1. Sitih inlahen lōn yip rīkre prötör sistör hī yěn ahangköm tölöök inhānga hēk kūö yòh? (Ngëichkö ngam nyat.)

 HANGENLŌN in tö Yāvē, lökten öi vë-eny nang më taṙòkhöre tarik tö ngam tölöök inhānga hēk lōnu inrē tö cha nö akahakūö tö inlahen ò. Kuchīken in öi in ngih la-en inhangköm tölöök inhānga. Ōtre pöri yip prötör sistör hī tö kihngen nö im la-en inhānga, kūö cha lohten nö tö aṙē-ěv hēk tö pa-ekūö inrē nö vë-ekūö tarik. Piyū-en inrē cha-a nö chuh patī yip tahëng nöng öt havëtu. Ōtre inrē yip prötör sistör hī tö vöö pön öt akahakūö tö inlahenre yěn liplö min yip tahëng nö in cha. Ōt inrē yip tö sō nö nôlhöt nö in nup lina-alkūö. Kô-en yin më prötör sistör hī nö vöö yěn ahangkö ngam tölöök inhānga, sön pöri cha-a nö öt ṙāngenre nö in e angū-ö la-en. Kūö cha nö hangenlōn tö Yāvē hēk akahakūö inrē tö ngam inhangkö tölöök inhānga nö tötṙanāngen. Kô-en ang Yāvē nö ṙamlōn takô yěn meuk në tö ngatī inlahen cha!

2. Asuh öp mihôiṅ inlahen meh yěm pa-ekūö öm ahanga hēk öt kuchīken inrē?

² Hēṙu öm ṙung më-eṅ pa-ekūö öm ahānga hēk öt kuchīken inrē? Yěn heūṅ, ngaich um haṙivlōn. Ṙòkhöre in pa-ekūö yěi vë-ekūö yip tarik, kūö hī öi sō öi nôlhöt in nup lina-alkūö, hēk öt lōnu inrē ayī-ö tö cha nöng ngëichken hī. Pöi hōten cha nö yöölen yěn hang ngam tölöök inhānga hēk öt lōnu inrē ayī-ö tö cha tainy nö in hī. Köplōn tö ngam Tēv hī Yāvē nö akahakūö tö minë kanihngen hī hēk lōnu inrē anga-aṅ töre nö hayööken hī. (Isa. 41:13) In ngih ātiköl in min mikahtökūö tö minë tö taneui inchōten hī öi sitih inlahen ṙap ngam pinhë-ekūöre hēk holtö ṙanamlōnre inrē öi in ngam la-en inhānga.

 KĒḴ NGANÖNÖRE LÖKTÖ IN NGAM ṘÔ NGAM TĒV

3. Kūö yòh ök pròfět Yarimiā nö aṅhavin tö nganönöre nö ahānga?

³ Pōyen yik misī tarik ngam Tēv tö kē-ěvkūö tö nuk la-enre nuk töt lööṙen nö in cha. Löktö in minë ṙô ngam Tēv pöri cha-a nö teūngen tö nganönöre nö hateūngngö minë la-enre tö kētu. Tö sā inlahen pròfět Yarimiā, kē-ěvkūö anga-aṅ tö Yāvē töm la-enre nö ahangkö ngam tölöök inhānga, īnu pöri anga-aṅ töm pinhë-ekūöre. Ngö ṙô anga-aṅ nö in Yāvē: “Hö-ö chin huveū-euṙô ṙô-òv, pò chu höng ṙālö tarik.” (Yar. 1:6) Sitih inlahen pöri anga-aṅ nö ṙap ngam pinhë-ekūöre? Höng löktö im ṙô ngam Tēv anga-aṅ nö teūngen tö nganönöre. Ngö ṙô anga-aṅ: “Sā töhūkūö tameūyö öpngö-rekūö nö el nup tangëḵ chu, ngaich chū-ö cheingö haköpken e nö lātuhēt.” (Yar. 20:8, 9) Sō-ov ang Yarimiā tö yik tarik ik sā ò nö ahangkö ngam tölöök inhānga, sön pöri anga-aṅ nö öt ṙākenre nö im la-en inhānga. Pò ò nö fēkö ngam la-en inhānga nö tötṙanāngen.

4. Asuh öp yanöölen hī yěi haköp ngam ṙô ngam Tēv hēk afēken u inrē? (Kòlòsi 1:9, 10)

⁴ Ngatī in ayī-ö töngamuh inrē öi teūngen tö nganöönöre öi löktö in ngam ṙô ngam Tēv. Ṙūöhlö alaha yik holmaneukre ang Pôl aṅ Kòlòsi tö cha nö un ṙākenre nö kē ngam tölöng mikah. Kūö yòh? Hòṅ cha min nö vī minë tinrīken minë ‘tö sā lōn Yāvē nö in më tarikre hēk ṙònguvö inup tökeuheūttöre tölöök la-en.’ (Vë-evkūö Kòlòsi 1:9, 10.) Nôlhöt an ngam tölöök inhānga nö in minë tövai la-en, töp lökten hī yěi haköpmat ngam Paipöl hēk afēkö nup haköpre inrē ngaich löktö in e nö ngönlöre ngam ṙinatö-ellōn hī nö in Yāvē. Akahakūö inrē ayī-ö tö ngam tölöök inhānga nö tötṙanāngen.

5. Hòṅ asuh öp inlahen hī yěi hòṅ teūngen tö yanöölenre?

⁵ Yēḵ hī öi hòṅ kē yanöölenre im ṙô ngam Tēv ngaich ötkô ayī-ö höng haveutṙô re yěi vë-ekūö e. Hòṅ kēnyö ṙētakre pöri ayī-ö öi hakööpö e hēk afēkö nup ṙô e. Yěm öt akaha elnang tö nup haköpre i mat ngam Paipöl, ngaich mihôiṅ më-eṅ öm kē inyöökenre öm lökten in ngam Kòchpin Kaet Më Vamënyen Yāvē hēk in nup tahëng inrē līpöre, mihôiṅ inrē më-eṅ öm chöh manah minë miröökö imat u. Yēḵ meh min öm ngatī inlahen kēnyö ṙētakre öm istötī mat ngam Paipöl, ngaich sīöplöre ṙinatö-ellōn min më-eṅ in ngam ṙô ngam Tēv. Ṙatö-ellōnre min më-eṅ tö minë tö kūichi aṅmat e nö tö kô-en. (1 Tös. 5:21) Asā sanīöpö ngam ṙinatö-ellōn meh min ngaich teūngen min më-eṅ tö ṙanamlōnre öm vënyen e in yip tahëng.

 HALĒNÖRE URĒHĚKŪÖ RE AHĀNGA

6. Kūö yòh öi hòṅ lēntöhěichṙen urēhěkūö re öi ahānga?

⁶ Yēḵ meh min öm lēntöhëichṙen urēhěkūö re öm ahānga, ngaich heuveū-euṙô min më-eṅ öm vë-ekūö yip tarik hēk öt vöö min inrē. Ngatī inlahen ök Yēsū urēhěkūö ò nö tīnngen yik mahaköp nö ahangkö ngam tölöök inhānga, ngaich haköpten cha anga-aṅ tö nup tö hòṅ ṙô cha hēk inlahen cha nö in yip tarik. (Lūk. 10:1-11) Ik sā cha nö hang ṙô Yēsū, kô-en cha-a nö teūngen tö ṙòng nuk la-enre hēk kirööngen ṙanamlōn inrē.—Lūk. 10:17.

7. Sitih inlahen öi lēntöhëichṙen yěi ahangkö ngam tölöök inhānga? (Ngëichkö ngam nyat.)

⁷ Mihôiṅ in ayī-ö inrē halēnöre urēhěkūö re öi ahānga. Mihôiṅ öi urěh fēkö inlahen ṙô re öi vë-ekūö yip tarik hēk sitih inlahen öi mikahtö elnang cha. Kò-òren inrē öi fēkö nup inlahen ṙô re öi sapṙô cha, ngaich sitih inlahen ṙô min cha-a nö hatöönö hī yěn hang minë ṙô hī. Yēḵ meh ngaich lēntöhëichṙen öm ahānga, ngaich um pa-ekūö. Holtö ṙanamlōn hēk ṙanëmen re pöri öm vë-ekūö yip tarik.

8. Kūö yòh ayī-ö Kristīön öi kaheūkö tö Pôl öi sā ṙēngen ngam tanīöyö?

⁸ Hòṅ köpölōn in tö ngam la-en inhangkö ngam tölöök inhānga nö tötṙanāngen. Töi chumkūöṙen öi ngëichkö ṙô Pôl, ngö ṙô anga-aṅ: “El tanīöyö pöri ngih chehen nö in ih.” (2 Kòr. 4:7) Asuh öng ngih töpōiṙai chehen? Ngam inhangkö ngam Pūlngö ngam Tēv. Yēḵ hī öi ahangkö ngih tölöök inhānga in yip tarik, ngaich mihôiṅ min cha-a tö nômöre. (2 Kòr. 4:1) Ngaich achīö Më tanīöyö? Yip tarik ngam Tēv ma-ahangkö ngam tölöök inhānga nö in yip tarik. Ik raneh senchurī yik tö ngatī inlahen nö havahkö chehen, nö in el minë tanīöyö nuk nyā-aṅkūö, vāin, rupīö hēk nup tahëng inrē chehen. Ngatī inlahen ang Yāvē nö kē-ěkūö hī tö ngam la-en el tanīöyö öi hateungngö ngam tölöök inhānga öi in më taṙòkhöre tarik. Ngaich öthō Yāvē nö öt hayööken hī öi kēken ngih tövai la-en.

HAVËKÖ KUMLĒḴRE ÖM VË-EKŪÖTĒV

9. Asuh öp mihôiṅ inlahen meh, yěm vöö öm vë-ekūö yip tarik? (Ngëichkö ngam nyat.)

⁹ Lohten in ayī-ö ṙung hēṙu öi vöö tö më tarik yěn angëḵ nö hī hēk sōten hī inrē öi ahānga. Asūp mihôiṅ inlahen meh? Töi chumkūöṙen öi ngëichkö inlahen më mahaköp, ik sā cha nö asökiröön nö ahangkö ngam tölöök inhānga ngaich sitih inlahen cha-a. Vë-ekūötēv ngaich cha-a ngaich havëkö inyööken re nö in Yāvē “hòṅ cha nö öt pinë-elkūö nö ṙô tö  ngam ṙô Meh.” Ilöö hang ṙô cha ngaich ang Yāvē nö hayööken cha. (Inl. 4:18, 29, 31) Yēḵ meh öm pa-ekūö vë-ekūö yip tarik, ngaich vë-ekūötēv më-eṅ öm havëkö inyöökenre in Yāvē. Tölṙô ò nö ṙūöhlö ngam hanangenlōn meh tö yip tarik hòṅ ngam pinhë-ekūö meh nö ṙūöhngöre.

10. Sitih inlahen ang Yāvē nö hayööken hī öi holtö öt pinhë-ekūöre öi ahānga? (Isayā 43:10-12)

¹⁰ Kē-ěkūö hī ang Yāvē tö ngam la-en öi vë-eny nang yip tarik tö ngam tölöök inhānga. Vënyu ayī-ö tö ò öi ameūken ò, kilēḵngôre inrē anga-aṅ nö hangönken hī min öi hateungngen ngih la-en. (Vë-evkūö Isayā 43:10-12.) Sitih inlahen ang Yāvē nö hangönken hī? Töi ngëichken në fën. Raneh, holṙenn hī ngam kūön ò Yēsū hēk hayööken hī inrē anga-aṅ öi ahānga. (Mët. 28:18-20) Innëtö, kētö la-en yip ma-ahānga anga-aṅ nö hayööken hī. (Inm. 14:6) Linūöyö, kētö ngam töhet kumlēḵre anga-aṅ nö in hī. Löktö in e ayī-ö hayöökaṙen öi köplōn tö nuk haköpre. (Yôh. 14:25, 26) Ngam finënö, kētö më prötör sistör anga-aṅ nö hamôlṙen hī öi ahānga. Yěn kē-ěkūö ang Yāvē tö në inyööken hī, ngaich holtö öt pinhë-ekūöre min ayī-ö öi ahangkö ngam tölöök inhānga.

HARĪNGÖ INLAHENRE NGAICH HAVAI MUFĒ RE

11. Yěi hòṅ vënyö nang yip tö pōyen tarik tö ngam tölöök inhānga, ngaich hòṅ asuh öp inlahen hī? (Ngëichköm nyat.)

¹¹ Haṙivlōn öm ṙung yěn öt ōt yip tarik nö i patī? Mihôiṅ man öm ngö ṙô hatönöre: ‘Isuh yip uvöh tarik, yěn öt i patī?’ (Inl. 16:13) ‘Ichūökre yip vöh nö la-evṙen hēk i-inyiha ṙöng?’ Yěn elkahôiṙen yip tarik, ngaich ötkô hòng më-eṅ öm el talööktu öm ahānga, chūök yip tarik tö pōyen? Ngö ṙô ang prötör Chosūa, “Teūngen chū-ö tö ṙētakre öich vë-ekūö yip tö pōyen tarik öich el pachar, môl, hēk chūök nup lôri ṙung nö pārking (parking).” Hěnghöre kôtikūö ang prötör Chosūa hēk tö ngam pīhö ò Prichit tö inlahen yip tarik ṙung nö ōt el ṙētak harap nö i patī hēk Sunday inrē ahangkö ngam tölöök inhānga.—Efi. 5:15, 16.

12. Sitih inlahen öi mihôiṅ mikahtökūöre tö ṙinatö-ellōn yip tarik hēk tö nup mufē cha inrē?

¹² Asuh öp inlahen hī mihôiṅ, yěn öt ööire yip tarik nö hang ṙô hī öi ahānga? Mikahtökūöre man tö öp ṙinatö-ellōn ò hēk tö öp afēkö ò inrē. Chumkūöṙen tö inlahen nā prötör Chosūa hēk tö ngam Pīhö ò Prichit. Hatön ngam intöönö cha-a im raneh pěch ngam trëk hòṅ cha nö akahakūö  tö mufē yip tarik. Tö sā cha nö hameukhö mat yip tarik tö ngam trëk Sitih Lōn Öm Tö Ngam Paipöl? Ngaich hatöönö cha nö ngö ṙô: “Pōyen yip tö ngölōn tö ngam Paipöl nö ṙamā-ang in ngam Tēv, ōt pöri yip töt ngatī mufē, sitih lōn öm më-eṅ?” Ngatī löknyi ṙô cha-a nö vë-ekūö yik tarik.

13. Hòṅ asuh öp kanöplōn hī, yěn öt hang ṙô hī yip tarik öi ahānga? (Inchōḵ-oṙô 27:11)

¹³ Hòṅ köpölōn ayī-ö töre ngaich öi hateungngö ngam la-enre öi ahānga, yēḵ yip tarik pòrô nö öt hangṙô hī. Ṙën angū-ö nö ngatī kūö hī öi hateungngö ngam kuilōn Yāvē hēk Yēsū öi vë-eny nang yip tarik tö ngam tölöök inhānga. (Inl. 10:42) Lökten yēḵ hī öt teūngen tö yip tarik hēk sō-ov inrē, ngaich mihôiṅ ayī-ö höng ṙamlōn kūö ngam yöng hī aṅ el halīöngö nö ṙamlōn nö in hī.—Vë-evkūö Inchōḵ-oṙô 27:11.

14. Kūö yòh ayī-ö ṙamlōn, yěn ōt öp töhěng tak tarik tö hòṅ haköp inlahen Yāvē?

¹⁴ Ṙamlōn inrē ayī-ö yēḵ yip prötör sistör nö teūngen tö yip tarik tö hòṅ haköp inlahen ngam Tēv. Vënyu nang in öi in ök Chūökamahati tö ngam la-en inhangkö tölöök inhānga nö sā ṙēngen yip tarik angū-ö hamôlṙenre nö chöh öp tö chatngen nyīö. Ṙòktöre cha-a nö chöhan, ngaich yěn teūngen öp töhěng tak töp nyīö ngaich ṙòkhöre cha-a nö ṙamlōn. Ngatī ṙēngen ngam inlahen hī öi holṙen re vīten tarik nö mahaköp. Ṙòkhöre in öi kalē alaha ahānga in minë kamngöre hēk yěn ōt tarik yihtökūö nö el mīting, ngaich ṙòkhöre ayī-ö ṙamlōn.

FĒKÖ ṘÔKEN NGAM HANANGENLŌNRE TÖ YĀVĒ HĒK TÖ YIP TARIK INRĒ

15. Asūp mihôiṅ inlahen hī yěi hòṅ teūngen tö ṙanamlōnre im la-en inhānga? (Mëtiv 22:37-39) (Ngëichköm lamā uk nyat.)

¹⁵ Asūp mihôiṅ inlahen hī ṙūöhlö ngam nganöötöre hēk ṙanamlōnre im la-en inhānga? Mihôiṅ öi fēkö ngam inlahenre öi hameuktö ngam hanangenlōnre öi in Yāvē hēk tö yip tarik öi löktö in ngam inhānga. (Vë-evkūö Mëtiv 22:37-39.) Yěi fēkö ngam inlahen Yāvē inrē nö ṙanamlōn nö meukö hī öi ahānga, ngaich ṙūöhlöre hēk min ngam kuilōn hī im la-en inhānga. Hēk yěi fēkö inlahen yip tahëng nö teūngen cha-a tö ṙanamlōnre yěn haköp mat ngam Paipöl hēk teūngen inrē mihôiṅ tö ngam nômö tö örheūheu aṅ, ngaich ṙūöhlöre hēk min ngam nganöötö hī im la-en inhānga.—Yôh. 6:40; 1 Tim. 4:16.

16. Yěn ōt lāinyngen meh ötkô meutnyi tö patī re, ngaich sitih inlahen më-eṅ mihôiṅ höng sön ṙamlōn i linökö lōn Yāvē? Kētö inchōḵ elmat.

¹⁶ Ōt hòng chö-öiny meh öm öt meutnyi tö patī re hēk öt kētöre inrē im la-en inhānga? Yěn  ngatī ngaich um haṙivlōn. Fēkö ngam inlahen re më-eṅ öm hameuktö ngam hanangenlōn re tö Yāvē hēk tö më tarik inrē. Töi chumkūöṙen tö ngam inlahen prötör Sēmuěl hēk tö ngam pīhö ò Tanīā. Öt meutnyi cha-a tö patī re kūö ngam COVIT-19, höng löktö el fūn cha-a nö ahānga, kūich chitri hēk löktö el chūm (zoom) inrē nö kē istötī. Ik sā ngam prötör inrē nö lë-en ngam kēnsöör re nö chuh in ngam tòktör, ngaich in e inrē anga-aṅ nö ahangkö ngam tölöök inhānga nö in më tarik. Ngöṙô ngam prötör, “Yěn yih minë kanihngen ai ngaich kiröngen miṙivlōn āyö, laṙāḵ hēk sā tö kalaha inrē ngam ṙinātö-ellōn ai. Yē hī pöri iṙūöhen im linöklōn Yāvē el ṙētak në tö ngatī kanihngen, ngaich mihôiṅ ayī-ö höng ṙamlōn.” Ṙònghöichṙen hē e ngam invah, ik sā sistör Tanīā nö pala-aiṙen, lūöi chumngëṅtö anga-aṅ nöng el ngam chamamre. Ngaich tafūöl chumngëṅtö anga-aṅ nöng el vīl chër. Ngöṙô anga-aṅ, “Öp töng tölngö inlahen chu i linöökö lōn Yāvē, ngaich ngatī inlahen chū-ö. Ngam nörs amahten chu vë-eny nang ò chū-ö tö ngam tölöök inhānga. Yip tarik inrē samömtö samān nö chuh patī ai ngaich vë-ekūö cha chū-ö. Hēk vë-ekūö öp töhěng tak kikānö inrē chū-ö tö la-evṙen nö el ngam mëtiköl kömpönī.” Kūö ngam tö ngatī kanihngen re nā prötör Sēmuěl hēk tö ngam pīhö ò nö öt sā nuk urěh inlahen re nö löklōn Yāvē. Ngam tölngö kanô-òṅ cha pöri ngaich ngatī inlahen cha-a nö löklōn Yāvē hēk teūngen inrē cha-a tö ṙanamlōnre.

17. Asūp mihôiṅ inlahen meh yěm hòṅ teūngen tö yanöölēn re öm löktö in minë tö kētu inchōḵten hī in ngih ātiköl?

¹⁷ Hòṅ asīnken minë tö taneūi ayī-ö inchöngten re in ngih ātiköl. Sā ṙēngen nup masāla nun në inchöngten hī. Yē hī ṙung öi vī söpchī ngaich chaplö nup masāla ṙung ayī-ö, ngaich möl nö kūchik ngam söpchī. Ngatī ṙēngen nun minë inchöngten hī öi hòṅ lök in u, ngaich mihôiṅ min ayī-ö ṙap ngam pinhë-ekūöre hēk teūngen inrē min tö ṙanamlōnre im la-en inhānga.