Hatön Meh
Kūö yòh ök Yēsū nö ngö ṙô, urēhěkūö maneuchngö mat ò nö kapah, “Tēv chu, Tēv chu, kūö yòh öm ṙāngen chu?”
Urēhěkūö maneuchngö mat Yēsū nö kapah hang ngam ṙô ò ayī-ö, pön kūichi nö im Mëtiv 27:46, hē ò nö ngö ṙô: “Tēv chu, Tēv chu, kūö yòh öm ṙāngen chu?” Pô e nö in teungngö ngam tö kūichi ṙô Tāvit im Salmai 22:1. (Māk. 15:34) Rö-ö pöri nö kūö ngam ṙinatö-ellōn ò nö kūönngöre, töp lökten ò nö ngatī ṙô. Pön akahalōn takô ang Yēsū tö ò nö tö hòṅ kēngö nômöre tö pôkūö hī, kuilōn ò angū-ö inrē. (Mët. 16:21; 20:28) Akahalōn inrē anga-aṅ tö Yāvē min nö öt “havīlen [laklen] ò” yēḵ ò nö fëliyö. (Yōp 1:10) Pön angū-ö min vamënyen ò nö köp nö löklōn ngam Tēv pôrò nup tö sitih kinlaha ò nö söl kinpahare.—Māk. 14:35, 36.
Asuh pöri öp lāinyngen ò nö ngö ṙô tö ngam Tēv, kūö yòh öm ṙāngen chu, nöng sā ṙô ngam tökūichi im Salmai? Öt akahakūö in töp tökô-en lāinyngen ò nö ngatī ṙô. *
Lohten anga-aṅ nö ngatī ṙô, pô ò nö hòṅ vënyö nang hī tö Yāvē min nö öt laklen ò tö ngam kinpaha? Höng hòṅ hěng tak ang Yēsū nö kēnyö ngam ṙāi ṙinānyi ötkô nö hayöökaṙen tö Yāvē. Ngaich kūö ò nö tökayônyu tö tarik lökten “Anga-aṅ nö kalah kinpaha, nö pòkūö tarik.”—Hep. 2:9.
Ngatī ṙô hòng ang Yēsū pô ò nö hòṅ fēḵlen yik haköptöre tö ṙô ngam salmai Sal. 22:7, 8, 15, 16, 18, 24) Im mana-angrit ngam salmai inrē nö vënyu ang Yāvē nöng anga-aṅ min mahayöng nö ikui pumnāmö tarik.—Sal. 22:27-31.
nö keuheūtlöre? Pōyen yik Yahuti tarik misī tö keuheūtlöre kanöplōn tö ṙô minë salmai. Lökten cha yěn fēḵlöng töp töng hěng miröökö ngaich ilööṙen nö yīhi kanöplōn cha-a tö e nö keuheūtlöre. Yěn angū-ö ṙô më-el kuilōn Yēsū, ngaich lohten anga-aṅ nöng famëḵlö yik haköptöre Yahuti tö ṙô minë töha-ehangen kinūichö imat ngam salmai vinënyö inlahen ò min yěn kapah. (Löktö im ṙô Tāvit inrē lohten ang Yēsū nö hòṅ vë-enyre nö öt fāluṙen. Pōyen nuk töng vinīlö fālen Yēsū urēhěkūö ngam finëlngö ò, minë töng sinūöchkö fālen ò nö ötlēḵkôre tö ngam Tēv. (Mët. 26:65, 66) Öt lööngö kinṙòkken anga-aṅ, öt el minë ṙētak kamhôka ngam kinṙòkken ò pön höng chūöltööm hēk höng kurāten cha-a nö kahòkken ò pön töng hòṅ fëlngen ò. (Mët. 26:59; Māk. 14:56-59) Lökten lohten ang Yēsū nöng hòṅ fēḵlen më hamang ṙô re tö ò nö öt rahëichyen fālen töp lökten ò nö ngatī inlahen finëlngö.
Vë-eny nang yik tahëng ṙöng ang Yēsū töminë kanihngen ò nöng sā inlahen kanihngen Tāvit ngam kamūich ngam salmai? Kihngen ök misī inrē Tāvit, öt ṙāngen ò pöri ang Yāvē. Hē ò nö ngö tī nö kūich, “Tēv chu, kūö yòh öm ṙāngen chu?” ngaich rö-ö ngih ṙô ò nö vamënyöm ṙinatö-ellōn ò nö kūönen nö in Yāvē, pön höng örheūheu anga-aṅ nö ṙatö-ellōnre nö in ò. (Sal. 22:23, 24, 27) Ngaich ngatī ang Yēsū, “ngam kūön Tāvit,” nö kihngen nö irōi ngam chōn, nö rö-ö nö tö ngö manah tö Yēsū nö ṙa-ayö tö Yāvē.—Mët. 21:9.
Lohten nö kūö chanöököre anga-aṅ nö ngatī ṙô Pön akahalōn töm yöngre nöng akahalōn tö ò nö chök sön nö öt hayööken ò pön hōten ò nö hameuktöre nö hangenlōn töm yöngre. Öt kuilōn Yāvē angū-ö tö ngam kūön ò nö kihngen ngaich kapah. Kūö ngam fālen Ātöm pöri angū-ö nö ngatī. Pön öt rahëichyen fālen ang Yēsū. Sön anga-aṅ nö ngatī kanihngen nö sanapṙô ngam Sī-ö hēk tö kò-òre ang Yēsū nö tökētu nö ṙāi ṙinānyi ngòh tarik. (Māk. 8:31; 1 Pīt. 2:21-24) Teung min inrē ngam kuilōn Yāvē yěn rahëichtaṙen anga-aṅ nö öt laklö ngam kūönre töm kanihngen ò nö söl im kinpaha re.
Hayööken yik haköptöre ang Yēsū nö akaha elmat töm lāinyngen Yāvē nöng hökngen ngam kūönre nö ngatī kinpaha. * Akahalōn ang Yēsū tö yik haköptöre nö mihôiṅ min nö kūönngöre ṙinatö-ellōn yěn meūkan nö sā finëlngö tö köölö fālen nö irōi ngam chōn, lökten lohten anga-aṅ nö ngatī ṙô. (1 Kòr. 1:23) Hōten cha pöri ang Yēsū nö köplōn tö ngam tökô-en chö-öny ò nö kēngö nômöre, ngaich ngön min cha-a, öthō nö kavē-ěre nö meukngö vah ò nö kapah. (Kal. 3:13, 14) Pön meuk ngam finëlngö ò min cha-a nö Mahayööken hī, hòṅ ṙānyu öi ṙa-ang im kinpaha, röön fëli anga-aṅ tökūö fālen re.
Öp töng yòh pöri lāinyngen ò nö ṙônyö ngam ṙô re aṅ mat ngam salmai, akahalōn pöri anga-aṅ töm kuilōn ngam yöngre Yāvē töm chö-öny ò nö kapah. Lökten hē ò nö keuheūtö ṙô nö ṙô-òv tö ngam salmai, ngaich ngö ṙô anga-aṅ: “Keuheūten an nö ngaich.” (Yôh. 19:30; Lūk. 22:37) Kô-en pöri ang Yēsū nö keuheūten tö nuk töng la-en kinë-ekūöre tö ngam yöngre, minë chöönyö ò nö yih nö ing panam. Ṙën nö ngatī pön rahëich hang kūö ngam yöng ò nö öt laklen ò, ‘nö töhōtu nö keuheūtiṙen nup tökūichiyö nö im chöngö Môsös, nup ṙô yik pròfĕt, ane inrē i nup salmai.’—Lūk. 24:44.
^ Par. 2 Ngëichken ngam perekrāf 9 töm 10 in ngih ātiköl “Haköplö Hī In Minë Mana-aṅ Ṙô Yēsū” in ngih öngk.
^ Par. 4 Hē ò nö ahānga, hěng heuh ang Yēsū nö hatöönö cha nö sā ṙamòngnyökūö ellōn cha nö vë-ekūöre hòṅ ò nö akahakūö tö ṙô ellōn cha.—Māk. 7:24-27; Yôh. 6:1-5; ngëichken ngam ; Chūökamahati, Òktopör 15, 2010, pěch. 4-5.