TÖHAKÖÖPÖ ĀTIKÖL 43
TINKÖÖKÖ 90 Kö Hangönken Höö
Sitih Inlahen Öi Ṙūöhngen Ngam Kintööngö Elkuilōnre?
“Kalah tökeuheūttöre.”—1 TÖS. 5:21.
ASUH ÖP MIN HAKÖP HĪ?
Sitih inlahen öi ṙūöhngö ngam kintööngö elkuilōnre, hòṅ hī öt kūönngöre inlahen im linökölōn Yāvē?
1-2. (a) Asūp mihôiṅ yamih kintööngö elkuilōn më tarik Yāvē? (b) Asuh öp min kahakkö hī in ngih ātiköl?
PÒRÔ ayī-ö öi ṙālö hēk tököinyö ṙēḵti, mihôiṅ ayī-ö hēṙu öi yīhi kintööngö a elkuilōn. Tö sā ngòh töhěng tak ṙāl tarik tö ngö mufē, ‘Chumkūöṙen hòng ang Yāvē tö chu.’ Angū-ö mihôiṅ min lāinyngen ò nö heūlngöre nö kēḵ ngam vinôkö. Lohten inrē öp töhěng tak prötör nö im ṙanālö re nö urěhlö ngam Pūlngö ngam Tēv, lökten nö öt im inmūl pësa. Kihngen pöri anga-aṅ nö hateungngö kuilōn ngam mikūönöre. Lohten anga-aṅ nö ngöṙô lōn, ‘tölöng angvö ngam kahë chu fësla?’ Lohten inrē ngam tököinyö ṙēḵti sistör nö ngöṙô lōn töre nö öt sā nuk urěh inlahen re nö löklōn ngam Tēv tö kūöre nö öt kalēḵ-en, mihôiṅ min anga-aṅ lohten nö haṙivlōn ngaich ngö mufē, ‘Hö-ö chin chū-ö öich tö hō-ov tö Yāvē in minë la-en.’ Hēṙu öm ṙung më-eṅ öm ngatī mufē?
2 Yēḵ meh min öt ilööṙen öm kēngö ngam kintööngö elkuilōnre, ngaich mihôiṅ min ngam ṙinātö-ellōnre meh nö kūönngöre hēk ṙāngen re inrē min më-eṅ öm löklōn Yāvē. In ngih ātiköl min öi mikahtökūöre öi sitih inlahen mihôiṅ ṙūöhngö ngam kintööngö elkuilōnre öi löktö in minë lökngörit chööngö aṅ mat ngam Paipöl. Tö sā hī mihôiṅ öi ngö mufē, (1) chumkūöṙen angvö Yāvē tö chu, (2) löng hòng ngam kahë chu fësla hēk (3) hō-ov hòng chū-ö tö Yāvē öich in nup la-en.
ASŪP MIHÔIṄ INLAHEN HĪ ṘŪÖHNGÖ NGAM KINTÖÖNGÖ ELKUILŌN RE
3. Asuh öp ihih töhěng inlahen meh öm ṙūöhngö ngam kintööngö elkuilōnre?
3 Ngih töhěng inlahen hī yěi hòṅ ṙūöhngö ngam kintööngö elkuilōnre, öi haköp ngam Ṙô ngam Tēv ngam Paipöl. In e min ayī-ö teūngen tö sanapṙô minë intöönö. Yē hī min ngatī inlahen, ngaich ṙūöhlöre min ngam ṙinātö-ellōn hī in Yāvē hēk ngönlöre inrē min ngam innòlö hī öi in ò, hěnghöre ‘köp inrē min ayī-ö im ṙinātö-ellōnre.’—1 Kòr. 16:13.
4. Sitih inlahen öi mihôiṅ ‘Kalah i ökeuheūttöre’? (1 Tösalònikē 5:21)
4 Vë-evkūö 1 Tösalònikē 5:21. Vënyu nang in tö ngam Paipöl tö hī hòṅ ‘kalah i tökeuheūttöre.’ Öi sitih inlahen? Yěn yih nup intöönö elkuilōn hī, ngaich mihôiṅ ayī-ö ma-ainyre mikahtökūöre tö ṙô ngam Paipöl nö vënyö inlahen e. Tö sā inlahen öp mufē öp ṙāl tarik nö mihôiṅ anga-aṅ nö ngölōn, tö ngam Tēv nö öt chumkūöṙen tö ò. Höng hòṅ ilöö ṙātö-ellōnre hòng min anga-aṅ tö e? Hö-ö öt ngatī. Pön hòṅ urěh anga-aṅ nö ‘kalah i tökeuheūttöre,’ ngaich mikahtökūöre tö inlahen ngam mufē Yāvē.
5. Isuh chūök öi mihôiṅ teūngen tö sanapṙô minë intöönö elkuilōnre?
5 Yē hī öi haköp ngam ṙô ngam Tēv, ngaich sā hamang ṙô Yāvē min ayī-ö hēk akahakūö inrē tö ngam mufē ò. Yěi hòṅ mikahtökūöre pöri tö sanapṙô minë intöönö öi löktö imat ngam Paipöl, ngaich hòṅ ṙūöhlö ngam inlahenre hēk ayī-ö kētöre. Hòṅ chöh nup miröökö ayī-ö hēk rīsörchö u inrē hòṅ ngam kintööngö elkuilōn hī min nö ṙūöhngöre. Hěnghöre hòṅ yūs minë pöplikēsön tö halēnlöng tö ngam söngkötön, chūök hī mihôiṅ öi rīsörch. (Inch. 2:3-6) Mihôiṅ öi havëkö inyööken re in Yāvē öi rīsörch, hòṅ hī akahakūö tö ngam mufē ò. Mihôiṅ inrē öi chumkūöṙen tö nup lökngörit chööngö hēk nup minkahlōn nup lökten hī mihôiṅ la-al nup kanihngen re. Chumkūöṙen inrē min ayī-ö öi ngëichkö inlahen yip tarik ngam Tēv misī tö ngatī inlahen kanihngen.
6. Sitih inlahen ayī-ö öi teūngen tö inyööken re öi ṙūöhngö ngam kintööngö elkuilōnre öi löktö in minë mīting?
6 Löktö in minë mīting inrē ang Yāvē nö vë-ekūö hī. Yē hī min yihtakūö el minë mīting, ngaich lohten min nö ṙūöhngöre ngam kintööngö elkuilōn hī yěi hang nup minkahten hēk tö nup sanapṙô yip tahëng inrē. (Inch. 27:17) Ta-a chěi töi ngëichkö nup tö yih mihôiṅ nö kintööngö elkuilōn hī, ngaich sitih inlahen ayī-ö mihôiṅ ṙūöhngen u.
CHUMKŪÖṘEN HÒNG ANG YĀVĒ TÖ CHU
7. Asuh nup mihôiṅ yamih intöönö nö elkuilōn yip rīkre tarik?
7 Yih ön në tö ngatī intöönö ṙung nö elkuilōn meh, ‘Kô-en hòng ang Yāvē nö chumkūöṙen tö chu? Yēḵ meh öm kun elmat töre, ngaich ngöṙô lōn mihôiṅ min më-eṅ, ‘Sitih inlahen mihôiṅ öich hanôl ngam mā Tēv? Öt tö hō ön ngih nö ngatī.’ Lohten inrē nö ngatī mufē misī ang Tāvit. Pingangkūö anga-aṅ nö meuk inlahen Yāvē nö chumkūöṙen tö më töng tarika. Ngöṙô anga-aṅ, “Mā Tēv, asuh ang ngòh tarik, töp lökten Meh miṙūöt tö ò: hēk ngòh kūön tarik, töp lökten Meh mikūöṙen tö ò?” (Sal. 144:3) Isuh pöri më-eṅ mihôiṅ öm teūngen tö sanapṙô ngih intöönö ngam tö ngöṙô, ‘Kô-en hòng ang Yāvē nö chumkūöṙen tö chu hēk mikūöṙen inrē?ʻ
8. Sā ṙô ngam 1 Samuěl 16:6, 7, 10-12, asuh öp maheuk Yāvē nö in më tarik?
8 Löktö in ngam Paipöl öi akahakūö tö Yāvē nö chumkūöṙen anga-aṅ tö më tarik tö hanāchiṙen tö yip tahëng. Töi mikahtökūöre öi löktö in ngih töhěng inlahen. Tīnngen Samuěl ang Yāvē nö chuh in Yēsī nö katöllö rācha yip aṅ Isreal. Hameuktö yik tö sat tak kūön re ngaich ang Yēsī nö ikūö Samuěl, hö-ö pöri anga-aṅ nö kumten öp manāngö kūönre ang Tāvit. b Katölöng pöri ang Tāvit nö rācha tö Yāvē. (Vë-evkūö 1 Samuěl 16:6, 7, 10-12.) Kūö yòh? Kūö Yāvē nö meuk ellōn Tāvit hēk meuk ngam tökiröng hanangnenlōn ò inrē ik sā ò nö ṙālö.
9. Kūö yòh öm më-eṅ mihôiṅ ṙātö-ellōnre tö Yāvē nö chumkūöṙen tö meh? (Ngëichkö ngam nyat.)
9 Fēkö inlahen Yāvē man nö sitih inlahen anga-aṅ nö chumkūöṙen tö më. Asā öp kanò-òṅ meh anga-aṅ nö kētö inlēnö nö in meh. (Sal. 32:8) Fē-a man yēḵ Yāvē öre nö ör keuheūtlöre mikahkūö tö meh, ngaich sitih inlahen mihôiṅ anga-aṅ min nö kētö minë tövai inlēnö nö in meh? (Sal. 139:1) Ngaich yēḵ meh min öm meuk minë yanöölenre öm löktö in minë inlēnö kahëtö Yāvē, ngaich ṙūöhlöre min ngam ṙinātö-ellōn meh tö Yāvē nö chumkūöṙen tö meh hēk pōiṙāi mat inrē tö meh. (1 Kin. 28:9; Inl. 17:26, 27) Nup töng inlahen meh i linöökö lōn ò chumkūöṙen anga-aṅ nö ngëichken u. Chumkūöṙen inrē anga-aṅ nö ngëichkö nup tövai tinrīken meh hēk lōnu inrē töre nö hòṅ hanôlö meh. (Yar. 17:10) Rö-ö nöng angū-ö, pön lōnu inrē ang Yāvē tö meh öm hanôlö ò.—1 Yôh. 4:19.
‘Yē meh chöhö Yāvē, kôtö kūö man min tö ò.”—1 Kin. 28:9 (Ngëichköm perekrāf 9) c
LÖNGÖ KAHË HÒNG CHŪ-Ö TÖ FËSLA
10. In nuk tö urěhngöre fësla kahë hī, asuh nup mihôiṅ intöönö yamih nö elkuilōn hī?
10 Lohten yip rīkre tarik min nö yīhi kintööngö elkuilōn nö in nuk tö urěhngöre samyeūheu kahë re fësla, lohten cha-a nö ṙāngen nuk kinmānöre hēk nup tahëng inrē la-en kūö cha nö kētöre nö löklōn Yāvē. In minë tö unôichngöre samyeūheu pöri cha-a nö meuk më mikahkūöre hēk më holre nö teūngen tö minë tövai kinmānö, ngaich lohten min nö ngö mufē, ‘Pōyen aṅ in cha-a tö minë kanòlô hēk kumchikngen re inrē. Löng hòng ngam inlahen chu öich harööḵngen re öich kētöre i linöökö lōn Yāvē hēk hamūl rupīö hòng chū-ö öre?’
11. Kūö yòh ök kamūich ngam Salmai tö 73 nö kihngen ellōn?
11 Yěn yih nup tö ngatī intöönö nö elkuilōn meh, ngaich mihôiṅ öm afēkö inlahen öp kamūich ngam Salmai tö 73. Meuk inlahen yip tarik anga-aṅ töt lamöklōn Yāvē nöng haṙamlōnre hēk kuchīkenre inrē nö in nup inlahen re. (Sal. 73:3-5, 12) Ngaich ngöṙô lōn anga-aṅ tö cha nö öt hěngö kanihngen hēk öt pirūtku inrē. Lökten anga-aṅ mihôiṅ nö ngöṙô lōn, nöng yanëḵngen minë inlahen ò nö harööḵngen re nö löklōn Yāvē. Kūö në tö ngatī anga-aṅ mufē re, nö ‘kaheuk sakāmö nö chökö nômö’ hēk haṙivlōn inrē. (Sal. 73:13, 14) Asuh pöri ngaich öp inlahen ò?
12. Sitih inlahen nö ṙūöhngöre ngam kintööngö elkuilōn ngam kamūich ngam Salmai tö 73? (Salmai 73:16-18)
12 Vë-evkūö Salmai 73:16-18. Ik sā ngam kamūich ngam Salmai nö chuh el ngam töhet chūök vinë-ekūö Yāvē. Ngaich in e anga-aṅ nö halööktö ngam mufē re. Akaha elmat ngaich anga-aṅ tö hī yěi pòrô öi ngöṙô lōn tö më tötlöök tarik nö kuchīken, öt maheukkūö pöri cha-a tö öp yamih ṙētak. Löktö in e anga-aṅ nö teūngen tö hanöhlöre. Akaha elmat inrē anga-aṅ tö ngam inlahen ò nö urěhlö ngam linkölōn ngam Tēv nö tölöng angū-ö. Ṙūöhöngre ngaich ngam kintööngö elkuilōn ò hēk ngönlöre ngam kuilōn ò nö i linköölōn Yāvē.—Sal. 73:23-28.
13. Asūp mihôiṅ inlahen meh yěm katööngö lōn tö nup kahë re fësla yěn tölöng anū-ö hēk yěn hö-ö? (Ngëichkö ngam nyat.)
13 Mihôiṅ in öi asīnken ngam kamūich ngam Salmai tö 73 öi ṙūöhngö minë kintööngö elkuilōnre hēk mihôiṅ inrē öi teūngen tö ngam lanāmö elkuilōn re. Öi sitih inlahen? Mihôiṅ öm afēkö nup in re hēk afēkö nup in yip tarik inrē ing panam. Tö sā meh öm hamūl kanòlô öm el halīöngö ngaich hayööken meh ang Yāvē. Öt lamöklōn ngam Tēv pöri më aṅ ngih panam, lökten nö öt hayööken cha ang Yāvē. Ngöṙô lōn cha-a töre yěn aṅhav in tö tövai kinmānö hēk kumchīken re, ngaich höng anū-ö kamëtö ṙanamlōn tö lōn cha, pò cha nö öt maheukku tö öp yamih ṙētak. Harīkngöre pöri ayī-ö tö cha. Kilēḵngô re ang Yāvē nö in hī tö ò nö kētö maheukkö hī tö öp yamih ṙētak hēk kētö nup tö pōyen inkòlô hī inrē nup töt mufē hī. (Sal. 145:16) Afē-a man, yēḵ meh hamūl rupīö öm ing panam ngaich öt löklōn Yāvē, karëntīru hòng më-eṅ töre min öm kuchīken nö sā öp mufē meh. Yēḵ ngòh töhěng tak tarik pöri nö hangenlōn tö Yāvē hēk tö yip tarik inrē hēk chumkūöṙen inrē tö inlahen u nö kē fësla re, ngaich anga-aṅ min tö teūngen tö ngam tökô-en ṙanamlōn hēk öt hanaktuṙen inrē.
Fēkö inlahen minë tö hòṅ kahëtö Yāvē inkòlô (Ngëichköm perekrāf 13) d
HŌ-OV ÖICH TÖ YĀVĒ IN NUP LA-EN
14. Asuh nup mihôiṅ yamih intöönö nö elkuilōn më rīkre tarik Yāvē?
14 Rīkre yip tarik ngam Tēv töt fūra inlahen nö sā nuk urěh inlahen re nö löklōn Yāvē, kūö cha nö köinyö ṙēḵti, vahav hēk lum inrē. Lökten cha-a nö ngöṙô lōn tö minë inlahen re nö töng yanëḵngen. Lohten inrē cha-a nö ngö mufē, ‘ṙömöng hō-ov öich chū-ö tö Yāvē öich in minë la-en?’
15. Asuh öp ṙinātö-ellōn ngam Salmai tö 71?
15 Lohten inrē nö yih ngih intöönö nö elkuilōn ngòh kamūich ngam Salmai tö 71. Ngöṙô anga-aṅ nö vë-ekūö Yāvē: “Uh öich ṙā-ayö yē chu ngaich chūhu kumlēḵ.” (Sal. 71:9, 18) Ṙinātu-ellōn pöri anga-aṅ töre yēḵ ò min nö chiplö nö löklōn ngam Tēv, ngaich chumkūöṙen min anga-aṅ tö ò hēk hachōḵ kūö ò inrē nö lök in ngam tökô-en talöökö. Akahakūö inrē anga-aṅ tö hī yěi asā öp kanò-òṅ re öi löklōn ngam Tēv, ngaich ṙamlōn min ang Yāvē nö in u.—Sal. 37:23-25.
16. Asūp mihôiṅ inlahen më tököinyö ṙēḵti prötör sistör nö löklōn Yāvē? (Salmai 92:12-15)
16 Yī-ö tö köinyö ṙēḵti prötör sistör, kalahten re yin öi sā mat Yāvē ngëichköre. Lohten ngam alaha meh nö öt kalēḵ-en, kaheuk sakāmö pöri ngam innôlö meh nö in Yāvē nö ngönlöre. (Vë-evkūö Salmai 92:12-15.) Lökten më-eṅ mihôiṅ öm fēkö nup tö hòṅ inlahen re. Tö sā meh, yěm chiplö löklōn Yāvē hēk mikahtökūö re tö yip tahëng, ngaich teungten min më-eṅ öm hareuskö alaha cha. In e më-eṅ mihôiṅ öm vë-eny nang yip tahëng tö Yāvē nö samyeūheuv rô-òten nö chumkūöken meh hēk meuk nup tö hòṅ teungtakūö inrē më-eṅ kinlēḵngô ò ip yamih ṙētak. Rö-ö nöng angū-ö, pöm mihôiṅ inrē öm vë-elkui yip tahëng. Öt mufē-ěv min më-eṅ tö ngam ṙô re nö mihôiṅ min nö lökngöre tī tö cha. (1 Pīt. 3:12) Kô-en pòrô öp töng yòh inlahen hī, mihôiṅ öi chöhtö nup inlahen re öi löklōn Yāvē hēk hayööken yip tahëng inrē.
17. Kūö yòh öi ötkô asā töre in yip tahëng?
17 Haṙivlōn hòng më-eṅ tö kūö meh öt sā nuk urěh inlahen re öm löklōn Yāvē. Ṙātö-ellōnre man tö Yāvē nö pōiṙāi mat tö nup inlahen meh öm löklōn ò. Um fēkö ngam inlahen re öm ötkô sā inlahen yip tahëng nö kalēḵ alaha nö löklōn ngam Tēv. Pön öt hěngheuh ang Yāvē nö asāten meh nö in më rīkre tarikre. (Kal. 6:4) Tö sā ngih inchōḵ elmat tö Mariā nö föhtö ngam tö tahūsa tavī-i nö elkui Yēsū ngam tö pōiṙāi. (Yôh. 12:3-5) In ngam tahëng hēk inlahen ngam tafīösi nö chaplö minë töng tak anga-aṅ nö el ngam chūök vinë-ekūötēv. (Lūk. 21:1-4) Meuk ngam ṙinātö-ellōn cha pöri ang Yēsū ngaich eū-eu cha. Kô-en ang Yēsū nö sā ngam Yöngre. Lökten öm ṙātö-ellōnre tö nup töng inlahen meh öm löklōn Yāvē nö kūö ngam hanangenlōn meh angū-ö, pòrô anū-ö nö töng kūönnen nö inlahen meh, hameuktö minlēḵṙen re pöri ang Yāvē nö in u.
18. Sitih inlahen öi mihôiṅ ṙūöhngö ngam kintööngö elkuilōnre? (Ngëichkö ngam pòks “ Ṙūöhngö Ngam Kintööngö Elkuilōn Öm Löktö In Ngam Ṙô Yāvē.”)
18 Ròkhöre in öi hēṙu yīhi kintööngö elkuilōn. Sā hī pöri ngaich öi akahakūö tö hī mihôiṅ öi ṙūöhngö ngam kintööngö elkuilōnre öi löktö in ngam ṙô ngam Tēv. Lökten më-eṅ hòṅ ma-ainyre öm chöh sanapṙô minë intöönö elkuilōnre. Yēḵ meh min ngatī inlahen, ngaich kūönngöre min ngam pinṙūtö kuilōn meh hēk sīöplöre inrē min ngam ṙinātö-ellōn meh tö Yāvē nö chumkūöṙen tö meh. Rö-ö nöng angū-ö, pön hangenlōn ang Yāvē tö më tarikre hēk chumkūöṙen inrē tö cha.
TINKÖÖKÖ 111 Löktö Nup Töpōyen Ṙanamlōn Hī
a TÖ SITIH MANAH ANGŪ-Ö? Vënyu nang in tö ngam Paipöl tö ngòh tarik yěn kūönnen ṙinātö-ellōn, ngaich mihôiṅ min anga-aṅ nö yīhi kintööngö elkuilōn nö in minë kinlēḵngô Yāvē. Hö-ö pöri ngih ātiköl nö ṙôten ngih tö ngatī kintööngö elkuilōn. Pön ṙôten nup tö hēṙu nö yih kintööngö elkuilōn ngòh Kristīön nö mihôiṅ. Tö sā ò lohten nö ngöṙô lōn tö Yāvē yěn pōiṙāi elmat tö ò hēk yěn hö-ö, hēk yěn tölöng nup fësla kahë ò.
b Hö-ö in vënyu nang tö ngam Paipöl tö Tāvit nö iṙēḵti samayeūheu anga-aṅ nö hachāmö elkui. Lohten pöri ngam ṙēḵti ò nö elhôi minë 14-15.—Ngëichkö ngam 2016 Chūökamahati, No. 4 pěch 9.
c VAMË-ENY INLAHEN NGAM NYAT: Hěng tak ngam sistör nö rīsörch inlahen ngam mufē Yāvē in nö nup inlahen nö imat ngam Paipöl.
d VAMË-ENY INLAHEN NGAM NYAT: Hěng tak ngam prötör pamitkö inlahen re nö ngëichkö kūö ngam mikūönöre, haköpkö ngam maheukre pöri anga-aṅ nö in öp yamih ṙētak yěn vī-i min ngih panam nö peretāis.
