Hatön Meh
Yěn filal minë inlēnö tö pihövö aṅ mat Paipöl ngòh Kristīön, nö ṙāngö ngam pihöre kikānö, ngaich kē pihöre töm tahëng, sitih mat öng min ngam māṅ nö ngëchkö ngam raneh pihö ò hēk tö ngam innëtö inrē?
Öt köpsören min ngam raneh, pön höng ngam innëtö pihö ò min tö kaheukö tö ngam māṅ nö pihö ò. Kūö yòh öi ngatī ṙô? Ta-a töi hang ṙô Yēsū nö vë-eny inlahen yip ṙamāngö pīhöre ngaich kē pihöre tö tahëng.
Vënyu nang in tö Yēsū im Mëtiv 19:9, tö ngam töng hěngchö-öny hī mihôiṅ öi ṙāngö pīhöre. Ngö ṙô anga-aṅ: “Ngòh ṙamāngö pihöre min; nö öt kūö chinô-òṅ, ngaich pihö tö ngam tahëng höng ma-asěhha anga-aṅ.” Nët nun minë tö vënyu nö ihih tö ngam Paipöl. (1) Mihôiṅ ngòh tarik nö ṙāngö pihöre yěn hěngtak öp in cha ma-asěhha. (2) Yěn ōt pöri öp ṙamāngö pihöre nö tahëngö chö-öny ngaich kē pihöre tö tahëng höng ma-asěhha anga-aṅ. *
Tö ngö manah hòng ngam ṙô Yēsū tö ngam kikōnyö ma-asěhkö tahëng kikānö , nö mihôiṅ nö ṙāngö ngam pihöre ngaich kē pihöre tö tahëng? Öt ngatī. Pön höng eltī ngam töṙā-ayö kikānö angū-ö yěn hòṅ aṙēlen ò min hēk yěn hö-ö. Yēḵ ngam kikānö pöri min nö sō nö aṙēlen ngam kikōnyö, möl min cha-a mihôiṅ nö ṙāngen höö ngaich kē pihöre tö tahëng.
Yēḵ ngam kikānö pöri nö sō nö ṙāngen ngam pihöre kikōnyö, pön hòṅ aṙēlen ò. Sō pöri ngam kikōnyö nöng ngöh nö in ò pön hòṅ ṙāngen ò ngaich kē pihöre tö tahëng. Tölöng hòng ngam inlahen ò? Hö-ö pön öt halöngtuṙen anga-aṅ tö ngam Paipöl nö ngatī inlahen. Yěn höng iṙūöhen pöri anga-aṅ nö halôngen minë inlēnö tö pihövö aṅ mat ngam Paipöl nö kē pihöre tö tahëng, höng ma-asěhha min anga-aṅ. Lökten min yip minṙöinylen el ngam māṅ nö ngëichkö ngam fālen ò.—1 Kòr. 5:1, 2; 6:9, 10.
Yēḵ öp kikōnyö nö sō nö hang minë inlēnö tö pihövö aṅ mat ngam Paipöl, ngaich höng iṙūöhen nö kē pihöre tö tahëng, hòṅ sitih inlahen mat öng ngam māṅ min nö ngëichkö ngam raneh hēk tö ngam innëtö pihö ò? Köpsören hòng min cha-a nö imat hī nö pihöre tö ngam raneh pihö ò? Ṙòngmö eltī ngam kikānö hòng angū-ö yěn hòṅ aṙēlö ngam pihöre hēk yěn hö-ö? Töng ma-asěha hòng min ngam kikōnyö yē ò nö iyöng in ngam innëtö pihöre?
Ngö mikah elmat sin ayī-ö, yěn öl nö kapah ngam töṙā-ayö kikānö, öt asěhkö tahëng inrē, ṙòngmö köp cha-a nö pīhöre, ngam kikōnyö pöri tö kaheūkö nö ma-asěha. Yěi ngëichkö ṙô Yēsū pöri nö kakkö ngam inlahen ṙamāngen höö, öt ṙô-òv anga-aṅ tö inlahen ngam tö ṙā-ayö hēk töm inlahen ngam innëtö pinīhö, höng ngö ṙô anga-aṅ, yēḵ öp tarik nö ṙāngö pīhöre nö öt sā ṙô ngam Paipöl ngaich pīhövö hēk tö tahëng, höng ma-asěha anga-aṅ. Lökten yěn ngatī inlahen ngam kikōnyö nö ṙāngen ngam urěh pīhöre ngaich öt köp cha-a nö pīhöre.
“Ngö ṙô Chin tö yīö, Ngòh ṙamāngö pihöre min; nö öt kūö chinô-òṅ, ngaich pihö tö ngam tahëng, höng ma-asĕhha anga-aṅ. Ngam töpīhövö tö ngam töṙā-aiyö kikānö, ma-asĕhha anga-aṅ inrē.”—Mët. 19:9
Lökten ngaich nö öt eltī ngam kikānö ngam inlahen ò, yěn hòṅ aṙēlen ngam pihöre hēk yěn hö-ö. Öt kanihngen ngam tö ṙā-ayö angū-ö. Hēk hòṅ sitih mat inrē min ngam māṅ tö ngam innëtö pinīhö ngam kikōnyö, öt eltī ngam tö ṙā-ayö kikanö ngam inlahen cha. Öt tö ngö manah angū-ö inrē tö ngam raneh pīhö ò kikānö min yěn höng kapah, hēk yěn kēḵ pīhöre tö tahëng, hēk yěn asěhkö tahëng inrē ngaich möl min ngam inlahen ngam kikōnyö nö pīhötö ngam tahëng nö kaheukö nö tölöng. *
Ngaich in öi meuk, yěn ṙāngö ngam pīhöre ngam kikōnyö unôichrit inlahen ò nö asěha ngaich sitih inlahen angū-ö. Töi ngëichkö në tö nët hēk inlahen. Asehkūöre man tö ngam kikōnyö nö öt asěha anga-aṅ sön pöri nöng ṙāngen ngam pīhöre ngaich pīhötö tahëng, hēk yěn unôichrit inlahen re ngam kikōnyö nö ṙāngen ngam pīhöre ngaich möl nö asěhkö tahëng, hōḵ pöri lang ngam kikanö nö aṙēlen ò sön anga-aṅ nö hòṅ pīhötö tahëng. In u anū-ö në tö nët inlahen nö pasūḵ ngam raneh pinīhö tö cha, pön ṙāngen ngam pīhöre ngam kikōnyö ngaich pīhövö töm tahëng, lökten ngam kikōnyö nö kaheukö nöng ma-asěha. Sön pöri ngam innëtö pinīhö tö cha nö tö hō-övö nö imat ngam chööngö. Ngöṙô ön ngam ṙô ingki Chūökamahati 15 Nòvempör 1979, pěch 32, “Yēḵ ngam kikōnyö ngaich nö kēḵ pīhöre tö tahëng, öt lööṙen min anga-aṅ hēk nö havantöre nö in ngam raneh pīhöre. Pön ngaich ngam pinīhö tö ò nö pasuḵ tö kūö inlahen ò nö ṙāngen ngam pīhöre, asěha hēk pīhötö tahëng inrē.”
Pòrô ngaich ngam mikah elmat hī nö haṙī-ingre, öthaṙī-ingre pöri ngam hanëtö ngam pinīhö nö elmat hī. Tökiröng ngam insěha nö falen nö imat hī. Yēḵ ngòh tarik nö ṙāngö pīhöre nö öt sā ṙô ngam chööngö aṅmat ngam Paipöl ngaich kēḵ pīhöre tö tahëng, höng ma-asěha anga-aṅ. Tö hòṅ kahòkkaṙen min ngam fālen ò. (Pòrô min öp innëtö pīhö ò nö ṙamātö-ellōnre, sön min anga-aṅ nöng ma-asěha ngaich kahòkkaṙen inrē min anga-aṅ.) Pòrô min ngam pinīhö tö cha nö tö hō-ov, ṙōl samyeūheu pöri min ngam kikōnyö nö öthō nö kē-ěvkūö tö nup tö kamngu la-en el ngam māṅ. Hēk pòrô min inrē nö unôichrit tö ṙōl samyeūheu yěn hòṅ kě-ěkūö ò min yip minröinylen tö nup tö kamngu la-en, ngaich hòṅ hatönöre cha-a nö urěh nö ngö ṙô “hö-ö yip vöh min prötör sistör hēk yip tahëng inrē nö kihngen yěn kě-ěvkūö anga-aṅ tö nup la-en el ngam māṅ, milēḵṙen hòng min cha-a tö ò? Hòṅ köplōn inrē më minröinylen tö miṙivlōn ngam tö ṙā-ayö kikanö pön lohten ngam tarik nöng vī inlahen re nöng ṙāngen ò.” Yěn tö kūönu inrē anga-aṅ tö yip tö kunkun nöng ṙā-ayö tö ò ngaich hòṅ köplōn inrē më minröinylen tö mufē cha.—Mal. 2:14-16.
Kô-en ön nö öt löngö ṙòng ngam ṙināngö pīhöre hēk kinë pīhöre tö tahëng yěn öt asā ṙô ngam Paipöl. Lökten yin vē tökô-en Kristīön nö hòṅ sā mat Yāvē tö ngam pinīhö nö töhet. —Mum. 5:4, 5; Hep. 13:4.
^ Par. 2 Höng ngam kikōnyö an tö fāluṙen nö vënyu nö el ngih ātiköl, inlēnö cha pöri angū-ö nö nëtre tak. Sā ṙô Yēsū im Mākös 10:11, 12.
^ Par. 1 Ngö mufē sin ayī-ö, yěn ṙòngmö aṅ ngam töṙā-ayö kikanö, nö öt pīhövö tö tahëng ötrēhěn nö asěha inrē, ngaich höng ma-asěhken ngam innëtö pīhöre ngam kikōnyö tö ṙô. Öt ngatī pöri ngaich ngam mikah elmat hī töngamuh.
