ṘAMLŌN in yěi meuk nup sīṅp ngam Tēv yěn havanhötvö hēk nö el ngam māṅ. Asëhkūöre man töm “ṙanamlōn min nö el halīöngö” yěn hěngtak mahavantöre! (Lūk. 15:7, 10) Yēḵ meh më-eṅ öm in cha yip mahavantöre nö in Yāvē, mihôiṅ më-eṅ ṙinātu ellōn tö ò, tö Yēsū hēk tö yip ma-ahānga inrē nö ṙamlōn nö meukö meh. Ōt pöri min kò-òren nup kanihngen meh yěm havantöre in Yāvē. Nup tö sitih, hēk sitih inlahen më-eṅ kô-òren öm la-al u?

Pōyen yip tö köptī tö nup miṙivlōn re tö kūö nuk fālen re, pòrô ngaich cha-a nö havan nö el ngam māṅ. Ngatī mufē takô ang Rācha Tāvit, pòṙô nö aṙēlöng nuk tökööl ò, sön anga-aṅ nö ngö ṙô: “Kò-òngvah chin tökūö në tököölre.” (Sal. 40:12; 65:3) Ha-uknyu ang Isapēl nö 20 samyeūheu rô-òten *, ngö ṙô anga-aṅ, “Kihngen chū-ö öich ṙātö-ellōnre tö Yāvē nö mihôiṅ nö aṙēlen chu.” Yēḵ meh pöri min köptī tö miṙivlōn re, mihôiṅ min tö kūöṅnngöre ngam ṙinātö-ellōn meh. (Inch. 24:10) Um halöngngen re ngatī inlahen.

Lohten yip tahëng inrē nö ngö lōn tö cha min nö kihngen nö havanlö ngam innôlöre hēk nö in Yāvē. Ngatī mufē ang Antonī unôichrit inlaha ò nö havanhötvö, ngö ṙô anga-aṅ, “Sā tö vaichngö chū-ö tö nuk tinrīken re öich Kristīön tö lā urěh.” Angū-ö kò-òren mufē hī nö lāinyngen hī mihôiṅ kihngen kētöre in minë la-en ngam Tēv.

Töi hachōḵ elmat re, töp tarik tö pala-aiṙen patī tö kuö öp tökalēḵ chanôchö. Lohten anga-aṅ nö kihngen elmat tö inlahen tī re hēk nö havanlö vinī-i ngam patī re. Ngatī ngòh  tarik tö pasu-utī tö ngam innôlö re nö in Yāvē kūö minë fālen re, nö akahakūö tö ṙôken nup la-en re min yěn hòṅ havanlö inlahen re nö hanôlö Yāvē. Ōt pöri ngam inyööken ò.

Havëten hī ang Yāvē nö ngö ṙô: “Tā-ih, töi ve-ekūöre.” (Isa. 1:18) Ngaich më-eṅ öm rēhěre öm vë-ekūö Yāvē öm sā mahalööktit minë tö pasūḵ nö ihôi nā. Ṙamölōn ang Yāvē nö meuk inlahen meh. Pön heuveū-eu ṙô min anga-aṅ nö sapṙô ngam Sī-ö ngam samūöchlö fālen ò!—Inch. 27:11.

Ṙūöhtöre më-eṅ öm in Yāvē, ngaich ngatī min anga-aṅ nö ṙūötöre nö in meh. (Yāk. 4:8) Hö-ö pöri nöng angū-ö tölngö inlahen meh, tön hòṅ asīöp ngam hanāngenlōn re më-eṅ tö ngam Yöng re hēk ngam Hol re inrē, ang Yāvē. Öm sitih inlahen pöri?

Sā ngam patī tö fukngö tö kūö chanôchö, höng köp pöri nup rööntö machööḵlö e. Ngatī inlahen ngam mikahkūö meh tö Yāvē tö minë kinlēḵngô ò inrē nö ṙòngmö köp nö in meh. Asuh pöri öp tö hòṅ ngëichka tö meh? Minë la-en hī öi Kristīön tö sā ngam inhānga, hēk innôlhötre in yip holmaneuk re. Kò-òren ngëichken në inrē.

Örheūheu vë-ekūö Yāvē. Akahakūö ang Yāvē tö meh min öt lööṙen vë-eny nup ṙô ellōn re, kūö miṙē-ěv meh tö nup fālen re. (Rōm. 8:26) Sön pöri më-eṅ höng hòṅ, “iṙūöhen köp im vinë-ekūötēv,” ngaich vë-eny nang Yāvē töre öm hòṅ havantöre chuh in ò. (Rōm. 12:12) Ngatī inlahen ang Ānrē ngaich yöölen. Ngö ṙô anga-aṅ: “Örheūheu chū-ö öich haṙivölōn yěch fēkö nup vanaichö re. Höhlö pöri chū-ö yěch vë-ekūötēv. Teūngen inrē chū-ö tö lanāmö elkuilōn re.” Yēḵ meh pöri öt akahakūö tö nup ṙô re vë-ekūötēv, ngaich mihôiṅ öm ngëchkö ṙô Rācha Tāvit misī nö vë-ekūötēv imat ngam Salmai 51 hēk 65.

Örheūheu haköpmat ngam Paipöl. Angū-ö min ngih mahangönlö ngam ṙinātö ellōn meh in Yāvē, asīöp ngam hanāngenlōn meh inrē tö ò. (Sal. 19:7-11) Ngö ṙô ang Filipē, “Kūö chu höng hēṙu haköpmat ngam Paipöl, lökten nö öt ngön ngam ṙinātö-ellōn chu nö in Yāvē. Sō chū-ö hēk öich ngatī inlahen, lökten chin ngaich örheūheu haköpmat ngam Paipöl.” Mihôiṅ man më-eṅ inrē ngatī inlahen. Yēḵ meh hòṅ hayöökaṙen chöh nup haköp re, ngaich mihôiṅ öm kēḵ inyööken re i yip holre tö ngönö ṙinatö-ellōn nö in Yāvē.

Havantö inlahen re hanôl yip prötör sistör. Ōt in yip mahavantöre tö ngö lōn, sitih mufē yip vöh min hol chu yěn meūkö chu havantöre. Vë-eny mufē re ang Lerisā nö ngö ṙô, “Aṙē-ěvö chū-ö pöich afēkö inlahen re miṙivngölōn më holmaneuk re.” Köpölōn pöri më-eṅ tö më minṙöinylen nö hòṅ hayööken meh nö hangönlöm ṙinātö-ellōn meh in Yāvē. (Ngëchkö ngam pòks “ Asuh Nup Kò-òren La-en Më Minṙöinylen?”) Ṙāmölōn cha-a nö meukö meh havantöre, lōnu inrē tö meh öm ṙamölōn!—Inch. 17:17.

Sitih inlahen öm rih min hēk mihôiṅ hanôltöre in më holmaneuk re? Kētöre öm in minë la-en linökö lōn Yāvē. Tö sā në: chuh el mīting, ahangköm tölöök inhānga. Asuh min nup yanöölen meh tī u? Vë-eny nang hī Felik nö ngö ṙô, “Ṙòkhöre më prötör sistör nöng hökken chu öich havantöre el ngam māṅ. Akahaiṙen chū-ö töm hanangenlōn cha tö chu. Hayööken chu cha-a öich havantöre in Yāvē öich löklōn ò.”—Ngëchkö ngam pòks “ Asuh Nup Mihôiṅ La-en Meh?”

Öt ṙā-angtīre ngam Sī-ö nö kētö “kanihngen” hī, pön sōten hī öi havantöre chuh in Yāvē. (Lūk 4:13) Lökten öi hòṅ iṙūöhen hangönlöm ṙinātö-ellōn re in Yāvē.

Kilēḵngôre ang Yāvē nö in hī: “Chöh töchatngen chin min, kētö tölō-ongkūö chin min inrē, hangëkö tötkalē-en chin min.” (Isi. 34:16) Ngaich nö pōyen yip tö hayöökaṙen tö Yāvē nö havantöre nö chuh in ò. Mihôiṅ ayī-ö ṙinātu-ellōn tö Yāvē min nö hayööken hī hangönlöm innôlö re in ò.