1-2. Achīö öp tö tīntu nö mahachō röön hī öi lök el ngam talöökö kanô-en?

ASEHKŪÖRE man, yēḵ nā kiröön töp hol meh an lök kūö kuyāyö, öp tö akahakūö töm talöökö. Kirööngen pöri minë chōn nö röhnyi nö ikūö ngam kuyāyö. Rěhrô-òlkūö an kiröön ngaich öt meukngö kūö ngam holre më-eṅ, hö-ö pöri öm vöö pöm meuk minë elröön ò nö urēhěkūö meh. Lökten öm höng iṙūöhö röön öm kiröön öm asīnkö minë vanangö ò, öm tömrit ò!

² Achīö öp mihôiṅ mahachō röön ngòh Kristīön töngamuh, nö lök el ngih tö kihngen panam. Yēsū an tahīntö Yāvē nö mahachō röön hī öi lök el ngam talöökö kanô-en, hòṅ hī öi tömkö röön ò. (1 Pīt. 2:21) Vënyu nang in tö Pītör tö Yēsū nö sā ṙēngen öp mu-urēhěkūö hī, hòṅ hī tömkö röön ò. Ta-a töi ngëichkö sanapṙô në tö lūöi intöönö: Tö sitih manah öng ngam insīnkö röön Yēsū? Kūö yòh öi hòṅ haröhtö röön re tömkö röön Yēsū? Sitih inlahen öi mihôiṅ haröhtö röön re öi tömkö röön Yēsū?

3. Tö sitih manah öng ngam kiröön hēk kalröön nö imat ngam Paipöl?

³ Ōt nun minë ṙô imat ngam Paipöl tö sā ngam “kiröön” hēk “kalröön,” nö vamënyö tinrīken ngam tarik, irô-òtö nômö ò. (Ran. 6:9; Inch. 3:23) Yēḵ hī min asīnkö tinrīken  ngam tarik ngaich sā tamöm köröön ò min ayī-ö.

4. Tö sitih manah öng ngam insīnkö röön Yēsū?

⁴ Yěi kēken minë taṙòkhöre la-en kahëken ò, ngaich mihôiṅ öi vë-eny re ma-asīnkö röön Yēsū. Vë-eny nang hī ang Pītör tö Yēsū nö hachōten hī öi hòṅ keun kanihngen töpòkūö holre. Pōyen minë inlahen Yēsū tö vai, inchōkūö hī. (1 Pīt. 2:18-25) Pōyen haköp in öi in minë ṙô Yēsū, minë inlahen ò inrē.

5. Mihôiṅ öi min tömkö röön Yēsū yēḵ hī töthet?

⁵ Heūṅ! Mihôiṅ in öi tömkö röön Yēsū pôrò öi töthet. Kööpölōn tö Pītör nö rö-ö nö tölṙô hī öi sā ta röön takô öi in Yēsū, höng tölṙô hī pöri anga-aṅ öi ‘haröhtö röön re öi tömkö röön ò.’ Lökten in pôrò öi töthet, sön öi mihôiṅ asīntö röön re öi in Yēsū ip tölngö kanô-òṅ hī. Ngaich hamang ṙô Yôhan min ayī-ö nö ngö ṙô: “Anga-aṅ inrē tö hòṅ vangngöre, nö sā ngam röön ò [Yēsū].”—1 Yôh. 2:6.

6-7. Sitih inlahen öi min kò-òren öi röhta öi in Yāvē?

⁶ Yēḵ hī min öi tömkö röön Yēsū, ngaich röhta min ayī-ö in Yāvē. Ngam raneh inlahen hī, öi hòṅ örheūheu la-evṙen tö nup la-en Yēsū. (Yôh. 8:29) Yēḵ hī min asīnken ò, ngaich ṙamlōn min ang Yāvē. Ngaich mihôiṅ öi ṙatö-ellōn re tö Yāvē nö ṙūöhtöre min nö in hī.—Yāk. 4:8.

⁷ Innëtö lāinyngen, kô-en Yēsū nö kēken minë taṙòkhöre la-enre nö sā inlahen ngam yöngre. Lökten anga-aṅ nö ngö ṙô: “Ngòh mameūkö Chu, ngaich meuk ngam Yöng inrē.” (Yôh. 14:9) Mihôiṅ in ayī-ö inrē asīnken Yēsū yěi vë-ekūö yip holre hēk la-evṙen öi holṙen cha. Hē Yēsū nö  meuk ök tö yeūnyu tarik, chöknyi nômö anga-aṅ nö meūkan, lökngöre anga-aṅ inrē tö chanöökö ök yöng nyīö tö marô-òtökūö nö vāhavö. Yēḵ hī min ayī-ö inrē, lökngöre tö nup kanihngen yip holre, ngaich sā ma-asīnken Yēsū min ayī-ö öi pītnyöre. (Māk. 1:40, 41; 5:25-34; Yôh. 11:33-35) Ngaich röhta min öi in ngam Tēv yěi ngatī inlahen.

8. Sitih inlahen öi min yěi hòṅ “mihôiṅ” töng panam?

⁸ Öt hō in lōmngö i nup la-en ngih panam yēḵ hī min öi tömkö röön Yēsū. Öt lōmngö Yēsū tö nup la-en ngih panam, nup mufē yip tarik hēk nup tinrīken cha inrē. Öt vaichngö anga-aṅ töm la-en re nö yih nö ing panam, nö möharōilö minë-eny Yāvē. Lökten ò nö heuveū-euṙô nö ngö ṙô: “Ngaich Chin mihôiṅ töng panam.” (Yôh. 16:33) Pōyen nup inlo-ongkūö hī töngamuh ikūö ngih panam. Yēḵ hī pöri min haköpmatre ngëichken Yēsū ngam inchōkūö hī, ngaich öt hō min öi öt “mihôiṅ” töng panam.—1 Yôh. 5:5.

9. Hòṅ sitih inlahen öi yěi hòṅ teūngen töm nômö tö-örheūheu-aṅ?

⁹ Yēḵ hī min tömkö röön Yēsū ngaich teūngen min töm nômö tö-örheūheu aṅ. Hěngtak ök ihih tökôlò tarik mahatön töre tö inlahen re nö teūngen töm nômö tö-örheūheu aṅ, ngaich ngö ṙô Yēsū nö sapṙô ò: “ta-a tömrit Chu.” (Mët. 19:16-21) Ōt misī yik Yahuti töt ṙamatö ellōn re tö Yēsū nö Kristū. Lökten ang Yēsū nö ngöṙô tö cha: “Hang ṙô chu nun në pöököre Chu . . . tömrit Chu anū-ö inrē. Ngaich kē-ěkūö u Chu-ö tö ngam nômö tö-örheūheu-aṅ.” (Yôh. 10:24-29) Hē Nēkòtēmös nö yihtöre, ngaich ngö ṙô Yēsū tö ò. Ngòh ‘ṙamatö ellōn re nö in chu,’ nômuvö min anga-aṅ tö ngam “tö-örheūheu-aṅ.” (Yôh. 3:16) Ngatī ayī-ö min, yěi hòṅ nômuvö töm tö-örheūheu aṅ, ngaich hòṅ tömkö röön Yēsū ayī-ö, hòṅ ṙatö-ellōnre inrē öi in ò.—Mët. 7:14.

10. Hòṅ sitih inlahen öi yěi hòṅ mikahkūöre tö Yēsū? (Yôhan 17:3)

¹⁰ Yēḵ hī öi hòṅ haröhtö röön re tömkö röön Yēsū ngaich hòṅ mikahtökūö re ayī-ö tö ò. (Vë-evkūö Yôhan 17:3.) Hòṅ kēnyö ṙētakre öi haköp inlahen Yēsū, mikahtökūöre tö minë mufē ò, haköp minë tinrīken ò, asīnkö inlahen ò nö la-evṙen tö minë la-en re. Möl kò-òren öi vë-eny re akahakūö tö ò. Pòrô öi marô-òten ngaich  im kanô-en, sön höng hòṅ iṙūöhen öi ‘mikahtökūöre’ tö Yāvē, Yēsū inrē, ngaich möl min öi teūngen töm nômö tö-örheūheu aṅ.

11. Asuh nup haköp hī imat minë tö fën tölöök inhānga?

¹¹ Hōten hī Yāvē akahakūö tö Yēsū, lökten ò nö tölṙô kinūchö minë tö fën tölöök inhānga. Vënyu minë tinrīken Yēsū, minë la-en ò nö imat u. Lökten in u ayī-ö öi akahakūö tö minë ṙô Yēsū, minë la-en ò, tinrīken ò, tö minë mufē elkuilōn ò inrē. (Hep. 12:3) Yēḵ hī min chumkūöṙen öi vë-ekūö u, ngaich sīöpö mikahkūö min ayī-ö töm tinrīken Yēsū, ngaich lööṙen min öi haröhtö röön re öi tömkö röön ò.

12. Hòṅ asuh töre öp tö hòṅ inlahen hī yěi vë-ekūö minë tö fën Tölöök inhānga?

¹² Hòṅ chumkūöṙen in inrē öi hakööpö u, fēken minë haköp re. (Kò-òren ngëichkö ṙôm Yôsuā 1:8, futnōt.) Hòṅ kēkö kaha minë haköpre inrē ayī-ö ngaich möl min öi yöölen. Ta-a töi ngëichkö minë tö nët hinôtö hī inlahen.

13. Kūö yòh öi hòṅ vī minë nyat nö sā mahalöinyköre nö elkuilōn hī?

¹³ Vī minë nyat man nö sā mahalöinyköre nö el kuilōn meh. Yěm vë-ekūö minë tölöök inhānga, hòṅ asehkūöre man tö minë haköpre, öm sā hamangö u hēk sā tö akahaiṙen tö u nö vënyu. Lökten öm afītöre tö u. Kò-òren öm vë-ekūö minë miröökö minë mu-urēhěkūö hēk mu-unôichrit minë vahë-ekūö meh, ngaich vī nyat më tarik öm elkui re më tö vënyu inlahen. Kò-òren öm vë-ekūö minë tahëng līpöre tölöök inhānga, ngaich öt hō min öm öt teūngen tö haköpre öm lökten in u. Mahayööken meh min anū-ö öm haröhtö röön re öm tömkö röön Yēsū.

14-15. Sitih inlahen öm min kēkö kaha nup haköpre?

¹⁴ Innëtö, kēkö kaha nup haköp re man. (Yôh. 13:17) Hòṅ fēkö minë haköp  re man, mihôiṅ öm hatöönöre öm ngö ṙô: ‘Asuh nup haköplö chu, nup tö hòṅ kēka kaha tö chu? Sitih inlahen öich min hayööken yip tahëng tö minë haköpre?’ Kò-òren öm fēkö inlahen öp tö hěngtak tarik öp tö hòṅ hayöökaṙen tö meh, ngaich kēnyö ṙētak re öm vë-eny nang ò, tö nup haköpre. Holtö hanangenlōn re pöri öm vë-eny nang ò.

¹⁵ Sitih inlahen öm min kēkö kaha ngam innëtö inlēnö? Ta-a töi haköp inlahen ngam yāich tafīösi, ngamtö meukö tö Yēsū nö el ngam töhet chūök.

16. Asehkūöre man öm vë-eny ṙô ngam Mākös 12:41?

¹⁶ Vī minë nyat man nö sā mahalöinyköre nö el kuilōn meh. (Vë-evkūö Mākös 12:41.) Asehkūöre man tö ngam ṙētak Nisān 11, 33 C. E. Haköphöti ang Yēsū nö el ngam töhet chūök. Ngaich kalahan yik mākūö kūönṙô nö ngö ṙô, achīö öp kamë-ekūö meh tö chööngö meh öm la-evṙen tö u? (Māk. 11:27-33; 12:13-34) Unôichrit e ang Yēsū nö haröhtöre nö in ngam chūök chamaplö rupīö. Lohten anga-aṅ nö hang ṙô tī cha nö chaphöl, pön pōyen nuk tö chaplöngö tö cha.

17. Vënyö inlahen ngam yāich tafīösi man ngam tö vënyu im Mākös 12:42?

¹⁷ Vë-evkūö Mākös 12:42. Yěi ngëichkö ngam töng “yāicha tafīösi” nö yih nö el ngam töhet chūök. (Lūk. 21:2) Chaplö nuk töng aṅ in re anga-aṅ nö ṙòkhöre, öt rēhěn nö hangö ṙô nuk chahaplö ò tö kūö kun ṙôken re. Akahalōn pöri ang Yēsū tö minë chahaplö ò nöng kūönen takô, öt rēhěn nö kô anga-aṅ nö havah nya-aṅkūöre tö u tö kun ṙòken u.

18. Sā ṙô ngam Mākös 12:43, 44 sitih ṙô ang Yēsū nö vë-eny ṙôken nuk chahaplö ngam yāich tafīösi?

¹⁸ Vë-evkūö Mākös 12:43, 44. Ṙamlōn ang Yēsū nö meuk nuk chahaplö ngam yāich tafīösi. Lökten ò nö havëtö yik haköptöre ngaich ngö ṙô tö cha: “Pōyen nun në chahaplö ngòh yāich tafīösi, tö minë [chahaplö më tökôlò] pò cha nö ṙa-ang in minë tö pōyen aṅ in re nö chaphöl, hö-ö pöri ngòh tafīösi pön chaplö nuk töng aṅ in re nö ṙòkhöre.” Inmeuktö ò nö ṙatö-ellōn re nö in Yāvē tö ò min nö öt hō nö öt chumkūöṙen tö ò.—Sal. 26:3.

19. Asup haköplö hī öi im inlahen ngam yāich tafīösi?

¹⁹ Kēkö kaha minë haköpre man. Kò-òren öm hatöönöre ngö ṙô, ‘Asuh öp haköplö chu in ngam ṙô Yēsū inlahen ngam tafīösi?’ Asehkūöre man tö inlahen ngam tafīösi tö ò lohten nö hòṅ kūyulōn, nö hòṅ sā ṙôken chahaplö më holre. Öt kô pöri anga-aṅ tö kūö yanāichöre. Ngaich pöri anga-aṅ nöng ip tölngö kanô-òre nö kē-ěti, ngaich ṙamlōn ang Yāvē nö meuk minë kahëtö ò. Haköplu in öi in e, tö hī hòṅ holtö ellōn re öi löklōn Yāvē ngaich ṙamlōn min anga-aṅ. (Mët. 22:37; Kòl. 3:23) Hòṅ ngatī inlahen ayī-ö ip tölngöre, yēḵ hī kētö ṙētakre im inhānga hēk chuh el mīting inrē.

20. Sitih inlahen öm min vë-eny nup haköpre öm in yip holre hòṅ cha nö reuslöre alaha?

²⁰ Sitih inlahen öm min öm hayööken yip tahëng tö minë haköpre inlahen ngam yāich tafīösi? Kò-òren man öm afēkö yip hol maneuk hī el minë māṅ yip tököiny nö ngaich sistör, tötkôlò el alaha töt uroho ṙôken kahëti tö ṙētakre nö ahangköm tölöök inhānga nö sā inlahen re sin tö lā-urěh,  ngaich mihôiṅ min cha-a nö ngölōn tö Yāvē nö öt ṙamlōn nö in cha. Kò-òren inrē öm fēken yip prötör hī tö vahav, töt kô nö chuh el mīting, lökten cha-a nö haṙivlōn. Kò-òren öm vë-eny nang cha tö inlahen ngam tafīösi, ngaich reuslöre alaha min cha-a tö nup ṙô meh. (Efi. 4:29) Hòṅ cha nö ṙatö-ellōnre tö Yāvē nö ṙamölōn nö in cha. (Inch. 15:23; 1 Tös. 5:11) Yēḵ meh min öm vë-eny re öm ṙamlōn tö inlahen cha nö löklōn ngam Tēv, ngaich sā ma-asīnken Yēsū min më-eṅ öm mahareuskö alaha holre.

21. Asuh öp haköplö hī öi in ngih ātiköl?

²¹ Ṙamlōn in hang minë tinrīken Yēsū öi löktö in minë tö fën tölöök inhānga. Yēḵ hī min vë-ekūö u, ngaich sā ma-asīnken Yēsū min ayī-ö, öi haröhtöre röön re öi tömkö röön ò. Mihôiṅ öi höng kahngenre haköp mat u, hēk holṙô re tö më aṅ ngam mikūönöre, kò-òren öi kēnyö ṙētak re öi haköp mat u. Ngaich sīöpö mikahkūö min ayī-ö tö inlahen Yēsū. Hòṅ vī minë nyat ò ayī-ö öi elkui re, minë inlahen ò, hòṅ hī kēkö kaha u min. Möl min öi haköplu tö minë inlahen Yēsū. In öp yamih ātiköl in min öi haköp inlahen nuk mana-aṅ ṙô Yēsū, urēhěkūö kinpaha ò, asūp haköplö hī min öi in u?