HA-EHETEN yik Israel nö kētö rūpīö yěn kētö tī re nö tānyö nuk la-en ngam Tēv. Vītöre pöri angū-ö nö lumngan nö in yik Yahūti inuk ṙētak Yēsū.

Hōtu misī yik kikōnyö Yahūti nö kētö tī re nö el töhet chūök i töhěng samyeūheu. Ngam ṙôkhata cha: ròngti i töhěng siköl (nët tāk rupīö). Yūsö minë kahëtö cha rupīö nö inuk la-en el ngam töhet chūök vahīlö Hëròt. Hatöönö Pītör yik Yahūti tö mufē Yēsū i alaha ngam kinëtö tëks (tax). Tīnngen Pītör ngaich ang Yēsū nö kē-ḵ rupīö ngaich hōten ò nö kēten e nö in yik kamëḵ tëks.—Mët. 17:24-27.

Hōtu inrē misī yik tarik ngam Tēv nö kētö töhěng i tösöm. (Lēv. 27:30-32; Kin. 18:26-28) Vīngöre pöri angū-ö nö lumngan tö tī yik Feresī. Hōtu yik tarik nö kētö töhěng i tösöm i ṙòng nuk taneūich re söl in nuk putinā, chirā inrē. Rö-ö ang Yēsū nö vënyen ngam kinëtö töhěng i tösöm nö vaich. Hatanykö yik Feresī pöri anga-aṅ pön vī ngam chööngö cha-a nö langanhu.—Mët. 23:23.

Inuk ṙētak anū-ö, ngam sörköör aṅ Rōm misī mahayöng nö ikui yik Yahūti, lökten cha nö hòṅ kētö tëks ngam sörköör. Yěn ōt misī tö aṅnhav in tö tumlat, ngaich hòṅ kēnyö ṙāi e cha-a. Yēḵ nup taneūch cha öre nö hěngòng kilō ṙòken, ngaich hòṅ 20 hēk 25 kilō ṙòken kahëtö cha nö im sörköör. Ṙòkhöre inrē yik Yahūti nö kö kētö tī re. Angu-ö ngih tëks (tax) kahakkö Yēsū ik sā ò nö ngö ṙô: “Kē-ěkūö Kaisör, tö nup aṅ in Kaisör, kē-ěkūö ngam Tēv, tö nup aṅ in ngam Tēv.”—Mët. 22:15-22.

Kētu ṙāi kinëhöt inrē nuk chehen lamöktö lātunyī hēk chamuh lātunyī töm panam. El talöökö, ikūö inkūp elpanam, hēk el chūök mi-inyih nö kē-ě minë tëks töngatī.

Kihngen yik tarik tökūö ṙôken minë tëks havëkö ngam sörköör aṅ Rōm. Sā ṙô Tesitös ök històrīön aṅ Rōm nö vë-eny inlahen yik tarik inuk sakamö Racha Tipērias, ṙòmöng ing panam ang Yēsū hē e, “Kahòklö kui re yik aṅ Siriā tö yik aṅ Yūta, nö tölṙô inkūönngö ṙôken nuk tëks kahëtö cha.”

Kihngen misī yik tarik yěn hòṅ kētö tëks re pön öt löngö inlahen yik kamë tëks. Chöh yik tarik ngam sörköör nö mahamūl tax yik töpōyen tī tö pròfit re min. Ngatī ṙēngen ök Sakkīös ök mākūö mahamūl ṙāi kinëhöt chehen. (Lūk. 19:1, 2) Lökten yik tarik nö öt hāngenlōn tö yik kamë tëks, pön akahakūö tö cha nöng mahamūl kanòlô re.