Kòr. 7:8-11) Hē Pôl ngaich nö hangö u, asuh hēk nuk inlēnö kahëtö ò nö in yik Kristīön aṅ Kòrin?
HÒṄ SITIH INLAHEN NGAICH NGAM MĀṄ NÖ IN NGAM TARIK TÖ HAṘIVLŌN TÖ TÖKÖÖLRE?
7. Asuh ök tövai ṙòng ngam inlahen ngam tököölö fālen tarik yěn ha-uknyu anga-aṅ? (2 Kòrin 2:5-8)
7 Vë-evkūö 2 Kòrin 2:5-8. Ngö ṙô ang Pôl ‘tö kò-òre nun minë chinökṙen ngam tarik, minë ṙahônyö më aṅ ngam māṅ nö in ò.’ Tö ngö manah ngam ṙô ò tö ngam tarik tököölö fālen ngaich nö kētu inlēnö. Kūö yòh inrē anga-aṅ nö ha-uknyu? Hòṅ ò nö haṙivlōn tö ngam kahëkenre, ngaich havantöre hēk nö halööktitre.—Hep. 12:11.
8. Asuh nuk ṙô Pôl hēk nö halēn ngam māṅ i Kòrin?
8 Ngö ṙô ang Pôl nö kētö inlēnö ngam māṅ i Kòrin tö cha nö ‘hameuktö miṙēlōnre nö in ngam tarik nö aṙēlen ò, hareuskö alaha ò inrē.’ Rö-ö nöng angū-ö, ‘pön hòṅ hameukhömat ò cha-a tö cha nö hangenlōn takô tö ò.’ Töi chumkūöṙen tö manah ngam ṙô Pôl tö ò nö rö-ö nöng lōnu tö më prötör sistör nöng ha-öinytö yīhi ngam tarik mahavan nö el ngam māṅ. Lōnu pöri anga-aṅ tö më prötör sistör nö hòṅ hameuktö ngam hanangenlōnre nö in ngam tarik tö fāluṙen nö in nup ṙô re inlahenre, in minë tinrīken cha inrē tö cha nö ngaich nö aṙēlen ò, hangenlōn inrē cha-a ngaich tö ò. Ngatī inlahen min cha-a nö hameuktöre nö ṙamölōn tö ngam tarik nö havan nö hēk nö el ngam māṅ.
9. Kūö yòh yik rīkre tarik aṅ ngam māṅ i Kòrin, nö kihngen lohten nö hō-en ngam tarik tököölö fālen nö havan nö el ngam māṅ hēk aṙēlen ò inrē?
9 Ōt hòng lohten tarik el ngam māṅ i Kòrin tö kihngen nö aṙēlen ök tarik hēk hō-en ò inrē nö havan nö el ngam māṅ? Öt vë-eny nang hī an ngam Paipöl tö inlahen e. Lohten pöri angū-ö nö ngatī kanihngen tī tö yik tahëng tarik nö el ngam māṅ. Kūö yòh öi mihôiṅ öi ngatī ṙô? Kūö ngam tökiröng fālen ngam tarik nö öt lööngö tī takô tö minë-eny ngam māṅ. Ōt inrē lohten yik tarik tö sirōngkūö tö kūö inlahen ngam kahëken ò tökööl. Lohten inrē nö ōt yik prötör sistör tö ngölōn, irôkö kumlēḵ alaha ihö öi havai minë tinrīken re, ngaich höng öt ngëichka ihö, ngaich ngòh tarik tö ngatī ṙôkö fālen ngaich hōtu ihö öi ha-öinytö yīhi ò. (Asātô e in ngam Lūkös 15:28-30.) Töt ṙanāngen pöri angū-ö misī tö ngam māṅ i Kòrin nö hòṅ aṙēlen ngam tarik hēk hameuktö ngam hanangenlōnre inrē nö in ò. Kūö yòh?
10-11. Yěn öt aṙēlen ngam tarik tököölö fālen misī më minṙöinylen, ngaich asuh öre öp ṙòng e?
10 Töi asehkūöre sin, yēḵ më minṙöinylen nö sō-en ngam tarik ngam tö haṙivlōn tö minë tökööl kahëken re nö hòṅ havan nö hēk nö el ngam māṅ hēk yěn sōḵ inrē më prötör sistör nö hameuknyö ngam hanangenlōnre nö in ò, ngaich sitih inlahen min anga-aṅ? Lohten min ngam tarik hēk nöng ṙūöhlöre ṙôken miṙivlōn tö pò kūö minë kahëken re. Ngölōn min anga-aṅ nö kò-òren höng hö-öv chin chū-ö ngaich tarik, öt maheūṅkkūvö chin inrē öich ngaich. Rö-ö nöng anū-ö pön heūlngöre min anga-aṅ nö mihôiṅ nö sōḵ nö halööktit ngam tö pasū innôlöre nö in Yāvē.
11 Ngam tö mötlö pöri tötlöng ṙòng e öre misī. Yěn sōḵ më prötör sistör nö aṙēlen ngam tarik tököölö fālen, ngaich mihôiṅ öre misī ngam innôlö cha nö pasū nö in ngam Tēv Yāvē. Nö sitih inlahen? Kūö cha nö öt asīnken ngam Tēv Yāvē ngam hamīnöre nö aṙē-ěl tökööl yip tö haṙivölōn, asīnkö inlahen ngam Satān pöri cha-a ngam töt ma aṙē-ěl holre, ngaich öt hameuktö minṙēlōnre cha-a nö in ngam tarik tö haṙivlōn tö minë tököölre. Sā hamòlṙen ngam Satān ngaich cha-a yěn ngatī inlahen. Pön höng angū-ö kuilōn ngam Satān tö ngam innôlö ngòh tarik nö in ngam Tēv Yāvē nö hōtu nöng örheūheu nö pasū.—2 Kòr. 2:10, 11; Efi. 4:27.
12. Sitih inlahen aich më Kristīön aṅ Kòrin nö asīnkö tinrīken Yāvē öre?
12 Teūngen misī tö ṙētakre më prötör sistör aṅ ngam māṅ i Kòrin nö asīnken Yāvē, un asīnkö tinrīken ngam Satān. Sitih inlahen pöri cha-a nö asīnkö tinrīken Yāvē? Hòṅ sā inlahen Yāvē cha-a nö hameuktö ngam miṙēḵlōnre nö in yip töhaṙivlōn tö tökööl re nö aṙēlen cha. Yěh kò-òren töi chumkūöṙen öi hang ṙô tī yik kamūich ngam Paipöl nö vënyö inlahen Yāvē. Ngöṙô tī ang Tāvit nö vë-eny inlahen Yāvē ‘tö ò nö tölöök hamöngöre inrē nö aṙē-ěl tökööl yip tököölö fālen.’ (Sal. 86:5) Ngöṙô tī inrē ang Maika nö kūich, ‘Achīö öp Tēv tö sā meh öp ma aṙē-ěl tökööl fālen yip tarikre, öp töt köplōn inrē tö fālen yip tarikre.’ (Mai. 7:18) Ngöṙô tī inrē ang Isayā nö kūich, ‘Hökngen ngòh tötlöök tarik nö ṙāngen nup tötlöök talöököre, ṙāngen nup tötlöng mufē elkuilōnre inrē, ngaich havantöre nö in ngam Tēv Yāvē ngaich aṙē-ělōn min anga-aṅ tö ò, ṙòngnyökūö ellōnre inrē min nö aṙēlen ò.’—Isa. 55:7.
13. Kūö yòh öng nö ötkô nö hökka nö hēk, ngam inlahen ngam tarik nö havanhötvö nö el ngam māṅ? (Ngëichken ngam pòks “ Ihē Ang Ngam Tarik Aṅ Kòrin Nö Havanhötvö.”)
13 Yěn hòṅ asīnken Yāvē më Kristīön aṅ Kòrin, ngaich hòṅ aṙēlen ngam tarik acha-a tököölö fālen, ha-öinytö yīhi ò inrē ngaich kētö ṙinātö-ellōn ò tö cha nö hangenlōn tö ò. Ngaich kô-en cha-a nö ngatī inlahen nö hang ngam chööngö kahëtö Pôl. Ngaich hameuktöre cha-a nö hamang minë chööngö ‘nö i tö keuheūttöre.’ (2 Kòr. 2:9) Kô-en misī ngòh tarik nö haroh tum chumngëṅtö nö ha-uknyuvö tö ngam māṅ. Ngam chö-öiny ngam chinökṙen ò inrē misī nö kētu, teung angū-ö nö in ò. Ngaich inrē anga-aṅ nö hameuktöre nö haṙivlōn tö nup tökööl kahëken re. Lökten nö ötkô nö hökka nö hēk öp inlahen ò nö havantöre nö el ngam māṅ.
SITIH INLAHEN MIHÔIṄ ÖI ASĪNKEN NGAM TĒV TÖLÖNGÖ TĪ NÖ KAHÔKA HĒK TÖ AṘĒ-ĔLŌN INRĒ?
14-15. Sā inlahen kinṙòkken ngam fālen misī nö el ngam māṅ i Kòrin asuh öp haköplö hī öi in e? (2 Pītör 3:9) (Ngëichkö ngam nyat.)
14 Ngam inlahen ngam kinṙòkken ngam fālen el ngam māṅ i Kòrin misī, ṙòkhöre anū-ö nö kūichiyö nö ‘haköp hī’ nö imat ngam Paipöl. (Rōm. 15:4) Haköplu ayī-ö öi in ngam inlahen kinṙòkken ngih fālen tö Yāvē nö öt halöngten yip tarik yip töt haṙivlōn tö nup tökööl re nö höngngöh nö ihôi yip tarik ò el ngam māṅ. Tötööḵlö an Yāvē tö miṙēḵlōn, lökten min anga-aṅ nö ötkô nö halöngten nup tö ngatī tinrīken tötlöng. Sā töng hamô-en u min anga-aṅ nö filal minë tölöök tinrīken ṙahatö ò. (Yūt 4) Pön kô-en yěn filal minë chööngöre min ang Yāvē, ngaich hö-ö min anga-aṅ nö köp nö tö aṙē-ěvlōn nö Tēv, kūö ò min nöng sā vamītö kanihngen yip tarikre nö ṙòkhöre. Ngaich akahalōn ayī-ö tö ò nö öthō nö ngatī inlahen.—Inch. 13:20; 1 Kòr. 15:33.
15 Ngamuh pöri haköplö hī inrē öi in Yāvē tö ò nö öt lōnu tö töhěng hangtak tarik nö kapah, lōnu pöri anga-aṅ nö hòṅ laklö nômö ngòh tarik. Ngòh tö haṙivlōn tö nup tököölre ngaich halööktitre, ngaich havanlö ngam innôlöre hēk nö in ò ngaich hameuktö miṙēḵlōn re min anga-aṅ nö in ò. (Isi. 33:11; vë-evkūö 2 Pītör 3:9.) Lökten hē ök tarik aṅ ngam māṅ i Kòrin nö haṙivlōn tö nuk tökööl re ngaich ṙāngenre tö u, ngaich löktö in Pôl tī ang Yāvē nö vë-ekūö yik prötör sistör aṅ Kòrin nö hōten cha nö aṙēlen ök tarik ngaich ha-öinytö yīhi ò nö hēk nö havantöre nö el ngam māṅ.
Yěn hěng tak öp tarik tö havanhötvö nö el ngam māṅ, ngaich ṙòkhöre më prötör sistör nö holtö ṙanamölōnre nö ha-öinytö yīhi ò. Ngatī inlahen cha-a nö hameuktöre nö sā inlahen Yāvē nö aṅhav-in tö ngam hanangenlōn hēk miṙēlōn (Ngëichkö minë perekrāf 14-15)
16. Sā inlahen kinṙòkken ngam fālen misī el ngam māṅ i Kòrin, sitih inlahen mufē öm yěm fēkö inlahen ngam Tēv Yāvē?
16 Ngaich in öi meuk inlahen kinṙòkken ngam fālen misī el ngam māṅ i Kòrin, ngaich meuk inlahen ngam Tēv ayī-ö Yāvē nö tö hangenlōn nö Tēv, örheūheu inrē anga-aṅ nö löngö inlahen tī yěn kahôka, köptī inrē anga-aṅ tö minë tölöök tinrīken ṙahatö tö ò. (Sal. 33:5) Sā meh ngaich öm akahalōn tö inlahen Yāvē, öt yihtöre ellōn ömeh öm hòṅ harōi ngam minënyö ò? Öt hěng hangtak tarik töt īnu tö ngam tökööl, pöi ṙòkhöre öi vaichköre inlahen ṙòkhöre inrē ayī-ö öi teūngen tö ngam inṙēlö. Lökten in öi kiröngen ṙô öi ha-öinyö Yāvē kūö ò nö halēnlö ngam ṙāi ṙinānyö hī, ngam lökten hī mihôiṅ öi teūngen tö inṙē-ěl nup tökööl. Kô-en takö öi teūngen tö hanöhlöre öi ahng inlahen ngam yöngre. Keuheūtnyöre ayī-ö tö ṙanamölōnre tö Yāvē nö hangenlōn takô tö yip tarikre höng örheūheu anga-aṅ nö lōnu töre nö hòṅ hayööken cha.
17. Asuh nup min tö nët intöönö tö kakka tö hī in nup tönët yamih ātiköl?
17 Yěn kēken tökiröng fālen öre yip tarik töngamuh, ngaich sitih inlahen kinṙòkken min nup fālen cha? Sitih inlahen inrē min yip miṙöinylen nö asīnken Yāvē nö hayööken öp tarik nö havantöre öp tö haṙivlōn tö nup tökööl re? Yěn hěng tak öp tarik tö ha-uknyuvö nö ṙā-ang el ngam māṅ hēk havanhötvö inrē nö el ngam māṅ, ngaich hòṅ sitih inlahen min yip prötör sistör nö in cha? Anū-ö nun min në tö nët intöönö tö chöhö sanapṙô tö hī öi in nup yamih tö nët ātiköl.
TINKÖÖKÖ 109 Keherā Piyār Kare
