Asā sanīöpö chu, ngatī unfovngöre ngam hanangenlōn chu tö Yāvē. Ṙòngmö 13 samyeūheu ṙēḵti chū-ö hē chu meuk inlahen yik holre i patī, el iskul nöng öt kanihnguṙen, mihôiṅ nö inup töng kuilōnre. Hòṅ asīnken cha chū-ö. Öt holtö ellōnre öich ahangköm tölöök inhānga, chuh el mīting inrē. Rö-ö chin ngö ṙô tö Yāvē tö ò nö tö insa-av nö Tēv. Sön pöri öich öt kūyulōn öich löklōn ò. Hiṙeūtngö röön chū-ö ngaich öich marôvat tö ò.

Kôngen öich höng ma-asīnken yip holre öich chuh el filt. Öt heuveū-eu raneh nyô pöri öich vë-ekūö tarik. Lökten öich öt taneūnguṙen tö yip tö hòṅ haköp. Öt kumchīkuṙen öich ahangköm tölöök inhānga. Ngölōn chū-ö, ‘sitih inlahen aich uvöh vē hol chu nö kaheuk sakamö nö ahangköm tölöök inhānga?’

Hē chu ngaich öich 17 samyeūheu ṙēḵti. Hòṅ lök nup töng kuilōnre chū-ö. Lökten öich halēn nuk chehenre, ngaich chuh Ôstrēliā. Haṙivlōn minā yöng chu nö meuk  inlahen chu. Ṙatö-ellōn re pöri cha-a tö chu öt hō ṙangenre öich löklōn Yāvē.

Hē chu teung i Ôstrēliā, Höich ngören ngam inlahen chu. Hēṙu öich chuh el mīting, hanôl yip holre inrē yip töt hěngheuh nö meūkö nö el mīting. Chuh el minë chūök kam eūṅt, kumṙiöm inrē, angū-ö ngaich tinrīken chu. Nët kangen minë la-en chu.

Unôichrit tö nët samyeūheu ngaich ngam tinrīken chu nö haṙi-ingre. Hē chu öich holtörah yik tö taneui tak sistör öi el öp tö hěng patī. Ngaich hěng heuh īhö öi hěng afta rô-òten tī töp sörkit ovörsīör töp pīhö ò inrē Tamara nö iyöng el patī ih. Öt vaichngö chin tö nuk inyöökenre, lökngöre chū-ö tö nuk ṙô Tamara nö vë-ekūö chu töm tinrīken chu. Kuchikṙô īhö öi vë-ekūöre, öt kihngen īhö vënyö nup ṙô elkuilōnre in ò. Ṙamlōn öich meuk inlahen ih, ṙamlōn inrē chū-ö öich meuk inlahen më sistör nö im linöökö lōn ngam Tēv. Kuchīken inrē öi hanôlö höö.

Lökngöre chū-ö töm nganötö Tamara nö im kanô-en. Kô-en anga-aṅ nö keūheuttö ellōnre nö im linöökö lōn Yāvē, lökten ò nö ṙamlōn. Hē chu pöri ngaich öich meuk ngam nganöötö ò, ngaich sā tö fēlöng chū-ö tö öp tö hěng ṙô ngam Paipöl yěch ngëichken Tamara tö Yāvē nö lōnu tö hī öi ṙòkhöre “ṙamlōn öi im linöökö lōn ò,” ṙamlōn inrē “yěi tikök nup nööinyö ò.”—Sal. 100:2.

Hòṅ sā ṙanamlōn Tamara chū-ö, lökten öich hòṅ halööktitre. Hiṙeūtkö inlahen re chū-ö öich halööktit minë tö vaich inlahenre. Halēn inlahen re möl chū-ö öich chu el filt. Hēṙu kētöre öich òksilörī painīör, lökten ngam pinhë-eṅkūö chu nö kūönngöre, heūveu-eu ṙô inrē ngaich öich vë-ekūö tarik öich el filt. Lökten ngam ṙanamölōn chu öich ahānga nö havan. Kaheuk chingëṅt ngaich chū-ö öich òksilörī painīör.

Hanôl më prötör sistör chū-ö më tö ṙōlkangen ṙēḵtī, më tö ngön nö im kanô-en tö  ṙamölōn nö löklōn Yāvē. Hakööpu chū-ö öich in cha tö nup tö hòṅ mötlö nö in ngam tinrīken chu. Örheūheu ngaich öich haköp mat Paipöl. Lökten öich yīhi kumchikṙen ahangköm tölöök inhānga. Kētöre ngaich öich rekulör painīör. Kô-en chin ngaich öich ṙamölōn öich in më holre.

Unôichrit tö hěng samyeūheu öich meuk kūö prötör Alex. Ngam tö hangenlōn tö ngam Tēv Yāvē, tö kuchīken nö ahangköm tölöök inhānga. Ngam tö hěngtak Mahayööken Töla-evṙen. Tafūöl samyeūheu anga-aṅ nö painīör nö ngaich nö i Malavi in ngam chūök tölōn tö tarik. In e më misönörī nö hareuskö alaha ò nö im linöökö lōn ngam Tēv.

Ik samyeūheu 2003 ai Alex ai hapīhö. Löktö kūö in e ngaich ai holṙenre ai löklōn ngam Tēv. Pōyen minë töhakööpö tö chu, pōyen minë inkôlò kahëtö Yāvē nö in ai.

Ik samyeūheu 2009 ai havëtu ai la-en tö la-en misönörī ai i Timorleste, ngam panam i Intōnēsiā tö kun kun nö panam. Hē ai akahalōn töre ai havëtu ai chuh in e, keūheutnyöre āyö tö ṙanamlōnre, rahëichyen pöri ai vöö. Unôichrit tö taneui chumngëṅtö ngaich ai teung i Tīli.

Harīkngöre takô ngaich ngam tinrīken ai, pòn tufömngöre tinrīken më tarik, tufömngöre ëlô, minë inlahen kūö cha nö nya-avkūö, ṙòkhöre anū-ö nö tufömngöre nö meūkö tö ai pai öt ha-eh ai meuk tö ngatī inlahen. Lökten ai hòṅ pōyen haköplö ai in u. Pōyen më tarik taneūngen ai yěi ahangkö ngam tölöök inhānga, nö töng yāichö takô töt uroh nö pōi höölö nö haköp, pōyen minë innāichngen cha misī, höichngen hē ngam kinyūngö nö ikūö ngam panam, lökten cha-a nö pōyen miṙivlōn. *

 Vāyö ṙòng ngam la-en inhangköm tölöök inhānga nö ihih. Töich vë-eny nang yīö tö ngih tö hěng inlahen. Hē chu öich meukkūö Maria * ök tö 13 samyeūheu ṙēḵti. Höng örheūheu anga-aṅ nöng haṙivlōn. Pòn kapah löng tök yöngre. Sā inlahen më holre anga-aṅ töt maheūkku. Peuny anga-aṅ hē chu vë-ekūö ò. Öt uroh öich akah elnang tö ṙô ò, Lökten öich havëkö kūö Yāvē tö hinòlṙenre öich hareuskö alaha ò. Lökten chū-ö öich hameuk hö mat ò tö ṙô ngam Paipöl. Haköp ngaich anga-aṅ, ngaich haṙī-ingre ngam tinrīken Maria. Öt sā re anga-aṅ nö haṙivlōn, vayö tinrīken inrē nö meūkö. Unôichrit inlahen ò nö kēḵ ngam vinôkö, pōyen më haköptö ò ngaich, tö ṙô ngam Paipöl. Ngaich öp töngamuh Maria nö kiröngti ngam mikūönö ò më prötör sistör tö hangenlōn tö ò.

Hakôlò ngam la-en ang Yāvē nö i Timor-Leste. Pōyen yin ngaich më pöplisör unôichrit tö söm samyeūheu, ōt ngaich më painīör, Mahayööken Töla-evṙen. Ōt më tö la-evṙen nö el RTO nö trānslēt minë līpöre vamë-eny ṙô Paipöl. Ṙamlōn yěch hang ṙô cha nö tikökṙôre nö el mīting, ṙamlōn öich meuk sanīöpö ṙôken cha.

Kuchīken chin hē e, öt hēngö kanihngen, hē chu i Ôstrēliā, öt uroh nö ngatī ṙôken ngam kumchikṙen chu töngamuh öich i Timor-leste. Ṙamölōn pöri chū-ö töngamuh öich im inhangköm tölöök inhānga öich ihih. Kô-en nun minë kanihngen nö kirööngen nö ihih, pöi hòṅ yôk el minë pös tö tööḵlö tö tarik. Amahaiṙen ṙung më tarik nö kumtö tö nyôḵ kāḵ hēk söpchi inrē nö el ngam pös. Öt uroh nun minë patī nö kiröng nö ihih. Ngaich höng ūichhakö öi el tumlat öi kēḵ istötī. Pòrô pöri minë kanihngen nö ngatī ṙôken nö ihih, sön öi höng ṙamlōn öi ahangköm tölöök inhānga.

Yēḵ chu öich afēkö ök nyinī-öre, ngaich sīöpö hanangenlōn chū-ö tö nap yöngre. Pò cha nö haköpten chu tö inlahen ngam Tēv Yāvē nö holtö kumlēḵ lōnre. Hē chu öich ufovngöre öich im kanô-en, hö-ö pöri cha-a nö ṙangenre nö hayööken chu. Kô-en nö teung ngam ṙô ngam līpöre Inchōḵ-oṙô 22:6 löngta angū-ö nö in chu. Ṙamlōn nap yöng chu nö in ai Alex kūö ai kētöre im linöökö lōn Yāvē. Löktö kūö im samyeūheu 2016 āyö ai i Ôstrēliā ai la-en tö la-en sörkit.

Öt kintööngulōn chin tö ngamuh pò chu misī öich öt uroh kuchīken öich ahangköm tölöök inhānga pò chu öich pōring. Ngaich pöri töngamuh ngih la-en inhangköm tölöök inhānga nö ṙamlōn tī tö chu. Angū-ö ön ngaich mikahkūö chu löktö yanihi ngam tökô-en ṙanamlōn, mötlö yēḵ hī öi holtö ellōnre öi löklōn ngam Tēv Yāvē. Ngaich an lohten ai 18 samyeūheu ai Alex ai holṙenre ai löklōn ngam Tēv Yāvē, anū-ö nun në samyeūheu töt insa-av vanayö, inlahen ai holṙenre ai löklōn Yāvē. Löngö ṙô ang Tāvit misī nö ngö ṙô: ‘Ṙòkhöre yip min yamihtöre nö in meh nö ṙamölōn nö tikök ṙô re, ṙamlōn inrē min yip tö hangenlōn tö meh.’—Sal. 5:11.