TÖHAKÖÖPÖ ĀTIKÖL 42
TINKÖÖKÖ 103 Inlōnti Aṅ I Tarik
Hameuktö Minlēḵṙenre Tö Më Taneūngen Hī ‘Inlōnti Aṅ I Tarik’
“Hē ò nö yônlö nö lātulöng . . . , ngaich kētö inlōnti anga-aṅ tö aṅ i tarik.”—EFI. 4:8.
ASUH ÖP MIN HAKÖP HĪ?
Mikahtökūöre in min tö minë la-en më mahayööken töla-evṙen, minṙöinylen hēk sörkit ovörsīör inrē nö hayööken hī. Ngaich sitih inlahen min öi hameuktö minlēḵṙenre tö vē töchiplö prötör nö hayööken hī.
1. Asuh nup inlahen tī Yēsū nö hayööken hī?
ÖT HĚNGTAK tö kô nö asīnkö inlahen tī Yēsū nö hayööken hī. Hē ò misī nö ing panam ngaich löktö im kumlēḵre anga-aṅ nö hameuktö pinngangkūö nö hayööken yik tarik. (Lūk. 9:12-17) Ngam tökiröng inlahen ò nö hayööken hī, ngam inlahen ò nö kēngö nômöre töpôkūö hī. (Yôh. 15:13) Unôichrit ò nö ha-aṅlöng nö ṙa-ang im kinpaha höng iṙūöhen anga-aṅ nö hayööken hī öi tarik. Tölṙô ngam yöngre anga-aṅ Yāvē nö kētö ngam töhet kumlēḵ nö in yik haköptö ò, hòṅ cha nö akaha elnang töm kanô-en, teūngen inrē tö inreuskö alaha re. (Yôh. 14:16, 17, ftn.; 16:13) Hayööken hī inrē ang Yēsū töngamuh. Löktö in minë mīting tī anga-aṅ nö haköpten hī, hòṅ hī heuveū-en öi kēken ngam la-en inköptö tarik ikūö ngih panam.—Mët. 28:18-20.
2. Achīö aich cha-a inlōntö hī aṅ i tarik nö kahëtö Yēsū? (Efisös 4:7, 8)
2 Hěng an inrē ngam inlōntö hī kahëtö Yēsū. Ngö ṙô tī Pôl nö kūich, unôichrit inlahen Yēsū nö yônlö nö el halīöngö, ngaich kētö minë ‘inlōntö hī anga-aṅ aṅ i tarik.’ (Vë-evkūö Efisös 4:7, 8.) Mikahtö elnang hī ang Pôl töp chööḵnyö Yēsū nö kē-ěkūö hī tö më inlōnti, hòṅ cha nö ṙōlkangen inlahen tī nö hayööken hī öi el ngam māṅ. (Efi. 1:22, 23; 4:11-13) Achīö aich ri cha-a inlōnti aṅ i tarik töngamuh? Më mahayööken töla-evṙen, minṙöinylen el minë māṅ, tö më sörkit ovösīör inrē. a Kô-en yin nö hēṙu nö vaichköre inlahen, pön töng sā hī nö tarik. (Yāk. 3:2) Löktö in cha tī pöri ngam mā hī Yēsū Kristū nö hayööken hī. Lökten cha-a nö kahëtö ò nö inlōntö hī nö aṅ i tarik.
3. Më ‘inlōnti aṅ i tarik’ më kahëtö Yēsū nö in hī, sitih inlahen öi mihôiṅ öi holṙen cha? Mikahtö elmat hī.
3 Më inlōnti aṅh i tarik kahëtö Yēsū nö tö la-evṙen nö mahangönken ngam māṅ. (Efi. 4:12) Mihôiṅ pöri ayī-ö öi ṙòkhöre holṙen cha öi in ngih la-en. Ta-a töi mikahtö elmatre tö e. Yěn ṙònghöichṙen vinī-i ṙung öp töhěng Patī-Pūlngö, ngaich höng katöllöng ṙung yip tö la-evṙen nö in e. Mihôiṅ pöri yip tahëng prötör sistör nö holṙen cha hēk hayööken cha inrē. Mihôiṅ nö kumtö nyā-aṅ cha, söömngen cha hēk kumten cha, hēk tö nup tahëng inrē inlahen tī cha nö hayööken cha. Ngatī inlahen kò-òren yip prötör sistör el ngam māṅ, nö hayööken më mahayööken töla-evṙen, minṙöinylen hēk tö më sörkit ovörsīör inrē. Mihôiṅ öi hareuskö alaha cha hēk hayööken cha inrē. Ta-a chěi töi ngëichkö öp yanöölenre min öi löktö im inlahen vē prötör nö ma-ainyre nö la-evṙen. Mikahtökūöre inrē min ayī-ö tö inlahenre öi milēḵṙen tö më ‘inlōntöre aṅ i tarik’ hēk milēḵṙen inrē tö Yēsū, ngam kamë-ekūö hī tö cha.
KAMËTÖ INYÖÖKEN YIN MË M AHAYÖÖKEN TÖLA-EVṘEN
4. Asuh nuk misī la-en yik mahayööken töla-evṙen ik raneh senchurī?
4 Rīkre misī yik prötör ik raneh senchurī tövīlöng nö mahayööken töla-evṙen. (1 Tim. 3:8) Ik sā Pôl misī nö kakken më ‘kamëtö inyööken,’ ngaich lohten anga-aṅ nö ṙô tö më mahayööken töla-evṙen. (1 Kòr. 12:28) Löktö in e mikahkūö ayī-ö tö vē prötör tö nup la-en cha el ngam māṅ nö töt ṙanāngen, hòṅ më minṙöinylen nö chumkūöṙen nö im la-en inköphöti, hēk töm nginëichkö minë sīṅp ngam Tēv inrē. Lohten misī yik mahayööken töla-evṙen nö hayööken cha nö im insīnkö kinūichö ngam töhet līpöre, hēk havāhare nup chehetī cha inrē nö kūichö e.
5. Asuh nup la-en më mahayööken töla-evṙen töngamuh nö el ngam māṅ?
5 Töi ngëichkö minë la-en më mahayööken töla-evṙen töngamuh nö el ngam māṅ. (1 Pīt. 4:10) Rīkre yin më ngamëichkö minë akāòns (accounts), rīkre in cha ngamëichkö minë rīkòks kamngö chūök ngam la-en inhānga, ōt ngamëichkö minë līpöre töm kintölngö u inrē, rīkre ngamëichkö minë ôtiō vitiō. Rīkre më ötenten (attendant) in cha, ōt yip ngamëichkö minë Patī Pūlngö. Töt ṙanāngen anū-ö nö la-en cha hòṅ ngam māṅ nö vāyö inlahen nö la-evṙen. (1 Kòr. 14:40) Kētö minë tòk inrē cha-a yěn kēkaṙen ngam ‘Sā Tinrīken Kristīön’ ngaich kētö minë pāt re cha-a. Rīkre inrē in cha tövīlöng nö krup ovösīör, holröön më minṙöinylen inrē cha-a yěn chöhken më prötör sistör.
6. Kūö yòh öi hòṅ milēḵṙenre tö vē tö kalēḵ alaha mahayööken töla-evṙen?
6 Pōyen yanöölen ngam māṅ nö löktö in minë la-en më mahayööken töla-evṙen. Ta-a töi hang ṙô vē prötör sistör nö ṙônyen minë inlahen cha. Ngö ṙô ang sistör Pēpörlī b ngam aṅ Poliviā, “Kuchīken chū-ö öich mīting tö tī më mahayööken töla-evṙen, tö sā chu yěich tikökṙôre, kētö sanap ṙô, hang minë minkahten inrē hēk haköplu inrē öich in minë nyat, vitiō, pön chumkūöṙen cha-a tö ih, hòṅ ih öt pala-aiṙen, chumkūöṙen inrē cha-a tö më hol ih mumting nö el vitiō kònfrens, hòṅ cha nö pōyen yanöölen. Ngëichkö inhëtö ngam Patī-Pūlngö inrē cha-a, unôichrit kinheūten ngam mīting. Ngëichkö minë akāòns, chumkūöṙen inrē tö yip prötör sistör hòṅ cha nö teūngen tö nup līpöre. Kô-en takô chin öich kētö thanks vē prötör.” Ngö ṙô ang sistör Leslī ngam aṅ Kolömpiā, ngam tö pīhövö tök töhěng tak minṙöinylen, “Kô-en yin vē mahayööken töla-evṙen nö pōyen la-en lökten ngam pīhö chu nö löktö in e nö teūngen tö yanöölenre, yē cha öre nö hö-öv ngaich lohten ngam pīhö chu nöng pōi la-en. Holtö ṙanamlōnre hēk nganöötö re cha-a nö la-evṙen tö nup töng sitih la-en. Pòrô öp tö sitih ṙôken ṙô öich kētö thanks cha, sön angū-ö nöng kūönen.” Lohten man inrē më-eṅ el ngam māṅ re öm ngatī mufē tö inlahen yip mahayööken töla-evṙen.—1 Tim. 3:13.
7. Sitih inlahen öi mihôiṅ hameuktö minlēḵṙenre tö më mahayööken töla-evṙen? (Ngëichkö ngam nyat.)
7 Lohten man öm pōyen ṙô öm ha-öiny nup la-en më mahayööken töla-evṙen. Hòṅ hameukten pöri më-eṅ öm tö ngatī. Ngö ṙô an ngam Paipöl, “Hameuktöre më-eṅ öm tökirööngen minlēḵṙen.” (Kòl. 3:15) Sitih inlahen ang Prötör Kösistòf ngam töhěngtak minṙöinylen el ngam māṅ i Finlënt nö vë-eny ṙanamlōnre tö minë la-en cha, Ngöṙô anga-aṅ, “Söömtö minë krīting kārts cha chū-ö minë tö aṅhav mat tö minë miröökö, hēk vë-eny nang cha inrē chū-ö tö chu öich sitih inlahen öich reuslöre alaha tö minë la-en cha. Pōyen inrē ngam minlēḵṙen chu tö minë la-en cha.” Vë-elkui më mahayööken töla-evṙen inrē nā prötör Pāsköl töm pīhö ò Chiěl aṅ Niū Keletoniā. Ngö ṙô ang prötör Pasköl, “Örheūheu āyö ai vë-elkui më mahayööken töla-evṙen yē ai ai vë-ekūötēv, kūö Yāvē nö kēten cha, havëkö inyööken cha inrē ai in ò, hòṅ ò nö örheūheu nö in cha.” Pön öthō Yāvē nö öt hang nup tö ngatī ṙô hī yěi vë-e-kūö ò. Hēk teūngen inrē ngam māṅ tö minë inkòlô.—2 Kòr. 1:11.
MË MINṘÖINYLEN “TÖ KALĒḴ ALAHA” NÖ LA-EVṘEN
8. Kūö yòh ang Pôl nö ngatī ṙô tī misī nö kūich inlahen yik Minṙöinylen ik raneh senchurī tö cha nö tökalēḵ alaha nö la-evṙen? (1 Tösalònikē 5:12, 13)
8 Kalēḵ alaha yik misī minṙöinylen nö la-evṙen el ngam māṅ ik raneh senchurī. (Vë-evkūö 1 Tösalònikē 5:12, 13; 1 Tim. 5:17) “Hachō-okūö” ngam māṅ cha-a misī, sā cha nö kēken minë mīting, holṙenre inrē nö kē nup fësla. “Halēn hēk mikahtö elmat” më prötör sistör cha-a nö holtö hanangenlōn re, hòṅ ngam ṙinatö-ellōn cha nö kööpö nganöönö. (1 Tös. 2:11, 12; 2 Tim. 4:2) Hěnghöre, kalēḵ alaha inrē vē prötör nö ngëichkö nup kuilōn ngam mikūönöre, kalēḵ alaha inrē nö hangön ngam innôlöre nö in Yāvē.—1 Tim. 3:2, 4; Tai. 1:6-9.
9. Asuh nup töṙōlkangen la-en më minṙöinylen töngamuh?
9 Pōyen nun minë la-en kahëken më Minṙöinylen, pön sā hī cha-a inrē nö ma-ahangkö ngam tölöök inhānga. (2 Tim. 4:5) Töngöt inrē nö hachōkūö hī im la-en inhānga. Vāyö inlēnlö minë la-en tö cha hòṅ hī öi teungten öi ahānga öi in minë kamngöre. Kētö inrūnö hī cha-a hòṅ hī heuveū-en öi kēken ngam la-en inhānga, heuveū-en inrē öm im inköphöti. La-evṙen inrē cha-a nö sā la-en kamhôka. Holtö miṙēḵlōnre cha-a yēḵ cha nö ngatī inlahen la-en, öt aṅhavin inrē cha-a tö ngam intölten. Yěn hěng tak öp Kristīön kamëken öp tökiröng fālen, ngaich hayööken ò cha-a hòṅ ò nö havanlö ngam innôlöre nö in Yāvē. Chumkūöṙen cha-a tö ngam māṅ ngam Tēv nö hòṅ kööpö hanëtö. (1 Kòr. 5:12, 13; Kal. 6:1) Ngam tökiröng takô pöri la-en cha kahëtö Yāvē, nö ngam inyōmken minë sīṅp. (1 Pīt. 5:1-3) Kētö minë tövai cha-a minkahten lamökngörit in ngam Paipöl. Kalah inrē nö mikahkūöre tö më prötör sistör nö ṙòkhöre hēk chöhken cha inrē. Rīkre më Minṙöinylen kamëtöre nö holṙen më vamī hēk ngamëichkö vinītit minë Patī-Pūlngö. Halēnlö kinëken minë könvensön inrē cha-a, la-evṙen inrē nö el ngam Hòspitöl Liēsön Committee, hēk in ngam Pēsönt Visiting Krup nö chamöhken më tövahavö. Rö-ö nöng anū-ö, pön pōyen inrē nup tahëng la-en cha. Kô-en in öi hangenlōn tö vē tökalēḵ alaha minṙöinylen, ha-öiny minë la-en cha inrē.
10. Kūö yòh öi hòṅ milēḵṙen tö më tökalēḵ alaha minṙöinylen nö la-evṙen?
10 Urěhngöre ṙô ang Yāvē nö vë-eny inlahen më minṙöinylen nö sā inlahen yōm sīṅp nö haṙūötken hī, hòṅ hī ‘öt pa-ekūö öt ngangngö kūö inrē.’ (Yar. 23:4) Töi chumkūöṙen öi ngëichkö ngih inlahen sistör Yohanā ngòh aṅh Finlënt, hē ök yöng ò kikānö nö pōihangṙen nö vāhavö, ngaich hē e anga-aṅ nö akahaiṙen tö më Minṙöinylen nö tö akaha nö yōm sīṅp. Ngö ṙô anga-aṅ, “Kihngen chū-ö hē e öich vë-eny mufē el kuilōnre, hēk vënyö kanihngenre öich i tahëng. Hěngtak pöri ök minṙöinylen vamë-ekūö chu, öt uroh chū-ö öich akahakūö tö ò. Holtö manööyöre pöri anga-aṅ nö hangihtö ṙô chu, holṙô chu inrē öich vë-ekūötēv, hēk vë-eny nang chu inrē tö chu mihôiṅ ṙatö-ellōnre tö Yāvē nö hangenlōn tö chu. Öt uroh chin öich köplōn tö nuk ṙô ò nö in chu. Köplōn pöri chū-ö hē e töre öich teūngen tö ngam lanāmö elkuilōnre, öt pa-ekūö hēk öt pinṙūtulōn inrē. Lööngö ṙētak tī ang Yāvē nö söömten ngam prötör nö in chu.” Ngatī inlahen yip inrē minṙöinylen el ngam māṅ meh nö hayööken meh?
11. Sitih inlahen öm mihôiṅ hameuktö minlēḵṙenre tö më minṙöinylen? (Ngëichkö ngam nyat.)
11 Lōnu ang Yāvē tö hī öi kirööngen minlēḵṙen tö më minṙöinylen “kūö minë la-en cha.” (1 Tös. 5:12, 13) Ngö ṙô ang sister Henritā ngòh aṅ Finlën, “Holtö ṙanamölōnre yin më minṙöinylen yěn hayööken yip tahëng, öt tö ngö manah pöri angū-ö tö cha nö pōyen kumlēḵ hēk ṙētak tö hī hēk öt kanihnguṙen inrē. Hēṙu chū-ö öich ngö ṙô ṙung öich in më minṙöinylen, ‘Kô-en yin öi tö akaha öi minṙöinylen.’” Ngö ṙô ang sister Sēra ngòh aṅ Turkiē c, “Lōnu yin inrē më minṙöinylen tö inreuskö alahare. Lökten ayī-ö mihôiṅ öi kūichtö kāt cha hēk havëken cha nö nyā, mihôiṅ inrē öi holten cha yěi ahānga.” Ōt hòng el ngam māṅ meh minṙöinylen tö hòṅ milēḵkaṙen tö meh? Yěn heūṅ, ngaich kò-òren öm vë-eny nang ò.—1 Kòr. 16:18.
Hareuskö alaha më prötör tö katöllöng el māṅtö hòṅ cha nö iṙūöhen nö ngöt nö i linökölō ngam Tēv (Ngëichkö minë perekrāf 7, 11, 15)
MË SÖRKIT OVÖSĪÖR MA HANGÖNKEN MINË MĀṄ
12. Asuh öp hēk halēnlö Yēsū nö hangönken minë māṅ ik raneh senchūri? (1 Tösalònikē 2:7, 8)
12 Tö tahëngö inlahen yin inrē më kahëtö Yēsū Kristū inlōnti aṅ ih tarik nö hayööken më prötör sistör nö el ngam māṅ. I inchōḵ-okūöre tö Yēsū Kristū yik minṙöinylen aṅ Yērusalem misī nö vīlen Pôl, Parnapas hēk tö yik rīkre inrē tahëng prötör nö trēvöling ovösīör hēk söömngen cha inrē nö chamöhken nuk māṅ. (Inl. 11:22) Kūö yòh nö ngatī? Hòṅ cha nö sā inlahen më mahayööken tö la-evṙen hēk minṙöinylen inrē nö hangönken minë māṅ. (Inl. 15:40, 41) Harööḵngenre cha-a vë prötör hēk öt mufē-ěvö inrē tö ngam nômöre nö hareuskö alaha yip tahëng hēk haköpten cha inrē tö inlahen ngam Tēv.—Vë-evkūö 1 Tösalònikē 2:7, 8.
13. Asuh nup la-en kahëken më sörkit ovörsīör?
13 Kalēḵ alaha yin më sörkit ovörsīör nö chöhken minë tö ṙōlkangen māṅ. Rīkre yip prötör in cha tö pōyen kilōmitör rò-òlkūö nö chuh el nup tahëng māṅ. Kaheuk afta më sörkit ovörsīör inrē nö pōyen kahëti tö minkahten, im chinöha hēk mīting nö më painīör, mīting nö in më minṙöinylen hēk kēḵken ngam fīl sörvis mīting, hěnghöre halēnlö minë sörkit ësemlī hēk könvensön inrē cha-a ngaich kētö minkahten nö in u. Haköphöti inrē cha-a nö el minë iskul më painīör hēk vīlö öp mīting inrē cha-a nö in më painīör aṅ el ngam sörkit. Rö-ö nöng angū-ö pön tahëng inrē nup la-en cha. Tö sā cha nö kēken nup töt ṙanāngen la-enre nup kahëtö ngam mupākö òfis. Kô-en më sörkit ovörsīör hī nö tö kalēḵ alaha nö la-evṙen.
14. Kūö yòh öi hòṅ milēḵṙen tö më tökalēḵ alaha prötör nö la-evṙen tö ngam sörkit ovörsīör?
14 Inlōnti hī yin më sörkit ovörsīör nö aṅ i tarik. Asuh öp yanöölen më prötör sistör nö löktö in cha? Ngö ṙô ök ih tö hěngtak prötör aṅ Turkiē nö kakkö inlahen më sörkit ovörsīör yěn chöhken cha, “Yěn yih më sörkit ovörsīör nö chöha ngaich teūngen chū-ö tö nganötöre hēk kūyulōn inrē töre öich ṙūöhlö inlahenre öich la-evṙen öich chö-öinyten më prötör sistör. Pōyen maheukkūö chin tö më sörkit ovörsīör, öt hōten chu pöri cha-a öich ngö mufē tö cha nö sānngen hēk öt ṙētakvö inrē nö vë-ekūö chu.” Ngö ṙô ang sistör Yohanā ngam tö vënyu inlahen taheui ik urěh, ik sā ò nö hěngheuh nö hol ök sörkit ovörsīör nö ahānga. Öt hēngö taneūngen pöri cha-a tö tarik, ngö ṙô anga-aṅ, “Öt vaichngö pöri chū-ö tö ök ṙētak hē e. Ik sā nak mëm chu kikānö nö chuh tahëng panam nö iyöng ngaich kalēḵ-e mufē chū-ö tö cha. Kētö inreuskö alaha chu pöri ngam sörkit ovörsīör hēk mikahtö elmat chu inrē tö hī yěi löklōn Yāvē ngaich hòṅ maṙôvat ayī-ö tö ngam mikūönöre hēk tö yip holre inrē, pön höng töng rahëichtakūö angū-ö. Örheūheu min ayī-ö öi in cha el öp peretāis.” Pōyen yin më sörkit ovörsīör tö ngatī inlahen më hanangenlōn më prötör sistör.—Inl. 20:37–21:1.
15. (a) Sitih inlahen öi hameuktö minlēḵṙenre tö më sörkit ovörsīör sā ṙô ngam 3 Yôhan 5-8? (Ngëichkö ngam nyat.) (b) Kūö yòh öi hòṅ milēḵṙen tö më pīhö më tö halēnlöng prötör hēk asuh mihôiṅ öp inlahen hī? (Ngëichkö ngam pòks “ Köpölōn Inrē Tö Më Pīhö Cha.”)
15 Tölṙô Kaiös misī ang Yôhan nö havëten yip prötör nö i patīre yip chamöhken cha hēk ‘ngatī inlahen inrē nö söömngen cha hòṅ ngam Tēv nö ṙamlōn.’ (Vë-evkūö 3 Yôhan 5-8.) Mihôiṅ in inrē ayī-ö ngatī inlahen, mihôiṅ öi havëken më sörkit ovörsīör nö chuh patī hī nö nyā hēk ṙūöhöl inlahenre inrē öi im inhānga. Sister Leslī ngam tö vënyu inlahen taheui ik urěh, tahëngö inlahen inrē anga-aṅ nö hameuktö minlēḵṙenre tö cha, ngö ṙô anga-aṅ, “Vë-ekūö Yāvē chū-ö nö hateungngö nup kuilōn më sörkit ovörsīör. Kūichtö chitrī cha ai tö ngam pīhö chu hēk vë-eny nang cha inrē tö ai öi reuslöre alaha öi lökten im inlahen cha yěn chöhken ih.” Köpölōn tö më sörkit ovörsīör nö töng sā hī. Ngatī inrē cha-a nö la-al nup kanihngenre hēk hēṙu inrē nö vāhavö, ōtre inrē nup piṙūtkö cha hēk hēṙu inrē cha-a nö haṙivlōn. Yēḵ hī min öi hangönken cha hēk alōnten cha inrē ngaich mihôiṅ min ang Yāvē nö löktö in hī tī nö kētö sanapṙô cha yěn vë-ekūötēv!—Inch. 12:25.
LŌNU IN TÖ ‘INLŌNTI ṘAMĀ-ANG I TARIK’
16. Asūp mihôiṅ ṙô ngòh tö hěngtak prötör nö hatöönö re nö sā ṙô ngam Inchōḵ-oṙô 3: 27?
16 Lōnu in tö më prötör nö keuheūtngöre chūök ikūö ngih panam nö vītöre nö inlōnti aṅ i tarik. Yēḵ meh öm tö hěngtak öm prötör hēk tö ngaich inrē öm vōkö ngaich mihôiṅ hòng më-eṅ öm kētöre hayööken yip tahëng yěn minhôiṅyö meh angū-ö öm hayööken cha? (Vë-evkūö Inchōḵ-oṙô 3:27.) Mihôiṅ hòng më-eṅ kētöre im la-en mahayööken tö la-evṙen öm hayööken yip prötör sistör? d Ma-ainyre hòng inrē më-eṅ öm la-evṙen pöm hòṅ kētöre im la-en minṙöinylen? Harikngö nup tinrīkenre hòng inrē më-eṅ hēk mihôiṅ hòng inrē më-en öm fil ngam fôm më ma-ahangkö ngam tölöök inhānga? Mihôiṅ nun min në iskul nö heuveū-en tī tö meh, hòṅ Yēsū nö yūsö meh öm in minë la-en. Yēḵ meh öm ngö ṙô lōn töre öm öl hòṅ kētöre in në la-en ngaich vë-ekūö Yāvē më-eṅ. Havëkö kūö ò tö ngam töhet kumlēḵ, hòṅ ò nö hayööken meh öm hateungngö nup kinë-eṅkūöre la-en.—Lūk. 11:13; Inl. 20:28.
17. Inmeuktö yòh aich më inlōnti aṅ i tarik taneūngen hī?
17 Më kahëtö Yēsū inlōnti aṅ i tarik, inmeuktö ò angū-ö nö hachō-okūö hī ing manā-aṅ sakāmö. (Mët. 28:20) Öt ha-öiny inlahen ngam rācha re hòng ayī-ö nö kirööngen hanangenlōn tö hī, chumkūöṙen inrē hēk holtö ellōnre inrē nö kē-ěkūö hī? Öt ha-öinyö ò hòng ayī-ö nö hayööken hī anga-aṅ nö kētö më tö heuveū-en prötör? Ta-a chěi, töi hameuktö minlēḵṙenre tö më prötör mö ma-ainyre nö la-evṙen. Hěnghöre örheūheu öi ha-öinyö Yāvē tökūö më inlōnti hī aṅ i tarik. Pön ‘ṙòkhöre nup tölöök inlōnti, nup tö teung inlōnti’ nö aṅ in ò.—Yāk. 1:17.
TINKÖÖKÖ 99 Hol Maneuk Hī Tö Köönyu Ṙôken
a Më miṙöinylen nö alaha ngam Yōm La-en, më mahayöken cha, mupākö Kömitī hēk yip tahëng inrē tö la-evṙen, cha-a yin “inlōnti nö aṅ i tarik.”
b Harīki minë minë-ny.
c Kaheūkö minë-eny misī angū-ö Turkī.
d Yip pötör tö hòṅ kētöre nö im la-en minṙöinylen hēk mahayööken tö la-evṙen ngaich mihôiṅ cha-a nö ngëichkö ngam ātiköl in ngam Chūökamahati 2024, Nòvempör minë tö ngö kui “Yī-ö Prötör Lōnu Öi Töre im La-en Mahayööken Tö La-evṙen?” hēk “Yī-ö Prötör Lōnu Öi Töre im La-en Minṙôinylen?”
