TÖHAKÖÖPÖ ĀTIKÖL 19
Sitih Inlahen Öi Ṙatö-ellōnre Im Kinlēḵngô Yāvē Tö Inlahen Ngam Tufömngöre Panam?
“Yěn ṙô-òv Yāvē ngaich öt hateungnö e hòng min?”—KIN. 23:19.
TINKÖÖKÖ 142 Köptī Töm Mineūka
RAHËICHTAMAT a
1-2. Hòṅ Asūp inlahen hī yěi hòṅ hökkö öp tufömngöre panam?
KINLĒḴNGÔ Yāvē angū-ö tö ò min nö ha-etngen yip tötlöök nö ikūö ngih panam, ngaich vīten ngam tufömngöre panam nö tö chöönyu angū-ö nö in hī ṙòkhöre. (2 Pīt. 3:13) Öt akahakūö in tö ṙētak öp yamih tufömngöre panam meukö pöri ngam ṙētak yanihī e nö ṙöhta.—Mët. 24:32-34, 36; Inl. 1:7.
2 Hòṅ ṙòkhöre in öi ṙūöhlö ngam ṙinatö-ellōnre öi in ngam kinlēḵngô, hanöng sā ngam ṙētak nö öl nö teung pòrô ngaich öi tö marô-ònyen öi in ngam kanô-en. Pöi yěi öt ngatī inlahen min ngaich mihôiṅ min ngam ṙinatö-ellōn hī nö kūnngöre nö in ngam kinlēḵngô. Ngöṙô ang Pôl tö ngam kanūnen ṙinatö-ellōn hī nö ‘sā ṙēngen ngam tökööl nö lööṙen tī nö halō-ongkūö.’ (Hep. 12:1) Yěi lōnu tö ngam ṙinatö-ellōnre nö un kūnngöre. Ngaich hòṅ uröören ayī-ö öi chumkūöṙen tö minë tö hameuktu nö inmeuktö ngam tufömngöre panam min kô-en nö röhta yanihī.—Hep. 11:1.
3. Asuh öp min kahakkö hī in ngih ātiköl?
3 Lūöi nun min minë kahakka hī in ngih ātiköl ngam lökten hī öi asīöp ngam ṙinatö-ellōnre tö yanīhi ngam tufömngöre panam: (1) Afēkö ngam ṙāi ṙinānyö re, (2) Afēkö ngam ṙôkö kumlēḵ Yāvē hēk, (3) Iṙūöhen inup la-en linöklōn ngam Tēv. Mikahtökūöre inrē min ayī-ö tö ṙô Yāvē nö in Hapakūk ngam löktö ngam ṙinatö-ellōn hī mihôiṅ nö asīöpö tö hī. Urěh pöri ayī-ö öi kakken minë ṙētak hī hòṅ hangön ngam ṙinātö-ellōnre öi in ngam tö kilē-ěyö tufömngöre panam. Pī-a min öi lökngöre tö u anū-ö.
ṘĒTAK HĪ HÒṄ NGÖNÖ ṘINATÖ-ELLŌN
4. Asuh nup katöllö hī öi hòṅ ngönö ṙinatö-ellōn?
4 Hòṅ ngön ngam ṙinatö-ellōn hī inup tö pōyen katöllö hī. Tö sā në, innôlö, inṙamlōn, marò-òl chūök im inkööpö, pinīhö, tumtak kūön hēk i alaha nup tahëng kinmānö inrē. Lökten öi hòṅ hatöönöre: ‘Asūp mikahkūö chu löktö in në katöllö chu? Ṙatö-ellōnre öich chū-ö tö ngih panam nöng rahëichtöreṙen, ngaich ngam Tēv min nö röhten inlahen min nö vī ngih panam nö tufömngöre? Hameuktu ön minë katöllö chu nö sā mufē yip tarik aṅ kūö ngih panam?’ (Mët. 6:19, 20; Lūk. 12:16-21) Yēḵ hī min öi asīöp ngam ṙinatö-ellōnre tö inlahen ngam tufömngöre panam nö röhten yanīhi, ngaich vāyö katöllö min ayī-ö.
5-6. Kūö yòh nö hòṅ ngön ngam ṙinatö-ellōn hī hē el ṙētak kanihngen? Hachōḵ elmat hī.
5 Hòṅ ngön ngam ṙinatö-ellōn hī. Pön pōyen nup kanihngen min lā-al hī. Tö sā ngam inlahen hī yěi hakihtuṙen, öt ilöö lööken yěi vahavö, haṙivlōn inrē yěn yih nup tahëng kanihngen. Öt uroh sin öi kihngen lohten öi lā-al u, ngaich yěi marò-òten pöri öi lā-al u ngaich hòṅ ngön ngam ṙinatö-ellōn hī. Ngaich möi min ayī-ö öi lā-al u hēk holtö ṙanamlōn re inrē min öi löklōn Yāvē.—Rōm. 12:12; 1 Pīt. 1:6, 7.
6 Yēḵ hī öi īnu tö minë kanihngen re, ngaich lohten ayī-ö öi ngölōn tö ngam tufömngöre panam nö öt hētu nö yih. Tö ngö manah hòng ngaich angū-ö tö ngam ṙinatö-ellōn hī nö kūnngöre? Hö-ö öt ngatī. Kò-òren öi fēkö ngih inlahen yěn ṙētak ngam unfōvö kūö ngam panam ṙung ngaich ngölōn ayī-ö tö öp ṙanāchö min nö öt hētu nö yih. Akahakūö pöri ayī-ö tö ngam ṙanāchö nö öthō min nö öt yih. Ngatī ṙēngen ayī-ö yěi haṙivlōn ngaich mihôiṅ min öi ngölōn tö öp tufömngöre panam nö öt hētu nö yih. Yēḵ ngam ṙinatö-ellōn hī pöri nö ngön ngaich ṙatö-ellōnre ayī-ö tö ngam kinlēḵngô Yāvē min nö öthō nö öt teung. (Sal. 94:3, 14, 15; Hep. 6:17-19) Yěi īnu min tö ngam ṙinatö-ellōnre ngaich örheūheu min ayī-ö öi urěhlö ngam linkölōn Yāvē.
7. Asūp tötkô nö kintöngölōn hī?
7 Hòṅ ngönö ṙinatö-ellōn in yěi la-evṙen tö ngam inhangkö ngam tölöök inhānga. Kūö yòh? Kūö hī öi vë-eny nang yip tarik tö yanihī nagm tufömngöre panam, ngaich pōyen min yip tö ngölōn tö u nö töng ṙô, tö öthētu kūö nö teung. (Mët. 24:14; Isi. 33:32) Hö-ö pöri ayī-ö öi lōnu töre öi sā inlahen yip tarik öi katöngalōn tö minë kinlēḵngô Yāvē. Lökten öi hòṅ asīöp ngam ṙinatö-ellōnre. Öi sitih inlahen? Ta-a töi ngëichken në tö lūöi.
AFĒKÖ NGAM ṘĀI ṘINĀNYI
8-9. Sitih inlahen öng ngam ṙinatö-ellōn hī nö ṙūöhölöre yěi fēkö ngam ṙāi ṙinānyi?
8 Hěng ön ngih inlahen hī yěi hangön ngam ṙinatö-ellōnre hòṅ afēkö ngam tökitaknyu mahām Yēsū. Pön angū-ö min tö tī-ivö tö ngam kinlēḵngô ngam Tēv nö teungtakūö. Fē-a man tö inlahen Yāvē nö iṙò-òten nö halēn ngam ṙāi ṙinānyi hī. Ngaich ṙūöhölre min ngam ṙinatö-ellōn hī tö ngam kinlēḵngô ngam Tēv min nö kētö ngam tö örheūheu aṅ nômö nö el peretāis ngaich öthō min angū-ö nö öt teung. Kūò yòh mihôiṅ öi ngatī ṙô?
9 Fēkö inlahen Yāvē ayī-ö nö iṙôköti nö kētö ngam ṙāi ṙinānyö hī. Hangenlōn anga-aṅ tö ngam lanòh kūön re pön tö röhta anga-aṅ nö hol ò. Sön pöri anga-aṅ nö tīnten ò nö ing panam nö sā alaha tarik. Ik sā Yēsū nö ing panam ngaich pōyen nuk kanihngen ò fëliyö inrē anga-aṅ. Kô-en nö pōyen ngam ṙāi hī kahëtö Yāvē. Uroh anga-aṅ nö kēngö nômö ngam kūön re töpôkūö hī. (Yôh. 3:16; 1 Pīt. 1:18, 19) Yěn ngatī ṙòken tī ang Yāvē nö kētö ṙāi hī, ngaich öthō min ngam kinlēḵngô ò nö öt teung ngaich kē-ěkūö hī inrē min anga-aṅ tö ngam tö-örheūheu aṅ nômö nö el peretāis.
FĒKÖ ṘÔKÖ NGAM KUMLĒḴ YĀVĒ
10. Sā ṙô ngam Efisös 3:20 tö iṙôken kumlēḵ ang Yāvē?
10 Ngam innëtö hēk inlahen hī ṙūöhlö ngam ṙinatö-ellōnre, hòṅ fēkö ngam ṙôkö kumlēḵ Yāvē. Kiröngen kumlēḵ anga-aṅ lökten nö mihôiṅ nö hateungngö nup kinlēḵngôre, sitih mufē pöri ayī-ö tö ngam kinlēḵngô Yāvē tö ò min nö kē-ěkūö hī tö ngam tö örheūheu aṅ nômö nö el öp tufömngöre panam? Pōyen yip tö ngölōn tö e nö öt teung. Hòṅ köplōn pöri ayī-ö tö nup kinlēḵngô Yāvē nup tötkô nö hateungngö yip tarik. Pön Tēv tökalēḵ kūö tökalēḵ ang Yāvē. (Yōp 42:2; Māk. 10:27) Lökten anga-aṅ yěn vënyö nup tökiröng kinlēḵngôre ngaich öt pingangkūö ayī-ö.—Vë-evkūö Efisös 3:20.
11. Vënyö öp töhěng kinlēḵngô Yāvē, öp töt teung tölōn hī. (Ngëichkö ngam pòks “ Nup Töt Teung Mufē Hī Hateungngen U Ang Yāvē.”)
11 Töi ngëichkö minë kinlēḵngô Yāvē minë töt teung tölōn hī. Tö sā ngam ṙô ò nö in nā Aprahām nā Sëra tö cha min nö kūönu im ṙēḵti cha nö köiny. (Ran. 17:15-17) Ngöṙô inrē anga-aṅ nö in Aprahām tö ò min nö kē-ěkūö yip kūön cha tö ngam panam Kanā-an. Ṙōl samyeūheu pöri yik kūön Aprahām nö haköövö nö i Aikup. Lökten öi ngölōn tö ngam kinlēḵngô Yāvē nö öt teung. Hateungngö nup kinlēḵngô re pöri ang Yāvē. Unôichrit tö köinyu samyeūheu ang Yāvē nö kilēḵngôre nö in Ēlisöpet tö ò min nö kūönu im kanöinyö re. Kilēḵngô inrē ang Yāvē nö in Mariā. Rö-ö ön pön höng ṙēlö, ngöṙô pöri ang Yāvē tö ò min nö pirūkö nyīö, kô-en ngaich angū-ö nö teung ngam kinlēḵngô ò nö el ök panô-òṅ Ēten. Ngatī inlahen nup töng ṙô Yāvē nö öthō nö öt teung.—Ran. 3:15.
12. Sitih löktö mikahkūö öi tö ngam kumlēḵ Yāvē im Yôsuā 23:14 hēk Isayā 55:10, 11?
12 Yěi meuk inlahen Yāvē nö hateungngö nup töng kinlēḵngôre, ngaich akahakūö ayī-ö tö ò nö īnu tö ngam töt insa-av kumlēḵ. Löktö in e ngam ṙinatö-ellōn hī nö sīöplöre tö Yāvē min nö vī ngih panam nö tufömngöre. (Vë-evkūö Yôsuā 23:14; Isayā 55:10, 11.) Lökten mihôiṅ öi holtö ngam ṙinatö-ellōn re öi vë-eny nang yip tahëng tö ngam kinlēḵngô ngam Tēv min nö vī ngih panam nö tufömngöre, rö-ö angū-ö nöng heūvö hēk sanëhkūö inrē. Pön vë-enyre ang Yāvē tö ò min nö vī ngam tufömngöre halīöngö hēk tufömngöre panam nö ngöṙô: “Tön tökô-en nun në ṙô, kanô-en inrē.”—Inm. 21:1, 5.
IṘŪÖHEN INUP LA-EN NGAM TĒV
MĪTING
Sitih inlahen ngam ṙinatö-ellōn hī nö ṙūöhölre nö löktö in në?(Ngëichköm perekrāf 13)
13. Sitih inlahen sanīöpö ngam ṙinatö-ellōn hī yěi chuh el mīting? Mikahtö elmat hī.
13 Ngam linūöyö hēk inlahen hī öi ṙūöhlö ngam ṙinatö-ellōnre, öi la-evṙen tö nup la-en ilinöklōn ngam Tēv. Tö sā ngam inlahen hī öi sīöplöre ṙinatö-ellōn yěi chuh el mīting. Töi chumkūöṙen tö inlahen ök ihih sistör Ënā, ngam tö samyeūheuv nö ṙōlkangen la-en nö i linkölōn ngam Tēv. Ngöṙô anga-aṅ: “Ngön ngam ṙinatö-ellōn chu öich löktö el minë mīting. Pòrô öp kamëtö ngam minkahten nö öt teungnyi ṙô nö vënyö nup töt mikah elnang chu sön pöri chū-ö teūngen töt mikah elnang re tö ṙô ngam Paipöl. Ngaich ngönlöre ngam ṙinatö-ellōn chu.” b Rö-ö nöng angū-ö pöi reuslöre alaha inrē yěi hang minë ansöör më prötör sistör el minë mīting.—Rōm. 1:11, 12; 10:17.
AHANGKÖ NGAM TÖLÖÖK INHĀNGA
Sitih inlahen ngam ṙinatö-ellōn hī nö ṙūöhölre nö löktö in në? (Ngëichköm perekrāf 14)
14. Sitih inlahen sanīöpö öng ngam ṙinatö-ellōn hī yěi ahangkö ngam tölöök inhānga?
14 Sīöplöre an inrē ngam ṙinatö-ellōn hī yěi ahangkö ngam tölöök inhānga. (Hep. 10:23) Ngöṙô ök ihih sistör Parpörā pōyen tö tö 70 samyeūheu nö i linökölōn Yāvē: “Meūköre chū-ö öich sīöpö ṙinatö-ellōn yěich ahangkö ngam tölöök inhānga asā yip vahënyö nang chu tarik tö minë kinlēḵngô Yāvē, ngaich ngatī ṙôken sanīöpö min ngam ṙinatö-ellōn chu.”
ṘĒTAK HĪ KAHNGEN RE HAKÖP
Sitih inlahen ngam ṙinatö-ellōn hī nö ṙūöhölre nö löktö in në? (Ngëichköm perekrāf 15)
15. Sitih inlahen öng ngam ṙinatö-ellōn hī nö sīöp yěi kēnyö ṙētakre kahngenre haköp? (Ngëichkö ngam nyat.)
15 Hěng öp i hēk inlahen hī öi asīöp ngam ṙinatö-ellōnre: Ngam Ṙētak hī kahngenre haköp. Vī ngam sëtiūl (schedule) re ngam sistör Sūsön nö pörsönal istötī kiröngen yanöölen anga-aṅ nö löktö in e. Ngöṙô anga-aṅ: “Örheūheu chū-ö el Sunday öich halēn ngam inköpö ngam Chūökamahati tö kēkaṙen el öp yamih afta. Ngaich el Monday hēk Tuesday chū-ö öich halēnken minë el hôi ngam tö kēkaṙen mīting el ngam afta. In minë tahëng sakāmö chū-ö pörsönöl istötī minë tahëng kui minë töhakööpö.” Ngaich ngatī inlahen ang sistör Sūsön nö asīöp ngam ṙinatö-ellōnre nö asīnken minë sëtiūl re. Tö samyeūheuv rò-òten ang sistör Airīn nö la-evṙen nö el ngam vörlt hetkuātörs. Ṙūöhlöre ngam ṙinatö-ellōn ò kūö ò nö haköp minë tökilēḵ-ěyö. Ngöṙô anga-aṅ: “Yēḵ chu öich haköp inlahen nup kinlēḵngô Yāvē, ngaich pingangkūö chū-ö öich meuk taneung tökūö minë tö rahëichyen kinlēḵngô ò.” c
“ÖTHŌ NÖ ÖT TEUNG”
16. Ngam ṙô Yāvē nö in Hapakūk kūö yòh mihôiṅ öi ṙatö-ellōnre tö e nö manahöv nö in hī? (Heprāi 10:36, 37)
16 Samyeūheuv yik tö köp nö löklōn Yāvē nö hökkö yanihī öp manāngen. Pōyen lohten yip tö ngölōn tö öp manāngen nö öt hē nö yih akahakūö pöri ang Yāvē tö hī öi ngatī lōn. Lökten anga-aṅ nö kētö ṙinatö-ellōn ök pròfět Hapakūk nö ngöṙô: “Pò ngam tömeūkö nö mī-ip ṙētak re, veūtö röön an inrē nö kū-ötö öp manāngen, öthō inrē nö minyôiny-aṅ: pòrô anū-ö nö öl, hökken e; tön öthō an min nö öt yih öt ahāṅkenre an min!” (Hap. 2:3) Höng yanöölen Hapakūk hòng ngam ṙô Yāvē? Hēk tö manahöv röng ngam ṙô Yāvē nö in hī töngamuh? Löktö in ngam ṙô ngam Tēv ök tanīnöṙô ang Pôl nö vënyö nang yik Kristīön hamökken ngam tufömngöre panam, ngaich ngatī inrē ayī-ö öi hòṅ chumkūöṙen tö e. (Vë-evkūö Heprāi 10:36, 37.) Lökten yēḵ hī öi ngölōn tö ngam kinlēḵngô Yāvē tö ngam tufömngöre panam nö öthē nö teung, ngaich mihôiṅ ayī-ö ṙatö-ellōnre tö e min ‘nö öthō nö öt teung öthō nö ahāṅkenre!’
17. Ngam inlēnö kahëtö Yāvē nö in hapakūk ngaich sitih inlahen ngam sistör nö hangö e?
17 Pōyen yip lamöklōn Yāvē hamang ngam chööngö ngaich “hökkö öp ṙētak.” Ōtre yip tö samyeūheuv nö ngatī inlahen. Töi chumkūöṙen öi ngëichkö ngam inlahen sistör Lūöis rultenre anga-aṅ nö löklōn Yāvē ik 1939. Ngöṙô anga-aṅ: “Ngölōn hē e chū-ö yěich hòṅ keuheūten töm inköpö el iskul ngaich yih min ngam Armakētòn, hö-ö pöri angū-ö nö ngatī. Haköp inlahen yik tarik pöri chū-ö imat ngam Paipöl yik tö samyeūheuv rò-òten nö hökkö ngam kinlēḵngô Yāvē nö teung, tö sā hē Nō-a, Aprahām, Yôsěf hēk yik tahëng inrē. Röhta yanihī ön min ngam tufömngöre panam ngam kinlēḵngô Yāvē.” Lökten chū-ö öich ṙatö-ellōnre hēk yip tahëng inrē nö ngatī ṙinatö-ellōn, pōyen yip hamô-en ngam ṙô sistör Lūöis nö marò-ònyen cha-a nö löklōn Yāvē.
18. Sitih inlahen öng ngam ṙinatö-ellōn hī nö sīöplöre tö ngih panam min tufömlöng yěi chumkūöṙen öi ngëichken minë tö vīlöng?
18 Öl an ngam tufömngöre panam nö yih mihôiṅ pöri öi chumkūöṙen öi ngëichken minë tö vīlöng tö sā ṙēngen minë taneūsömat, kun chōn töṙeūla hēk më tarik inrē. Öl nun sin anū-ö në nö vīlöng inuk ṙētak. Ngaich pöri ayī-ö ṙatö-ellōnre tö u nö ōt ṙën nö ngatī pò Yāvē nö vīlen u. (Ran. 1:1, 26, 27) Ngatī ṙēngen ang Yāvē nö halēnngen öp ṙētakre min nö vī ngih panam nö tufömngöre ngaich öthō min anū-ö nö öt teung, örheūheu min ayī-ö ip hē e öi aṅ hēk vayö el alaha inrē. Ṙatö-ellōnre in tö Yāvē nö öthō nö öt vī ngih panam min nö tufömngöre ngaich kô-en min angū-ö nö ngatī. Sā hī meuk në tö vīlöng töngamuh.—Isa. 65:17; Inm. 21:3, 4.
19. Sitih inlahen öi mihôiṅ asīöp ngam ṙinatö-ellōnre?
19 Ta-a chëi töi kē yanöölen re in në ṙētak öi iṙūöhen öi ṙūöhlö ngam ṙinatö-ellōnre, ing sā ngih panam nö öl nö tufömngöre vī-i. Örheūheu ayī-ö öi ha-öiny tī Yāvē pò ò nö halēn ngam ṙāi ṙinānyö hī. Hòṅ afēkö ṙôkö kumlēḵ ò ayī-ö hēk iṙūöhen öi kēken nup la-en i linökölōn ò. Yēḵ hī min ngatī inlahen ngaich sā “yip tarik min ayī-ö tö amīnu tö minë kinlēḵngô nö lökten i mikah manööyö inrē.”—Hep. 6:11, 12; Rōm. 5:5.
TINKÖÖKÖ 139 Tufömngöre Tövai Panam
a Pōyen yip töt ṙamatö-ellōnre tö ngam Tēv min nö vī ngih panam nö tufömngöre. Pön ngölōn acha-a tö e nöng sanehkūö hēk töng vīka inrē nö ṙô kirööngen ṙinatö-ellōn pöri ayī-ö öi in Yāvē tö nup kinlēḵngô ò min nö teung. Sön pöri ayī-ö öi hòṅ ṙūöhlö ngam ṙinatö-ellōnre öi sitih inlahen, in ngih ātiköl min öi mikahtökūö re.
b Harīki ngam minë-eny.
c Yěm hòṅ haköp minë kinlēḵngô aṅ mat ngam Paipöl ngaich vë-ekūö ngam ātiköl tö kētu nö in ngam Yahōvā Kē Saksīyô Kē Līyē Kòchpīn Ka-ët in ngam “Paipöl” minë tö kētu lā-tāreū kui minë tö haköpö “tökilēḵ-ěyö.” Tö sā ngam Chönvörī-Māch 2008 Chūökamahati-HI ngam tö ngö kui “Tö Köp Nun Minë Ṙô Yāvē.”
